PINAS

Ang Lihim ng Panginoon (Ikaapat na Bahagi)

Sonspeak

Recent News:

ISIS

Laban kontra terorismo, di aatrasan ng Duterte admin 

by

ALERTO 24 oras na nagbabantay sa mga karagatan ng bansa ang mga miyembro ng Philippine Coast Guard laban sa banta ng terorismo.

 

Ni: Quincy Joel Cahilig 

Isa ang terorismo sa mga isyu na matagal nang kinakaharap ng gobyerno ng Pilipinas. Ang paghahasik ng kaguluhan ng iba’t-ibang mga bandido, communist, at extremist groups ay talaga namang nakakahadlang sa peace situation, bagay na mahalaga para sa mga investors na gustong mamuhunan sa bansa.

Batay sa Global Terrorism Index report na inilabas ng Institute for Economics & Peace (IEP), nasa pang-sampung pwesto ang Pilipinas sa listahan ng mga bansang apektado ng terorismo noong 2018; kabilang ang Nigeria, Afghanistan, Syria, Pakistan, Somalia, India,Yemen, Egypt, Congo, Turkey, Libya, South Sudan, Central African Republic, Cameroon, Thailand, Kenya, Sudan, U.S., Ukraine, Mali, at Niger.

Siniguro naman ng Malacañang na seryoso ang pamahalaan sa paglutas sa banta ng terorismo at patuloy pang pinapalakas ang kakayahan ng militar at pulisya upang labanan ang mga pwersang naghahasik ng karahasan sa lipunan.

TINIYAK ni Presidential Spokesman Salvador Panelo na seryoso ang Duterte administration sa pagsupil sa pwersa ng terorismo sa bansa.

 

“As one would expect, we are not taking terrorism lightly. Our goal is to totally eradicate rebellion by crushing it as well as providing better services and opportunities for all to achieve a state where there would no longer need for any uprising or armed struggle,” pahayag ni Presidential Spokesman Salvador Panelo.

Sa kabila ng pagtutol ng ilang grupo, kasalukuyan pa ring umiiral ang martial law sa Mindanao matapos lagdaan ni Pangulong Rodrigo Duterte ang Proclamation 216 bunsod ng paglusob ng Islamic State-inspired Maute group sa lungsod ng Marawi noong 2017. Ayon kay Panelo ang extension ng martial law sa rehiyon ay dahil sa patuloy na banta sa seguridad ng publiko, bagay na suportado naman ng maraming Pilipino.

Ilan pa sa anti-terrorism steps ng  Pangulong Duterte ay ang pag-isyu ng Memorandum Order No.32, na nagpapalakas sa guidelines ng miltar at pulisya sa pagsugpo sa karahasan, at ang pagpapatupad ng Executive Order No.70, na nagtatakda sa pagbuo ng isang national task force para lutasin ang problema sa local communists at insurgencies.

PINAPAYUHAN ng mga government authorities ang mga magulang na bantayang mabuti ang kanilang mga anak sa paggamit ng internet upang maiwasang ma-brainwash ang mga ito ng mga extremist groups.

 

PAGBIBIGAY PRIORITY SA PANGANGAILANGAN NG PNP AT AFP

Patuloy ang modernization programs ng Duterte administration sa Armed Forces of the Philippines (AFP) at Philippine National Police (PNP) upang makasabay sa lumalakas din na kakayahan ng mga terrorist groups sa loob at labas ng bansa.

Kamakailan, inanunsyo ni PNP chief, General Oscar Albayalde ang pagbili ng pulisya sa mga motorized patrol boats at pag-recruit ng karagdagang tauhan para sa maritime operations ng PNP, nagbabantay sa mga borders mula sa pagpuslit ng mga bawal na gamot at pagpasok ng mga terorista.

“We are modernizing our maritime group. We have procurement last year and there will be a portion of our 2019 budget that will be allocated for the capability enhancement,” wika ni Albayalde.

Ayon naman kay Brigadier General Rodelion Jocson ng PNP Maritime Group, dumating na ang pito sa 28 gunboats na naaprubahan noong nakaraang taon at inaasahan ang pagdating ang nalalabi pang gunboats ngayong taon. Oorder din umano ang PNP Maritime Group ng karagdagan pang 18 gunboats at drones ngayong 2019.

Samantala, pinapalakas din ng Philippine Coast Guard (PCG) ang kakayahan nito gamit ang PHP1.320 bilyon na pondong inilaan para sa pagbili ng speed boats mula sa U.S.

Apat sa 38-meter response boats ang paparating na sa bansa ngayong taon, na may bilis na 40 knots, na kayang habulin ang mga terorista at pirata sa mga karagatan ng Mindanao.  Inaasahan na din umanong makukumpleto na ngayong taon ang 40 units ng 33-footer boats na kanilang inorder mula sa mga local shipbuilders.

Patuloy din ang natatanggap na suporta ng Pilipinas mula sa mga malalaking bansa na kaalyado nito tulad ng U.S. na nag-pledge ng PHP300 milyong ayuda para paigtingin ang intelligence operations laban sa extremist groups. Nagpahayag din ng suporta ang France, Russia, Japan, at China sa kampanya ng Pilipinas kontra terorismo.

“Terrorism knows no boundaries, politics, religion and creed. It is the new evil in the world that strikes at every country and every continent and all member-nations of the United Nations really should help and cooperate with each other to combat and crush terrorism,” wika ni Panelo.

MANATILING ALERTO SA ISIS

Habang isinusulat ang artikulong ito, kasalukuyang sinasagupa ng US-backed Syrian Democratic Forces (SDF) ang nalalabing caliphate ng Islamic State in Iraq and Syria (ISIS) sa isang village sa Baghouz. Sa loob ng ilang araw ng paglusob ng SDF at coalition warplanes, matagumpay nilang napasuko ang mahigit 4,000 na ISIS fighters kasama ang kanilang mga pamilya.

Dahil dito, natatanaw ng ilan ang nalalapit na pagguho ng naturang kampo ng mga extremist, na minsa’y naging singlawak ng Britain.

Subali’t kung natitibag na ang pwersa ng IS sa middle east, kasalukuyan din namang umuusbong ang panibagong pwersa nito sa ibang panig ng mundo. At ayon sa mga ulat, ito’y sa Mindanao.

Taong 2016 nang magsimula ang malawakang recruitment ng ISIS sa Mindanao sa pamamagitan ng online videos at marami-rami umano silang nahikayat sa loob at labas ng bansa. Taong 2017, ang mga militanteng sumanib sa IS na Maute Group ang lumusob sa Marawi, kung saan nakita rin na mayroong mga foreigners sa kanilang hanay. Matapos ang mahigit limang buwang bakbakan na kumitil sa buhay ng 900 insurgents, nagtagumpay ang pwersa ng pamahalaan ng Pilipinas. Nguni’t naniniwala ang ilan na reresbak pa ang IS sa bansa.

Nitong Enero, ginimbal ng kambal na pambobomba ang Jolo, Sulu, na kilalang balwarte ng Abu Sayyaf terrorist group, na sinasabing sumapi na rin sa IS. Mahigit 20 katao ang nasawi at marami ang sugatan sa naturang pagsabog.

Naunang inako ng ISIS ang naturang twin blasts. Nguni’t tinukoy ng pamahalaan na ang bandidong Abu Sayyaf ang may kagagawan.

Ayon kay Rommel Banlaoi, chairman ng Philippine Institute for Peace, Violence, and Terrorism Research, maraming financial resources ang IS at patuloy ang pagrecruit nila ng fighters.

“ISIS is the most complicated, evolving problem for the Philippines today, and we should not pretend that it doesn’t exist because we don’t want it to exist,” babala ni Banlaoi.

WAR ON TERRORISM, NAGSISIMULA SA TAHANAN

Sinabi naman ni Sidney Jones, director ng Institute for Policy Analysis of Conflict na nakabase sa Indonesia, tinatarget ng ISIS ang mga kabataan na gawing recruits.

 “The government didn’t recognize its strength in attracting everyone from university-educated students to Abu Sayyaf kids in the jungle. Whatever happens to the pro-ISIS coalition in Mindanao, it has left behind the idea of an Islamic state as a desirable alternative to corrupt democracy,” aniya.

Kaya naman pinapayuhan ng isang socio-anthropology professor sa Philippine Military Academy (PMA) ang mga magulang na bantayang mabuti ang kan

ilang mga anak sa social media. Ayon kay Capt. Sherhanna Paiso, military science professor at chief ng education branch ng PMA, mahalagang malaman ng mga magulang kung sino-sino ang kausap ng kanilang mga anak sa social media gayon din ang mga tanda kung ang kanilang anak ay nahawahan ng radicalization, na ipinanghihikayat ng mga extremist groups sa mga menor de edad na may kakulangan pa sa critical thinking skills.

Aniya, kapag pinalitan ng isang bata ang kanyang profile picture na nakasuot ito ng maskara ng ISIS o ISIS flag, ibig sabihin ay naimpluwensyahan na ito ng radicalization.

“If you are in a group the promotes violence, there is a tendency for you also to become violent individual. Remember, prevention is always better than cure,” wika ni Paiso.

Payo din ng military prof na iwasan ang pag-stereotype sa mga Muslims bilang “terrorists” at “bombers” para maiwasang mahikayat ang mga Muslim youth na sumapi sa mga grupong nagpapasimuno ng karahasan.

Pagkilala sa Pilipinas, umaangat

by

Ni: Edmund Gallanosa

PAGKILALA sa Pilipinas at ang henerasyon ng mga makabagong Pilipino at ang sigla nilang palakasin ang ating bansa sa lahat ng larangan ng progreso ay nagbubunga ng tagumpay at positibong resulta sa karamihan sa ating mga kababayan.

Noon, ang Pilipinas ay kilala bilang isang ‘third-world developing country,’ subalit sa kasalukuyan ay unti-unti na itong umuusad pataas sa mga listahan ng mga bansang kinakikitaan ng mabilis na pagganda ng ekonomiya, progreso sa mga mamamayan at ibayong stabilidad sa mga komunidad sa iba’t ibang sulok ng bansa, pati na sa lokal na pamahalaaan, na siya namang bumubuo sa kapuluan ng bansang Pilipinas.

Nitong mga nakaraang buwan, binulabog tayo ng isang hamong guluhin ang katahimikan ng bansa nang subukan ng mga bandidong Abu Sayaff at ISIS ang rehiyon ng Mindanao. Malaking kabawasan ito sa kita ng bansa sapagkat apektado ang turis­mo sa lugar at higit sa lahat, nagbago ang buhay ng mga taga-Marawi City sa sinapit ng kanilang lugar. Wasak ang mga ari-arian at nawala ang mga negosyo. Gutom at hinagpis ang iniwan ng mga bandido. Subalit hindi sila nagtagumpay. Nangibabaw ang pagmamahal sa bansa, dahil sa tapang, nagwagi ang sandatahang lakas ng Pilipinas laban sa mga bandido.

HINDI PASASAKOP SA MGA TERORISMO

Ngayon pilit bumaba­ngon ang mga taga-Marawi City sampu ng kanilang mga karatig-pook na naapektuhan ng nagdaang giyera, dahil na rin sa pagsusumikap ng mga kababayan natin at sa ayuda na din ng pamahalaan ng Pilipinas.

Binantayan nang maigi ng mga ibang bansa ang labanan sa Mindanao. At marami ang nagdiwang nang manaig ang ating gobyerno’t mga sundalo. Dahil dito, dagdag sa puntos ito sa bansa natin bilang isa sa Asya na maikukunsiderang Pro-Democracy at hindi basta-bastang papasakop sa terorismo na galing sa ibang lupalop.

Isang malaking latay ito sa kasaysayan ng Pilipinas. Ang makapasok at manggulo ang mga terorista. Subalit nanaig ang mga Pinoy at hindi nagpasakop. Dumaan ang ilang bagyo, nakabangon pa din tayo. Likas na sa mga Pilipino ang magaling bumangon mula sa pagkakadapa.

KILALA BILANG LITTLE AGGRESSIVE ECONOMIC DRAGON

Iba ang sigla ng mga Pinoy ngayon. Aminin man natin o hindi, napakalaki ng pagkakaiba ng pagpapalakad ng gobyerno natin ngayon kumpara noong mga nakaraang administrasyon. Naitaas nang malaking antas ang mga pasahod lalo na sa mga guro, alagad ng batas at mga sundalo. Kahit papaano, dumagdag ito sa pagtaas ng morale ng mga nagbibigay serbisyo-publiko. Nadagdagan ang pantustos nila sa mga pang-araw-araw na pangangailangan lalo na ng kanilang mga pamilya.

Ang mga bagong henerasyon ng mga manggagawa, kasama na ang ating mga ‘bagong bayani ay kinakikitaan din ng sigla. Nagawa ng isang pangulo sa tulong ng mga mambabatas na matanggal ang pabigat na buwis sa mga mabababa ang sahod; mabawasan ang buwis ng mga nasa gitnang antas na manggagawa, at buwisan ng sapat ang mga malalaki ang kinikita at mayayaman. Sa mga OFWs, maraming programa ang inilaan sa kanila upang mas lalong mapaayos ang kanilang pa-nanatili sa ibang bansa upang makipag­sapalaran, proteksyonang maigi ang kanilang kapaka­nan at mapalayo sila sa mga nakaakmang peligro at pagmamalupit. Masugid na na­kikipag-ugnayan ang iba’t ibang ahensya ng gobyerno na tumututok sa ating mga OFWs.

Patuloy ang paghahanap ng gobyerno ng ibang merkado, upang mailako ang galing at kakayanan ng ating mga kababayan. Sa katunayan, kamakailan ay dumagdag pa sa mga ‘demands’ ng ibang bansa ang pagkuha ng Tsina sa ating mga kababa­yan bilang English-speaking teachers para sa kanilang mamamayan. Sa unang pagkakataon, ito na ang maituturing na pinakamalaking demand ng Filipino teachers sa ibang bansa, at malaking karangalan ito sa ating mga guro sapagkat nakikilala ang kanilang galing sa pagsalita ng Ingles na maaaring ipantapat sa mga native speaker ng salitang Ingles mula sa America at Europa.

SUMIGLA ANG EKONOMIYA

Higit sa lahat, ang ating ekonomiya ay kinakitaan din ng sigla, bunga ng pagsusumikap ng mga kumpanya sa bagong henerasyon at bagong pamunuan. Kabi-kabila ang patuloy na paglaki ng mga dating industriya, at patuloy din naman ang pagdami ng mga bagong mapagkikitaan at nagnanais magnegosyo.

Sa katunayan, noong nakaraang taon lang ay napabilang ang Pilipinas bilang ikasampu sa pinakamabilis umangat na ekonomiya sa buong mundo.

Mabilis ang arangkada ng progreso ng Pilipinas na pumapalo sa 6.5 bahagdan paakyat ng 7.5 bahagdan. Nakakagulat na dalawang beses ang bilis nito kumpara sa long term growth na inaasahan sa ating bansa.  Sa unang tatlong quarter ng huling taon, nanalasa sa 6.7 bahagdan ang progreso ng Pilipinas. Hinigitan pa nito ang Tsina sa ganda ng itinatakbo ng industriya sa ating bansa.

Iba na ang Pinoy!

Dahil sa pinalawig at pinagandang tax reform program at iba’t ibang proyekto sa imprastraktura, kasabay pa ng tuloy-tuloy na daloy ng mga remittances ng ating mga OFWs, ang tumataas na consumer spending ng mga mamamayan at pagdami ng mga international-owned at local call centers na ‘very promising’ ang mga pasahod, inaasahang lalagpasan pa ang naabot na $311 bilyon kita ng nakaraang taon.

‘Big time player’ pa din at numero uno sa pagpapaganda ng ating ekonomiya ang mga kita ng ating mga manggagawa sa ibang bansa. Dahil sa dedikasyon ng mga Pinoy sa kanilang tungkulin, mapa-seaman pa sila, nurse o caregiver, todo-bigay sa dedikasyon ang mga pinoy.  Kaya nga naman nawiwili ang mga karamihan sa mga dayuhan na tanggaping muli ang serbisyo ng ating mga kababayan, at hindi ipagpapalit sa iba.

Magaling ang mga Pinoy,  saan mang industriya sila isabak, lalaban, magtitiyaga, nagmamahal sa trabaho ang karamihan. Kaya naman mabilis umasenso ang Pinoy sa ibang bansa. Sana nga lang, tularan ‘yan ng ating mga kababayan na nasa bansa lamang o ‘dili kaya, impluwensiyahan ng ating mga kababayan na nakapagtrabaho sa ibang bansa na ang pagmamahal sa tungkulin ay sinusuklian nang higit pa sa inaasahan. Malaking bagay ang mamarkahan kang magaling—dahil maaari mong maipagmalaki sa iyong kababayan at sa iyong pamilya.

 

Pagkalinga sa mga tagapagtanggol ng bayan

by

IPINAHAYAG ni Pangulong Rodrigo Duterte na magbibitiw ito sa puwesto kapag hindi inaprubahan ng Kongreso ang pagtaas ng suweldo para sa mga uniformed personnel ng bansa. Ang naturang kahilingan ay isang pundasyon ng kaniyang plataporma sa kampanya nito sa pagkapangulo nakaraang taon. Sinabi ng pangulo sa mga mambabatas na gawing priyoridad ang kanyang pangako para sa mga militar sa unang pakete ng tax reform.

 

Ni: Quincy Joel V. Cahilig

BUHAT sa pasimula ng kaniyang termino, ipinadadama ni Pangulong Rodrigo Duterte na batid niya ang hirap at sakripisyo ng kasundaluhan at pulisya sa pagpapanatili ng seguridad ng ating bayan at sa pagsugpo sa mga elementong nagnanais maghasik ng kaguluhan. Kaya isa sa mga naging prayoridad niya ang dagdagan ang sahod ng mga uniformed personnel bilang pagkilala sa kanilang kagitingan sa bansa.

Sa pagtatapos ng taon, pinatunayan ng lider ng ating bansa na ang pangakong kaniyang binitawan ay hindi napako.

“So because I promised you, I will double your salary. Sabi ko sa kanila (kongreso at senado) … ‘Unahin na muna ninyo iyung pangako ko.’ Kasi sabi ko, ‘kapag hindi niyo inilusot iyan, I will resign as a matter of principle,” ipinahayag ni Pangulong Duterte sa kanyang talumpati sa ika-82 Anibersaryo ng Armed Forces of the Philippines (AFP), kung saan kaniyang ibinahagi ang pakikipagusap niya sa kanyang gabinete at ilang kongresista at senador.

Tiniyak naman ni Budget Secretary Benjamin Diokno  na matatanggap na ng mga sundalo ang 100% increase sa kanilang base pay sa unang sweldo nila sa 2018 dahil pirmado na ng Pangulo ang joint resolution ng kongreso at senado na nagtatakda sa naturang ayuda.

Paliwanag ni Diokno sa ilalim ng naturang resolusyon , doble ang itataas ng base pay ng isang private sa AFP at Police Officer I (PO1) ng Philippine National  Police (PNP), at mga katumbas na ranggo sa Bureau of Jail Management and Penology, Philippine Coast Guard, Philippine Public Safety College, Bureau of Fire Protection, at National Mapping and Resource Information Authority.

“A PO1 and those with equivalent ranks will enjoy a 100 percent increase, resulting in a monthly base pay of P29,668… Overall, the salary adjustments will result in a 58.7-percent average increase for all military and uniformed personnel (MUP) ranks, effective January 1, 2018,” wika ni Diokno.

Aabot sa P64.2-billion ang ilalaan para sa nakatakdang umento sa sahod ng mga sundalo, pulis, bumbero, at jail guards sa bansa na kukunin mula sa Miscellaneous Personnel Benefits Fund at sa mga budget allotment ng mga responsableng ahensya.

Nakasaad din naman sa House Joint Resolution No. 18 at Senate Joint Resolution No. 11 na tataas ang sweldo ng mga may ranggo ng PO4 hanggang director general at mga katumbas na rango pag sapit ng January 2019.

Ipinunto din ni Diokno na tataas din ang take-home pay ng mga uniformed personnel ng pamahalaan sa ilalim ng bagong Tax Reform Law sa na ipapatupad sa 2018.

 

“Lover of Soldiers”

Talagang hindi biro ang propesyon ng pagiging isang sundalo dahil kinakailangan dito ang matinding lakas ng loob, isipan, at pangangatawan sa pagsabak sa mga iba’t ibang gawain, lalo na ang panganib ng pakikidigma. Kasama rin ang sakripisyo na mawalay sila sa kanilang mga mahal sa buhay alang-alang sa pagtugon sa tawag ng tungkulin na isulong ng kapayapaan.

Hindi na rin lingid sa kaalaman ng madla na daan-daang mga sundalo na ang nagbuwis ng kanilang mga buhay sa sari-saring engkwentro laban sa mga kaaway ng estado. Nitong taon ay saksi ang buong bansa sa sumiklab na digmaan sa lungsod ng Marawi sa pagitan ng militar at ng pwersa ng ISIS-inspired Maute Group, kung saan nasawi ang 165 na sundalo at mahigit 1,400 naman ang nasugatan. Ang limang buwang labanan, na napagtagumpayan ng mga pwersa ng pamahalaan, ay itinuturing na ‘heaviest urban battle’ mula nang matapos ang World War II.

Ang mga pangyayaring gaya nito marahil ang dahilan kung bakit gayon na lamang ang pagnanais ng Pangulong Duterte na bigyang lingap ang mga tagapagtanggol ng ating bayan. Kamakailan ay binansagan pa niya ang sarili at ang yumaong Ferdinand Marcos na “lover of soldiers”, na tanging mga pangulo ng Pilipinas na nagbigay ng buong atensyon sa mga pangangailangan ng mga sundalo.

“Hindi ako nagyayabang. Walang ibang presidente, dalawa lang, ang pagbigay na atensyon na kinakailangan para sa isang sundalo. Ako lang pati si Marcos,” sinabi ni Duterte sa harap ng mga sundalong naka-base sa Camp General Teodulfo Bautista sa Sulu nitong Disyembre.

Bilang patunay ng kanyang pagmamalasakit sa mga miyembro ng militar, naglunsad na ng mga programa at nagpamahagi na ng tulong ang Pangulo.

Inilahad ng Pangulong Rodrigo Duterte sa anibersaryo ng AFP sa Camp Aguinaldo ang mga ibayong benepisyong matatanggap ng mga sundalo, kabilang ang pag-release ng P500 milyong pondo para sa mga nasugatan at disabled na mga kawal.

Maglalaan din umano siya ng ibayong ayuda para sa V. Luna General Hospital at Veterans Memorial Medical Center upang matiyak na tuloy-tuloy ang serbisyong medikal para sa mga sundalo.

“I will subsidize yung medicines especially those who need the management for pills – it’s 50 million monthly para sa AFP pati 50 million para sa V. Luna. Para sa mga retired dun niyo na kunin yung medicines and management niyo for ailments a soldier suffers when he retires,” wika ng Pangulo.

Dagdag pa ng lider ng pangulo, nakalinya na rin ang programang Standalone Pension Fund para sa AFP. Aniya, ang perang kikitain sa pagbebenta ng ilang prime properties at kampo ng AFP ay gagamitin bilang seed money para sa nabanggit na pension fund.

Binigyang diin din ng Pangulo ang pagnanais niyang matulungan ang mga sundalo na maitawid ang edukasyon ng kanilang mga anak.

“All I want to see is that an ordinary soldier can finance his child’s education. I want a sergeant, a corporal, yung mga anak ninyo, pwede maging, as long as they have the brains, as long as they can continue to go to school, be a doctor or lawyer…”, wika ni Duterte.

Sa madaling sabi, layunin ni Pangulong Duterte na alisin ang pagkabalisa ng tagapagtanggol ng bayan patungkol sa kanilang mga pangunahing pangangailangan—at gagawin niya ang lahat upang na di mabigo ang mga ito.

“Do not worry about your families. Do not kill yourself just thinking about what will happen tomorrow…The Philippine government will always be there to see to it that your children to go to school until college time.”

Pagbalik-tanaw (time-line) ng Batas Militar kontra-terorismo sa Mindanao

by

Si Pangulong Rodrigo Duterte sa kanyang state-visit sa bansang Russia, ilang sandali bago niya idineklara ang Martial Law sa buong Mindanao

 

Ni: John Benedict G. Vallada

SA halos pitong buwan na itinagal ng Batas Militar sa Mindanao. Mula sa madugong paglusob ng teroristang grupo na Maute, pagresbak ng militar sa kalaban, buwis-buhay na opensiba hanggang sa mabawi ang siyudad ng Marawi. Muling balikan ang Batas Militar sa Mindanao at kasalukuyan nitong estado.

Mayo 23, 2017

2:00nh—Nakarating sa militar ang ulat ng mga residente ng Barangay Basak Malutlut sa Lungsod ng Marawi na mayroong 15 kahina-hinalang mga armadong lalaki sa nasabing pook na pinaniniwalaang miyembro ng teroristang grupo ng Abu Sayyaf at Maute, dahilan upang tumugon sa pamamagitan ng surgical strike ang militar laban sa kalaban.

5:00nh-8:00ng—Lumusob at nagpakita ng lakas ang grupong Maute sa pamamagitan ng pagkubkob ng mga ito sa pampublikong ospital ng Marawi na Amai Pakpak Medical Center. Ilang oras lang ay lumusob na rin ito sa City Jail ng lungsod at pinakawalan ang mga preso at nanunog, napaulat din na ang mga bantay ng nasabing kulungan ay pinagpapatay ng grupo. 5 sundalo ang kumpiramadong sugatan habang 1 ang patay bago pasukin din ang Dansalan College at Saint Mary’s Church.

11:30ng—Kasalukuyang nasa state-visit noon si Pangulong Rodrigo Duterte sa bansang Russia nang ideklara sa buong Mindanao ang Batas Militar.

Mayo 24, 2017—Sa pag-uwi ni Pangulong Duterte mula sa bansang Russia, agad niyang sinuspinde ang prebelihiyo na habeas corpus sa buong Mindanao upang madaling mahuli ang iba pang mga miyembro ng teroristang grupo at maiwasan ang paghahasik.

Mayo 31, 2017—Ayon sa Department of National Defense, 11 sundalo ang nasawi, habang 7 ang sugatan sa maling aerial attack ng mga mismong kapwa sundalo.

Hunyo 6, 2017—Nahuli sa check-point ng mga sundalo sa Davao City ang mismong ama ng tinaguriang Maute Brothers na si Cayamora Maute.

Hunyo 9, 2017—Naaresto naman ang ina ng Maute Brothers na si Ominta Romato “Farhana” Maute kasama ang 2 sugatang miyembro ng Maute Terrorist Group sa probinsiya ng Lanao Del Sur.

Hunyo 12, 2017 (Araw ng Kalayaan)—Madamdaming paggunita sa Araw ng Kalayaan ang nasaksihan habang itinataas ang bandila ng Pilipinas habang inaawit ang ‘Lupang Hinirang’. Sa araw ding iyon naitala ang 58 na mga sundalo namatay.

Hunyo 25, 2017—Bilang pagtatapos ng Ramadan, nagbigay ng 8 oras na ceasefire ang mga militar sa mga kalabang terorista.

Hunyo 26, 2017—Bumisita si Vice President Leni Robredo sa Ilagan City upang bisitahin at kumustahin ang lagay ng mga evacuees mula sa Marawi City.

Hulyo 4, 2017—Pinagtibay ng Korte Suprema ang deklarsyon ng Batas Militar ni Pangulong Duterte sa Mindanao.

Hulyo 20, 2017—Sa kauna-unahang pagkakataon mula nang sumiklab ang giyera sa Marawi City, bumisita si Pangulong Duterte.

Hulyo 22, 2017—Napagkasunduan ng kongreso ang pagpapalawig ng Batas Militar sa Mindanao hanggang sa katapusan ng taong kasalukuyan.

Agosto 22, 2017—Muling pinayagang maka pasok sa Mindanao State University.

Agosto 25, 2017—Tagumpay kung maituturing, dahil nabawi ng mga sundalo ang Grand Mosque ng Marawi City mula ng inokupa ito ng Teroristang Maute.

Agosto 27, 2017—Pumanaw ang ama ng mga pinuno ng teroristang grupo na Maute na si Cayamora Maute, ayon sa ulat nasa kritikal na kondisyon ang matandang Maute bago dinala sa Taguig-Pateros Hospital.

Setyembre 17, 2017—Matagumpay na na-rescue ang paring Katoliko na si Father Chito Suganob, na ilang buwan ding bihag ng Maute Group. Itinanggi rin ng pamahalaan na nagbigay sila ng ransom sa teroristang grupo para sa pari.

 

Ilan sa mga tagpong pangyayari habang nagkakaroon ng bakbakan ang hanay ng military at teroristang Maute sa Lungsod ng Marawi.

 

Setyembre 22, 2017—Nabawi ng militar ang tulay na entrance-point ng mga pook na sinakop ng Maute, ang tulay ng Maraya Daya o mas kilala bilang Masiu Bridge.

Oktubre 16, 2017—Inanunsyo ng militar na napatay na nila ang mga pangunahing pinuno ng Maute Group na si Isnilon Hapilon at Omar Maute.

Oktubre 17, 2017—Idineklara ni Pangulong Duterte na malaya na ang Marawi laban sa rebelyon ng mga Maute.

Oktubre 19, 2017—Kinumpirma ni Pangulong Duterte na napatay ang isang Malaysian terrorist na si Dr. Mahmud Ahmad. Si Ahmad ay hinihinalang taga-recruit ng mga bagong miyembro ng teroristang ISIS.

Oktubre 20, 2017—Nakauwi ang nasa bilang na 288 na mga sundalong lumaban sa Maute Group.

Oktubre  21, 2017—Kinumpirma ng Fedral Bureau of Investigation (FBI) na DNA mismo ni Isnilon Hapilon ang napatay sa bakbakan noong Oktubre 16. Habang wala pang kumpirmasyon kay Omar Maute.

 

Muling pinalawig ang Batas Militar hanggang sa katapusan ng taong 2017 sa botong 261 na ‘yes’ ng mga mababatas at 18 ‘no’ na boto bilang pagtutol sa pagpapalawig.

 

Disyembre 8, 2017—Nagsumite ang Department of Interior and Local Government (DILG) kay Pangulong Rodrigo Duterte ng rekomendasyon ng Philippine National Police (PNP) na palawigin pa ng isang taon ang Martial Law sa Mindanao. Suportado ito ng Armed Forces of the Philippines (AFP) dahil sa banta pa rin sa seguridad ng publiko lalo pa’t napapaulat na mayroon pa rin natitirang mga grupo ng Maute.

Disyembre 11, 2017—Humihirit ang sangay ng pamahalaang pang-ehekutibo sa pagpapalawig pa ng Batas Militar, ang dahilan ay ubusin ang natitirang miyembro ng Maute Group at pakikibaka sa bagong tinuturing ng pamahalaan na teroristang organisasyon ang Communist Party of the Philippines-New People’s Army (CCP-NPA).

Sa ngayon, nasa kamay ng mga mambabatas sa mababa at mataas na kapulungan ang kapalaran ng Batas Militar sa Mindanao. Mapapaso ang deklarasyon ng Martial Law sa Disyembre 31, 2017.

Pagkamatay ni Hapilon: Terorismo sa bansa wala na ba?

by

PINAKITA nina AFP chief Eduardo Año (pangalawa sa kaliwa) at Defense Secretary Delfin Lorenza (pangalawa sa kanan) ang mga larawan ng mga napaslang na lider ng terorista na sina Isnilon Hapilon at Omar Maute sa media sa Camp Ranao, Marawi City. Patuloy pa rin ang pagbabantay ng lahat ng mga yunit ng militar sa Marawi City, Maguindanao at Lanao del Sur sa maaaring paghiganteng atake ng mga tagasunod ng dalawang lider sa kanilang kamatayan.

 

Ni: Kristin Mariano

SA pagkamatay ng mga lider ng teroristang grupong Maute, sinasabi ng ilan na natuldukan na ang bakbakan sa Marawi at terorismo sa bansa.

Kinumpirma ng Federal Bureau of Investigation (FBI) na si Isnilon Hapilon nga ang isa sa mga napatay sa pagtatapos ng giyera sa Marawi. Ayon kay Defense Secretary Delfin Lorenzana,  “FBI has confirmed that the DNA sample taken from a body recovered by our operating units in Marawi matches that of Isnilon Hapilon.”

Kasama si Hapilon at ang lider ng Maute Group na si Omar Maute matapos ma-corner ang rebeldeng grupo sa pinagtataguan nito. Ang isa pang lider na si Abdullah Maute ay napatay naman sa naunang engkwentro kasama ang dalawa pang Maute Brothers na sina Madi at Otto na miyembro rin ng bandidong grupo.

Kasabay sa pagpatay ng mga lider ang pagligtas sa humigit 20 na mga bihag.

Si Hapilon ay sinasabing kinilala ng Islamic State o ISIS na lider sa Timog Silangang Asya. Si Hapilon ay wanted din sa Amerika dahil sa terorismo. May patong na $5-million sa ulo si Hapilon dahil sa “Acts of Terrorism” at pagdukot at pagpatay sa isang US national. Kabilang si Hapilon sa bandidong grupong Abu Sayyaf na nasa likod ng pagdukot sa mga turista sa Dos Palmas Resort sa Palawan taong 2001 kabilang si Guillermo Sobero. Ang American missionary na si Martin Burnham naman ay dinukot noong 2002.

Ang magkapatid na Omar and Abdullah Maute ang tumatayong lider ng Maute Group na naghasik ng terorismo sa Marawi noong Mayo. Ang dalawa ay sumusuporta sa paniniwala ng ISIS – na naniniwala sa “extremist interpretation” ng relihiyong Islam na gumagamit ng “religious violence” o “jihad.”

Sa halos 5 buwang bakbakan sa pagitan ng gobyerno at Maute Group, tinatayang 753 terorista, 47 sibilyan, at 155 na sundalo ang namatay. Samantalang libo-libong Pilipino ang kinailangang lumikas.

Rehabilitasyon sa Marawi

Naging madamdamin ang pag-uwi ng mga sundalo sa kani-kanilang pamilya ng matapos angs halos 150 na araw na giyera sa Marawi. Tila nabunutan ng tinik ang mga kaanak ng mga sundalo ng makitang ligtas ang kanilang pamilya.

Matapos nga ang madugong labanan sa pagitan ng militar at Maute Group ay sinisimulan na ang rehabilitasyon sa lugar. Unti-unti na ring nagsisibalikan ang mga residente sa kani-kanilang mga bahay. Inanunsyo ng gobyerno na maaaring bumalik ang mga pamilya sa mga bahay na hindi  naapektuhan ng kaguluhan. Samantala, magbibigay naman ang gobyerno ng pansamantalang matutuluyan sa mga pamilyang nasira ang mga tahanan.

Maglalaan ng P5-billion ngayong taon para sa agarang tulong sa Marawi at karagdagang P10-billion sa susunod na taon para sa pangmatagalan na  mga programa upang manumbalik ang sigla ng Marawi.

Nagbigay naman ng suhestiyon si Senadora Grace Poe ng karagdagang P5-billion pa na maaaring ilagay sa 2018 budget’s Unprogrammed Appropriations.

“The Marawi rehabilitation plan should be future-proof and include infrastructure for security against elements who would attempt to besiege the city anew,” ayon kay Sen. Poe.

Ang 2018 budget ay kasalukyang pinagdedebatihan sa Kongreso. Ayon naman kay Budget Secretary Benjamin Diokno, ang ilalaan na budget para sa Marawi sa 2019 ay depende sa mga natitirang pangangailangan ng probinsya para tuluyang makabangon.

Wag maging kampante

Nagbabala naman ang isang eksperto na hindi dapat maging kampante ang militar dahil may natitirang miyembro pa rin ang Maute Group. Ayon kay security analyst at terrorism expert Dr. Rommel Banlaoi, maaaring makakalap ng mga bagong miyembro ang mga natitirang puwersa ng Maute Group o kaya ay umanib sa ibang teroristang grupo sa Mindanao tulad ng Abu Sayyaf, BIFF, Ansar Khalifa, at Foreign Fighters. Dagdag pa ng ibang eksperto, ang mga kaanak ng mga napatay ay maaaring sumali sa mga rebelde dahil sa paghihiganti. Ito ay naging pattern na sa pag-recruit ng mga bagong miyembro ng mga rebeldeng grupo.

Pinayuhan nila ang militar na patuloy magbantay sa Mindanao dahil sa mga maaaring mangyari lalo na kung hindi maging maayos ang gagawing rehabilitasyon sa lugar. Tiniyak naman ni Defense Secretary Lorenzana na walang nakaambang panganib o banta ng pag-atake sa ibang bahagi ng Pilipinas.

Base sa mga naunang report, may sumusuporta sa Maute Group na nakabase sa ibang mga bansa tulad ng Indonesia at Malaysia. Ayon sa isang “child warrior” na hawak na ng gobyerno may suportang pinansiyal ang dumadating sa Maute Group. Sinabi rin niya na maraming “child warriors” ang bandidong grupo na hinihinog lang ng panahon.

Presidente Digong; Ikalawang Marcos nga ba?

by

Walang pinagkaiba si Marcos at Duterte.  Hindi maitago ang mga damdamin ng ilan sa mga kababayan natin ang ikumpara si Presidente Digong at ang dating pangulo, Ferdinand E. Marcos.  May ilang kasing pagkakahawig sa mga patakaran nila sa gobyerno kaya ang batid ng iba, ikalawang Marcos ang magiging pamumuno ni Digong.

 

Ni Bebra B. Ruma  

Sa ikalawang taon pa lamang ni Pangulong Rodrigo Duterte, hindi biro ang kinakaharap niyang suliranin ng bayan.  Mabibigat na pagsubok, tulad ng giyerang inilunsad niya laban sa droga, mga anomalya sa iba’t ibang ahensiya, ang suliranin ng trapiko, pabahay sa mahihirap at mga sundalo’t pulis na nagsisilbi sa ating bayan,  international community relations, ang giyera sa Mindanao.

Nagmistulang ‘war zone’ ang maunlad na Marawi at magpahanggang sa ngayon ay hindi pa nakababalik ang mga mamamayan nito.   Upang mabilisang mabigyan-lunas ang pagsugpo sa mga naghahasik ng lagim, nagdeklara ng ‘Martial Law’ si Digong.

Ang pagdedeklara ng Martial Law ang nagbigay ‘kiliti’ sa mga isip ng mamamayang ikumpara siya kay Dating Pangulong Ferdinand E. Marcos.   Lalong-lalo  na sa mga ‘Martial Law babies’ malaki ang pagkakapareho ng pamumuno ni Marcos sa ipinapakitang pamumuno ngayon ng pangulo.   Anila, siya nga ba ang ‘ikalawang Marcos?’

Walang pinagkaiba si Marcos at Duterte 

Hindi maitago ang mga damdamin ng ilan sa mga kababayan natin na ikumpura si Digong sa dating diktador ng Pilipinas.   May ilan kasing pagkakahawig sa mga naging kilos nila at patakaran sa gobyerno kaya hindi maialis na ipagkumpara ang dalawa.

Babanggit tayo ng ilang mga isyu kung saan napagkukumpara si Pangulong Digong at Ferdinand Marcos.   Ano ang kanilang pagkakapareha at pagkakaiba sa mga palakad nila sa mga mababanggit.   Bagaman puno’t dulo ang paggamit ng Martial Law ng dalawang pinuno, ihuhuli natin itong talakayin.

Curfew.  Kasunod ng pagpapatupad ng Martial Law ang pagpapairal ng curfew sa bansa.  Nagkaroon ng ibang kahulugan ang salitang ito sa panahon ni Marcos.  Kinatatakutan ang mga otoridad noon kapag nakahuhuli ng mga lumalabag sa patakarang ito, dahil hindi basta kulong lamang ang aabutin, pagmamalupit pa sa kamay ng may kapangyarihan na minsan nauuwi sa kamatayan.   Sa panahon ni Marcos, pinatupad niya ang curfew sa pagitan ng ika-11 ng gabi hanggang ika-4 ng madaling araw—para sa lahat ng mamamayan ng Pilipinas.  Kay Digong naman, pinatupad niya ang curfew sa pagitan ng ika-10 ng gabi hanggang ika-5 ng madaling araw, para lamang ito sa mga menor-de-edad.

Extrajudicial Killings.   Sa panahon ni Marcos,  umabot sa tinatayang 3,000 buhay ang nawala at ang iba rito ay ‘unsolvable’ sapagkat hindi nalutas ang pagkakawala nila, ang iba pa ay kilalang personalidad.   Sa panahon ni Digong, inihahantulad ito sa mga patayang nagaganap na may kinalaman sa ‘War on Drugs’ ni Digong, na tumatala na umano sa 5,000 killings, at bumibilang pa.

Philippine Army.   Sa panahon ng pamumuno ni Marcos, ‘show of force’ ang pinakita ng pangulo sa kaniyang mga kapitbahay na mga Asyanong bansa, ganun na rin sa buong mundo.  Kaya noong panahon ni Marcos, isa sa pinaka-prominente at kinakatakutan ang Sandatahang lakas ng Pilipinas—lalo na ang batikang Philippine Rangers.   Sa panahon ni Digong, pinagpaplanuhan ng kaniyang administrasyon ang  dagdag pang modernisasyon ng military marahil na rin sa nakikita niyang kalumaan at pangungulelat ng sandatahang lakas na ngayon ay dumaraan sa pagsubok sa giyera sa Marawi City.

 

Sa panahon ni Ferdinand Marcos  at ng martial law tinarget ng kaniyang  pamumuno ang mga tunay na rebolusyonaryo—ang mga NPA, ang mga makakaliwa, mga manggagawang kontra sa kaniyang gobyerno.   Nasupil ang mga karapatang pantao, nasuspinde ang ‘writ of habeas corpus’ at tinanggalan ang mga mamamayan ng karapatang ipahayag ang kanilang mga saloobin.   Photo credits: bagonglipunan.com

 

Sa panahon ni Presidente Digong, napilitan siyang iproklama ang martial law sa Mindanao upang masupil ang mga bandidong Maute kasama ang ilang elemento ng dayuhang Isis at mga lokal na Abu Sayyaf.   Aniya, ang ‘military intervention’ sa Mindanao ay dahil sa hindi na kinaya ng civilian authority ang panatiliin ang kapayapaan sa kanilang lugar.  Photo credits: aa.com.tr

 

Agrikultura.   Binigyan ng pagpapahalaga ni Marcos na ang bansa ay isang ‘agricultural country’ kaya naman ginawa niyang ‘self-sufficient’ ang Pilipinas pagdating sa produksyon ng palay at mais.   Hindi noon umaasa ang Pilipinas sa pag-aangkat ng mga suplay ng bigas sa mga kalapit bansa para lang mapakain ang populasyon.   Sa panahon ni Digong, kinikilala rin niya na ang Pilipinas ay mananatiling agricultural country kaya naman puspusan pa ang pagpapalaganap niya ng mga programang pang-agrikultural tulad ng ‘free water irrigation’ at ‘market-guided farming projects’ para sa mga magsasaka sa buong Pilipinas.

Duterte:  “I am not Marcos”

“Martial law is Martial Law ha.  It will not be any different

from what the President Marcos did.  I’d be harsh,” –Duterte, May 24, 2017.

Ito ang puno’t dulo ng pagkukumpara kay Digong at Marcos.  Pareho kasi silang gumamit ng kapangyarihan ng Martial Law.   Sa panahon ni Marcos kasi, kinatatakutan ang kaniyang pagproklama ng Martial Law sapagkat isa ito sa naging sanhi ng pagkakamatay ng maraming sibilyan at pagkakakulong ng iba na kumakalaban sa rehimen ng diktador noon.   Samantalang wala pang 2 taon bilang pangulo si Digong, tumawag din siya kaagad ng Martial Law para sa Mindanao.

Sa panahon ni Marcos target ng kaniyang batas ang mga tunay na rebolusyonaryo—ang mga rebeldeng  NPA, ang mga makakaliwa, mga manggagawang kontra sa kaniyang gobyerno, mga mamamayang sumasalungat sa kaniyang plataporma.

Nasupil ang mga karapatang-pantao, nasuspinde ang ‘writ of habeas corpus’ at tinanggalan ang mga mamamayan ng karapatang ipahayag ang kanilang mga saloobin.

Malaki ang pagkakaiba ng Martial Law ng dalawang pinuno.   Kay Marcos, pinatupad ang Martial Law para sa buong Pilipinas,  upang ‘targetin’ ang mga kalaban niya sa gobyerno,

Sa panahon naman ni Digong, napilitan siyang iproklama ang Martial Law na limitado lamang sa buong Mindanao.  Ito ay upang masupil ang mga bandidong Maute kasama ang ilang elemento ng dayuhang ISIS at mga lokal na Abu Sayyaf.

Aniya, ang ‘military intervention’ sa Mindanao ay dahil sa hindi na kinaya ng civilian authority ang panatiliin ang kapayapaan sa kanilang lugar.   Isa pang importanteng pagkakaiba ng Martial Law ng dalawa ay sa panahon ni Digong, ang panuntunan ng konsitusyon ng bansa ay nananatili, walang suspensyon ng mga karapatang pantao kabilang ang writ of habeas corpus at sinisiguro lamang ng administrasyon na ang military intervention ay para lamang sa pagsupil ng mga bandido.

Ayon pa sa mga malapit sa pangulo, masyado pang maagang husgahan ang mga galaw ng pangulo, lalo na ang ikumpara siya sa dating diktador.   Maka-masa at may malasakit sa mga Pilipino si Digong sabi ng kaniyang administrasyon, hindi siya hahataw ng aabot sa 84% approval rating sa mga survey kung hindi nagpapakita ng magandang resulta ang pangulo sa pagganap ng kaniyang tungkulin.   Magtiwala lang nang lubos ang mga tao.   Seryoso aniya sa pagbabago at kaunlaran ang kanilang ‘working president’.

Close Bitnami banner
Bitnami