Give Us This Day

Pang. Duterte, hindi tatalima sa pagpapaimbestiga ng Iceland sa isyu ng EJK sa bansa

July 20, 2019 by PINAS

Hannah Jane Sancho

NANINDIGAN si Pang. Rodrigo Duterte na hinding-hindi ito tatalima sa pagpapaimbestiga ng bansang Iceland sa umanoy nagaganap na mga extra judicial killings o EJK sa bansa.

Sa ekslusibong panayam sa “Give Us This Day” program sa Davao City ni Doctor Fellow Rev. Pastor Apollo C. Quiboloy, galit na sinabi ng pangulo na walang karapatan ang Iceland na paimbestigahan ang “war on drugs” ng pamahalaan.

Punto pa ng pangulo, gumagana at walang problema ang justice system ng bansa kaya wala itong nakikitang bigat para humarap sa anomang foreign panel investigation.

Matatandaan na ang Iceland ang nag-sumite ng resolusyon sa United Nations Human Rights Council (UNHRC) na nagpapaimbestiga sa war on drugs ng pamahalaan.

Samantala, inilahad ng pangulo ang mga aasahan ng publiko sa susunod na natitirang kalahating taong panunungkulan nito sa bansa.

Aniya tuluyang ibabalik nito ang karapatan ng mamamayang Pilipino na magkaroon ng kalye at parke na ligtas mula sa anumang krimen.

Tiniyak din ng presidente na mababawasan pa ang kaso ng iligal na droga na siyang nagdudulot ng krimen.

“I would return the right to use the streets and alleys I have made my mark very clear there are less drugs in the streets both side east and western,” saad ng pangulo.

Target din ng pangulo na mas mapababa pa ang pandarambong at korupsyon na umiiral sa gobyerno.

“I cannot cope up with the corruption in the government sometimes I feel helpless and hopeless even in the cabinet,” ayon pa sa pangulo.

Maliban dito, mayroon pang 4,000 appointments na kailangang pirmahan ng chief executive para mapunan ang mga bakanteng pwesto sa pamahalaan.

“Meron pang mga bakante. Maybe because of my training as a lawyer that before I sign, I have to read and it takes time just reading a voluminous paper,” ayon kay Duterte.

Plano rin ni Pangulong Duterte na permanenteng buksan ang Sulu bilang barter trade kasabay ng pagsiguro na walang tahasang pagpupuslit.

Wag pabiktima sa investment scams

July 2, 2019 by PINAS

Naunang ipinahayag ni Pangulong Rodrigo Duterte sa programang Give Us This Day ni Pastor Apollo Quiboloy ang kanyang utos sa NBI at CIDG na i-shut down ang operasyon ng KAPA dahil isa umano itong scam. (Larawan mula sa PCOO)

Ni: QUINCY CAHILIG

MAUGONG na usapin ngayon ang pagpapasara ni Pangulong Rodrigo Duterte sa Kapa Community Ministry International, Inc. dahil sa umano’y pagkakasangkot ng samahan sa pyramiding scheme.

Sa exclusive interview ni Pastor Apollo C. Quiboloy sa palatuntunang Give Us This Day, naunang ipinahayag ng Chief Executive ang kagustuhang ipasara ang Kapa dahil sa mga reklamong ipinupukol dito. Kaya inatasan niya ang National Bureau of Investigation (NBI) at ang Philippine National Police-Criminal Investigation and Detection Group na isara ang naturang religious group.

Naunang sinita ng Securities and Exchange Commission (SEC) ang Kapa dahil sa mga solicitation nito. Ayon sa ahensya, hindi authorized ang samahan na tumanggap ng investments, na malinaw na paglabag sa Securities Corporation Code of the Philippines. Dahil dito, sasampahan ng kasong criminal ng SEC ang mga opisyal ng Kapa dahil sa kanilang investment scam na di umano’y nakakulimbat ng aabot sa P50 bilyon mula sa kanilang mga miyembro.

Ang Kapa o Kabus Padatuon (na ang kahulugan ay “make the poor rich”) ay itinatag ni Pastor Joel Apolinario at inirehistro bilang isang religious group sa Bislig noong Marso 2017. Marami ang naenganyong sumali dito dahil sa pangako nitong pagpapala na mag-aahon sa miyembro mula sa kahirapan.

Hinihikayat ng Kapa ang mga miyembro na magdonate ng di bababa sa P10,000 kapalit ng 30 porsyentong monthly return, na tinatawag nilang “blessing” or “love gift,” na kanilang tatanggapin habang buhay. Wala umanong ibang gagawin ang mga miyembro kundi mag-invest at maghintay sa kanilang payout.

Kaya naman umalma ang libo-libong mga miyembro ng Kapa sa hakbang ng pamahalaan, sinasabing wala namang scam sa samahan. Bagkus marami pa umano itong natutulungan sa pamamagitan ng payouts sa mga miyembro at community service projects. Ito ang saloobin ng mahigit 500,000 Kapa members sa magkahiwalay na mga prayer rally sa General Santos City at Quezon City Memorial Circle kamakailan.

Nguni’t ayon sa awtoridad, ang ginagawa ng Kapa ay matatawag na isang Ponzi scheme, isang uri ng panloloko na pinauso ng Italian-American Swindler na si Charles Ponzi na nakapanloko ng libo-libong investors sa Amerika noong 1920s.

Sa ilalim ng naturang scheme, ang isang tao o grupo ay nangangako ng mabilis na return of investment para sa mga naunang investors, na ang pangpondo ay kukunin mula sa mga susunod na investors. Magpapatuloy ang ganitong scheme hanggang dumating sa punto na mag-collapse ito dahil sa kakulangan ng pang-pondo sa payouts, at ang mastermind ay bigla na lamang maglalaho, tangay-tangay ang nakulimbat na pera. Halos magkatulad ito at ang pyramiding scheme.

Kung tutuusin, hindi naman na bago sa Pilipinas ang ganitong uri ng modus. Marami nang nabiktima ng Ponzi scheme at Pyramiding sa nakaraan. Pero sa kabila nito, marami pa ring mga Pinoy ang sumusugal sa ganitong “get rich quick” scheme dahil sa kagustuhang maiangat ang kalagayan sa buhay.

Bago pa ang Kapa, pumutok na sa balita ang ilang malalaking investment scams na bumiktima ng libo-libo. Ilan sa mga kumpanyang tumatatak sa kasaysayan ng scams at swindling sa bansa ang Aman Futures na nakakulimbat ng P12 bilyon mula sa 15,000 katao sa Visayas at Mindanao; Ang Legacy Group na naging dahilan ng pag-collapse ng 12 rural banks at tatlong pre-need companies; at ang Multitel Group na nakapagdulot ng kabuuang P100 bilyon financial damage sa dalawang milyong katao.

Subali’t sa kabila ng mga pangyayaring ito, marami pa ring mga Pinoy ang nabibiktima ng mga scammers na sinasamantala ang kagustuhan ng marami na makaahon sa kahirapan.

Kaya bago mag-invest, alamin kung ano ang mga senyales na ang investment company ay isang scam:

RISK-FREE AT GET-RICH-QUICK INVESTMENT

Kung may nag-aalok ang isang kumpanya ng investment kaakibat ang no risk at mabilisang paglago ng investment, pagdudahan na ito dahil ang investing ay talagang may kaakibat na risks. Kung ang alok ay pumapalo sa 80 percent pataas na balik sa loob lamang ng isang linggo, malaking porsyento na scam ito.

Sa isang social media post, pinaalalahanan ng SEC ang mga Pinoy na mag-ingat sa fraudulent investment schemes lalo na kung “too good to be true” ang pangakong resulta nito dahil sa ganitong paraan nakapangloko ang maraming big time scammers.

MAS MARAMING RECRUIT, MAS MALAKING KITA

Isang pang-akit ng mga scammers ang mga umano’y testimonials ng kanilang “business partners” na mabilis na umasenso dahil sa pagsali sa scheme. Nandiyan yung papakitaan ang target victim ng picture ng isang miyembro na katabi ang isang luxury car at hawak ang bulto ng salapi. Pagkatapos ng ganitong presentation ay manghihikayat ang scammer na mag invest ng halagang P10,000 hanggang P50,000, na maaaring mapalago sa pamamagitan ng pag-recruit. Sabay hirit ng linyang, “Open-minded ka ba?”

Sa kabila nito, mayroon namang mga networking o multi-level marketing scheme na lehitimo. Lalo na yung may mga produktong ibinebenta. Pero kung hindi ka nakakatanggap ng cheke, malamang ay na-scam ka.

WALANG IMPORMASYON

Ayon sa SEC, mahalagang suriin ang background information ng kumpanya at tao na nag-offer ng investment. Mahalagang makitaan ito ng mayroong contact numbers (landline) para ma-trace ang SEC registration as investment taker. Kung walang impormasyon ang isang investment company na available online, malaking tsansa na isa itong scam.

Paalala pa ng ahensya, ang SEC company registration ay di nagbibigay ng authority para makapagbenta ng investment instruments gaya ng bonds, commercial papers, at securities. Tanging SEC registered person lamang ang makapagbebenta ng SEC registered securities sa publiko.

Para sa mga sumbong at karagdagang impormasyon, maaaring tawagan ang SEC enforcement and investor protection department sa (02)584-6377.

Ayon sa mga financial experts, kapag “too good to be true” ang inaalok na return of investment, malamang ay isa itong scam. (Larawan mula sa Pixabay)

FINAL ADVICE

Babala ng financial adviser at life coach na si Karla Stefan Singson, tinuturuan ng Ponzi scheme ang mga tao na maging gahaman at mainipin. Pinapaniwala rin nito ang mga biktima na hindi kailangang magsumikap at maging mahusay para umasenso sa buhay at yumaman. Bagama’t tila maganda ang pakinabang na nakukuha sa unang payouts, sa bandang huli, ang mga investors din nito ang kawawa.

Aniya pa, hindi dapat kinakagat ang ganitong scheme dahil sinisira nito ang tamang kaisipan at paraan sa pagpapalago ng kayamanan.

“Sure, there are people who have tripled or quadrupled their money through schemes but that is not the way to build real wealth. Remember, even lottery winners end up broke. And if we are a poor country and this is what we teach or show people, we are hurting the poor more,” aniya.

Kaya huwag basta-basta magpaakit sa oportunidad ng biglang-yaman. Ang tama at ligtas na paraan para umasenso sa buhay ay ang pagsusumikap sa trabaho at ang pag-nenegosyo sa legal na paraan.

Committee chairmanships sa 18th Congress, reresolbahin pagkatapos ng SONA

July 1, 2019 by PINAS

*SENATE President Vicente “Tito” Sotto, sa kanyang live TV guesting sa programang “Give Us This Day” ni Pastor Apollo C. Quiboloy sa Davao City.***

SMNI NEWS

RERESOLBAHIN ng mga senador ang Committee Chairmanships sa Senado pagkatapos ng SONA ni Pangulong Rodrigo Duterte ngayong taon.

Sa kanyang live TV guesting sa programang “Give Us This Day” ni Pastor Apollo C. Quiboloy sa Davao City, sinabi ni Senate President Vicente “Tito” Sotto na sa July 23 o isang araw pagkatapos ng SONA nila resolbahin ang pamamahagi sa Committee Chairmanships.

Nanindigan naman si Sotto na ang majority ang magdedesisyon sa kung sino ang hahawak sa isang komite sa Mataas na Kapulungan.

Aniya, idadaan ito sa botohan at compromised deal sa pagitan ng mga senador para maayos na maipamahagi ang paghawak sa bawat komite.

Pastor Apollo C. Quiboloy, hinikayat ang publiko na sumunod sa batas at maging patas

July 1, 2019 by PINAS

AYON sa SEC na hindi dahil sa impluwensya ni Pastor Apollo kung bakit napasara ang KAPA, kundi ito ay matagal nang ipinapasara dahil ito ay labag sa batas.

SMNI NEWS

KASABAY ng pagdami ng mga iligal na investment scams na kumakalat sa mga huling araw na ito, kabilang na ang mga simbahan o mga nagpapanggap bilang mga simbahan, nilinaw ni Pastor Apollo C. Quiboloy kung ano ang pag-ibig sa salapi at ang tunay na pag-ibig sa Diyos.

Matapos paratangan na siya ang nasa likod ng pagpapasara ng KAPA International Ministry, hinikayat din ni Pastor Apollo sa kanyang programa sa Give Us This Day ang mga tao na sumunod sa batas ng lupa.

Hindi umano makatarungang siya ang sisihin ng mga tao sapagkat tunay na ang naturang samahan ay iligal dahil nakarehistro ito bilang relihiyon ngunit gumagawa ng investment scam.

Matatandaang si Pangulong Rodrigo Duterte ang nag-utos ng pagpapasara ng KAPA dahil sa hindi pagsunod nito sa batas.

Pinabulaanan na rin ng SEC, na hindi dahil sa impluwensya ni Pastor Apollo kung bakit napasara ang KAPA, kundi ito ay matagal nang ipinapasara dahil ito ay labag sa batas.

Sa ngayon, nahaharap na sa patong patong na kaso ang KAPA na isinampa ng SEC sa DOJ at patuloy na ring pinaghahanap ng batas si Joel Apolinario upang harapin nito ang kanyang mga kaso.

PRRD tutuldukan ang problema ng EDSA traffic

June 24, 2019 by PINAS

Ang exclusive interview kay Pangulong Rodrigo Roa Duterte ni Kingdom of Jesus Christ founder and lead pastor, Apollo C. Quiboloy sa programang “Give Us This Day” sa Sonshine Media Network International (SMNI) Studio sa Davao City. ACE MORANDANTE/PRESIDENTIAL PHOTO

Ni: Quincy Joel V. Cahilig

MATINDING kalbaryo para sa libo-libong motorista at commuter ang pagbiyahe sa EDSA dahil sa mabigat na daloy ng trapiko dito. Araw-araw, tinitiis ni Juan Dela Cruz ang maipit sa mala-pagong na pag-usad ng mga sasakyan sa isa sa mga pangunahing arterial roads ng Metro Manila.

Sa matinding problema ng trapiko sa bansa, marami ang nawawala sa Pinoy. May mga nawawalan ng pasensya at umiinit ang ulo sa kalye. May nawawalan ng oras na para sana makagawa ng mahalagang bagay. At pagdating sa ekonomiya, malaki din ang nawawala dahil sa heavy traffic.

Ayon sa pag-aaral ng Japan International Cooperation Agency (JICA) araw-araw ay nalulugi ang bansa ng aabot sa P3.5 bilyon dahil sa mabigat na trapiko. At kung walang aksyon na gagawin ang pamahalaan dito, maari itong lumobo pa umano sa P5.4 bilyon na daily loss pagsapit ng 2035.

Ayon sa pag-aaral, mahigit P3 bilyon ang nalulugi sa Pilipinas dulot ng mabigat na trapiko sa Kalakhang Maynila. (Larawan mula sa PNA)

Sa panayam ni Pastor Apollo Quiboloy kay Pangulong Rodrigo Duterte sa programang “Give Us This Day” sa Sonshine Media Network Inc., muling ipinahayag ng Chief Executive ang kanyang determinasyon na lutasin ang sakit sa ulong trapik sa EDSA. Isang pangako na aminado siyang di pa niya natutupad hanggang ngayon.

Matagal nang nais ng Pangulo na pabilisin ang takbo ng mga sasakyan sa EDSA sa pamamagitan ng emergency powers subalit hindi ito naipagkaloob sa kanya ng Kongreso. Kung maibibigay ito kay Duterte, mapapabilis ang procurement process at pagpapatupad ng mga proyekto sa pamamagitan ng direct contracting, repeat order, at direct negotiation.

Inaprubahan ng House of Representatives ang hiling ni Duterte, subalit hindi ito nakapasa sa Senado dahil sa mga pangamba ng kurapsyon.

Sa ekslusibong panayam, muling ipinahayag ng Pangulo ang kanyang kagustuhan na magdulot ng ginhawa sa mga pagbyahe ng mga Pinoy sa EDSA. idineklara nga ni Duterte na, mula sa isang oras, ibababa niya sa limang minuto na lamang ang biyahe mula Quezon City hanggang Makati bago matapos ang taon.

“You just wait. Ayaw ko mag-ano but things will improve maybe God willing, December smooth sailing na. You don’t have to worry about traffic. Cubao and Makati is just about five minutes away,” wika ni Duterte.

Kabilang sa kanyang massive infrastructure program na Build, Build, Build, ang pagtatayo ng mga imprastrakturang lulutas sa problema sa trapiko gaya ng Metro Manila Subway at ang North Luzon Expressway-South Luzon Expressway connector road, na kasalukuyan ang konstruksyon.

TOO GOOD TO BE TRUE?

Subali’t may ilang mga napakunot ang noo at napataas ng kilay sa pahayag ng Pangulo dahil imposible umano ang limang minutong QC to Makati na biyahe sa EDSA, lalo na sa pagsapit ng Christmas Season dahil ito ang peak season ng mga malls at maraming sasakyan sa lansangan.

“If PRRD delivers on just two promises he recently made: (1) to cut travel time from Cubao to Makati to five minutes within six months and; (2) to eliminate flight delays in NAIA within one month, for being superhuman, he deserves to be president for life,” sabi ni Senador Panfilo sa kanyang tweet.

Positibo namang tinanggap ng Malakanyang ang pahayag ng senador. Wika ni Presidential Spokesman Salvador Panelo, paghanga sa Pangulo ang nais na iparating ni Lacson.

“Ang ibig sabihin, si Senator Lacson, hanga siya kung magagawa ‘yun. Kung magawa ni Presidente ‘yun, gusto niya siya na yung President for life,” wika ni Panelo.

Subali’t nang tanungin ang tagapagsalita ng administrasyon sa detalye kung paano magagawang pabilisin ang takbo ng trapiko sa EDSA, hindi ito nagbigay ng detalye.

“Surprise! He has something up his sleeves,” ani Panelo.

Nguni’t umaasa din ang Malakanyang na pagbibigyan sa 18^th Congress ang kahilingan ng Pangulo na emergency powers para malutas na ang trapiko sa Metro Manila sa madaling panahon.

Isusulong ni Senator-elect Francis Tolentino sa 18^th Congress ang pagbibigay ng emergency powers kay Pangulong Rodrigo Duterte para lutasin ang problema ng mabigat na trapiko sa Metro Manila. (Larawan mula sa PNA)

Ipinahayag naman ni Senator-elect Francis Tolentino na isusulong niya ang pagbibigay ng emergency powers sa pangulo sa Senado gayon din ang pagpapalakas sa mandato ng Metropolitan Manila Development Authority (MMDA) sa pagtugon sa trapiko sa Kalakhang Maynila.

“Nabanggit ko iyon noong campaign na kung kinakailangang ire-file iyong emergency powers, gagawin po natin ‘yan,” sabi ni Tolentino na dating MMDA chairman at political adviser ng Pangulo.

Siniguro naman ni Transportation Secretary Arthur Tugade na walang mangyayaring katiwalian sa mga transportation projects kung sakali mang tuluyang maisabatas ang emergency powers.

Metro Manila Development Authority Special Operations Group head Bong Nebrija (Larawan mula sa PNA)

MMDA NAKAHANDANG TUGUNAN ANG HAMON

Naniniwala si MMDA Special Operations Group head Bong Nebrija na, bagama’t mahirap, posibleng mangyari ang sinabi ni Duterte na tapyasin ang isang oras na biyahe sa EDSA mula QC hanggang Makati.

Bumuo ang MMDA ang Task Force Cubao-Makati (CubMA), isang inter-agency task force para maisakatuparan ang pangako ng Pangulo.

“Alam niyo naman po lahat ng pronouncement ng Pangulo, it becomes a directive and a mandate not only to MMDA but to all government agencies. “Recently, tinayo na po natin yung Task Force CubMa ahead of the President’s pronouncement,” wika ni Nebrija.

Sa ilalim ng Task Force CubMA, sanib pwersa ang mga ahensya ng pamahalaan gaya ng MMDA, Department of Transportation, Land Transportation Office, PNP-Highway Patrol Group, Inter-Agency Council on Traffic, at Land Transportation Franchising and Regulatory Board sa pagsasaayos ng daloy ng trapiko mula Cubao hanggang Makati.

Bukod pa dito, magsasagawa din ang Deparment of Public Works and Highways ng engineering interventions para pabilisin ang mga road repairs sa EDSA upang mabawasan ang mga hassle sa kalsada.

Dagdag pa ni Nebrija, ang paglutas sa problema ng trapiko ay maisasakatuparan kung lahat ay magtutulungan at paiiralin ang disiplina sa mga lansangan.

“Everybody should be on board not only the government agencies but also the people as the President has already spoken. Ang disiplina ay napakalaking bagay,” aniya.

Recent News: