Ni: Louie Montemar
Hindi matatawaran ang maayos na pagganap ng mga piling mambabatas para sa kapakanan ng bayan. Dahil dito, nais bigyang-pansin ng BK3 ang isang panukalang-batas mula sa tanggapan ni Sen. Erwin Gatchalian na maaaring magpagaan ng tunay sa pasanin nating mga konsyumer hinggil sa presyo ng kuryente sa bansa. Ito ang Senate Bill 1950 (SB 1950) o ang “Murang Kuryente Bill.” Kailangan ng kaunting paliwanag upang makita natin ang halaga ng panukalang ito.
Ang proyektong Malampaya (o Malampaya Deepwater Gas-to-Power project) ang unang pagtatangka sa bansa upang makakuha ng natural gas mula sa lupa sa ilalim ng dagat. Nadiskubre ang natural gas source na ito noong mga huling taon ng 1990s at binuksan noong 2001 ang planta ng kuryente. Sa ngayon, pinapatakbo nito ang tatlong gas-fired power stations na may kabuuang kapasidad na 2,700 megawatts. Katumbas nito ang 30% ng kuryenteng kailangan ng Luzon.
Noong 2002, nagsimula nang kumita ang “Malampaya.” Napupunta ang kita sa gobyerno at dapat na gamitin para sa pagpapaunlad ng mapagkukunan ng enerhiya at mga programa sa eksplorasyon. Ayon sa Presidential Decree No. 910 ni Pangulong Marcos, ang kita mula sa mga proyektong pang-enerhiya ay dapat na maging bahagi ng isang espesyal na pondo upang tustusan ang iba pang mga proyekto ng pamahalaan sa enerhiya. Pinahihintulutan din nito ang paggamit ng pondo para sa iba pang mga proyekto na inaprubahan ng Pangulo, kahit walang kapahintulutan ng Konggreso. Dito umusbong ang usapin sa paggamit ng tinatawag na “Malampaya fund.” Halimbawa na lamang, daan-daang-milyon ng pondo ang sangkot sa kaso ni Janet Napoles at ilang mga politiko.
Dito papasok ang halaga ng Murang Kuryente Bill na inaprubahan na sa ikatlong pagbasa sa Senado. Kung maisasabatas ang Murang Kuryente Bill, titiyakin nito na gagamitin ang bahagi ng pondo para sa pagpapababa ng presyo ng kuryente sa bansa. Sa partikular, pahihintulutan nitong magamit ang ₱ 207-bilyon mula sa Malampaya Fund upang bayaran ang mga natitirang gastos sa kontrata at ang utang ng National Power Corporation (Napocor).
Ayon kay Sen. Gatchalian, ang panukalang batas ay makatutulong sa pagpapababa ng presyo ng kuryente. Para sa isang household na gumagamit ng 200 kilowatt hours bawat buwan, aabot sa PhP 2,033.76 kada taon ang matitipid—halos isang sako na ng bigas ito! Samakatuwid, talagang kailangan ng isang batas para magamit ang Malampaya sa interes ng publiko. Suportahan natin ang Murang Kuryente Bill. Ang kapakanan nating mga konsyumer ang tinitiyak ng panukalang ito. #