Inalarma ng Metropolitan Manila Development Authority (MMDA) ang mga mananakay at motorista patungong eastern Metro Manila at Rizal na asahan ang matinding trapik  sa Marcos Highway dahil sa construction ng Light Rail Transit 2 Extension Project-Package 2 na sisimulan na ngayong buwan.

Sa abiso ng MMDA, magpapatupad sila ng traffic management plan sa loob ng isang taon habang ginagawa ang mga bagong istasyon ng LRT sa (Emerald station) na matatagpuan sa harapan ng  Robinsons Metro East at  Santa Lucia  sa  Cainta, Rizal at  Masinag Station na matatagpuan naman sa  Masinag Junction sa  Antipolo City.

Nabatid,  na  dalawang  lanes sa Marcos Highway,  east at southbound, mula  Cornel Hospital  hanggang   SM City Masinag ay isasara sa mga motorista simula ngayon Hunyo 1, 2017  hanggang Hulyo 13, 2018  para bigyan daan ang konstruksiyon  ng Emerald Station.

Payo ng MMDA sa mga motorista gumamit na lamang ng mga alternatibong ruta upang hindi maapektuhan sa mabagal na daloy ng trapiko.

Bilang alternatibong ruta,  ang  mga behikulong mula Sumulong Highway hanggang  Marcos Highway intersection,  patungong  Cubao at  C5 Road ay maaring dumaan sa  Sumulong Highway,   A. Bonifacio Avenue  patungong  Aurora Boulevard,  via Ortigas Avenue.

Yung mga sasakyan namang mula Cubao o  C5 Road patungong   Antipolo City ay maaring dumaan sa  A. Bonifacio hanggang  Sumulong Highway.

NI: MIKE ALMONTE – Pinas Global Newspaper