Ni: Vick Aquino Tanes

ANG panlalagas ng buhok ang pinakama-laking problema na maaaring mangyari kapag ang buhok ay nirebond na hindi maingat ang humawak. May mga simpleng paraan na maaaring makatulong upang mapanumbalik ang dating sigla ng buhok matapos manlagas pagkatapos ng ibat-ibang pampaarte ng buhok.

Bagama’t hindi sa lahat ng pagkakataon ay magiging epektibo ng mga sumusunod, maaari rin itong subukan:

Paglalagay ng “aloe egg mask” sa buhok

Ito ay pinaghalong puti ng itlog (hindi luto) at aloe vera. Ang dami ng itlog ay depende sa haba ng buhok. Ihiwalay ang pula (yolk) at gamitin lamang ang puti ng itlog. Sa aloe vera naman ay kailangang kunin ang gel o katas nito. Paghaluin ang nakuhang puti ng itlog at katas ng aloe vera. Ipahid sa buhok  ang mixture at hayaan ng 20-30 minuto na nakababad dito ang ulo. Pagkatapos ay banlawan ng malinis na tubig ang buhok. Gawin ito 2-3 beses sa isang linggo. Subukang gawin sa loob ng dalawang buwan o hanggang may makita nang magandang resulta sa buhok.

Gumamit ng mild shampoo at conditioner

Basahin ang label ng binibiling produkto para sa buhok. Mayroon kasing mga shampoo na hindi naaayon sa klase ng buhok.

Bigyan ng masahe anit gamit ang essential oils. Maaaring pagpilian ang virgin coconut oil at olive oil. Alinman dito ay maganda para sa buhok. Gawin ang pagmamasahe sa ulo tatlong beses sa isang linggo. Ito ay para mapanumbalik ang natural na kalagayan ng anit at para maging makapit ang buhok at patuloy na masuportahan ang paghaba nito.

Kumain ng maberdeng gulay at mga pagkaing mayaman sa bitamina at protina

Ang pagkain ng masustansya ay tumutulong upang maging maganda ang daloy ng dugo sa katawan, gayundin sa anit. Kapag dumadaloy ng maayos ang dugo sa anit, madaling maka-karecover ang buhok na napinsala.

Bawasan ang paggamit ng mga hair styling equipment

Kung minsan akala ng iba ay makabubuti ang gumamit ng hair dryer o hair straightener sa nasirang buhok. Ang hindi alam ng marami ay mas lalo lamang nitong dinaragdagan ang damage sa buhok at mas pinalalala ang panlalagas. Kaya hangga’t maaari ay iwasan ang paggamit ng mga ito kapag maraming buhok ang nalalagas.

Uminom ng dalawang litro ng tubig araw-araw

Ang simpleng pag-inom ng tubig ay may kagalingang dulot sa buhok. Magiging mas madali ang pagtubo, magi-ging malusog at makintab ang buhok kapag ang katawan ay di kinukulang sa tubig.