Ni: Louie C. Montemar
AN ounce of prevention is better than a pound of cure, wika nga sa Ingles. Kailangang maging maagap tayo sa pagharap sa mga banta sa kalagayan ng ating bansa. Ito ang isang bagay na dapat isipin ngayon ng ating mga pinuno sa sektor ng enerhiya.
Dahil sa lumalaking ekonomiya ng bansa at lalong umiinit na panahon, higit pang lumalaki ang pagkonsumo natin sa kuryente. Malaking hamon ngayon sa pamahalaan ang mapanatili ang ating kapasidad sa produksyon ng elektrisidad.
Nakababahala ang nabalitaang may anim na beses na palang nagka-yellow alert sa sektor ng enerhiya sa bansa nitong buwan lamang ng Setyembre. Ibig sabihin, malapit nang kapusin ang ating suplay ng kuryente. Mula nang magsimula ang taon, may tatlong beses naman na nagkaroon ng red alert at nagkaroon ng brown-out dahil sa kakulangan ng suplay ng kuryente.
Ito ay ayon sa pahayag ng pinagsanib na pulong ng Komite ng Konggreso sa Enerhiya at Good Government and Public Accountability.
Maganda namang pansinin ang tila patuloy na paglaki ng ating ekonomiya, subalit paano natin mapapabilis pa at mapalaki ang produksiyon sa ating bansa kung hindi matutugunan ang batayang pangangailangan sa enerhiya?
Dapat pa ngang pansinin na napakamahal ang presyo ng ating kuryente o enerhiya kung ikukumpara ito sa ibang bansa. Isa ang Pilipinas sa may pinakamahal na elekrisidad sa bahaging ito ng Asya. Sa katotohanan, isa ito sa mga dahilan kung bakit hindi naeenganyo ang ilang mamumuhunan na magnegosyo sa Pilipinas.
Sa harap ng hamong ito, kailangan nating manawagan sa Energy Regulatory Commission (ERC) upang maging higit pang maagap at masinop sa gawaing nito. Ayon sa Konggreso, may mga nakabinbing aplikasyon para sa Power Supply Agreements (PSAs) ang Manila Electric Company. May di bababa sa pitong PSAs na ang dapat desisyunan ng ERC.
Ibig sabihin, nakaumang na ang mga proyekto para sana sa produksiyon ng dagdag na enerhiya subalit naiipit ang mga ito sa proseso ng pag-aaral at pag-apruba ng ERC.
Gaya ng nasabi na, kailangang maging maagap tayo sa pagharap sa mga banta sa kalagayan ng ating bansa. Kung hindi, mas lalo pang lalala ang sitwasyon. Kapag dumalas pa at lumawak ang brownouts, masama ang epekto nito sa produksiyon, kalusugan, at pangkalahatang lagay ng ating mga mamamayan. Baka gawin pang dahilan ang nakaambang kakapusan sa kuryente sa pagtataas ng presyo ng mga bilihan.
Mabilis na aksiyon ng ERC ang kailangan sa kagyat. Sa pangmatagalan, kailangan nating payabungin pa ang programang pang-enerhiya ng bansa bilang mahalagang tuntungan ng sustenidong kaunlaran.