Ni Paula A. Canua

HUWAG nang mainip kung mabagal ang paghaba ng iyong buhok dahil may magagawa ka para sa long hair dream mo.

Ang ating buhok ay may tatlong phases, anagen kung saan tumutubo ang buhok. Catagen o mabagal na paghaba at telogen o ang pagtigil at kadalasang hairfall stage ng buhok.

 

Mahaba, matibay at malusog na buhok, narito ang mga tips:

 

• Kumain ng mga pagkaing mayaman sa protina gaya ng manok, itlog, greek yogart. Ang hairfall ay kadalasang senyales ng kakulangan sa protina ang katawan.

 

• Pataasin ang iron at zinc intake. Ang spinach, beans at seafoods ay mayaman sa zinc, may kakayahan itong patibayin ang inyong buhok upang makaiwas sa split ends at breakage ng hibla.

 

• Pagkain ng mayaman sa biotin gaya ng itlog, keso, mushrooms, almonds at cauliflower, ito ay nagbibigay sigla at moisture sa buhok. Mainam din ang mga pagkaing mayaman sa B vitamins gaya ng isda, karne, dairy products, madadahon na pagkain, cereals peas at beans, na nagbibigay ng kintab at buhay sa ating buhok.

 

• I-trim ang buhok, mukha mang kabaligtaran, ang pagtrim ng dulo ng buhok ay nakakatulong para mawala ang split ends na nagiging dahilan ng pagkakabuhul-buhol ng hibla ng buhok.

 

• Gumamit ng telang silk bilang pillow case. Ang friction sa inyong buhok at cotton na punda ay nagiging dahilan kung bakit paggising ninyo ay maraming hairfall sa inyong higaan.

 

• Iwasan na ibalot ang buhok sa tuwalya, nagdadahilan din ito ng matinding friction sa buhok. Maingat na pigain na lamang ang buhok gamit ang kamay.

 

• Iwasang mag-shampoo araw-araw. Nawawala ang natural oils ng buhok kaya ito madaling magdry at bumuhaghag. Sa halip tiyakin na araw-araw na magconditioner, magshampoo lamang kada isang araw na liban.

 

• Iwasan ang paggamit ng hot water sa anit, tinatanggal nito ang natural oils at dahilan din ng pagkapanot. Samantalang ang cold water ay pinapanatiling tight ang hair follicles kaya naiiwasan ang hairfall.

 

• Gamit ang dulo ng mga daliri, imasahe ang anit, gawin ito sa paikot na mosyon. Mainam na gawin ito bago matulog at kapag tuyo ang buhok.

 

• Hindi dapat basta mapahaba dapat mapanatili ang tibay at lusog ng buhok

 

• Gumamit ng suklay na malaki ang pagitan upang maiwasan ang hairfall.

 

 

 

Ni Kristine Joy Labadan

ITO ang kadalasang gamot sa mga bagay na ating dinaramdam: mahalin muna ang iyong sarili. Bagamat maraming depinisyon ang pwedeng ibigay, heto ang ilan sa mga kahulugan na maaaring magpauunawa sa lahat kung ano nga ba talaga ito:

1. Lakas ng loob upang patawarin ang sarili.

Ibig sabihi’y dapat nating kinikilala ang ating kamalian ngunit hindi magiging rason ng pagkagalit sa ating sarili. Unawain na ang hindi pagpapatawad sa sarili ay ang pinakamalupit na kritisismo at walang sinuman ang mamahalin ka hangga’t hindi mo napapatawad ang sarili sa mga pagkakamali. Yakapin ang sarili at ang iyong mga kakulangan, ito’ng nagpapaganda at nagbibigay interes sa mundo.

2. Hindi ang iyong bigat, kulay ng buhok, o porma ang nakakabawas ng iyong kagandahan.

Hindi lamang isang paraan mayroon upang maging maganda, at ang pagmamahal sa sarili’y ang pagtatanto na ang iyong kagandahan sa kung ano ito at hindi sa kontektso nang kung paano mo ikukumpara ang sarili sa iba.

3. Kalayaan na gawin ang gusto mo o ituloy ang buhay ayon sa inaasahan ng iba.

Ang mahalin ang sarili’y nangangahulugang pagkabatid sa kung ano ang nagpapasaya sa’yong kaluluwa at ang gawin yun nang mas madalas. Hindi para sa kung magkano ang kikitain mo, hindi sa kung sino ang huhusga sa’yo, hindi sa kung ikaw’y magtatagumpay talaga dito. Kailangan mo ang maging matagumpay sa kaalamang ginagawa mo ang pinakagusto mong gawin.

4. Hindi lahat ay mamahalin ka’t di kailangang mahalin ka ng lahat.

Kung totoo ka sa’yong sarili at may problema roon ang iba, yun ay kanilang problema at hindi na sa’yo.

Ang pagmamahal sa sarili’y ang pagkakabatid na hindi mo maaaring makuha ang pagmamahal, papuri, at pagtanggap ng lahat ng iyong nakakasalamuha. Gayunman, hindi nito sinasalamin ang kung sino ka man.

5. Pag-unawa na kailangang mahalin muna ang sarili bago ka mahalin ng iba

Ang relasyon na puno ng pag-aalinlangan, inggit, pagdududa atbp. ay tiyak ang pagpalpak. Paano iisipin ng iba na karapat-dapat kang mahalin kung hindi mo ito naipapadama sa sarili? Kailangang maramdaman mo sa sarili na karapat-dapat ka sa pagmamahal at iyon ay magmumula sa’yo mismo.

 

Ni Crysalie Ann Montalbo

NALALAGAS ang ating buhok bawat oras. Marahil ay umaabot ng 100 hibla ang nalalaglag sa atin araw-araw. Subalit sa mga kalalakihan, mas marami ang mas nakakaranas ng paglalagas ng buhok na sa kalaunan ay hindi na tumutubo ulit.

Isa ang buhok sa pinakaiingatan ng mga kalalakihan dahil nagbibigay ito ng seguridad sa kanilang pisikal na anyo. Kaya’t marami ang nababahala sa ganitong klase ng sitwasyon.

Ano nga ba ang dahilan kung bakit unti-unting nakakalbo ang isang lalaki? Narito ang ilang mga kasagutan.

1. Genes. Malaki ang epekto ng genes na minana mula sa ating mga magulang. Kung nakararanas ang isa sa iyong magulang ng mabilis na paglagas ng buhok, posibleng nasa lahi na ito ng inyong pamilya.

 

2. Pagkakaroon ng sakit tulad ng anemia o problema sa thyroid. Isa sa mga nangungunang sintomas ng mga sakit na ito ay ang pagkalagas ng buhok.

 

3. Chemotheraphy. May init na dala ang radiation sa chemotheraphy na nagiging sanhi ng paglagas ng buhok.

 

4. Stress. Ang stress ay nagdudulot ng sakit na tinatawag na alopecia arata, isang uri ng kondisyon na nakasisira ng buhok.

 

5. Malnutrisyon. Ang hindi pagkain sa tamang oras o kakulangan sa bitamina, protina at mineral ay nagiging sanhi ng unti-unting pagkakalaglag ng buhok.

 

6. Medikasyon. Ang sobrang pagkonsumo sa bitamina A at bitamina D ay nakapagdudulot ng hindi magandang epekto sa iyong buhok kaya dapat lamang itong balansehin.

Upang mapanatiling makapal at maganda ang iyong buhok, ugaliing sumunod sa mga mabuting gawiin.

Iwasan ang stress at manatiling positibo sa araw-araw. Kumain ng mga pagkaing tutulong sa paglago ng buhok. Tapatan ng ehersisyo at maagang pagtulog.

Pinapayuhan din na magpatingin sa doktor kung sakaling hindi na mapigilan ang mabilis na pagkalagas ng buhok.

 

 

 

Ni Eugene Flores

 

DAHIL sa mga naglalabasang mga pagkain ngayon sa merkado tulad ng processed foods, canned goods at iba pa, nalilihis ang tuon natin sa pagkain sapagkat mas mabilis ihanda sa hapag-kainan ang mga ito.

 

Tayo’y nasa mababang paaralan pa lamang itinuturo na sa atin ang kahalagahan sa kalusugan ng gulay at prutas ngunit sa ngayon tila mas nahuhumaling ang mga kabataan sa lasa ng mga ready-to-eat food o processed food.

 

Halina’t ating balikan ang ilan sa mga benepisyo ng gulay at prutas at ang resulta ng hindi pagkain nito.

 

Malaki ang ambag ng gulay at prutas sa ating diyeta. Nagsusuplay ito ng phytochemicals at fiber na tumutulong sa paglilinis ng ating internal organs. Mababa rin ang calorie content ng mga gulay at malaki ang tulong sa pagpigil sa pagtaba.

 

Nababawasan din ang posibilidad ng pagkakasakit sa puso, high blood pressure at mga sanhi ng cancer.

 

Hindi maikakaila ang tulong nito sa ating katawan ngunit dahil ang ilan sa mga ito ay hindi pasok sa ating panlasa, pinipili na lang natin ang hindi pagkain ng mga ito.

 

At ang maaaring maging resulta nito ay nutrient deficiencies, mawawalan ng suplay ng bitamina B at C ang ating katawan na kadalasang nanggagaling sa mga gulay at prutas.

 

Magiging mahirap din ang ating pagtunaw ng mga kinakain dahil kailangan ang fiber sa ating digestive system na dulot ng gulay at prutas.

 

Ganon din ay ang pagkakaroon ng mga sakit na maaring humantong sa kanser.

 

Bagama’t may mga lumalabas na alternatibong food supplement para rito hindi pa rin masisiguro kung mapapantayan ng mga ito ang lahat ng benepisyo mula sa pagkain ng prutas at gulay.

 

Ni Crysalie Ann Montalbo

ANG mata ay isa sa mga bahagi ng katawan na ating pinaka-iingatan. Nagsisilbi itong gabay upang matunghayan ang mga bagay na hindi pa natin natutuklasan. Kung wala ito, mananatiling madilim ang ating pananaw sa mundong ginagalawan.

Paano nga ba mapapangalagaan ang ating mga mata at maiiwas ito sa anumang kapahamakan?

1. Kumain ng mga pagkaing makapagpapabuti sa lagay ng iyong mata. Ang pangunahin dito ang ang sapat at masustansiyang pagkain. Nakakatulong ang lutein, omega-3 fatty acid, zinc, vitamin A, C at E sa pagpapabuti ng kondisyon ng ating paningin. Ilan sa mga halimbawa ng mga pagkaing mayaman sa mga ito ay ang mga sumusunod: mga berdeng gulay, salmon, tuna at iba pang isda, itlog, beans, mani, orange, ponkan at iba bang citrus fruits.

 

2. Magsuot ng sunglasses. Sa ating bansa, matirik ang araw kaya’t malaking bagay ang pagsusuot ng sunglasses nang sa gayon ay maprotektahan ang iyong mata sa ultraviolet rays na nagmumula sa araw. Kapag nasobrahan ang iyong mata sa ultraviolet rays, posible kang magkaroon ng katarata na maaaring humantong sa pagkabulag.

 

3. Gumamit ng proteksyon sa mata. Kung ikaw ay nasa isang trabahong malaki ang posibilidad na matamaan ang bahagi ng iyong mukha, huwag mag-atubiling gumamit ng protective goggles.

 

4. Iwasan ang pagbababad sa kompyuter at telebisyon. Ang sobrang pagtutok sa mga ito ay maaaring magdulot ng masamang epekto sa iyong mata tulad ng paglabo ng paningin, pagkapagod, panunuyo at pananakit ng iyong mga mata.

 

5. Huwag mag-atubiling bumisita sa iyong doktor. Ang regular na pagpapatingin ay hindi dapat kalimutan. Alamin ang iyong kasalukuyang kondisyon upang mas maagapan agad bago pa lumala ang sakit.
6. Iwasang gumamit ng cellphone nang nakapatay ang ilaw. Pwede itong magdulot ng pansamantalang pagkabulag.

 

Ni Crysalie Ann Montalbo

ISA ang mani sa mga pagkaing nagbibigay ng malaking benepisyo sa ating katawan. Ayon sa mga pag-aaral na isinagawa, ito’y mayaman sa bitamina B at E, at mineral tulad ng iron, zinc, potassium, magnesium at iba pa na siyang kailangan sa ating pang-araw-araw na buhay. Subalit paano nga ba kapag nasobrahan sa pagkain nito? Narito ang ilang mga maaaring mangyari kapag ikaw ay naparami sa pagkain ng mani.

1. Pagdagdag ng timbang. Ang mani ay nababalutan ng fats at ito ay katumbas ng mataas na calories kung kaya’t ito ay nagbibigay ng karagdagang timbang sa iyong katawan.

 

2. High blood. Madalas ay inihahain ang mani na may halong asin. Nakakadagdag man ito sa panlasa, ito ay maaari ring magdulot ng high blood kaya iminumungkahi ang pagbawas nito.

 

 

3. Problema sa digestion. Ang sobrang pagkonsumo ng mani ay delikado at malaki ang posibilidad na magkapagbigay ito ng suliranin sa iyong digestion tulad ng pagkakaroon ng diarrhea.

 

Lahat ng sobra ay masama ika nga. Sa kabila ng mga benepisyong naidudulot ng mani, kailangan lagi pa ring tatandaan ang mga limitasyon upang hindi masobrahan sa pagkain nito.