PINAS

Ang Lihim ng Panginoon (Ikapitong Bahagi)

Sonspeak

Recent News:

Build Build Build

Pagdami ng mga Chinese workers sa Pinas, dapat bang ipangamba?

by

DUMAMI ang mga bilang ng mga Chinese nationals na nagtatrabaho sa Pilipinas.

 

Ni: Quincy Joel Cahilig

Isang malaking issue ang pag-angkin at pang-aagaw ng China sa teritoryo ng Pilipinas sa West Philippine Sea. Nitong mga nagdaang mga taon, nasaksihan ng mundo kung gaano sila kaagresibo sa pangangamkam ng mga isla at yamang dagat ng ating bansa sa kabila ng desisyon ng international arbitral court na Pilipinas nga ang may-ari ng mga pinagtatalunang teritoryo.

At ngayon, tila hindi lamang Philippine territories ang inaagaw ng China kundi maging ang mga employment opportunity sa bansa.

Bago nagtapos ang 2018, pumutok ang kontrobersya ng paglobo ng bilang ng mga Chinese nationals na nagtatrabaho sa bansa. Kinumpirma ng Department of Labor and Employment (DOLE) Undersecretary Ciriaco Lagunzad na mayroon ngang “upward trend” base sa kanilang data.

Mula 2015 hanggang 2017, nakapag-issue ang ahensya ng kabuuang 115,652 Alien Employment Permits (AEPs), at 51,000 sa kabuuang bilang na ito ay ibinigay sa mga Chinese nationals. Nasa mahigit 21,000 naman ang AEP ang ipinamigay sa first quarter ng nakaraang taon.

Ayon sa Labor Code, ipinagkakaloob lamang ang AEP sa foreign workers kung walang may gusto o may kakayahan na Pinoy na makakagawa ng trabaho. Ang naturang permit ay ibinibigay sa mga trabahong nangangailangan ng highly-specialized technical, supervisory, at managerial na trabaho. Pagkatapos ng permit, bibigyan ng Bureau of Immigration (BI) at ng Department of Justice ang isang foreign worker ng foreign visa.

Ngunit nasa 2,000 na mga Chinese nationals ang binigyan ng trabaho sa construction industry mula 2016, ang taon kung kailan nagsimula ang termino ni Pangulong Rodrigo Duterte.

MARAMI ang nangangamba sa kanilang job security dahil sa pagdami ng Chinese nationals na nagtatrabaho sa bansa.

 

PAANO SILA NAKALUSOT?

Sa isang pagdinig ng Senate Committee on Labor kamakailan, sinabi ng BI na nasa 20,000 foreigners lamang ang kanilang binigyan ng working visa mula 2017 hanggang 2018.  Kaya naman ipinagtaka ng chairman ng naturang committee na si Senator Joel Villanueva kung paano sumipa ang bilang ng mga Chinese workers sa Pinas, kasabay ang paggisa sa DOLE sa pagbigay nito ng 1.6 million tourist visas sa mga Chinese nationals, na sa kalaunan ay nagsipag-apply ng work permits.

Dahil dito, nagbigay babala si Senator Grace Poe sa DOLE at BI sa pag-issue ng extensions sa mga may hawak ng tourist visa.

“Obviously niloloko lang tayo. Sabi nila turista sila ‘yun pala may balak naman pala sila ditong magtrabaho. Sa umpisa pa lang dapat tinitigil na natin ‘yon,” wika ni Poe. “Kung turista ka tapos humingi ka ng work permit para mag-extend, wag na nating payagan ‘yon. At marami sa kanila wala talagang lehitimong work permit pagpasok dito,”

Inilahad ng senadora na maliban sa 115,000 AEPs, nasa 119,000 ang nakatanggap ng special working permits, na karamihan ay nagtatrabaho sa Philippine OffShore Gaming Operations (POGO). Hindi pa kasama sa bilang ang mga illegal workers.

Kaya naman  nais isulong ni Villanueva sa Senado ang pag-amyenda sa Labor Code para siguruhin na ang ang workforce sa mga kumpanyang nag-ooperate sa bansa ay binubuo ng 80 porsyentong Filipino workers upang hindi maagawan ng trabaho ang mga manggagawang Pinoy, na patuloy na hinaharap ang hamon ng 5.1 porsyentong unemployment rate sa bansa.

Iginiit naman ni Poe na kailangang hulihin ang mga illegal foreign workers sa bansa na di lamang umaagaw sa mga trabahong dapat na para sa mga Pinoy, kung saan nadedehado ang marami nating mga kababayan.

“Nagkakaroon ng superficial market conditions. Ibig sabihin nakadepende sa iisang partikular na grupo dahil sa dami nila; nakakabili sila ng floor by floor, natural nagmamahal, may demand dito. Ang nangyayari, ang ating mga kababayan, na ang kinikita ay sapat lamang, hindi nakakapag kumpetensiya dahil tumataas ang value ng lupa at ng presyo ng mga condominiums at presyo ng mga renta dahil sa kanila,” sabi ng mambabatas.

NAGPULONG sina Pangulong Rodrigo Duterte, Malaysian Prime Minister Mahathir Mohamad, at mga opisyal sa Malacañang Palace.

 

FRIENDLY ADVICE

Sa three-day state visit ni Malaysian Prime Minister Mahathir Mohamad kamakailan, nagbigay babala siya sa pamahalaan ng Pilipinas sa pagpapahintulot nito na dumami ang Chinese workers sa bansa dahil posibleng magulo umano nito ang “political equations”.

“Foreign direct investment should not involve bringing huge numbers of foreigners to live in the country because that might disturb the political equations in the country,” sabi ni Mahathir sa isang panayam.

“If huge numbers of any foreigners come to live and stay in the country or to even influence the economy of a country, then you have to do some rethinking as to whether it is good or bad, or the limits that you have to impose on them,” wika pa ng 93-anyos na Prime Minister ng Malaysia, na tinawag ni Pangulong Duterte na “friend, partner and brother.”

Sa kaniyang pag-upo sa pwesto bilang leader ng kanyang bansa nitong nakaraang taon, sinuspindi ni Mohamad ang multi-billion dollar major projects ng China sa Malaysia, kabilang dito ang East Coast Rail Link (ECRL) project at natural gas pipeline project. Ginawa niya ang naturang hakbang dahil dehado umano ang Malaysia sa infrastructure deals nito sa China, mga kasunduang pinasok ng kanyang sinundang prime minister na si Rajib Nasak.

DUTERTE:  HAYAAN NYO SILA

Sa kabila ng mga pagkabahala sa pagdami ng illegal Chinese workers sa bansa, hindi naman ito malaking isyu para kay Pangulong Duterte.

“Iyong mga Chinese dito, hayaan mo ‘yan na dito magtrabaho. Hayaan mo. Bakit? We have 300,000 Filipinos in China,” sinabi ng Pangulo sa isang campaign rally ng PDP-Laban sa Biñan, Laguna kamakailan.

“Kaya hindi ako maka — sabihin, o umalis kayo dito, deport ka doon. Eh kung bigla paalisin ‘yun doon 300,000 of them.

Paliwanag naman ng Malacañang, mayroon kasing kakulangan sa construction workers at gayon din sa skills para sa massive infrastructure projects ng pamahalaan sa ilalim ng “Build, Build, Build” kaya kailangan natin ang ayuda ng Chinese workers.

“We lack so many construction workers. Siguro that’s why maraming Chinese na kinukuha dahil walang mga Pilipino,” wika ni Presidential Spokesman Salvador Panelo.

“Maraming Pilipinong walang trabaho and yet they lack the skill so we need to teach them. And most likely ‘yan ang magandang project ng TESDA  (Technical Education and Skills Development Authority),” aniya pa.

Hindi din umano dapat mabahala kung legal namang nakapasok sa bansa ang mga Chinese workers, kasunod ang pagsiguro na “full force” na ipapatupad ng gobyerno ang immigration laws laban sa mga Chinese workers na iligal na nagtatrabaho sa bansa.

“We wish to clarify that the President’s policy on Chinese workers who are illegally staying in the country remains the same, which is the enforcement of immigration laws against violators,” wika ni Panelo

“Our laws will be applied with full force and effect equally to all foreign nationals who violate them,” pagtiyak ng tagapagsalita ng Palasyo.

Makakabawi na kaya si Juan sa 2019?

by

Ni: Quincy Joel V. Cahilig

MARAMI sa mga Pinoy ang aminado na hindi ganoon kaganda ang taong 2018 dahil sa hagupit ng mataas na inflation rate, na lubhang bumutas ng ating bulsa.

Gayon pa man, malaking pasasalamat na rin natin at, kahit papaano, nalalampasan natin ang pahirap ng matataas na presyo ng bilihin, kahit na sobrang higpit na ng ating sinturon at sobrang ikli na ng ating kumot.

Sa kabila ng lahat, sa pagtatapos ng taon, marami pa rin naman sa atin ang nakakakita ng “silver lining” at umaasang bubuti pa ang buhay sa 2019.

Nguni’t makakaasa nga ba ng kaginhawahan ang mga Pinoy sa taong 2019? Makakabawi na ba si Juan Dela Cruz sa susunod na taon?

POSITIVE OUTLOOK NG MGA EKSPERTO

Tinataya ng International Monetary Fund (IMF) na papalo sa 6.6 porsyento ang economic growth ng bansa sa susunod na taon at bahagyang bababa ang inflation rate, na kasalukuyang nasa 6.7 porsyento.  Nakikita din ng IMF na ang mahinang piso, higher excise taxes at ang pagtaas ng presyo ang magiging “key inflation drivers” sa 2019.

Sa kabila nito, malaki ang naitulong ng Rice Tariffication sa pagpapababa ng presyo ng bigas at pagpapanatiling sapat ang supply nito sa merkado. Kaya asahan na unti-unti nang maiibsan ang hirap ng maraming Pinoy pagdating sa bigas, na staple food sa ating bansa.

Positibo naman ang prediction ng Economic Update ng World Bank sa Pilipinas para sa susunod na taon bunsod ng direksyon ng sustainability at inclusiveness na dulot ng political will ng administrasyon ni Pangulong Rodrigo Duterte sa pagtataguyod ng maingat na fiscal management, gayon din ang pagpapatupad ng tax reforms at malakihang public investment projects tulad ng “Build, Build, Build”.

Dahil sa massive infrastructure project na ito, inaasahan din na tataas pa ang infrastructure spending ng pamahalaan, kung saan 44 sa 75 na proyekto ang naipatupad na.

Pagdating naman sa Investment Climate, isa ang Pilipinas sa may pinakamataas na rate ng foreign direct investment (FDI) sa ASEAN at tinatayang mapapanatili nito ang momentum. Sa unang bahagi ng 2018, lumago ng 42 porsyento ang FDI dahil sa pagtaas ng investor confidence sa bansa.

Samantala, naitala ng Philippine Statistics Authority (PSA) ang kabuuang approved foreign investments sa second quarter ng 2018 na umabot sa PHP30.9 bilyon, na halos doble ng PHP18.2 bilyon na naitala noong 2017.

Ang mga numerong ito ay indikasyon ng “favorable investment climate” sa bansa at mataas na kumpiyansa ng mga foreign investors kaya patuloy umano na dadagsa ang inflows ng FDI.

Pagdating naman sa Banking and Credit, “very positive” ang pagtaya ng Moody’s investor service report sa banking system ng Pilipinas, na napanatili ang Baa2 rating credit outlook. Tintataya ng Moody ang stable credit growth sa susunod na 12-18 na buwan.

Samantala, isang magandang indikasyon din ang patuloy na pagbaba ng external debt ng bansa sa mga nakalipas na mga taon.

IKATLONG TELCO: SUSI SA PAGLAGO

Inaasahan din na magiging malaki ang positive impact sa ekonomiya ng pagdating sa bansa ng ikatlong TELCO player na tatapos sa duopoly situation sa industriya ng telecommunication. Kinumpirma na ng National Telecommunications Commission ang Mislatel bilang third major telecommunication player. Ito ang kumpanya na binubuo ng Chinese state-owned China Telecom, Udenna Corporation at Chelsea Logistics, na pagmamay-ari ng Davao-based businessman na si Dennis Uy.

Batay sa mga pag-aaral, magdudulot ito ng mas mahusay na internet service sa bansa, nguni’t sa mas mababang presyo dahil sa magiging competition sa industriya.  Bagay na matagal nang inaasam ng mga Pinoy na frustrated na sa pangit na sitwasyon at reputasyon ng mala-pagong na internet service sa Pilipinas kumpara sa ibang mga bansa.

Sa pagganda ng serbisyo ng internet sa bansa, mas magiging mabilis ang takbo ng kalakalan at makapagbubukas din ito ng marami pang livelihood opportunities.

Nakikita din ng mga eksperto na marami pang foreign investors ang magkakaroon ng interest sa telecom at power sectors dahil sa itinutulak na constitutional amendments ng pamahalaan. Ang Services sector ang ikalawa sa pinakamalaking ambag sa Gross Domestic Product ng bansa, sunod sa Industry sector.

Base din sa mga datos, patuloy naman ang pagbaba ng kahirapan sa bansa at mananatiling mataas ang labor rate sa bansa, na nasa 94.6 porsyento sa kasalukuyan.

Inaasahan na papalo na sa 106.6 milyon populasyon ng bansa nguni’t ito ay magiging advantage ng bansa dahil sa “young, well-educated, and dynamic” na workforce.

DI DAPAT MAGING KAMPANTE

Sa kabila ng mga inaasahang mabubuting bunga ng mga programa ng pamahalaan sa susunod na taon, mayroon pa ring mga internal at external factors na kailangan pa ring isaalang-alang.

“Philippine business depends on sales locally and abroad to fuel enterprise growth.  With Filipinos’ savings depleted due to the 2018 high inflation and with the possibility of still high inflation in 2019, there is concern that consumer spending may not go back to pre-2018 levels.  That will not happen if the Duterte administration decides to continue imposing higher levels of excise taxes,” wika ng business expert na si Melito S. Salazar, Jr.

Aniya pa, apektado din ng patuloy na trade war sa pagitan ng U.S. at China ang export sales ng Pilipinas at kailangan itong matugunan ng gobyerno.

“Export sales will be affected by the trade war between China and the United States.  If the Philippines sells components of products that each country will impose higher tariffs on, the sales effect will cascade down to sales of components.  Even if Philippine exports are not imposed additional tariffs, the American consumer will adjust their bundle of purchases considering that some items will have higher prices.”

Hiling naman niya sa pamahalaan para sa 2019, mas palakasin pa ang Philippine business para magkaroon pa ng maraming trabaho sa bansa para di na kailangan magtrabaho abroad ng mga Pinoy at iwanan ang kanilang pamilya.

“Business wishes that the Duterte administration will prioritize Filipino consumer interests over the need to increase government revenues… The Duterte administration can raise more funds by curbing the propensity of public officials to use wantonly public funds.,” wika ni Salazar.

Susi ang agrikultura sa pambansang pag-unlad

by

Ni: Louie C. Montemar

MALINAW sa National Economic Development Authority (NEDA), ang pangunahing ahensya ng pamahalaan para sa pagpaplano ng pangkaunlaran, na kailangang sensitibo sa lagay ng mahihirap ang isang istratehiyang magpapalago sa ekonomiya, lalo na noong nasa pamumuno ito ng isang awtoridad sa mga pag-aaral sa kahirapan, si Prop. Arsenio Balisacan.

Sa isang sinulat ni Balisacan hinggil sa kahirapan sa bansa, sinabi ng dating hepe ng NEDA na ang pagiging produktibo ng agrikultura at paglaki ng kinikita sa mga bukid ay magpapalago maging ng mga trabaho at aktibidad na hindi pang-agrikultura. Ayon sa kanya ito ang direktang nakababawas sa kahirapan sa kanayunan at tumutugon sa kawalan ng pagkain. Higit pa rito, tinukoy niya na ang di-tuwirang epekto nito sa mga gawaing hindi pambukid sa rural at panlunsod na ekonomiya ang mas mahalagang batayan sa pangmatagalang seguridad sa pagkain at pagpapababa sa bilang ng mahihirap sa mga kanayunan. Malinaw sa kanya kung bakit dapat alagaan ang sektor ng agrikultura.

Malinaw din sa kanya na “ang pagkakaroon ng magandang kalidad na edukasyon at mga serbisyong pangkalusugan na bukas sa mahihirap ay dapat na mataas sa adyenda ng pag-unlad. Ang pamumuhunan sa ganitong mga serbisyo, pati na rin sa mga institusyon na nagpapabuti sa kahusayan at pamamahala ng merkado ay lumilikha ng mainam na kondisyon para na rin sa pagtahak ng bansa sa isang mas mataas at pangmatagalang landas ng paglago.”

Kawangis ng pananaw na ito ang tinataguyod na mga reporma ng dating punong ekonomista ng World Bank at nagwagi ng Nobel Prize sa Economic Sciences, si Joseph Stiglitz. Wika niya (salin natin): “Hindi natin dapat kalimutan na sa maraming papaunlad na bansa, marami sa mga pinakamahihirap na tao ang nananatili sa sektor ng kanayunan, at malamang mananatili roon nang ilang dekada. Kung ang kahirapan ay dapat mabawasan, dapat may gawin tungkol sa sektor na ito. Kahit na hindi ito direktang nag-aambag sa pagluwas ng kalakal, ito ang tamang gawin. Ang mga karanasan sa matagumpay na bansa ay nagpakita ng kahalagahan ng katatagan sa lipunan, at hindi mapananatili ang katatagang panlipunan kung ang mga malalaking bahagi ng populasyon ay naiiwan [sa pag-unlad o pagbabago].”

Dagdag pa ni Stiglitz, “ang edukasyon… ay dapat dinidisenyo upang nakikita ng mga tao ang pagtaas ng kanilang pagiging produktibo, sa pamamagitan ng pagkakatuto nila sa mas mahusay na mga teknolohiya ng produksyon at pagkakilala nila sa mga produktong pinaka-pinahahalagahan sa merkado… Sa madaling salita, ang mga patakaran sa industriya ay hindi maaaring balewalain ang agrikultura at ang sektor ng kanayunan. “

Nang isulat ni Joseph Stiglitz ang mga linyang ito sa kanyang inilathalang “Development Policies in a World of Globalization” [Mga Patakarang Pangkaunlaran sa Mundo ng Globalisasyon] (2002) ang nasa isip niya ang isang susing ideya na itinataguyod din naman ng NEDA sa ating pambansang planong pangkaunlaran, ang inclusive growth —kaunlarang para sa lahat, o para sa nakararami.

Susi ang agrikultura at pambansang pag-unlad subalit Build, Build, Build ang mas naririnig nating madalas sa pambansang liderato?  Wala bang Farm, Farm, Farm?

Unahin ang Ekonomiya

by

Ni: Louie Montemar

Ayon sa Pulse Asia, mula Hunyo hanggang Setyembre ng taong ito, ang limang pangunahing isyu na nasa isip ng publiko ay ang presyo ng mga bilihin, sahod ng mga manggagawa, malawak na kahirapan, pagkakaroon ng trabaho, at katiwalian sa pamahalaan.

Sumunod na limang alalahanin ang paglaban sa kriminalidad, kapayapaan sa bansa, pagsira at pang-aabuso sa kalikasan, taas ng buwis, at ang maayos na pagpapatupad sa batas.

Nasa isipan din ng publiko ang kalagayan ng mga OFWs, paglobo ng populasyon, terorismo, at ang pag-angkin ng mga banyaga sa teritoryo ng Pilipinas. Kapansin-pansing panghuli sa listahan dahil sa mas kaunti ang tumugon nito ang pagbabago sa Saligang Batas.

Batay sa impormasyong ito at ang pagdami ng bilang ng mga mambabatas na galing sa mga dinastiyang pampulitika, kakulangan ng pamahalaan sa kapital para sa mga proyektong pangkaunlaran gaya ng nasa programang Build, Build, Build, baka mas mainam na pag-isipang muli ang panukala sa pagbabago ng Konstitusyon.

Ayon sa mga datos na nilabas ng iba’t ibang ahensiya ng pamahalaan at mga pananaliksik ng mga espesyalista, kukulangin pa ang inaasahang kabuuang koleksiyon sa TRAIN para pondohan ang pagpapatupad sa ipinapanukalang pederal na porma ng gobyerno sa ilalim ng kasalukuyang administrasyon.

Sa pormal na panukalang bagong Konstitusyon ng House of Representatives na pinasa na sa ikalawang pagbasa, tila pinapaboran pa ang pagdami at pagpalakas sa mga pampulitikang dinastiya dahil inalis na ang limitasyon sa pagtakbo ng mga magkakapamilya at bilang ng termino.

Kung hindi naman malinaw na may makabuluhang pagbabagong dadalhin ang isang magastos na bagong Konstitusyong gawa ng mga tradisyunal na politiko at napakarami pang iba pa namang prayoridad na usapin sa isip ng pangkaraniwang mamamayan, bakit hindi na lamang unahin ng Konggreso ang paggawa ng batas at patakarang mag-aayos sa ating ekonomiya?

Malinaw na sa mga mamamayan, pangunahin ang mga usaping pang-ekonomiya. Unahin natin ang mga ito.

Pinas, delikado nga ba sa debt trap?

by

Sina Pangulong Rodrigo R. Duterte at Chinese President Xi Jinping, pagpapakita ng lumalakas na ugnayan ng dalawang bansa.

 

Ni: Quincy Joel Cahilig

Tuloy-tuloy ang kaliwa’t kanang mga infrastructure projects sa ilalim ng Build, Build, Build program ng Duterte administration. Nakapaloob sa PHP 8.7 trillion na malawakang infrastructure program ang pagpapatayo ng mga kalsada, tulay, paliparan, train lines, irrigasyon, at dam sa iba’t-ibang bahagi ng bansa. Sa pagtatapos ng mga proyekto sa 2022, inaasahang bibilis pa ang paglago ng ekonomiya ng Plipinas.

 

Galing sa buwis, official development assistance (ODA), at commercial loans ang pondong ginagamit sa pagsasakatuparan ng Build, Build, Build projects. Ayon kay Finance Secretary Carlos Dominguez III, sa ganitong paraan ay mas madali at mabilis ang implimentasyon kumpara sa Private Public Partnership (PPP) funding na ginawa ng nakaraang administrasyon para sa infrastructure projects.

“The ODA plus a hybrid, that is generally what we are doing. There are proposals for PPP. We are entertaining those proposals. Our method of using government financing is working, it’s faster. We are pushing as quickly as we can. I think it’s moving more quickly,” wika ni Dominguez.

Isa ang China sa mga bansang pinanggagalingan ng mga loan pangtustos sa Build Build Build projects. Hindi lingid sa karamihan na blooming ang relasyon ngayon ng dalawang rising economies sa Asia. Ito ay sa kabila ng mga isyu ng pang-aagaw ng China ng teritoryo at yamang-dagat sa West Philippine Sea, pagpuslit ng mga bilyong-pisong drug shipments dito sa bansa mula China, at ang pagdagsa ng mga illegal Chinese workers sa Pilipinas.

 

Nguni’t batay sa mga report, mas mataas ang interest rates ng loans mula China kumpara sa ibang mga bansa. Isang halimbawa ang Chico River Irrigation Project, kung saan pinautang ng China ang pamahalaan ng P3.135 bilyon na may yearly interest na 2 percent, na magma-mature sa loob ng 20 taon, kasama na ang pitong taon na grace period.

Noong 2016, nag-offer ang Beijing ng $9 bilyong halaga ng ODA sa Pilipinas. Kabilang dito ang mga sumusunod na proyekto: New Centennial Water Source-Kaliwa Dam Project, South Long Haul Project ng Philippine National Railway, Davao-Samal Bridge Construction Project, Ambal-Simuay River at Rio Grande de Mindanao River Flood Control Projects, Pasig-Marikina River at Manggahan Floodway Bridges Construction Project, Subic-Clark Railway Project, Safe Philippines Project Phase 1, at Rehabilitation of the Agus-Pulangi Hydroelectric Power Plants Project.

Sa state visit ni Chinese President Xi Jinping sa bansa kamakailan, 29 na kasunduan naman ang pinirmahan sa pagitan ng Manila at Beijing. Kasama sa mga ito ang ilang proyekto tulad ng Davao City Expressway Project at Panay-Guimaras-Negros Island Bridges Project.

Mas mataas ito kung ikukumpara sa P51.3 bilyon na loan ng Pilipinas sa Japan International Cooperation Agency (JICA) para sa first phase ng subway system. Ang loan sa JICA ay may 0.1 percent interest rate at payable sa loob ng 40 na taon, na may 12-year grace period.

Ang mapait na sinapit ng Sri Lanka 

Dahil dito, marami ang nangangamba na baka ginagamit ng China ang debt trap diplomacy para ibaon sa pagkakautang ang Pilipinas hanggang sa mapilitan ang gobyerno na ipambayad sa kanila ang ilang bahagi ng ating teritoryo.

May posibilidad na sapitin ito ng Pinas dahil ganoon ang nangyari sa Sri Lanka. Pinautang ng China ang bansa ng $1.1 bilyon para sa pagtatayo ng Hambantota port, na pinangunahan ng isang Chinese contractor. Dahil nahirapan ang Sri Lanka na bayaran ang loan, napilitan nitong ipa-lease sa China ang port sa loob ng 99 na taon. Bagay na itinuturing ng mga eksperto na banta sa soberanya ng Sri Lanka at ayon sa mga ulat, nagtatayo na ang China ng mga pasilidad dito na parte ng kanilang Belt and Road Initiative.

Babala ni Magdalo Party-list Representative Gary Alejano, may nakatagong layunin ang China sa pagpapautang nito sa Pilipinas para mapondohan ang Build Build Build. 

 

Naniniwala si Magdalo party-list Representative Gary Alejano na ang Build, Build, Build ay bahagi ng Belt and Road Initiative, na naglalayong gawing pinakamalakas na bansa sa buong mundo ang China pagsapit ng 2049. Nakapaloob dito ang pagpatatatag ng trade and infrastructure network na mag-uugnay sa Asia, Europe, at Africa. Aniya, nakita ni Pangulong Rodrigo Duterte na kailangang makasali ang bansa sa naturang hakbangin ng China, na isang rising superpower.

Babala ng mambabatas, hindi dapat maging kampante ang gobyerno sa tulong na ibinibigay ng China dahil isa lamang itong pagbabalat-kayo.

“Kunwari nagbibigay ng suporta pero the main reason noon is to link these countries to China and to pull them into their own influence thereby removing them from their competition which is the United States,” aniya. “This is the power struggle between the United States and China, the United States, being an established power, challenged by a rising power, China. Nagkataon lang na yung Pilipinas, nandun sa gitna.”

Pinas, di masisilo

Sa gitna ng mga pangamba, mismong China na ang nagpahayag na imposible para sa Pilipinas na mahulog sa debt trap. Sa halip ay malaking tulong pa ang maidudulot ng naturang loans sa bansa.

“China’s loans only account for a very limited share of the Philippines’ foreign debts. It’s impossible for the Philippines to fall into the so-called “debt trap” due to these loans,” wika ni China Foreign Ministry Spokesperson Geng Shuang.

“We believe the relevant projects will further improve the livelihood and boost economic growth of the Philippines, providing new impetus for its national development,” dagdag pa ni Geng.

Siniguro din ng mga economic manager ng Duterte Administration na di tuluyang malulugmok sa utang ang bansa.

“This is totally unfounded. The financing we availed of are soft loans at the lowest possible interest rates and the longest possible term arrangements,” wika ni Dominguez.  Ipinaliwanag din niya na, sa pagtatapos ng Duterte administration, ang magiging estimated debt ng Pilipinas sa Chinese government ay nasa 4.5 porsyento lang ng kabuuang utang ng bansa.

Sinalag din ni Budget Secretary Benjamin E. Diokno ang mga alegasyon na papunta ang Pilipinas sa patibong na pautang ng China at sinabing maingat ang gobyerno pagdating sa loans.

“We’re very careful. We have a very rigorous process. The list of projects came from us, not from them. We have a cut-off, the project has to have an economic internal rate of return of at least 10%. If the economic rate of return exceeds the cost of borrowing, it’s a go, it makes sense. The rate of return (points to the) social worthiness of the projects,” wika ni Diokno.

Paliwanag pa ng budget secretary, kakayanin ng Pilipinas na i-absorb ang mga foreign loans dahil sa napakababang debt-to-gross domestic product ratio. Aniya, ang kabuuang utang ng bansa ay nasa 42.1 porsyento ng GDP, na inaasahang babagsak sa 37.9 porsyento sa pagtatapos ng Duterte admin.

Dagdag pa niya, maganda ang naging koleksyon ng buwis ngayong taon kaya mataas ang kumpiyansa na di lalampas sa 3% of GDP ang fiscal deficit ngayong 2018 sa kabila ng malakihang paggastos ng gobyerno sa pagtatayo ng mga infrastructure.

“We’re collecting more. Since revenue will be much higher due to the Christmas season, we usually collect more. We front-loaded our expenditures so we’re not going spend so much in the fourth quarter. So there’s no danger that we will breach our 3% deficit to GDP ratio,” wika ni Diokno.

Maayos na elektrisidad, Pinas uunlad

by

Ni: Noli C. Liwanag

NAPAKAHALAGA ng elektrisidad sa pang-araw-araw na buhay ng bawat mamamayan, mula sa tahanan, ito ang nagpapaandar sa mga kasangkapang de-kuryente, maging sa mga opisina, pabrika at iba pang negosyo ay nakasalalay din sa elektrisidad ang pag-unlad ng bayan.

Nagpahayag ng suporta ang Department of the Interior and Local Government (DILG) sa National Grid Corporation of the Philippines (NGCP) upang tiyakin na nasa itinakdang panahon ang pagsisimula at pagtatapos ng mga proyektong transmission line at substation sa mga lokal na pamahalaan.

Ipinahayag ni DILG OIC Secretary Eduardo M. Año, na bilang may pangkalahatang superbisyon sa mga pamahalaang lokal, magiging katuwang ng DILG ang NGCP sa pagtataguyod ng kaligtasang pampubliko at hindi napuputol na transmisyon ng kuryente gayundin sa proteksyon, seguridad at integridad ng transmission system ng bansa.

“Ang kuryente ang haligi ng ating ekonomiya. Kaya sisiguraduhin ng DILG na makakarating ang elektrisidad sa pinakamalayong barangay at sitio ng bansa sa pamamagitan ng pagbibigay ng kinakailangang tulong at suporta sa NGCP sa kanilang mga transmission projects,” saad ni Año.

MANDATO NG NGCP

SA ilalim ng batas, ang National Grid Corporation of the Philippines (NGCP) ay may mandato na mangasiwa, magsagawa at panatilihin ang transmission system sa bansa at palawigin ang national grid na siyang titiyak na ang kuryenteng nagmumula sa mga power plant ay naipapadala sa lahat ng distribution utilities at directly-connected customers.

Kamakailan, lumagda sina Año at NGCP president/chief executive officer Anthony L. Almeda sa isang kasunduan para sa mabilis na transmisyon ng elektrisidad sa bansa. Saksi sa paglagda sina DILG Undersecretary Epimaco Densing III at NGCP chief administrative officer Bryan Andersen Co.

Sa kasunduan, ie-endorso ng DILG ang kahilingan ng NGCP na maipasa ang mga lokal na ordinansa na magbabawal ng pagtatanim ng mga puno, pagsagawa ng mga mapanganib na gawain, at pagtatayo ng mga istruktura sa right-of-way corridors ng transmission at distribution lines.

Magbibigay din ng police assistance ang kagawaran para panatilihin ang kapayapaan at kaayusan upang maiwasan ang karahasan sa oras na igawad ng NGCP ang writs of possession o injunction mula sa Korte sa mga pribadong istruktura na may kaugnayan sa pagpapanatili, pagsasaayos, rehabilitasyon at restorasyon.

Kasama rin sa responsibilidad ng DILG ay tawagin ang pansin ng mga lokal na pamahalaan upang agarang maresolba ang mga isyu kung hindi agad nakakuha ng mga permiso ang NGCP kahit na ito ay nakatugon sa mga requirements.

“Buo ang suporta ng DILG sa mga proyekto at inisyatibo ng NGCP para sa ligtas na operasyon at maintenance ng mga transmission facility nito tungo sa hindi napuputol at maaasahang probisyon ng transmission services para sa publiko sa pamamagitan ng pagtatapos ng mga transmission projects sa tamang panahon,” paliwanang ni Año.

Sinabi ni Año, na ang bagong lagdang Republic Act 11032 o ang Ease of Doing Business and Efficient Government Service Delivery Act of 2018 at Executive Order No. 30 na inilabas noong Hunyo ni Pangulong Rodrigo Duterte ang naging daan upang likhain ang Energy Investment Coordinating Council (EICC) ay tumutugon sa pagpapabilis ng pagpapatupad ng mga energy project.

Walang sinayang na oras ang EICC at agad na inilabas ng Department of Energy (DOE) ang sertipiko ng Energy Project of National Significance (EPNS) sa Atimonan One Energy (A1E) at ng iba pang power projects noong Setyembre 11.

Ang bagong mga proyektong pang enerhiya ay kasama rin sa programang Build, Build, Build ng administrasyon. Ang mga bagong imprastruktura kalsada at tulay, mga pambansang gusali, paliparan at pantalan, at marami pa ay mangangailangan ng kuryente sa kanilang konstruksiyon at sa pagsisimula ng kanilang operasyon.

Bukod sa megawatts na maibibigay ng bagong mga planta ng kuryente sa bansa, makikinabang din dito ang mga lokal na komunidad, kasama na ang pagbibigay ng trabaho sa mga lokal na residente.

Sa Atimonan, pinangunahan ng pangulo ng Municipal Agricultural and Fisheries Council, Demosthenes Hernandez, ang mga magsasaka, mangingisda, manggagawa, residente at mga opisyal ng barangay sa rally sa Energy Regulatory Commission (ERC) upang ipahayag ang kanilang suporta sa 1,200-megawatt power plant ng A1E.

Bukod sa Atimonan plant, pinagkalooban na rin ng sertipikasyong EPNS ni Energy Secretary Alfonso Cusi ang isang wind power project sa isla ng Talim sa Binangonan at Cardona, Rizal at ang isang geothermal project sa probinsiya ng Kalinga.

 Ang mga proyektong nakapasa bilang mahalaga sa bansa ay mayroong capital investment na hindi bababa sa P3.5 bilyon. Dahil dito, nararapat lamang na hindi na patagalin pa ang pagbibigay ng Energy Regulatory Commission ng final approval sa mga ito.

MODERNISASYON NG POWER GENERATING PLANTS

Sinabi ni Energy Secretary Alfonso Cusi sa kanyang pagbisita sa lalawigan ng Bulacan kamakailan na bago matapos ang termino ni Pangulong Duterte, makakabitan ng kuryente ang bawat tahanan sa buong bansa.

Idinagdag pa ni Cusi na tinututukan ng ahensya ang patuloy na modernisasyon ng mga power generating plants at mga nakalinyang itatayo pa.

Base sa datos ng DOE, nakumpleto na ang modernisasyon ng Angat Hydropower Plant na nasa bunganga ng Angat Dam sa Norzagaray, Bulacan. Nagsusuplay ito ng 218 megawatt na kuryente mula sa ragasa ng tubig mula sa dam.

Patuloy naman ang pagsasa-ayos sa Limay Coal Plant sa Bataan na kayang magsuplay ng 600 megawatt habang sa Pangasinan, tinitiyak ng DOE na hindi pumapalya ang Sual Coal Plant na nagbibigay ng 1,000 megawatt at ang San Roque Hydropower Plant na may 345 megawatt.

Bukod sa pagpapabuti ng mga dati nang gumaganang mga planta, nakahanda na ring itayo at paandarin ang mga bagong planta ng kuryente na lilikha ng 12,683 megawatt mula sa renewable energy.

OCEAN THERMAL

NGAYONG taon, bubuksan ng DOE ang kauna-unahang Ocean Thermal Energy Conversion habang nakatakdang magkaroon ng Solar grid parity sa taong 2020.

Madadagdagan naman ng 2,345 megawatt ang suplay ng kuryente dahil sa wind energy pagsapit ng taong 2022; 25,398 megawatt mula sa hydro power sa 2023; at 75 megawatt mula sa ocean energy sa 2025.

Iba pa rito ang 284 megawatt na mula sa solar power sa taong 2030 at 1,495 megawatt na manggagaling sa geothermal energy.

Isang halimbawa na rito ang bagong bukas na 25 ektaryang solar energy farm sa barangay Pasong Bangkal at Casalat sa bayan ng San Ildefonso, Bulacan. Nakapagdagdag ito ng 15 megawatt na suplay sa power generation. Resulta ito ng pamumuhunan ng Cleantech Global Renewables Inc, na may lokal na subsidiary, ang Bulacan Solar Energy Corporation. Nakakasa na rin ang planong dagdagan pa ito ng mga solar panels upang umabot sa 85 megawatts ang malilikhang kuryente.

Close Bitnami banner
Bitnami