Ni Vic Tahud

 

 

NAKABAWAS ng 40% ng hawaan ng COVID-19 ang vaccination ayon sa World Health Organization (WHO).

 

Ayon kay World Health Organization’s Director-General Tedros Adhanom Ghebreyesus, marami sa mga vaccinated na mga tao ang nag-iisip na ‘di na nila kailangang mag-ingat.

 

Ani Tedros, dapat pa ring mag-ingat ng mga taong nabakunahan na at sumunod sa mga patakaran.

 

Dagdag pa nito, maaaring makapag-ligtas ng buhay ang bakuna ngunit hindi nito tuluyang makapipigil sa hawaan ng COVID-19.

 

Base sa datos, noong wala pang Delta variant, aabot sa 60% na nakababawas ng hawaan ang vaccination ngunit ngayong nasa 40% na lamang.

 

Ni Ruby Ann Supangan

 

NAGPAPAALALA ang Germany health minister sa kanilang mamamayan na magpaturok na ng bakuna kontra COVID-19.

 

Ito ay sa gitna ng pagtaas ng covid case sa Germany kung saan nakapagtala sila ng mahigit tatlong libo sa loob lamang ng isang araw.

Sinabi ng health minister na ito na ang pinakamataas na COVID-19 infection rate sa loob lamang ng isang araw simula nang tumama ang pandemya.

 

Dahil dito, nagbabala ang mga health experts na maaaring tataas pa ito kung hindi mag-ingat ang mga tao doon.

 

Sa ngayon ay nasa 4th wave na ng COVID-19 ang Germany matapo bumilis ang hawaan ng virus at puno na rin ang kanilang mga pagamutan.

 

Ayon kay German Health Minister Jens Spahn, dapat bago matapos ang winter season ay dapat  bakunado na ang lahat.

 

Dagdag pa ni Spahn, hindi magiging sapilitan ang pagbabakuna sa mga Germans ngunit aniya ito ay isang obligasyon dahil kung hindi, ay marami pa ang maaaring maapektuhan.

 

Samantala, mas paiigtingin pa ang paghihigpit sa mga taong unvaccinated sa matataong lugar.

 

 

 

Ni Chaddy Castro

 

NAGPOSITIBO sa coronavirus disease kamakailan ang apat na leon sa Singapore Wildlife Park matapos itong mahawaan ng tatlong zookeeper nitong kumpirmado sa sakit.

 

Ayon sa operator ng park na si Sonja Luz, ang mga Asiatic lion ay nakitaan ng mga sintomas kabilang ang pag-ubo at pagbahing na nag-udyok sa mga opisyal upang ipasuri ang mga ito.

 

Sa ngayon, ang mga nahawaang wild cat kasama ang limang iba pa sa Night Safari Park ay inilagay sa kanilang kulungan.

 

Gayunpaman, ani Luz, inaasahan ang ganap na paggaling ng mga leon na may minor supportive treatment.

 

Sa kabilang dako naman, naiulat kamakailan sa isang U.S Zoo na ang mga hayop gaya ng mga leon, tigre at gorilya, maging ang mga pusa at aso dito ay nagpositibo rin sa virus,

 

Samantala, ang Singapore ay kasalukuyang nahaharap sa pinakamasama nitong pagsiklab ng COVID-19 mula nang magsimula ang pandemya.

 

 

Ni Kriztell Austria

 

INANUNSYO ni Ethiopia attorney General Gedion Timothewos ang state of emergency sa bansa matapos sakupin ng mga rebelde ang Northern Tigray Region.

 

Ang naturang hakbang ay isinagawa dalawang araw matapos himukin ni Prime Minister Abiy Ahmed ang mga mamamayan na protektahan ang kanilang mga sarili laban sa Tigray People’s Liberation Front (TPLF).

 

Kaugnay nito, hawak na ng mga rebelde ang mga lugar na Dessie at Kombolcha, kung saan ang mga lugar na ito ang ilan mga mga main route papunta sa kapital ng bansa.

 

Samantala, batay naman sa bagong security alert, hinimok ng US Embassy sa bansa ang lahat ng us citizens na umalis na sa bansa.

 

Matatandaang huling isinailalim sa state of emergency ang Ethiopia sa loob ng anim na buwan noong Pebrero 2018.

 

 

Ni Chaddy  Castro

 

TATAWAGIN na ngayong “Meta” ang Facebook ayon sa pahayag ng kompanya nito kamakailan.

 

Sinabi ng CEO na si Mark Zuckerberg na sa halip na social media services, ang bagong pangalan na ito sumasalamin aniya sa mga ambisyon nito na bumuo ng metaverse.

 

Ang metaverse ay isang terminolohiyang nagmula sa isang dystopian novel na tumutukoy sa ideya ng isang shared virtual environment na maaaring ma-access ng mga taong gumagamit ng iba’t ibang bagay o device.

 

Naglabas din ito ng bagong sign sa punong tanggapan nito sa California, na pinapalitan ang thumbs-up logo na “like” sa asul na infinity shape.

 

Samantala, ginawa ang rebranding na ito ng social media giant sa gitna kinakaharap na kritisismo mula sa mga mambabatas at regulator dahil umano sa market power at ang mga pang-aabuso sa mga platform nito.

 

Matatandaan na ang whistleblower at dating empleyado ng facebook na si Frances Haugen ay nag-leak ng mga dokumento na sinasabing mas pinili ng kumpanya ang kita kaysa sa kaligtasan ng gumagamit.

 

Tugon naman ni Zuckerberg na ang mga nasabing dokumento ay ginagamit lamang upang magpinta ng isang “masamang imahe.”