Ni Arjay Adan

NAKATAKDANG bumisita si People’s Champ at Senator Manny Pacquiao sa mga nasalanta ng matinding pagbaha sa Marikina City at iba pang mababang lugar sa Probinsya ng Rizal.

Ito ay ayon mismo sa top aide nitong si Jayke Joson na nakatira rin sa bahagi ng Marikina na nasalanta ng matinding pagbaha dulot ng bagyong Ulysses.

Ani Joson, tinawagan siya mismo ng people’s champ upang itanong kung ano na ang kondisyon ng mga residente sa lugar at sinabing nanghihingi ang mga ito ng pagkain dahil sa tinangay ang mga pag-aari nito ng baha.

Aniya, paraan ito ng pagtulong ng senador dahil sa alam nitong hindi lang pagod ang mga tao kundi gutom na rin ang mga ito.

Sa ngayon ay wala pang kumpirmadong skedyul kung kailan pupuntahan ni Pacquiao ang mga nasabing lugar.

Ni Karen David

MALAKING hamon ang pagsasagawa ng COVID-19 testing sa mga displaced families bunsod ng magkakasunod na bagyong tumama sa bansa.

Ito ang naging pahayag ni NDRRMC Chairperson at Defense Secretary Delfin Lorenzana sa sidelines sa events sa Philippine Navy.

Sa halip, ipinanukala na lamang ni Lorenzana ang mahigpit na monitoring sa mga displaced individual na nagpapakita ng mga sintomas ng coronavirus sa mga evacuation center.

Sa ngayon, sinabi ni Lorenzana na wala pang report ng COVID-19 outbreaks sa mga evacuation center.

Una nang nanawagan ang OCTA Research Team sa mga local government units na magbigay ng adequate at accessible testing, effective contact tracing at supportive isolation facilities sa mga pamilya sa evacuation center upang mapigilan ang pagkakahawaan ng COVID-19.

Ni Arjay Adan

PUMALO na sa 2.53 bilyong piso ang pinsala at nawala sa sektor ng agrikultura dahil sa Bagyong Ulysses.

Ayon sa Department of Agriculture (DA), nasa 73,181 na magsasaka at mangingisda at 71,466 ektarya ng agricultural areas ang apektado ng bagyo.

Nasa 109,117 metric tons naman ang volume ng production loss.

Kabilang sa mga apektadong commodities ay mga palay, mais, high value crops, fisheries, live stocks at poultry, irrigation facilities, machineries and equipment at agricultural infrastructures.

Naitala ang mga pinsala sa Cordillera Administrative Region, Ilocos Region, Cagayan Valley, Central Luzon, Calabarzon at Bicol Region.