YNA MORTEL
BIGONG makapasok sa Top 10 ng Miss Universe 2019 ang pambato ng Pilipinas na si Gazini Ganados.
Hindi nakalusot ang Cebuana-Palestinian beauty sa listahan ng sampung kandidata na aabante sa swimsuit at evening gown competition ng pageant.
Nagtapos sa Top 20 ang Pinay beauty queen matapos na makapasok at unang tawagin sa wild card category.
Sa kaniyang opening speech, ipinahayag ni Gazini ang kaniyang adbokasiya na nakatutok sa mga nakatatanda.
Bigo mang masungkit ang ika-limang Miss Universe crown ng Pilipinas ay bumuhos pa rin ang pagbati ng mga proud Pinoy para kay Gazini.
Sa katunayan, pinuri ng Palasyo ang maayos na pag-presenta ni Ganados sa Pilipinas sa prestihiyosong beauty pageant na ginanap sa Atlanta, Georgia sa USA.
Ayon kay Presidential Spokesperson Salvador Panelo, nagbigay ng “pride and glory” sa bansa si Gazini sa pamamagitan ng pagpapakita ng kakaibang ganda at talento ng isang Filipina.
Dagdag pa ni Panelo na ang karanasan ni Ganados sa Miss universe ay tiyak na makadadagdag sa kanyang development bilang isang beauty queen.
Hangad din aniya ng Malacañang ang lahat ng kabutihan ng 23-year-old beauty queen para sa iba pang susuungin sa buhay.
