Ni Vhal Divinagracia

 

IPATUTUPAD ngayong Lunes, March 15 ang curfew hours sa buong Metro Manila.

Nagpalabas na ng supplemental general community quarantine (GCQ) guidelines ang Quezon City ukol dito.

Ang curfew ay ipaiiral simula alas diyes ng gabi hanggang alas singko ng umaga na magtatagal hanggang March 31, 2021.

Pinapayagan pa rin ang bente-kwatro oras na operasyon ng pamilihan o bagsakan, food take-out and delivery, pharmacies, hospitals, convenience stores at iba pang esensyal na establisyimento.

Ipinagbabawal na rin ang pagsasabong, operasyon ng swimming pools, gyms, spas at internet cafés kabilang na ang muling pagpapatupad ng liquor ban.

May exemption rin ang mga taong may pasok sa trabaho o pauwi pa lang sa mga oras na saklaw ng curfew hours basta’t magpapakita ito ng company ID, APOR ID o iba pang opisyal na mga ID.

 

Ni Claire Hecita

 

 

APRUBADO na ni Manila Mayor Francisco ‘Isko Moreno’ Domagoso ang planong pagsasagawa ng limitadong face-to-face classes ng apat na medical schools sa lungsod.

Ayon kay Domagoso, layunin nitong makapag-produce ng mga doktor, nurses, midwives at iba pang kurso na pinayagan ng Commission on Higher Education na magsagawa ng face-to-face classes.

Dagdag pa ng alkalde, makatutulong ito para mapalakas ang hanay ng mga medical professional na nangunguna ngayon sa pakikipaglaban sa pandemya.

Ang apat na medical schools na pinayagan ni Mayor Isko na magsagawa ng limitadong face-to-face classes ay ang Lungsod ng Maynila (PLM), College of Medicine, Metropolitan Medical Center College of Arts and Sciences, Chinese General Hospital Colleges, at Manila Theological College-College of Medicine.

Una na ring inaprubahan ni Domagoso na magsagawa ng face-to-face classes ang University of Sto. Tomas at Centro Escolar University noong Pebrero.

 

 

 

Ni Karen David

IPINAHAYAG ni Marikina City Mayor Marcelino Teodoro na aarangkada na bukas ang COVID-19 vaccination program sa kanilang lungsod.

Ani Teodoro, nasa 1,500 healthcare workers ng Amang Rodriguez Memorial Medical Center ang nakatakdang tumanggap ng unang COVID-19 vaccines. Habang nasa 55 prioritized recipients naman aniya ng bakuna ang nagback-out.

Ayon din sa alkalde, nirerespeto nila ang desisyon ng mga healthcare workers na tumangging magpaturok ng bakuna o mas nais ang ibang brand ng bakuna.

Nakatanggap umano siya ng report na ilang doktor sa Metro Manila ang tinatakot na kunin ang available vaccine kung hindi ay sila ang magiging huli sa priority list para sa inoculation rollout.

Binigyan-diin ni Teodoro na dapat bigyang pagkakataon ang mga ito na makatanggap ng bakuna kapag dumating na sa bansa ang preferred brand ng vaccines ng mga ito.

NAKUHA ng Mandaluyong City ang pagkilala ng OCTA Research Team bilang best performing LGU sa COVID-19 response sa National Capital Region.

Ayon sa OCTA, ito ay dahil matagumpay na napigilan ng lungsod ang pagtaas ng bagong kaso ng virus sa kanilang siyudad.

Bukod pa dito ay nakapagtala rin ang Mandaluyong ng low daily attack rate ng sakit na 2.55 per 100,000 at low positivity rate na nasa 2% lamang.

Dagdag pa dito, napanatili ng Mandaluyong LGU ang mababang hospital occupancy rate na pumalo lamang sa 5%.

Kabilang din ang Muntinlupa, Valenzuela at Pasig City sa mga LGUs sa NCR na kinilala ng OCTA na may well performance sa COVID-19 response.

Ni Arjay Adan

 

IGINAWAD ng US Department of State kay Pasig Mayor Vico Sotto ang titulong “anti corruption champion” noong Martes.

Kabilang din dito ang 11 pang lider mula sa ibang bahagi ng mundo dahil sa kanilang pamamalakad, tapang, at impluwensya sa pagpigil at paglaban sa korapsyon.

Kaugnay nito ay nagpapasalamat si Sotto sa pagkilala ng pamahalaan ng Estados Unidos sa kanya bilang “anti corruption champion.”

Aniya, umaasa itong makakatulong ang kanyang natanggap na karangalan upang matigil ang korapsyon sa bansa.

Ayon pa sa Twitter post ni Sotto, kung nais ng mga Pilipinong magkaroon ng mas mabuting pamahalaan, kailangan nating labanan ang korapsyon at tanggalin ito sa ating kultura.

 

Ni vhal divinagracia

 

NAKIPAGPULONG si Muntinlupa Mayor Jaime Fresnedi sa national government officials na pinangunahan ni Department of Transportation o DOTr Secretary Arthur Tugade.

 

Kaugnay ito sa paglalagay ng bike lanes at north-south commuter railway project sa Muntinlupa City.

 

Suportado naman ni Tugade ang paglalagay ng bike lanes lalo na ang paglalagay ng railway project.

 

Sinabi pa ni Tugade na tutulungan nya ang Muntinlupa para mapabilis ang pagpapatupad ng nasabing mga proyekto.