Muling humarap sa ika-apat na pagdinig ng senado sa P6.4 bilyong halaga ng smuggled shabu mula sa China si Mark Taguba ang Custom broker na nagbibigay ng tara sa mga opisyal ng Bureau of Customs (BOC) upang makalabas ang kanyang mga shipment na ipinapasok sa bansa.

Sa umpisa ng hearing ng Senate blue ribbon na pinangunahan ni Sen. Richard Gordon na s’yang chaiman ng komite, tinanong nito si Taguba kung paano nagsimula at nagkaroon ng impluwensya sa Customs.

Ikinuwento nito na sa pamamagitan ng kanyang ama na dating vice mayor ay ipinakilala s’ya sa nagngangalang Jojo Bacud na hindi naman kilala ng mga opisyal ng BOC na dumalo sa pagdinig.

Ayon kay Taguba nagbibigay s’ya ng limanlibong piso kay Bacud sa bawat container na ipinapasok nito sa Customs.

Mula kay Bacud din nakilala ni Taguba ang Tita Nanny na may koneksyon naman umano sa Davao Group.

Ayon kay Taguba na sina Tita Nany, Jack at Davao Councilor Nilo Abellera alyas “Small” ang bumubuo ng Davao Group.

Inilahad din ni Taguba na nagbigay s’ya ng limang milyong piso kay small para umano kay Davao City Vice Mayor Paolo Duterte nang magkita sila sa Davao bilang enrolment fee.

Maliban pa aniya sa paunang limang milyong pisong ibinigay n’ya kay “Small” at nagbibigay rin s’ya ng sampung libo buwan-buwan kay Jack.

Ngunit nang makalipas ang ilang buwan ay na-alert sa Customs ang mga shipment na ipinapasok ni Taguba kung kaya’t lumipat s’ya ng grupo na muli umanong titiyak na makakapasok ang shipment n’ya na hindi nasisita.

Samantala, hindi naman nakadalo sa pagdinig si “Small” matapos padalhan ng imbitasyon ng Blue Ribbon Committee.

Hiningi naman na ni Sen. Gordon ang tulong ng National Bureau of Investigation (NBI) upang hanapin at iharap sa senado sina Tita Nanny, Jack, at Jojo Bacud na mga binanggit ni Taguba sa mga binibigyan n’ya ng tara sa BOC.