Ni Karen David

 

NAGLAGDA na rin ang local government unit (LGU) ng Pasig City ng tripartite agreement sa UK vaccine maker AstraZeneca at national government.

Ito ang inanunsyo ni Mayor Vico Sotto sa kanyang twitter post.

Ayon kay Sotto, nag-order ang Pasig ng 400,000 doses ng COVID-19 vaccine na nagkakahalaga ng 100 milyong piso.

Depende naman aniya sa ilang factor ang actual quantity at petsa ng delivery.

Sinabi rin ng alkalde na bibili rin sila ng bakuna kontra COVID-19 sa iba pang kumpanya kapag may oportunidad.

Bukod sa Pasig, marami na ring LGU ang naglagda rin ng kasunduan sa AstraZeneca na isa sa nag-apply ng emergency use authorization (EUA) sa Food and Drug Administration.

Ni Karen David

 

INANUNSYO ni Mayor Isko Moreno sa isinagawang flag ceremony sa Manila City Hall ngayong umaga na magtatayo ng storage facility ang lungsod para sa mga bibilhing bakuna kontra COVID-19.

Itatayo aniya ang naturang storage facility sa Sta. Ana Hospital.

Lumagda na rin ang alkalde ng mga dokumento para sa pagbili ng 12 refrigeration units na gagamitin sa pag-imbak ng COVID-19 vaccines at 50 units ng transport cooler bilang paghahanda sa darating na mga bakuna sa mga susunod na buwan.

Ni Karen David

 

IPINAG-UTOS ni Manila Mayor Isko Moreno ang suspensyon ng pasok upang mabigyan ng pagkakataon ang mga deboto na makadalo sa online activities para sa pagdiriwang ng kapistahan ng Poong Itim na Nazareno.

Nakasaad din sa Executive Order No. 01 na inilabas ni Moreno, mahigpit na ipinagbabawal ang pagbenta ng alak at iba pang alcoholic beverages sa Quiapo District.

Inatasan ng alkalde ang Manila Police District at lahat ng law enforcement officers na mahigpit na ipatupad ang city ordinance 5555 kung saan ipinagbabawal ang pag-inom sa mga pampublikong lugar sa buong durasyon ng kapistahan.

Ni Karen David

 

UMABOT na sa 94 percent o 26,938 ang mga gumaling sa COVID-19 sa Quezon City hanggang kaninang alas 8 ng umaga.

Ito ay mula sa 28,572 na kabuuang bilang ng nagpositibo sa sakit sa lungsod.

Ayon sa QC Epidemiology and Disease Surveillance Unit (CESU), 857 ang kumpirmadong active cases sa Quezon City.

Umakyat naman sa 778 ang bilang ng mga nasawi dahil sa nakahahawang sakit.

Samantala, makikita pa rin ang daily COVID-19 case update ng bawat barangay sa lungsod sa website ng city government.

Ni Vhal Divinagracia

MAY ilalaan na apat na lugar ang Manila City Government para sa mga devotee ng Black Nazarene na pupunta sa Quiapo church sa January 09.

Ayon sa pahayag ni Manila Mayor Isko Moreno, ang mga lugar na Villalobos, Carriedo, Hidalgo at Plaza Miranda ang bubuksan para sa mga gustong magsimba sa Quiapo Church.

Magbibigay naman ng libreng face shields at face masks ang Manila LGU para sa nasabing mga deboto.

Matatandaan naman na inaanyayahan ni Quiapo Church Spokesperson Fr. Douglas Badong ang ibig magsimba sa Quiapo church sa Enero 9 na huwag na lang pumunta at sa mga chapel at simbahan na lang sa kanilang lugar ito magtungo para makaiwas sa hawaan ng COVID-19.

Ni Vic Tahud

 

PINASINAYAAN na ng Pasig City Local Government Unit ang isang one stop shop para sa mga kukuha ng business permits.

Pinangunahan naman mismo ni Mayor Vico Sotto ang nasabing programa sa Ayala Malls, 30 Meralco Avenue, Barangay Ugong.

Ani Sotto, ito ay makatutulong upang mabawasan ang pagdagsa ng tao sa City Hall.

Ito ay makatutulong din upang magkaroon ng good governance at transparency ang lungsod ng Pasig ayon kay Sotto.

Kaugnay nito, hinikayat ni Mayor Vico ang publiko na huwag i-tolerate ang korupsyon sa pamahalaan.