PINAS

Ang Lihim ng Panginoon (Ikapitong Bahagi)

Sonspeak

Recent News:

Germany

Kauna-unahang hydrogen train lumarga sa Germany

by

Tahimik at matagumpay ang unang byahe ng Coradia iLint.

 

Ni: Eugene B. Flores

PATULOY na lumalala ang sitwasyon ng mundo tungkol sa usapin ng polusyon. Isa sa pangunahing nagdudulot nito ay ang diesel engines.

Ginagamit ang diesel sa maraming bahagi ng mundo lalo na sa Third World dahil ito ang maituturing na isa sa pinaka-epektibong enerhiya sa pagpapatakbo ng mga makinarya, sasakyan at elektrisidad sa buong mundo. Isa rin sa dahilan kaya palasak ang gamit nito ay dahil mas mababa ang halaga nito sa gasolina.

Ngunit kaakibat ng malaking ginagampanan ng diesel sa pagpapatakbo ng industriya ay ang matinding epekto nito sa kapaligiran at kalusugan.

May mga pananaliksik na nagtuturo sa diesel na isa sa mga sanhi ng kanser, respiratory problems at cardiovascular diseases sa mga manggagawa o mga taong exposed sa diesel fumes. Apektado rin nito ang tubig, hangin at lupa.

Subalit hindi pa kayang iwaksi ang paggamit ng diesel. marami pang taong mamamalagi ang diesel sa maraming bansa. Kakailanganin pa rin ng ilang sektor ang diesel sa susunod na mga taon kung kaya’t lalong manganganib ang ating kapaligiran.

LABAN KONTRA POLUSYON

May nakikitang solusyon ang mga Aleman sa hamong ito. Kamakailan lamang bumiyahe sa unang pagkakataon mula sa istasyon ng Bremevorde sa Lower Saxony ang dalawang Coradia iLint o hydrogen trains na papalit sa mga diesel train dito.

Ang kulay asul na hydrogen train ang bagong tatakbo sa ruta na nagdudugtong sa bayan ng Cuxhaven at Buxtehude na may layong 62 milya o 100 kilometro. Karaniwang binabagtas ito. ng mga diesel train. Tuluyang ilulunsad ang bagong teknolohiya sa 2021 kung saan 14 pa na hydrogen train ang tatakbo mula sa istasyong ito.

Mahalagang hakbang ito ng gobyerno ng Germany upang labanan ang lumalalang polusyon sa hangin.

Marahil, may mas malalim na dahilan kung bakit asul ang napiling kulay para sa hydrogen train.  Malamang may reference ito sa “blue flame,” ang pinakamalinis at pinakaepektibong apoy hindi lamang para sa pagluluto kundi sa manufacturing process din.

Ang kompanyang TGV-maker Alstom ang siyang gumawa ng tren na pinatatakbo ng hydrogen

“The world’s first hydrogen train is entering into commercial service and is ready for serial production,” wika ni Henri Poupart-Lafarge, CEO ng Alstom.

Nakatakda namang magbayad ng 81.3 milyon euro o $95 milyon ang estado ng Lower Saxony para sa proyektong ito.

Ito’y bahagi ng advocacy ng bansa na higit na gamitin ang mga renewable fuel at bawasan ng malaking porsyento ang polusyon sa taong 2050.

Tinawag nilang “Energiewende” ang policy na ito. Ang Energiwende ay naglalayong gumamit ng green power sources mula sa dating nuclear at coal power.

Maaliwalas ang loob ng hydrogen train.

 

HYDROGEN TRAIN

Paano at ano ang nagpapatakbo sa hydrogen train? Mayroong fuel cells sa bubong ng tren at may  tangke ng hydrogren sa loob. Pinaghahalo ang hydrogen at oxygen upang magkaroon ng elektrisidad para patakbuhin ang tren.

Dahil sa ganitong pamamaraan, tanging tubig at singaw (steam) lamang ang ilalabas ng tren sa atmosphere kumpara sa mga tren na pinagagana ng diesel na bumubuga ng usok na kung minsan ay itim na.

Ayon sa kompanya ang isang tangke ng hydrogen ay kayang magamit para makatakbo ang tren ng  1,000 kilometro katulad din ng kayang takbuhin ng diesel train.

Nasa 87 milya kada oras o 140 kilometro kada oras ang pinakamabilis na takbo ng hydrogen train at lubhang mas tahimik kumpara sa dating diesel train.

Naiipon naman sa ion lithium batteries ang mga enerhiyang hindi nagagamit ng hydrogen train sa normal na pagbiyahe nito.

Plano ng gobyerno ng Germany na mapatakbo na ang lahat ng hydrogen train sa 2022.

PRESYO AT SERBISYO

Sa mga nabanggit na katangian ng bagong teknolohiya mas mahal ang halaga nito ngunit tiniyak naman ng Alstom na madali itong patakbuhin.

“Sure, buying a hydrogen train is somewhat more expensive than a diesel train, but it is cheaper to run,” wika ni Alstom project manager Stefan Schrank.

“In line with our aim to facilitate a global transition to a low-carbon transport system, Alstom has pioneered several sustainable mobility solutions. The Coradia iLint is a perfect illustration for our commitment to designing and delivering innovative and environmentally-friendly solutions,” pahayag ng Alstom sa kanilang website.

INTERES MULA SA IBANG BANSA

Nagpakita ng interes ang mga karatig bansa sa pagbili ng hydrogen train. Kabilang sa mga bansang ito ay ang Denmark, Canada, United Kingdom, Norway at Italy.

Sa kabilang banda naman, kumuha rin ng eco-friendly buses sa ibang bansa ang Germany upang paigtingin ang laban nito sa pagpapababa ng polusyon sa bansa.

ADVANTAGE AT DISADVANTAGE

Bagama’t isang magandang hakbang ang proyektong ito, mayroon pa ring advantage at disadvantage ang paggamit ng hydrogen bilang fuel sa pagpapatakbo ng tren.

Sagana at renewable ang hydrogen kung kaya’t hindi ito mahirap makuha gayon din ang napakalakas nitong enerhiya.

Isang malaking kalamangan nito, hindi ito nakadadagdag sa polusyon na nagdudulot ng climate change ngunit kinakailangan pa rin ang fossil fuels. Ang fossil fuel ay isang non-renewable energy surce na taliwas din sa kanilang nais na green power sources.

At kapalit naman ng mataas na presyo ng hydrogen train — ito ay low maintenance at mas matagal ang itatakbo kaysa sa diesel train.

Patuloy na lumalawak ang mga teknolohiya sa iba’t-ibang panig ng mundo at inaasahan na ang mga ito ay magresulta ng higit na pagpapabuti ng kapaligiran, komunidad at higit sa lahat maisusulong ang mas kaigaigayang kalidad ng pamumuhay sa lahat ng aspeto.

Isang malaking hamon sa kasalukuyan ang global warming at climate change, ang paglikha ng mga gamit at sasakyang pinatatakbo ng renewable energy sources ay isang malaking tulong at hakbang upang mabigyang lunas ang lumalalang sakit ng kapaligiran.

Aljona Savchenko, wala sa edad ang pagpatuloy ng pangarap

by

Perfect, ganito ang pagkakasulat ng ilang pahayagan sa ginawang performance ni Massot at Savchenko.

 

Ni: Ana Paula A. Canua

MAS madaling sumuko kapag mas lamang na ang talo kaysa sa panalo, ngunit hindi ito ang pinaniniwalaan ni Aljona Savchenko, isang Ukraine figure skater. Sa kanyang edad na 34-anyos hindi binitiwan ni Savchenko ang kanyang pangarap na makapag-uwi ng ginto sa Olympics, ito ay sa kabila ang mas tumataas na kompetisyon dahil sa mga bagong batang atleta.

Sa kanyang ikalimang pagkakataon  sa Olympics, ginawa ni Savchenko ang lahat ng makakaya ng sa gayon sa kanyang muling pag-uwi  hindi lamang karangalan ang kanyang dala, kundi ang mataas na pangarap para sa bansa lalo pa’t hindi gaanong binigyan ng halaga ang ice skaters athletes sa Ukraine.

“I never give up, all my life I’ve been fighting.”

Pagdating ng tamang oras

Pinanganak noong 1984 sa Ukraine si Savchenko, kwento niya noong bata pa lamang siya gustung-gusto niya ang pakiramdam  na sumasayaw sa yelo. Para sa kanya hindi lamang sport ang figure skating kundi isa ring sining.

Unti-unti hindi na lamang libangan ang figure skating para kay Savchenko, nang mapanood niya sa telebisyon ang mga  figure skating competitions gaya sa Olympics, nabuo ang kanyang pangarap na balang araw ay makasali at makapag-uwi ng gintong medalya.

Taong 2002, sa edad na 18-anyos sumabak siya sa kauna-unahang pagkakataon sa Olympics na ginanap sa  Salt Lake City Games, Ukraine. Bitbit ang bandila ng kanyang bansa, nagpakitang gilas si Savchenko at ang kanyang partner na si  Stanilav Morozov. Puno ng pag-asa at pagmamahal na pinasok ng duo ng ice skating rink, at lumabas uwi ang 15 pwesto.

Noong taong 2003, lumipad patungong Germany si Savckenko para maghanda sa 2006 Olympics, ngunit sa ikalawang pagkakataon hindi siya muli nakapag-uwi ng medalya. Taong 2010 muli siyang sumali sa Olympics, sa wakas nakapag-uwi ng bronze ang duo at noong 2014, kasama ang kanyang partner na si Robin Szolkowy nasundan muli ito ng isa pang bronze medal.

Sa puntong iyon naisip ni Savchenko na panahon na ito para bumitaw sa pagsali sa Olympics, hanggang sa biglang dumating ang malaking pagkakataon na makapareha si Bruno Massot, isa sa mga tinitingala dahil sa husay sa figure skating.

Ginugol ng pagkapares ang apat na taon para sa pagsasanay at noong 2018 lumipad patungong Pyeongchang si Savchenko at Massot, ito na ang ikalimang pagkakataon ni Savchenko sa Olympics.

Sa unang round, nasa ika-apat na pwesto ang partner skater. Sa puntong ‘yon nabawasan ang kumpiyansa ni Massot na masungkit pa ang ginto, kadalasan kasi senyales na ang first round kung sino ang makapag-uwi ng ginto.

“It was hard for me, but Aljona was there for me. She said: ‘It is not finished. We still have the free programme to come,’” kwento ni Massot.

“I got the gold medal in my head. I said I don’t want my partner Savchenko to come back with another bronze medal. She deserved this gold medal.” Dagdag niya.

Sa second round ng laro ang free programme stage, iisa lamang ang hangad ng magkapares ang makakuha ng mataas na score para maitaas sila mula sa ika-apat na pwesto.

“I said to Bruno ‘We will write history today.’ And then everything happened as I had imagined, and it came true,” pagbabalik-tanaw ni Savchenko.

“Nothing is over until everything is over,” Savchenko

Nakakuha ng score  na 159.31 sina Savchenko at Massot ang score na ito ang kasalukuyang pinakamataas na score sa kasaysayan ng pairs figure skating.

 

Savchenko at Massot. Hindi na napigilan ng magkapareha na maging emosyunal matapos ang performance.

 

Person of the Year

Matapos ang pinakitang dedikasyon sa larangan ng sports, ginawad ng  Icenetwork ang titulong 2017-2018 person of the year si Savchenko.

Ito rin ang kauna-unahang gintong medalya  sa Olympics ng bansang Alemanya, simula 1952.

“It is my moment, we celebrated New Year’s together and we said, ‘2018 will be our year,’ and it became our year.’

Pay it forward

Matapos ang tagumpay, nais ibahagi ni Savchenko ang kanyang mga natutunan sa figure skating. Sa ngayon nakalaan na ang kanyang lakas at oras para mag-coach ng mga bagong henerasyon  ng mga figure skaters.

“I like to share my knowledge with skaters who are already there, who have potential, and who I feel I can help.  The best (approach) is always to create what fits the athletes best and how they feel, not what we created for ourselves. We have to see what style they have, what they’re good at and what they’re not good at, what choreographic style they feel confident with”

Benham Rise, pag-aari ng Pilipinas — Duterte

by

Ni: Quincy Joel Cahilig

SA paggunita ng unang ta­on ng Philippine Rise, muling binigyang diin ni Pangulong Rodrigo Roa Duterte na walang ibang bansa ang pwedeng umangkin dito at sa mga yamang taglay nito. Sinabi pa niya na handa siyang makidigma sa sinomang bansang aangkin dito.

 “Hindi ako papayag. And it will mean war. Nandoon na ‘yung Marines, huwag kayo matakot. Kasama ako doon, sabay tayo sa barko,” matapang na sinabi ni Duterte sa kanyang talumpati sa Natio­nal SWAT Challenge sa Davao City.

“We will never agree to an insult like that na just because ganito lang tayo you start to fuck with the areas there. I’ll go to war. Do not mess with us because we would not allow it. If it’s time to go to heaven, so be it. Huwag kayo matakot, mauna ako doon,” aniya.

Mayo 2017 nang opisyal na palitan ni Pangulong Duterte ang tawag sa Benham Rise bilang Philippine Rise sa bisa ng isang Executive Order matapos makita ang ilang barko ng China sa karagatang sakop ng teritoryo ng ating bansa.

Kinikilala ng United Nations Commission on the Li­mits of the Continental Shelf na bahagi ng teritoryo ng Pilipinas ang Benham Rise, ang undersea plateau 135 mil­ya mula sa dalampasigan ng lalawigan ng Aurora, na may lawak na 13 milyong ektarya. Tanging ang bansa lamang ang may karapatan dito.

Ang pagkilalang ito ng UN ay sinusuportahan ng mga iprinisinta ng Pilipinas na iba’t-ibang mga scientific at technical evidence, gaya ng geodetic, bathymetric, geophysical, at geological data mula sa iba’t-ibang ahensya ng pamahalaan at mga international sources upang mapatunayan na sakop nga ng pambansang teritoryo ang Benham Rise.

Ngunit nitong Pebrero ay lumutang ang balitang pina­ngalanan at matagumpay na nairehistro ng China ang limang undersea features ng Philippine Rise sa International Hydrographic Organization.  Inaangkin ng China na sila ang “nakadiskubre” sa mga ito noong 2004.

Matapos pumutok ang balita, ipinag-utos ng Pangulo na tigilan na ang lahat ng pagsisiyasat na isinasagawa ng mga dayuhan sa Philippine Rise. Kinansela niya ang 30 lisensya ng mga maniniyasat mula sa United States, China, Japan, South Korea, at Germany at inatasan ang Philippine Navy na magpatrolya sa nasabing lugar.

 

Ano ba ang mayroon sa Philippine Rise?

Ang Benham Rise ay natu­klasan ni U.S. geologist Andrew Benham noong 1933. Ito ay tinatawag na “natural submarine prolongation” of Luzon na may lalim na 3,000 hanggang 3,500 metro. Pinaniniwalaan ng mga eksperto na mayaman ito sa mineral at gas deposits.

Sa Benham Bank ang pi­nakamababaw na bahagi nito, na may lalim na 48 hanggang 70 metro, naninirahan ang iba’t-ibang klase ng hayop at halamang dagat.

Ayon sa mga siyentipiko, nasa 200 fish species ang makikita sa Philippine Rise na kinabibilangan ng surgeonfish, hawk fish, at damselfish, kasama na din ang dambuhalang tiger shark, at mga soft at hard corals, algae, at sponges. Sinasabi rin na maraming klase ng tuna ang makukuha din dito tulad ng big-eye, yellowfin tuna, at albacore. Kaya naman malaki ang pakinabang sa Philippine Rise ng mga mangingisda sa mga lalawigan ng Quezon, Aurora, at Catanduanes.

Batay naman sa pag-aaral ng Department of Environment and Natural Resources, may mga indikasyon ng malalaking deposito ng solid methane, na isang uri ng na­tural gas sa ilalim nito.

Kaya naman hindi na kataka-taka na maraming bansa ang interesado sa nasabing yamang taglay ng Pilipinas.

 

Maritime research susi sa proteksyon ng Philippine Rise

Nakasaad sa Article XII, Section 2 ng Saligang Batas, ang Estado ay may mandato na protektahan ang mga yamang dagat na sakop ng teritoryo ng bansa, at exclusive economic zone upang mapakinabangan ang mga ito ng mamamayang Pilipino.

Upang maprotektahan ang Philippine Rise, magsasagawa ang gobyerno ng national maritime scientific research (MSR) program dito, na pa­ngungunahan ng 50 Pinoy scientists.

Lulan ng BRP Gregorio Velasquez, ang research vessel na donasyon ng Amerika, lalayag ang mga eksperto sa Philippine Rise at isasagawa ang kanilang pag-aaral hanggang sa huling linggo ng Mayo.

Layunin ng pag-aaral na pangalanan ang limang undersea features sa Philippine Rise, na paghahayag din ng di pagkilala ng Pilipinas sa mga pangalang ibinigay ng China sa mga ito.

Bukod dito, nais ding maunawaan ng mga siyentipiko ang mga prosesong nangyayari sa ating mga karagatan mga impormasyong mahalaga para sa sektor ng pangingisda sa bansa.

Mataas ang kumpiyansa ni Dr. Mario Aurelio, director, UP National Institute of Geological Sciences, na sapat ang kakayahan ng mga siyentipikong Pinoy na magsagawa ng MSR sa Philippine Rise.

“Yes, indeed we have the technical capability, meaning, the expertise,” wika ni Aurelio.

Aniya, matagal nang isinasagawa ng mga Filipino scientists ang pag-aaral sa ating mga karagatan ngunit hindi nga lang laganap sa kamalayan ng publiko ang kanilang mga gawain sa mga nakalipas na taon.

Bagamat tiwala sa kakayahan ng ating mga siyentipiko, aminado si Aurelio na pag dating sa kagamitan ay mayroon pa ring kakulangan.  Ngunit, pinag-uusapan na umano ng pamahalaan at ng iba pang mga sektor na may kinalaman sa marine scientific research and exploration, ang pagbili ng karagdagang mga kagamitan at sasakyang pandagat upang malubos ang mga pagsisiyasat na isasagawa sa hinaharap.

“At present, the Philippines­ does not have a comprehensive agenda that would incorporate all the sectors or all the perspective of scientific research from solid earth to atmospheric to meteorological,” wika ni Aurelio. “And so the objective of this, what we call roundtable discussions now, is geared towards esta­blishing the National Marine Research Agenda.”

Dagdag ni Aurelio, layunin ng itatatag na National Marine Research Agenda na makabili ng karagdagang equipment tulad ng underwater drones, research vessels, at remote operated vehicles.

Aminado naman ang naturang ekperto na, sa ngayon, ay hindi pa sapat ang pondo ng pamahalaan para sa pagsasagawa ng MSR.  Wika ni Aurelio, umaaot sa PHP 5 bilyon ang kailangang halaga para makabili ng isang marine research vessel. Samantalang ang isang MSR abroad ay magkakahalaga ng PHP 3.8 milyon kada araw.

Piolo Pascual at Shaina Magdayao magkasama sa Berlin

by

Ni: Beth Gelena

MAGKASAMA na um-attend sina Piolo Pascual at Shaina Magdayao sa Berlin, Germany para sa 68th Berlin International Film Festival.

Lahok sa naturang filmfest ang kanilang movie “Panahon ng Halimaw” (Season of the Devil) na dinirek ng award-winning director na si Lav Diaz.

Saksi ang mga nasa Berlin nang i-hug ni Papa P. Si Shaina nang napakahigpit bago sila naglakad sa red carpet.

Halatang sobrang na-miss ang magandang aktres kaya ganun na lang daw kung yakapin ng aktor ang ka-nyang leading lady.

May pinagsamahan naman kasi ang dalawang ito kung saan na-tsitsismis nga silang magkarelasyon.

Puksain ang peste sa pamamagitan ng mobile app

by

Ni: Ana Paula A. Canua

INIISIP natin marahil na pinapatay ng teknolohiya ang agrikultura at pamumuhay ng mga magsasaka, sapagkat ngayon ay maaari nang magpatubo ng halaman sa laboratoryo, nariyan na rin ang modified foods at processed foods; mga pagkaing mas malasa, masarap at mabilis anihin, ito na rin ang ilan sa mga dulot ng teknolohiya sa ating mga kinakain.

Ngunit hindi lang iyon ang kayang gawin ng teknolohiya sa sektor na ito.  Dahil gamit ang siyensya at teknolohiya na-develop ang isang mobile app na tutulong sa mga magsasaka na tukuyin ang iba’t ibang uri ng peste na pumapatay sa kanilang mga tanim.  Pinatunayan nito na sa panahon ngayon ay kailangan din pala ang teknolohiya ng agrikultura.

Kada taon, isa sa mga dahilan ng pagkalugi ng mga magsasaka ay ang bagyo, tagtuyot at peste. Tanging peste lamang ang kayang solusyunan sa mga ito, dahil ang dalawang natira ay likas na sa panahon.

Gamit ang mobile app na Plantix, maaari ng matukoy ng mga magsasaka ang peste ng pumapatay sa kanilang hanap-buhay. Na-develop ang app na PEAT (Progressive Environmental & Agricultural Technologies) na binubuo ng mga graduating students at scientists mula sa Berlin, Germany. Bukod sa peste, matutukoy din ng app ang problema gaya ng nutrient deficiency sa kanilang pananim.

Inilarawan ni David Hughes mula Penn State, isa sa  co-leads ng  proyekto, na “transformative” na  kayang ma-amplify ng  isang daang beses  ang nasimulan nila, sa tulong na rin ng mga magsasaka at mga gumagamit ng app.

PAANO ITO GINAGAWA?

Ang diagnostic app ay may image recognition, kailangan lamang na kunan ng litrato ang apektadong halaman. Nangangailangan ng internet upang matukoy kung anong peste o problema ng halaman, kaya mahalaga rin na may maayos na internet connectivity sa rural areas para ma-access ang app. (Sa kasalukuyan mga bansang Germany, Brazil at India ang nakatatamasa ng Plantix.)

Matapos matukoy ang problema, magbibigay ang app ng solusyon at kung paano ito maiiwasan.

“It was really important for us to understand what farmers wanted,” pahayag ni Charlotte Schumann, co-founder of Pea, “so we did a lot of groundwork in India.”

Kapag hindi matukoy ng app ang problema, ipapadala ang larawan upang  makita ng pathologists at eksperto, sa pamamagitan din nito na maaaring makadiskubre ng mga bagong species ng insekto.

Ang Plantix ay isang multi-lingual app, kaya nitong magsalin sa tatlong wika ang Hindi, Telugu at English. Libre at puwede itong i-download sa google play. Natutukoy din ng app ang klima at panahon sa lugar na isa rin sa mga posibleng dahilan ng pagbabago sa pananim.

Sa kasalukuyang database ng PEAT mayroon itong 1.5 million na larawang natanggap mula sa 100,000 noong nakaraang taon. At 80% ng users nito ay nagmula sa India na katumbas ng 300,000 hanggang 400,000 na tao.

MAGANDANG ANI  

Ngayong nasimulan na ang ganitong “breakthrough” sa agrikultura isa itong hamon sa iba pang innovators na tapatan o higitan ang Plantix, maganda ring mungkahi na gumawa ng sariling bersyon ng diagnostic app ang Pilipinas, na naayon sa mga pananim at karaniwang peste na mayroon sa mga probinsya. Sa pamamagitan nito magdudulot ng malaking tulong sa lokal na industriya ng pagsasaka sa bansa, bukod din sa maisasalba ang pananim, maisasalba rin ang hanap-buhay at presyo ng bilihin sa merkado. At kung hindi kaya ng mga magsasaka nariyan ang mga anak nila na “millenials” kung tawagin nga, na pwedeng mag-access sa app.

 

Knauf sa Germany, mamumuhunan ng P2.5 bilyon sa Pilipinas

by

NI: SHANE ELAIZA ASIDAO

Mamumuhunan ang Knauf Gips KG, nangungunang manufacturer of building solutions ng bansang Germany, ng USD50 milyon o PHP2.5 bilyon sa Pilipinas ayon kay Department of Trade and Industry (DTI) Secretary Ramon Lopez.

Magtatayo umano ng pasilidad ng pagawaan ang naturang kumpanya sa Calaca Seaport sa probinsiya ng Batangas upang maglikha ng gypsum-based plasterboard kungsaan nangunguna ito sa paggawa ng naturang produkto sa mundo.

Ayon kay Lopez, ang itatayong pagawaan sa Batangas ay magdulot sa kapwa lokal at internasyonal na  merkado at ang inisyal na puhunan nito ay magbigay ng 100 bilang na trabaho.

“They recognize the fast growing Philippine market, the stability of business environment in the Duterte administration and the quality output of Filipino workers,” wika ni Lopez.

“DTI and BOI (Board of Investments) committed to provide assistance in documentary requirements and accredited contractor as they aim to commence commercial production toward early 2018,” dagdag ni Lopez.

Kamakailan lang ay nagkaroon na ng groundbreaking nakarang Mayo 9 sa isang 6-ektaryang lupain sa Calaca Seaport ang naturang kumpanya.

Malaki ang paniniwala ng Knauf sa pagtayo ng pagawaan sa Pilipinas dahil sa umuunlad na konstruksyon at mabilis na pagtubo ng ekonomiya ng bansa.

Kabilang sa mga produkto ng Knauf Group ang modern insulation materials, dry-lining systems, plaster and accessories, thermal insulation composite system, paint, floor screed, floor systems, at construction equipments and tools.

Umabot na sa 150 bilang ng manufacturing plants at sales organization ang naturang kumpanya na may 26,000 bilang ng mga empleyado sa mundo.

Close Bitnami banner
Bitnami