Lunas sa sakit ng likod

 

NI: MARILETH ANTIOLA

 

MADALAS na pananakit at pangangalay ng likod na hindi maiwasan. Marami ang maaaring mga dahilan o sanhi nito tulad ng maling postura sa pag-upo at pagtayo, pagod sa patatrabaho o pag-aaral at marami pang iba, na ang ilan ay maaring maging dahilan  ng malalang sakit.

 

Narito ang ilang pangunahing lunas upang mabawasan o mawala ang sakit ng likod:

• Ipamasahe ang likod upang maibsan ang sakit at ngalay nito at matanggal ang mga lamig na nararamdaman.
• Lagyan ng warm compress ang parte ng likod na sumasakit. Mainam na gumamit ng boteng may maligamgam na tubig at ibalot sa malinis na tela; huwag gumamit ng boteng plastik.  Unti-unting idampi ang bote sa balat ng likod nang paulit-ulit. Patagalin ng 10 hanggang 15 minuto ang warm compress, tatlo hanggang apat na beses sa isang araw.
•     Puwedeng langisan ang parte ng likod na sumasakit. Pwede ring gumamit ng mga body pain reliever gaya ng salonpas, oil of wintergreen at iba pang klaseng liniment na makakatulong upang maibsan ang sakit, kirot at ngalay na nararamdaman ng inyong likod.
• Puwede rin na uminom ng mga oral na gamot gaya ng alaxan, ibuprofen at mefenamic acid; inumin ito pagkatapos kumain.
•      Kumonsulta sa doktor kung iba na ang nararamdaman upang mabigyan ng agarang lunas ang sakit sa likod.

Makatulong sana ang aking artikulong ito, upang mabawasan o mawala ang anumang klaseng sakit na nararamdam niyo sa inyong likod.

Masarap gumalaw at kumilos nang walang masakit sa katawan, kaya habang maaga pa ay agapan mo na agad kung may kakaiba kang nararamadam sa iyong katawan.

Kung ikaw ay nanghihinayang sa inyong gagastusin para magkaroon ng malusog na pangangatawan, magisip-isip ka na dahil baka kulang pa ang iyong iniipon na pang-ospital mo.

Ika nga, health is wealth or better.

 

TAMANG pag-aalaga sa tainga susi sa malinis na pangangatawan.

 

NI: MARILETH ANTIOLA

 

KASAMA rin sa ating personal hygiene ang paglilinis ng ating mga tainga, ngunit ang iba ay hindi alam na maaring makapinsala sa tainga ang araw-araw at maling paglilinis nito.

Nakaugalian na ng ibang tao na pagkatapos nilang maligo bago umalis ay naglilinis muna sila ng kanilang mga tainga. Ngunit sa totoo lang ay maling ugaliin na maglinis araw-araw sa loob at maging sa labas ng tainga.

Ang earwax o tutuli ay bahagi ng proteksyon ng ating mga tainga, isang uri ng secretion na nagsisilbing taga-sala ng pumapasok na dumi at alikabok sa ating mga tainga.

Kapag ang isang tao ay araw-araw naglilinis ng kanilang mga tainga ay nawawalan ng pagkakataon na makaipon ng tutuli o earwax. Mawawalan ng proteksyon ang mga tainga, halimbawa sa mga insektong aksidenteng bigla-bigla na lang pumapasok sa tainga kung may tutuli o earwax ay hindi agad-agad makakapasok sa kaloob-looban ng tainga ang ano mang insekto.

. Ayon sa mga espesyalista o doktor ay mas mainam na maglinis ng tainga dalawa o tatlong beses sa loob ng isang linggo.

• Gumamit ng mga cotton buds na sakto lamang sa inyong mga tainga
• Huwag gumamit ng mga kahoy na panglinis na madaling maputol.
• Ganun din ang mga gawa sa metal na panglinis ng tainga dahil baka mapasobra ang inyong paglilinis at baka ito ay dumugo o masugatan ang inyong mga tainga.
• Kapag nararamdaman na masakit o makirot ang tainga pagkatapos ng paglilinis mas mabuti na pumunta agad sa malapit na ospital o health center upang ipatingin kung ano ang nangyari sa inyong mga tainga para hindi na lumala.

Karaniwang mas maraming tutuli ang mga bata, ngunit habang nadadagdagan ang edad ng isang ato ay mas kumukunti at nababawasan ang pagdami o produksyon nito.

Alagaan at linisin ang lahat ng parte ng katawan upang makaiwas sa ano mang mga sakit o karamdaman.

Tandaan ang malusog at malinis na katawan ay nagsisimula sa maayos at disiplinandong pag-aalaga.

 

NI: MARILETH ANTIOLA

 

NOONG mga nakaraang taon, may mga lumabas na pahayag mula sa mga environmentalist na ang mga produkto na may halong plastik tulad ng mga pinggan na kinakainan ay mapanganib sa  kalusugan.

Ang mga kemikal na additives at mga espesyal na solvents sa pinggan ay maaring makaapekto nang masama sa kalusugan ng tao dahil maaring makapasok sa pagkain at magkaroon ng pathogenic effect sa katawan.

Ilan sa mga additives na ito at espesyal na solvent ay ang susumusunod:

Styrene.  Isang substance na nakakapagdulot ng kanser sa tao. Nakakaapekto rin ito nang masama sa mga nervous, cardiovascular at reproductive system, na nakakasagabal sa normal na metabolism ng isang tao.

Methanol.  Isa sa pinaka-mapanganib na lason na maaring makakitil ng buhay ng tao.

Bisphenol A. Maari kang magkaroon ng kanser at diabetis. Mapanganib lalo na sa mga buntis.

Kaya mas mabuti na kahit mas mahal ang halaga ng pinggang kinakainan, mas ligtas naman ang mga ito sa kalusugan kaysa naman ang makatipid at makamura ngunit malagay naman sa panganib ang kalusugan na maari rin mapunta sa sakit kagaya ng kanser.

Maging matalino palagi at mapanuri sa mga bagay na bibilhin at gagamitin upang ang buhay ay mas lalong tumagal at hindi magkasakit.

KASAMA sa buwanang dalaw ng mga kababaihan ang masamang pakiramamdam na maari rin namang maiwasan. 

NI: MARILETH ANTIOLA

ANG matinding sakit sa puson ang isa sa mga problema ng mga kababaihan tuwing sasapit ang kanilang buwanang dalaw o regla. Bukod sa magastos ito, para ding wala silang ganang kumilos,  pagod na pagod, wala sa wisyo o wala sa mood.

Nararanasan ang pagsakit ng puson dahil ang mga muscle sa matris ang nagre-relax at nagco-contract para makatulong sa paglabas ng lining ng uterus, at ang lining na ito ang nagsisilbing dugo tuwing may buwanang dalaw ang isang babae.

 Ilan sa maaring gawin upang mabawasan ang menstrual pain at sakit ng puson:

 Mag-ehersisyo. Dapat mag-ehersisyo araw-araw at hindi lang tuwing sasapit ang buwanang dalaw. Isama ito sa normal na bahagi ng lifestyle upang kapag may regla o buwanang dalaw ay mas magaan ang pakiramdam.

 Kumain ng masustansiyang pagkain. Ilan sa  mga ito na dapat isama sa diet araw-araw ay ang isda at gulay kasama na ang pipino;  mga prutas tulad ng pakwan, papaya, saging at avocado; almond at walnut pati na peanut butter; brown rice at dairy products.

Uminom ng maraming tubig. Mainam ang pag-inom ng maraming tubig araw-araw upang manatiling hydrated dahil sa dami ng fluids na nailalabas ng katawan. Nakakatulong ito upang mapaayos at mapaganda ang dugo sa katawan. Inirerekomenda ang walong baso ng tubig sa buong araw.

Magpahinga. Nakakawala ng lakas ang pagkakaroon ng dysmenorrhea o matinding sakit ng puson.  Iwasan din ang labis na physical activities o paggawa ng mga mabibigat na trabaho at bawasan ang social activities tuwing may buwanang dalaw upang makapagpahinga rin ang katawan. Huwag magpuyat.

Kung hindi parin nawawala ang sakit na nararamdaman, mas mabuti na pumunta sa malapit na ospital o center o komunsulta agad sa doktor dahil baka ito ay mauwi sa malalang komplikasyon kung hindi agad maagapan.

MGA dapat maunawaan tungkol sa mind control.

 

NI: MARILETH ANTIOLA

 

MARAMI ang hindi alam kung ano ang ibig sabihin ng mind control. Ito  ay isang   gawain o paggamit ng kakayahan na  utusan at pasunurin ang isang tao sa pamamagitan lamang ng paggamit ng lakas ng pag-iisip.

Ang pagkontrol sa isipan ng isang tao ay kadalasan ginagamit ng mga psychologist upang mapag-aralan ang pinagmulan ng phobia, behavioral patterns at subconscious ng kanilang mga pasyente.

Noong Medieval period o middle ages pa lamang ay aware na ang ilang tao tungkol sa mind control. Ngunit, itinuturing noong panahon na iyon na ang mind control ay gamit sa black magic o mahika.

Ayon sa paniniwala ng ibang tao ang mind control ay kabilang sa mga kapangyarihan ng mga mangkukulam, mangbabarang o mga black witch para maisakatuparan ang kanilang bibiktimahin.

Ngunit noong Renaissance bahagyang nabago ang pananaw at interpretasyon ng ibang tao tungkol sa mind control at noon din inumpisahang gamitin ito ng mga salamangkero o magician sa kanilang mga pagtatanghal.

Sa aking sariling pananaw, walang masama kung maniniwala ka sa mind control dahil wala namang mawawala magiging bukas pa ang iyong isipan sa mga ganoong bagay. At hindi imposible ang mind control dahil sa tamang meditation kagaya ng pagpapahinga, pagtulog sa tamang oras, pagkain ng mga masusustansiyang pagkain, paglayo sa mga negatibong tao, magagawa mong mapalakas ang iyong isipan upang makapag-emit ito ng enerhiya na magagamit mo para maisagawa mo ang tinatawag na mind control sa ibang paraan gaya ng pag-iisip mo ng mas kapakipakinabang na mga bagay.

Paalala lamang,  huwag kakalimutang magpasalamat at magdasal dahil tanging ang Panginoong Maykapal lamang ang may tunay na kapangyarihan mag-control sa lahat ng mga bagay at puwedeng mangyari sa ating buhay.

SOLUSYON para sa maputi at mala porselanang balat.

 

 NI: MARILETH ANTIOLA

 

MARAMI sa mga kababaihan ang nangangarap ng maputi at makinis na balat na may pantay na kulay.

Ang iba ay nahihiyang magsuot ng mga sleeveless na damit,  shorts, at hindi ma-enjoy ang summer dahil nahihiya at nahihirapang magsuot ng mga swimsuit dahil sa hindi pantay na kulay ng kanilang balat.

Ang ilan ay gumagastos pa ng malaki para lang makamit ang puti ng balat na kanilang ninanais. Talamak na rin ngayon ang mga sabon, lotion, mga beauty regimen na pampaputi at mga nauusong oral glutathione capsule na pampaputi ng balat at ang bagong-bago at sikat na gluta-drip na mas mabilis daw ang resulta ng pagputi kapag ikaw ay nagpa-inject nito.

Ngunit may ilang natural na paraan para makamit mo ang kulay ng balat na iyong pinapangarap na hindi na kailangan pang gumastos ng malaki.

Gumamit ng kalamansi. Ang balat ng kalamansi ay may alkalizing effect na nakakapagpagpaputi ng balat. Kumuha lang ng apat o limang piraso ng kalamansi, hiwain sa gitna at ikuskos sa inyong balat. Gawin ito araw-araw para sa mabilis na resulta.

Katas ng patatas. Kumuha ng patatas hiwain ng pabilog at maninipis, ipahid o ikuskos sa inyong mga balat hanggang maubos ang katas. Gawin ito dalawa o tatlong beses sa isang linggo dahil ito ay medyo magastos kung ito ay araw-arawin mo.

Aloe vera. Hiwain sa gitna ang aloe vera at ipahid sa iyong balat o sa lugar na mas gusto mong pumuti. Gawin ito isang beses sa isang linggo habang naliligo dahil ito ay malagkit.

Ang kulay ng balat ay hindi basehan ng pagkatao at kagandahan  ng isang tao. Walang masama kung  kayumanggi ang iyong kulay, maputi o maitim ang balat dahil ang tunay na kagandahan at tunay na kayamanan ng tao ay palaging nasa puso at nasa tunay na  kabutihan ng loob.