PINAS

Ang Lihim ng Panginoon (Ikatlong Bahagi)

Sonspeak

Recent News:

Department of Environment and Natural Resources (DENR)

Gree-ne-las: Negosyo Para Sa Kalikasan

by

 

EDWINA ALVAREZ

SA panahon ngayon, marami ang nais magtayo ng sariling negosyo. Marahil ito ay dala ng paghahanap ng alternatibong pagkakakitaan ng hindi kinakailangang mag empleyado o mangamuhan. Maari din na may bagong oportunidad na nais subukin na makapagbibigay ng bagong layunin sa buhay.

Anuman ang dahilan, di maitatanggi na ang pagnenegosyo ay bahagi na ng kaisipan ng mga Filipino. Ang magandang balita, nagkakaroon din ng mas malalim na dahilan ang pagpasok sa negosyo maliban sa kagustuhang kumita.

Para kay Camille Albarracin, may ari ng kumpanyang Everything Green, may mas malalim na dahilan ang pagtatayo ng negosyo. Ito ay ang masidhing adbokasiya na mabigyan ng halaga ang kalikasan.

Ang trabaho sa hospitality industry ang nagbigay kamalayan kay Camille tungkol sa “going green” at “green initiatives.” Marso 2018 nang iwan ni Camille ng tuluyan ang kanyang trabaho para makapagpahinga mula sa stress ng kanyang trabaho at maisakatuparan ang hiling nilang magasawa sa Diyos na magkaroon ng anak. Ngunit isang magandang pagkakataon pala ang naghihintay sa kanya.

Natatanging pagkakataon

Naging consultant si Camille ng Department of Environment and Natural Resources (DENR) para sa mga sustainable events at tagapagsulat ng mga manual para sa mga sustainability projects ng naturang kagawaran. Ito na ang nagbigay sa kanya ng pagkakataon na makasalamuha ang iba’t ibang komunidad na nasasaklaw ng community based forest management.

Ang layunin ng mga ito ito ay makapagpatayo ng mga negosyong pangkabuhayan na hindi masira ang mga kagubatan sa kanilang komunidad.

Isa sa mga komunidad na ito ang nagpakita sa kanya ng sample ng mga “bakbak” o pinatuyong abaca leaf sheaths. Dito na sila nagsimulang mag-isip kung anu ang pwedeng maging produkto mula sa mga ito. Ang komunidad na ito sa Labo, Camarines Norte ay kilala rin sa paggawa ng mga sandalyas. Ang natural nilang kaalaman sa paggawa ng sandalyas at ang maraming supply ng bakbak ay tila mga ideyang kailangan na lamang pagsamahin upang makapagtatayo ng isang negosyong pangkabuhayan para sa komunidad na ito.

Nakita rin ni Camille na puede siyang maging tulay sa pagdadala ng mga sandalyas na ito sa mga hotel. Isa sa mga malalaking generator of waste ay ang mga hotel. Bahagi ng solusyon na nakita ni Camille upang maisulong ang “going green” ay ang pagdala ng mga Gree-ne-las sa mga hotel.

Makabuluhang simula

Nagsimulang gumawa ang komunidad ng prototype ng tsinelas na gawa sa bakbak. Agosto ng nakaraang taon nang masubok ni Camille kung tanggap ba ng mamimili ang mga tsinelas na gawa sa bakbak sa isang garage sale ng isang kilalang eskwelahan. Ikinagulat ni Camille nang maubos ang 50 pairs ng tsinelas na wala pa halos isang oras. Natuwa ang mga mamimili sa bagong konsepto at pagiging eco-friendly ng produkto. Ito rin ang nagbigay daan para sa marami pang events para maipakilala ang mga tsinelas gawa sa bakbak. Pagkatapos mapatunayang tanggap ito ng marami, sinimulan na ni Camille na ipakilala ang mga ito sa mga hotel.

Gree-ne-las

Dito na kinailangan na bigyan ng sariling pangalan ang mga tsinelas. Para maipakitang ito ay gawang Filipino at ang pagiging eco-friendly ng mga tsinelas, pinangalanan itong Gree-ne-las. Mapalad na nai-feature na ang Gree-ne-las sa ilang TV shows na sumusuporta rin sa parehong adbokasiya. At kasunod nito ang sunod sunod na ring pag-order ng iba’t ibang establisimyento. Naging epektibong paraan ito ng Everything Green para maiparating sa nakararami ang kanilang mensahe na ingatan ang kalikasan.

Sinusubok din ng kumpanya hanggang sa kasalukuyan na mapasok ang industriya ng mga hotel. Mahirap man dahil sa malalaking kompetisyon, hind ito nakikitang hadlang na isulong ang kanilang adbokasiya. Patuloy din si Camille sa pagbibigay kaalaman at opsiyon sa mga hotel na kunin sa mga lokal at eco-friendly suppliers ang mga hotel supplies nito. Nagbibigay din ang Everything Green ng training sa iba’t ibang kompanya at unibersidad sa pagsulong ng pangangalaga sa kalikasan.

Di lamang para sa kalikasan  

Ang mga manggagawa ng Gree-ne-las ay galing sa marginalized na komunidad ng Labo, Camarines Norte. Sa ngayon ay limang manggagawa ang full time na trabahador ng Everything Green. Ngunit kasama ang buong komunidad sa proseso, mula sa mga magsasaka ng abaka hanggang sa mga nagpupulot ng bakbak, lahat ng ito ay galing sa marginalized na bahagi ng nasabing komunidad. Maging ang tarheta ng Gree-ne-las ay gawa ng mga PWD mula naman sa lungsod ng Quezon City. Ang mga tauhan para sa pagbuhat at pagdeliver ng product ay mula sa grupo naman ng mga deaf and mute.

Isa lamang ang Gree-ne-las sa marami pang produkto na nais ipamahagi ng Everything Green. Ika nga ng tag line ng kumpanya, “Take the right step” tungo sa sustainable at zero waste na pamumuhay. Sa hinaharap nais ni Camille na makapamahagi pa ng iba’t’ ibang produkto tulad ng sponge na gawa sa coco coir, teabags na gawa ng mga lokal na magsasaka at marami pang iba.

Marami pang komunidad at PWD’s ang matutulungan ng negosyong ito. Isa lang ang mensahe ni Camille para sa lahat: “Be mindful of the things you throw away and be thankful to mother nature. Awareness is always key. If you don’t need it don’t buy it. Take the right step to sustainable choices and go green.”

Maaring isa lamang si Camille sa dumaraming tao na nakapagtayo ng negosyo na may ganitong adbokasiya, ngunit di maitatanggi na maliit man o malaki ang hakbang na gawin tungo sa pangangalaga sa kalikasan ay mayroon itong  malaking epekto na pangkalahatan di lamang sa mga taong nabubuhay sa kasalukuyann kundi lalo na sa mga henerasyon sa hinaharap.

 

Source: Facebook

Ito ang prototype ng Gree-ne-las na maaring

alternatibo sa mga tsinelas na karaniwang ipinasusuot

ng mga hotel sa kanilang mga guest. Gawa ito sa

pinatuyong abaca leaf sheaths.

 

Source: Facebook

Si Gng. Camille Albarracin, may-ari ng kumpanyang Everything Green, habang kasama ang isa sa mga manggagawa ng Gree-ne-las mula sa isang marginalized na komunidad sa Labo, Camarines Norte.

 

Source: Facebook

Layunin ni Ms. Camille na maitaas ang awareness tungo sa sustainable at zero waste lifestyle sa pamamagitan ng pagsusupply ng mga eco-friendly products tulad ng Gree-ne-las.

 

Source: Facebook

Mula sa pagsasaka, pagpupulot ng bakbak at paggawa ng

mga Gree-ne-las, isang marginalized na komunidad sa Labo,

Camarines Norte ang natutulungan ng Everything Green.

Source: Facebook

Kay gandang pagmasdan ng mga Gree-ne-las! Di lamang ito nakakatulong sa

kalikasan, ang mga manggagawa sa likod nito ay mga marginalized na komunidad

at mga PWD.

 

 

Basura sa Pasig River, sosolusyunan

by

BASURA sa Pasig River sosolusyunan para sa pangkalahatang gamit ng Pasig River.

 

Ni: Jonnalyn Cortez 

KASABAY ng rehabilitasyon ng Manila Bay ang paglilinis ng mga ilog at estero sa mga kalapit na siyudad na nagbabagsak ng maruming tubig sa look, kabilang na ang Pasig River.

Kaya upang hindi masayang ang pagod ng mga organisasyon, volunteers, at gobyerno sa pagtatanggal ng basura sa Manila Bay, makikipagtulungan ang Pasig River Rehabilitation Commission (PRRC) sa Chinese firm na China First Highway Engineering Co., Ltd. (CFHEC) upang solusyunan ang polusyon at paigtingin ang development ng ilog para magamit nang maayos.

Pumirma ng memorandum of understanding and cooperation ang PRRC at CFHEC sa pangunguna nina executive director Jose Antonio Goitia, operations director Anshari Lomodag Jr., general manager Hou Jianchao at business managers na sina Zhang Hanzhou and Liu Mengchen.

Ayon sa PRRC, mayroong kakayahan at track record ang CFHEC para sa “implementing engineering” at “construction requirements” ng mga pampublikong imprastraktura, kabilang dito ang patubig, kalsada, transportasyon at commercial development.

Magsasagawa ang Chinese firm ng isang feasibility study ukol sa rehabilitasyon ng Pasig River system at mga kinakailangan para sa pagsasaayos ng wastewater mula sa pabrika at alkantarilya na napupunta sa ilog.

“Today marks another momentous event in the histories of the PRRC and CFHEC, as both signify to participate in joint undertaking for the cause of attaining the requirements of the Pasig River Integrated and Strategic Master plan,” wika ni Goitia.

Sinabi naman ni PRRC public information office head George Oliver de la Rama na ang PRRC at CFHEC ang tutukoy kung anong teknolohiya ang gagamitin sa rehabilitasyon ng Pasig River.

Dadaan sa isang mahigpit na pagsusuri ang proposal ng CFHEC alinsunod sa batas at regulasyon ng Build-Operate-Transfer Law sa ilalim ng Republic Act No. 6957 na inamyendahan ng RA 7728.

Mag-iimbita ang gobyerno ng mga pribadong grupo na magbibigay ng suhestiyon na maaaring higitan o pantayan ang kanilang panukala.

Ang proyekto ay alinsunod din sa direktiba ng Pangulong Rodrigo Duterte na kontrolin ang polusyon sa Pasig River at palawakin ang kapakinabang nito para sa lahat ng sektor.

Inaasahan ni Goitia na mauumpisahan ang inisyatiba sa kalagitnaan ng taon.

Lumalalang problema sa plastic waste

Nakipagpulong ang World Bank (WB) Group sa PRRC upang masusing pag-aralan ang polusyon sa Pasig River at ang lumalalang problema sa plastik na basura dito at sa mga tributaries nito.

Sa isang panayam na ginanap sa Marine Plastics Conference sa Maynila kamakailan, sinabi ni World Bank senior environmental engineer Gerardo Parco na mayroong kasunduan sa pagitan ng dalawang departamento upang suriin ang 27-kilometrong haba ng daanan ng tubig sa ilog na napupunta sa buong Metro Manila.

Nakatanggap rin ang WB ng pondo mula sa Korean Green Growth Trust Fund, ang koloborasyon sa pagitan ng institusyong pinansyal at gobyerno ng Korea na nakatuon sa mga proyektong pangkapaligiran, ayon kay Parco.

Gayunpaman, tumanggi si Parco na sabihin kung magkano ang halaga ng naturang pondo.

Sinabi naman ni senior environmental specialist Katelijn van den Berg na kasama sa pagsusuri ang surveys ukol sa pinanggagalingan at epekto ng plastik na basura sa hindi bababang limang lugar malapit sa ilog.

Tutukuyin din ang pinakakaraniwang plastik na basura, kung saang bahagi ng waterways pumapasok, at maging ang tatak nito.

“The data that would be gathered will then be used for policy dialogue with the government,” wika ni Parco.

Dagdag pa niya, gagamit ng remote satellites at drones para sa pag-aaral na maaaring magtagal ng dalawa hanggang tatlong taon.

Ayon sa isang pagsusuri noong 2017 ng mga mananaliksik mula sa United States at Netherlands, nagtatapon ng mahigit 63,000 tonelada ng plastik ang Pasig River sa karagatan taon-taon.

“The Philippines is estimated to have the 3rd highest rate of mismanaged plastic waste worldwide,” pahayag ni World Bank Manila Office Operations Manager Agata Pawlowska.

“The Pasig River and Manila Bay have been identified among the water-bodies around the world that need rehabilitation most urgently.”

Panawagang linisin rin ang Laguna Lake 

Nanawagan ang chairman ng House Committee on Ecology na si Quirino district Rep. Dakila Cua na kasabay sa paglilinis ng Pasig River, pagtuunan din ang masusing paglilinis ng Laguna Lake. Ang dalawang ito ang nagsisilbing water source ng Manila Bay, upang siguruhin na magiging matagumpay ang paglilinis ng look.

“I have many questions at the back of my mind. My bigger question is, if we clean up Manila Bay, shouldn’t we have equally intensive approaches on Laguna Lake and also the Pasig River, which all empties into Manila Bay?” wika ni Cua.

“Kasi kung sa tail end lang tayo nagwo-work, kung sa source walang effort, di ba parang sinasalo natin yung gripo? Di ba dapat tini-turn off mo yung waste doon,” dagdag pa niya.

Kinokonekta ng 25-kilometrong haba ng Pasig River ang Laguna de Bay sa Manila Bay.

Mas malinis na ilog at estero 

Tiwala ang Department of Environment and Natural Resources (DENR) na makikita ang pagbabago sa mga ilog at estero sa Metro Manila ngayong taon.

Sa katunayan, sinabi ni Environment Secretary Roy Cimatu na ang kalidad ng tubig sa ilang parte ng Manila Bay ay lumilinis na. May ilang lugar din na maaari ng languyan, partikular na sa Bataan.

Nagdaos kamakailan ng sabay-sabay na paglilinis ang DENR, Department of the Interior and Local Government (DILG), Metropolitan Manila Development Authority (MMDA) at PRRC sa mga ilog at estero na papunta sa Manila Bay.

Upang mapanatili ang kalinisan, sinabi ni DILG Secretary Eduardo Año na naglabas sila ng isang memorandum circular na nag-aatas na mandatory ang cleanup drives kada linggo sa 178 na local government units (LGUs) na pumapalibot sa mga ilog at estero.

“Every week, magko-conduct sila ng cleanup, hanggang maging second nature na sa atin ‘yan, maging part na ng kultura natin. Papakiusapan natin ang DepEd (Department of Education) na turuan ang mga bata maglinis ng kanilang kapaligiran,” wika ni Año.

Ang mga hindi susunod na opisyal ng barangay ay kakasuhan na maaaring humantong sa suspensyon o pagkatanggal sa pwesto.

Ililipat din ang mga informal settlers sa paligid ng estero at ilog sa relocation sites sa Bulacan at Cavite upang maiwasan ang patuloy na pagtatapon ng basura sa katubigan.

Susuriin din ng DENR ang pagpapatupad ng kontrata sa pagitan ng LGUs at kontratistang nakatakdang kumolekta ng basura, ayon kay Cimatu.

“The weakness of the local government and the estero problem, is garbage (collection),” wika ni Cimatu.

“Hindi maganda ang pag-dispose. Ibig sabihin may naiiwan, may hindi nakukuha, na napupunta sa estero…. So gusto namin i-improve ang sistema.”

Sa pakikipagtulungan sa MMDA, titingnan din ng DENR ang mga pabrika at establisyementong nagtatapon ng maruming tubig sa mga ilog at estero.

Kapag nagawa ang lahat ng ito, makakaasa ang mga mamamayan na makakita ng mas malinis na Manila Bay, Pasig River, Laguna de Bay at iba pang waterway sa darating na mga taon.

Gobyerno laban sa El Niño

by

Ni: Jonnalyhn Cortez

MALAKING dagok sa mga Pilipino ang nagdaang kakulangan ng tubig sa ilang parte ng Metro Manila at Rizal. Idagdag mo pa ang dalang matinding init ng El Niño at ang epekto nito sa magsasaka at mga palayan, lalo nang nagkaroon ng mas malaking problema ang bansa.

Bunsod nito, gumawa ang gobyerno ng roadmap upang mabawasan, kung hindi man masolusyunan, ang epekto ng El Niño at siguruhing may tamang supply ng tubig ang bawat lugar sa bansa.

Sa isang pahayag, sinabi ni presidential spokesman Salvador Panelo na kabilang sa roadmap, na iprinisinta sa nakaraang 36th cabinet meeting ni Pangulong Rodrigo Duterte, ang layuning magtayo ng Department of Water and Department of Disaster Resilience.

“A roadmap was presented, which included immediate, medium, and long-term interventions, such as making an intensive campaign for the conservation of water and energy, creating a Department of Water and a Department of Disaster Resilience,” wika ni Panelo.

Kabilang din sa plano ang paglilinis ng waterways, pagpapalit ng tunnels at aqueducts, paglagay ng water tank systems sa lahat ng ospital sa ilalim ng Department of Health (DoH) at pagbibigay ng pondo sa pagtatatag ng water treatment plants.

KAKULANGAN sa tubig, isa sa mga problemang nais solusyunan ng gobyerno.

 

Department of Water 

Maraming lugar ang biglaang nawalan ng tubig dahil umano sa magulong pamamalakad ng mga opisyal na namamahala sa patubig.

Una nang iminungkahi ni Socioeconomic Planning Secretary Ernesto Pernia ang pagtayo ng Department of Water noong Marso, ngunit sinabi ni Panelo na hindi na ito kailangan dahil nasolusyunan na ang problema sa tubig.

Mayroon ding panukalang-batas na nakabinbin sa Senado na naglalayon ng pagtatatag ng nasabing Department of Water, Irrigation, Sewage and Sanitation Resource Management, na ang mandato ay pamahalaan at protektahan ang water resources ng bansa.

Sa kabilang dako, si National Economic and Development Authority (NEDA) Undersecretary Adoracion Navarro ay iprinisinta ang mungkahing executive order (EO) upang baguhin at palakasin ang National Water Resources Board (NWRB).

“The EO will merge the NWRB and the River Basin Control Office into the National Water Management Council (NWMC),” pahayag ni Panelo. “This will streamline and consolidate planning and regulation of all water and river basins in the country. It will also draft a National Water Management Framework Plan.”

SOCIOECONOMIC Planning Secretary Ernesto Pernia iminungkahi ang pagtatatag ng Department of Water upang solusyunan ang problema sa tubig.

 

Water Summit 

Isinagawa ng pamahalaang panlalawigan ng Ilocos Norte ang 3rd Water Summit kamakailan upang talakayin ang mga maaaring hakbang na tutulong mabawasan ang matinding epekto ng El Niño, na dinaluhan ng iba’t-ibang sektor mula sa magsasaka hanggang sa mga stakeholders at mga opisyal at representante ng Department of Agriculture (DA), National Irrigation Authority (NIA), at Philippine Rice Research Institute (PhilRice).

Inihayag ni Philippine Atmospheric Geophysical and Astronomical Services Administration (PAGASA) chief meteorological officer ng Laoag City na si Cynthia Iglesias na ang epekto ng El Niño sa lalawigan ay “minimal lamang,” ngunit mayroon ng mga hakbang ang probinsya upang hindi na lumala ito.

“We have at least five measures that are readily implementable to cushion the impact of El Niño: rain harvesting, switching to short-gestation crops that do not require abundant water to grow, such as monggo, watermelon, and pechay, the use of enhanced fertilizers having better water-retention properties, installation of pond liners to serve as reservoirs, and the use of gray water to avoid wastage and maximize water use,” sabi ni Sustainable Development Center (SDC) head Edwin Cariño.

Parehong payo naman ang ibinigay ni Ilocos Norte Water District (INWD) manager John Teodoro at Department of Environment and Natural Resources (DENR) member Vic Dabalos na magtipid ang publiko sa paggamit ng tubig.

PAGLALAGAY ng solar powered irrigation system, isa sa mga nakikitang pansamantalang paraan upang hindi lumala ang epekto ng El Niño sa mga palayan.

 

Solar-powered irrigation system 

Buong pagmamalaking inihayag ni Agriculture Secretary Emmahnuel Piñol ang paglalagay ng DA ng 6,200 solar-powered irrigation systems sa buong bansa bilang pansamantalang solusyon sa epekto ng El Niño sa mga sakahan.

“This is our short-term solution for El Niño, to build a solar-powered irrigation system. The project has a fund of P4 billion. The solar panels will produce the energy needed for the irrigation to be functional. This will be very effective during dry season,” wika ni Piñol.

Una nang sinabi ng dating journalist na ang paggawa ng panukalang-batas na mag-uutos sa lahat ng komunidad na ipatupad ang water conservation at preservation programs tulad ng pagkakaroon ng maliit na water impounding at water catchment basin ay magiging malaking tulong upang solusyunan ang problema sa tubig.

“We will do our best for this bill to be included in the President’s legislative agenda,” pahayag ni Piñol.

Karaniwang 22 na bagyo ang dumaraan sa bansa taon-taon na maaaring mapagkuhanan ng maiimbak na tubig na gagamitin kung kinakailangan.

“The bill, once it is signed into a law will urge the public to conserve and utilize water resources and can be put in good use during dry season,” dagdag ni Piñol.

Ang mga hakbang na ito umano ang dapat gawin ng mga Pilipino upang mapatupad ang sustainable agriculture.

“There will be a time that our resources will not be able to feed the population in the manner we produce food right now and we do not want that to happen,” sabi ni Piñol.

Ekonomiya mananatiling malakas 

Mananatiling malakas ang ekonomiya ng Pilipinas sa kabila ng epekto ng El Niño.

Sinabi ni Pernia na kabilang na sa pinababang 6 to 7 percent growth na target para sa taong 2019 ang resulta ng epekto ng El Niño sa ekonomiya.

“The 6 to 7 percent is the more realistic target given the reenactment of the budget and the effects of El Niño,” wika ni Pernia.

Inihayag naman ni NEDA Assistant Secretary Carlos Bernardo O. Abad Santos ang epekto ng El Niño sa gross domestic product growth (GDP) para sa buong taon ay papatak ng 0.2 percentage points lamang.

“When the DBCC revised the target for the 2019, that already presumed the weak El Niño and was included in the calculation. It was already incorporated in the revised target,” paliwanag ni Santos. “However, depending on the response that we have, that might even be less. We are very bullish [on growth]. We are still at 6 to 7 percent.”

Naniniwala ang NEDA na mananatili sa 2 to 4 percent ang inflation rate sa kabila ng banta ng El Niño.

“I think we can be confident that we will stay within the target range of 2 to 4 percent. If there’s some impact, then inflation will still be within the target,” pahayag ni Pernia.

Umabot sa bilyun-bilyong halaga ang pinsala ng El Niño sa agrikultura. Inaasahang hihina ang epekto ng tagtuyot sa mga susunod na buwan, ayon sa PAGASA.

Pinas, ginawang tambakan ng basura?

by

SOUTH Korea nagpasok ng tone-toneladang basura sa bansa.

Ni: Jonnalyn Cortez 

MARAMI ang nagulat nang lumabas ang balita tungkol sa tone-toneladang basura na ibinababa sa seaport ng Tagoloan, Misamis Oriental mula sa South Korea noong nakaraang taon.

Nananatiling palaisipan sa maraming Pilipino kung bakit binabagsakan ng mga banyagang bayan ng santambak na basura ang ating bansa na para bang ito ay isang malaking dump site.

Matatandaang nagpasok din ng basura ang Canada dito sa Pilipinas na hanggang ngayon ay nakatambak pa rin sa ating lupain.

Ayon sa mga ulat, dumating sa Mindanao International Container Terminal noong Hulyo 2018 ang ang barko mula South Korea na puno ng basura. Base sa mga dokumentong hawak ng mga Customs officials, ang Koreanong kompanya na Verde Soko Philippines Industrial Corporation ang consignee ng mga kargamento.

Idineklarang “plastic synthetic flakes” ang laman ng naturang kargada, ngunit 5,100 na tonelada ng basura ang nakita rito. Sinasabi ng kumpanya na mali ang naideklarang nilalaman nito at raw materials daw para sa paggawa ng furniture, pero hindi naman maipaliwanag ng kinatawan nito kung paano ito nangyari.

Sinabi naman ni MICT Port Collector John Simon na kung ang idineklarang laman ng padala ay plastic flakes, dapat lamang na plastic flakes ang makikita rito at wala ng iba. Subalit, ilan sa mga natagpuang nilalaman nito ay mga plastic waste, iba’t-ibang materyales katulad ng kahoy at metal waste na pare-parehong hindi dumaan sa tamang proseso ng pagre-recyle.

ECOWASTE Coalition hiniling ang pagbabalik ng basura mula sa South Korea sa kanilang bansa.

 

RE-EXPORTATION AT ANG PANGAKO NG SOUTH KOREA

Ipinangako ng South Korea na kukunin nitong muli ang tone-toneladang basura na ipinasok sa bansa.

Sa isang pahayag, sinabi ng gobyerno nito na magsasagawa sila ng mga hakbang upang mabalik ang mga nasabing basura sa kanilang bansa sa lalong madaling panahon.

“The Ministry of Environment on November 21 initiated legal procedure to have the wastes in question in the Philippines be brought back in accordance with Article 20 of the Law on Cross-border Movement and Disposal of Wastes – Prior Notice of Repatriation Order – and embarked on investigation of the violation of Article 18-2 of the said law – False Export Declaration,” dagdag pa nito.

Ayon sa isang opisyal ng BOC, mga 6,500 na tonelada ng basura ang ibabalik sa Pyeongtaek City. Nagkakahalaga naman ng $47,430 o P2,493,869.40 ang gagawing re-exportation.

“We expect the 51 garbage-filled containers stored at MICT to be homebound by January 9 provided that all regulatory requirements are readily available,” wika ni Simon sa joint news conference ng BOC at EcoWaste Coalition.

“Their expedited re-export is what BOC wants and this is what our people are yearning for,” dagdag ito.

Gayunpaman, siniguro ni Simon na ginagawa nila ang lahat ng dapat ayusin upang matiyak na ang lahat ng basura na nakatambak sa Verde Soko compound sa Barangay Santa Cruz sa Tagoloan ay maibabalik sa pinagmulan nitong bansa ngayong buwan.

Alinsunod sa mga probisyon ng Republic Act 10863 o ang Customs Modernization and Tariff Act, Republic Act 6969 o ang Toxic Substances and Hazardous and Nuclear Wastes Control Act, at ang Basel Convention on the Control of Transboundary Movements of Hazardous Wastes and Their Disposal ang gagawing re-exportation.

Binaba ang desisyon na ibalik ang mga naturang basura isang linggo matapos ang bilateral meeting sa pagitan ng mga opisyal ng Pilipinas at South Korea sa Tagoloan.

Merong higit na 35 na kalahok ang nasabing pulong, kabilang ang isang delegasyon na binubuo ng apat na katao mula sa South Korea na pinamumunuan ni Lee Jong Min mula sa Ministry of Environment.

HALIMBAWA ng basura na itinambak ng South Korea sa bansa.

 

VERDE SOKO, MAHAHARAP SA PAGLILITIS

Ibinunyag ni Environment Undersecretary Benny Antiporda na ang consignee ng kargamento na Verde Soko ay walang sapat na permit mula sa Department of Environment and Natural Resources (DENR) upang mag-import ng materyales na ito sa bansa.

Sa ilalim ng patakaran ng departamento, kinakailangang makakuha ang mga nakarehistrong importer ng import clearance mula sa environment department ng hindi bababa sa 30 araw bago ganapin ang importasyon. Meron hawak na tamang permit ang pagpasok ng basura mula sa Canada.

Sinabi rin ni Antiporda na hindi rehistrado ang naturang kumpanya bilang importer ng mga recyclable materials.

Dagdag naman ni Misamis Oriental Rep. Juliette Uy, nakatakdang magsagawa ng paglilitis ang House of Representatives ukol sa pagbabagsak ng Verde Soko ng foreign wastes sa bansa.

Kailangan umanong humarap ang kumpanya sa provincial government ng Misamis Oriental, DENR at the Phividec Industrial Estate Authority para sa lahat ng posibleng paglabag sa environmental and business operation laws kaugnay sa importasyon ng basura.

IMPORTASYON NG BASURA, INSULTO SA DIGNIDAD NG BANSA

Hindi ito ang unang pagkakataon na may nagbagsak ng basura sa ating bansa.

Noong 2013, matatandaang nag-import ng 50 container ng basura mula Canada ang kumpanyang Chronic Plastics Inc. na nakabase sa Valenzuela City.

Katulad ng kargamento mula sa South Korea, mali rin ang idineklara nitong laman ng kargada na sinasabing recyclable materials.

Nagdulot naman ito ng matinding takot sa mga environment groups sa paniniwalang maaaring naglalaman ito ng mga toxic materials. Mahigit sa kalahati o 29 na containers na ang naitapon sa dump site sa isang landfill sa Tarlac.

Noong 2017 naman, tinawag ng BOC ang atensyon ng isang South Korean shipper na kunin ang iniwan nitong 5,000 metriko tonelada ng pinaghihinalaan ding basura na tinambak sa Mandaue City sa Cebu.

Iprinotesta ng mga environment groups ang pagbabagsak ng basura sa mga daungan sa Pilipinas, lalo na nga pagkatapos magdala ng basura ang Canada sa bansa.

Kinondena naman ni Senator Aquilino Pimentel III ang mga pagbabagsak ng basura na ito sa Pilipinas. Hihingi rin diumano ito ng update ukol sa mga waste materials galing sa Canada.

“As far as I’m aware, as of January 2018, the matter has yet to be resolved. The Canadian Prime Minister promised to resolve the matter when he went here for the 31st ASEAN Summit in November 2017. There’s been no follow through ever since. We need immediate and concrete action on this,” pahayag nito.

Sinang-ayunan naman ito ni Uy at sinabing kinakailangang bisitahin muli ang isyu ng mga basurang nagmula sa Canada pagkatapos masolusyunan ang problema sa South Korea.

“The lessons learned from this Verde Soko case should be applied to the Canada garbage case whenever relevant. There is also the need to have the Department of Foreign Affairs follow-up with Canada on the legal and legislative actions they should have taken by now,” pahayag nito.

Binigyan-diin naman ni Pimentel na hindi “dumping ground” ng kahit sino man ang bansa.

“The Philippines should assert its dignity and co-equal standing as a sovereign state in the community of nations. We should not be seen as a recipient, officially or unofficially, of waste material coming from other countries,” aniya.

Nanawagan naman si Aileen Lucero, EcoWaste Coalition National Coordinator, ng pagpapatibay ng mga mahigpit na patakaran upang mapigilan ang pag-ulit ng mga ganitong pangyayari, kabilang na ang crackdown sa pag-import ng mga plastik na basura.

“We need to act decisively to protect our country from turning into a global dump for plastics and other wastes that China no longer wants,” wika nito.

Laglag ang Balloon Drop

by

Ni: Louie C. Montemar

TONE-toneladang basura ang iniwan ng mga sumalubong sa Pasko sa pambansang liwasang Rizal nitong nakaraang Disyembre 25.  Maraming netizens ang naglabas ng kanilang pagkadismaya sa mga lumabas na larawan ng duming nagkalat sa Luneta.  Para sa marami, usapin daw ito ng kakulangan sa disiplina.  Binigyang-diin naman ng iba ang kakulangan o kahinaan sa pagpapatupad ng batas sa pagkakalat at kawalan ng mga sapat na pasilidad para sa tamang pag-imbak ng basura sa liwasan.

Kung anuman ang ating pagtingin sa ganitong kaganapan sa ating mga liwasan, dapat talagang harapin ang usaping ng pangangalaga sa ating kapaligiran. Ang bansa natin sa ngayon ang ikatlong pinakamalaking kontribyutor sa marine plastic pollution. Malinaw na isang malaking pagbabago sa isip, salita, at gawa ang kailangan nating mga Filipino sa usapin ng pag-asikaso sa basura at pangangalaga sa kalikasan.

Kaugnay nito, isang magandang kaso ang nagpaingay din sa mga netizens ngayong pasara na ang taon. Isang lokal na club, ang Cove Manila, ay nag-aanunsyo ng Balloon Drop. Plano nilang magpakawala at maglaglag ng 130,000 na lobo sa pagsalubong sa Bagong Taon. Sabi ng Cove Manila, ito ay isang opisyal na pagtatangka upang makapasok sa Guinness Book of World Records.  May mga nagtatanong kung tunay bang tinanggap ng Guinness ang nasabing proyekto dahil ayon sa kanilang mga patakaran, hindi na tumatanggap ng mga pagsubok na itinuturing na makakasama sa kapaligiran.

Sinabi rin ng club na ang pagpapakawala at paglalaglag ng lobo ay isasagawa indoors (o sa loob ng isang saradong istruktura) at may tamang pagtatapon sa magiging basura at susubaybayan ito. Pero isipin na lamang natin, 130,000 na lobo ito—isang bagay na mala-plastik at di basta-basta nalulusaw ng natural sa kalikasan. Para na rin tayong biglaan na lamang nagtapon sa kalikasan ng isang bagay na alam nating mananatiling naririyan at basura lamang sa matagal na panahon.

Bakit nga ba dapat natin kailangang lumikha ng basura para lamang magpakasaya at ipagdiwang ang pagpasok ng bagong taon? Ang magandang balita, dahil naging matinding viral na usapin sa social media ang kaso, kagyat  na iniutos na ng Department of Environment and Natural Resources (DENR) ang pagpapatigil sa planong paglalaglag ng mga lobo.  Ayon kay DENR Undersecretary Benny Antiporda, kung ipipilit ito ng Cove Manila, makakasuhan sila sa ilalim ng Republic Act 9003 o ang Ecological Solid Waste Management Act of 2000.

Sana ay matauhan na nga tayo sa mga ganitong walang kapararakang gawain at matuto tayong itigil na rin ang mga kawangis na gawain gaya ng pagpapakawala ng mga lobo sa mga seremonya ng libing at gawaing pampalakasan.  Sa atin din naman kasi ang balik ng basurang iniiwan natin at ikinakalat sa ating kapaligiran.

Manila Bay sasailalim sa rehabilitasyon 

by

DENR nakatakdang isailalim sa rehabilitasyon ang Manila Bay.

 

Ni: Jonnalyn Cortez

PLANO ng Department of Environment and Natural Resources (DENR) na ibalik ang dating ganda at sigla ng Manila Bay.

Gamit ang parehong estratehiyang sa rehabilitasyon ng Boracay Island, determinado si Environment Secretary Roy Cimatu na tanggapin ang hamon na linisin ang Manila Bay.

Pagbuhay sa Manila Bay

Kilala ang Manila Bay sa kabigha-bighani nitong sunset, pero kilala rin ito bilang dagat ng basura. Ngunit sa plano ng gobyernong rehabilitasyon, hindi magtatagal ay muling mabubuhay ang ganda ng look.

“We are preparing for an all-out strategy to bring the coliform concentration in Manila Bay to a safe level so that millions of people who reside in the bay region and neighboring areas will enjoy its waters and marine resources without fear of getting sick,” ani Cimatu.

Sinabi ng retired general na nakikita nitong pangmatagalang solusyon ang pagpapababa sa coliform level ng tubig sa 100 kada 100 milliliters (MPN/100ml) upang muling makalangoy dito at makapagsagawa ng iba pang water activities. Sa kasalukuyan, mayroon itong 333 million MPN/100ml.

Dagdag din ni Cimatu na magpapakita ng parehong political will ang gobyerno sa paglilinis nito tulad ng ginawang rehabilitasyon sa Boracay.

Nanawagan naman si DENR Calabarzon Executive Director Ipat Luna na tumulong ang mga local government units (LGU) na disiplinahin ang mga naninirahan sa easements.

“Kasi ‘pag napigilan natin sila – kahit patrolin mo ‘yan araw-araw, mas maliit pa rin ang gagastusin mo kaysa hanapan mo sila ng bahay. Mas malaking gastusin pag ire-relocate mo na sila,” paliwanag nito.

Sinang-ayunan naman ito ni Cimatu at pinaalalahanan ang mga mga LGU na sumunod sa mga environmental law upang makatulong sa rehabilitasyon ng Manila Bay.

“I am calling on all LGUs to step up their efforts in cleaning up the bay because it is their own constituents who will benefit,” anito.

Polusyon dulot ng domestic waste

Ibinunyag ni Luna na 90 porsyento ng polusyon sa Manila Bay ay mula sa domestic waste.

Pangunahing kontributor umano dito ay ang Calabarzon. Dumidiretso ang basura nito sa Laguna Lake at tumutungo sa Manila Bay.

Sinabi naman ni Cimatu na ang mataas na coliform nito ay dulot ng dumi mula sa mga estero o estuaries sa Metro Manila.

Dagdag nito, natukoy na ng DENR ang apat na pangunahing estero na nagdadala ng bilyong coliform sa mga tubig kabilang na ang Pasig River. Dalawa naman dito ay nakakaapekto lamang sa Manila Bay. Isa nga rito ang Estero de San Antonio de Abad sa Malate, Manila, na nakatakdang inspeksyonin ni Cimatu.

“If we control these four esteros, I am very optimistic that the coliform level of the bay will be reduced significantly,” pagtitiyak nito.

Hamon kay Cimatu

Malaking hamon para kay Cimatu ang paglilinis ng Manila Bay dahil sakop nito ang apat na lungsod — Metro Manila, Cavite, Bulacan at Bataan.

“We have divided the cleanup based on these areas but we will concentrate first here in Metro Manila,” pahayag nito.

“This is urgent because I believe that during habagat, dirt and garbage is blown to the west and stagnates in Manila Bay.”

Nakatakdang magsimulang bumisita si Cimatu sa mga gusali, pagawaan, at sapa na nagtatapon ng maruming tubig dito.

Determinado umano itong ipasara ang mga makikita nitong establisyemento na lumalabag sa environmental laws na malapit at nasa paligid nito.

Plano ni Cimatu na makipagpulong sa mga stakeholders at opisyal ng gobyerno sa lalong madaling panahon upang mailunsad nila ang kanilang plano sa darating na Enero 2019.

“We start this early and we are planning to have a meeting-conference with stakeholders and city mayors of Metro Manila,” anito.

“After that, we’ll be launching also this plan into reality within the month of January so that we expect that at the end of this year, by Christmas next year we’ll have a better Manila Bay.”

Dati nang iniutos ni Cimatu sa Manila Bay Coordinating Council ang paggawa ng draft master plan para sa rehabilitasyon. Bukod naman sa DENR, 15 pang ahensya ng gobyerno ang magtutulung-tulong na gumawa ng draft rehabilitation plan para rito.

DENR Sec. Roy Cimatu at Sen. Cynthia Villar

 

Pagkilala kay Villar

Kinilala ng DENR ang pagsisikap ni Senator Cynthia Villar na linisin at isailalim sa rehabilitasyon ang Manila Bay sa ika-10 anibersaryo ng pagpapalabas ng mandamus ng Supreme Court na nag-uutos sa 13 ahensya ng gobyerno na pangunahan ang rehabilitasyon ng look.

Si Villar ang chairperson ng Committee on Environment and Natural Resources.

“Manila Bay is one big toilet kaya hindi malinis-linis,” anito pagkatanggap ng plake mula kay DENR Undersecretary Sherwin Rigor sa harap ng representante mula sa mandamus agencies at opisyal ng DENR.

Pinansin din nito ang kawalan ng waste water treatment facilities na siyang nagiging dahilan ng mataas na coliform level sa tubig.

Pinuri naman ni Villar si Cimatu nang ianunsyo nito ang planong rehabilitasyon.

Sinabi ng senadora na maaaring magsilbing modelo ng paglilinis ng look ang kanyang dalawang proyekto sa Manila Bay.

Isa rito ay ang Las Piñas-Parañaque Wetland Park, kungsaan nagsasagawa ng buwanang clean-up at tree-planting activity. Ang isa naman ay ang proyekto niya sa Baseco Compound, kung saan sa tulong ng Villar Social Institute for Poverty Alleviation and Governance kaakibat ang Department of Health (DOH) ay nakapagtayo sila ng mga palikuran para sa mga residente. Nakagawa naman sila ng mga livelihood projects katulad ng aquaculture at urban gardening para sa mga nakatira rito sa pagtutulungan ng Department of Agriculture (DA) at Pasig River Rehabilitation Commission.