Ni Vic Tahud

POSIBLENG tumaas ang kaso ng COVID-19 sa mga lugar na sinasalanta ng bagyo kung hindi magiging maingat ang local government unit sa pagpapatupad ng mga health protocol sa mga evacuation center.

Ito ang inihayag ni Prof. Ranjit Rye ng UP OCTA Research sa panayam ng Sonshine Radio.

“Kapag nasa evacuation center talaga ‘yong mga tao ng matagal ng isang linggo o dalawa ay malaki ‘yong tsansa po, at hindi napa-practice ‘yong testing, tracing and isolation, wala masyadong social distancing, walang universal wearing of mask, may posibilidad po na magkaroon ng uptick ng COVID-19 do’n sa mga lugar na nasalanta ng bagyo,” ani Prof. Ranjit Rye.

Ayon naman kay Prof. Rye, bagama’t may posibilidad na magkaroon ng hawaan ng COVID-19 sa mga evacuation center naka-depende pa rin ito sa bilang ng dami ng kaso ng COVID-19 sa probinsyang sinalanta ng bagyo.

Payo naman ni Prof. Rye na dapat sumunod sa mga health protocol na ipatutupad sa mga evacuation center upang maiwasan ang hawaan ng COVID-19.

Sa ngayon, binanggit ni Prof. Rye na sa mga lugar ng Cagayan at Isabela, mayroon ng recorded community transmission kung kaya’t mas kailangan ng ibayong pag-iingat sa mga evacuation center.

Ni Vhal Divinagracia

AABOT sa 11 billion pesos ang kabuoang danyos sa sektor ng agrikultura.

Sa panayam ng Sonshine Radio kay Department of Agriculture o DA Secretary William Dar, danyos ito mula sa apat na malalaking Bagyong Pepito, Quinta, Rolly at Ulysses.

Sa kabila nito, masaya namang ibinahagi ni Sec. Dar na may 32 billion pesos naman na halaga ng mga pananim ang naisalba bago pa nanalasa ang mga bagyong ito.

Samantala, suportado naman ni Sec. Dar ang rekomendasyon ng NDRRMC na isailalim sa state of calamity ang Luzon.

Ni Karen David

TUTOL ang Commission on Higher Education (CHED) sa panawagan na nationwide at Luzon-wide academic break.

Lumabas ang panawagan na academic freeze matapos ang magkakasunod na bagyo na tumama sa bansa noong nakaraang mga linggo na nakaapekto sa pag-access ng mga estudyante sa edukasyon bunsod ng pagkawala ng kuryente, internet connection at pagkasira ng maraming bahay at ari-arian.

Ayon kay CHED Chairperson Prospero de Vera, magkakaiba ang epekto sa iba’t ibang paaralan at pamilya ng kalamidad.

Kaya nasa colleges at unibersidad na aniya ang desisyon sa pagpapatupad ng academic breaks o suspensyon ng klase.

Sinabi rin ni De Vera na hindi magandang polisiya ang ‘unilateral suspension” dahil hindi aniya sila maaring magsagawa ng unilateral decision na hindi nakabase sa kung ano ang nangyayari sa ground.