Ni: Eyesha Endar

MALAKI ang kumpetisyon sa larangan ng negosyo sa panahon ngayon. Kaya hindi maiiwasan na minsan ay madadaya ka sa mura at magandang anyo ng isang bilihin dahil sa mga gimik na ginagawa ng isang negosyante. Upang maiwasan ang mabiktima ng mga walang kalidad na bilihin at hindi masayang ang pera mo ay narito ang dapat mong isaalang-alang.

1. MAGING MAPANURI

Dapat maging ‘wais’ ka sa pagbili ng isang produkto. Suriin ang lahat ng bahagi nito kung ito ba ay walang depekto at kung makatwiran ang presyo nito. Tingnan mabuti ang mga sangkap, presyo, timbang, at expiration date ng produkto at ihambing ito sa iba pa upang malaman ang kapakinabangang makukuha.

2. HUWAG MAGPALINLANG SA MGA ANUNSYO NG MGA SIKAT NA TAO

Ang kalidad ng produkto ang isinaalang-alang at hindi ang pag-aanunsiyo ng produkto, kung saan kilalang tao ang ginagamit sa pag-eendorso. Dapat mong tandaan na hindi ito basehan bagkus ang produkto mismo ang dapat mong siyasatin.

3. HUWAG MAGPABIKTIMA SA MGA MANDARAYA

Laganap sa panahon ngayon ang panglalamang sa mamimili sanhi ng sobrang hirap at gipit sa buhay. Lagi mong pakatandaan na kadalasang nangyayari ito sa sukli, timbangan, at kalidad ng produkto. Ang matalinong konsyumer ay laging alerto, mapagmasid, aktibo, at handa na labanan ang mga maling gawain ng mga tindero at negosyante.

4. MAKATWIRANG PRESYO

Hindi pinupulot ang pera sa daan bagkus ang isang matalinong konsyumer ay sinisiguradong kapaki-pakinabang ang mga binibili nitong mga produkto. Masusing tinitingnan ang kalidad at presyo ng bawat produkto dahil sa limitado ang badyet nito sa pamimili.

5. DAPAT NA MAGKAROON NG ALTERNATIBO

 Ang kakulangan ng suplay ng produkto ay nararanasan sa pamilihan, kaya minsan, ang dating binibiling produkto ay hindi na mabibili. Minsan, ang kita ng tao ay di-sapat para bilhin ang isang produkto. Sa ganitong sitwasyon, ang konsyumer ay kailangang marunong humanap ng alternatibong produkto na makatutugon din sa pangangailangan. Halimbawa, kung ang dating binibili na isda ay kulang ang suplay sa pamilihan, hahanap ito ng kapalit.

6. HUWAG SIRAIN NAG BUDGET

 Alamin kung nasaan ang mga tindahan na may midnight sale, buy one-take one promo, at mga give away na produkto dahil ang ganitong sitwasyon ay makatutulong sa kanilang budget. Hangga’t maari ay iwasan ang mangutang para pantustos sa pamimili.

7. HUWAG MAG-PANIC BUYING

 Ang may malawak na kaalaman sa pamimili ay hindi nababagabag sa artipisyal na kakulangan ng mga produkto sa pamilihan. Isiping mabuti na ang ganitong kalagayan ay pansamantala lamang na nangyayari.