PINAS

Ang Lihim ng Panginoon (Ikapitong Bahagi)

Sonspeak

Recent News:

Menardo Guevarra

Pagsasawalang bisa ng amnestiya kay Senador Trillanes, nararapat nga ba?

by

NAGULANTANG ang sambayanan ng biglang inanusyo ni Kalihim Menardo Guevarra ng Kagawaran ng Katarungan na kinasela o pinawalang bisa ni Pangulong Rodrigo Duterte sa pamamagitan ng Proclamation Number 572 ang amnestiya na iginawad ni dating Pangulong Benigno Aquino III noong 2011 kay Senador Antonio “Sonny” Trillanes IV dahil sa kaniyang partisipasyon sa mga serye ng kudeta noong panahon ni dating Pangulong Gloria Macapagal Arroyo.

Matatandaang si Senador Trillanes ay bahagi o kasapi ng ng “Magdalo Group” na naglunsad ng mga sunod-sunod pagaalsa tulad ng magkasunod na 2003 Oakwood Mutiny at 2007 Manila Peninsula Siege bilang pagtuligsa sa mga alegasyong korapsyong nagaganap noong panahon ni PGMA sa hanay ng sandatahang lakas na may kinalaman sa military procurement system at retirement system.

May dalawang basehan na ibinigay si Pangulong Duterte kung bakit kinansela niya ang amnestiyang naibigay kay Senador Trillanes, ang una ay hindi raw ito nag-apply ng amnestiya at pangalawa ay hindi nito inamin ang pagkakasala o pagkukulang sa isang bidyong panayam ng makibahagi siya sa mga kudetang aktibidades bagama’t ito ay labag sa saligang batas.

Samakatuwid ang amnestiyang iginawad ay walang bisa mula pa sa simula dahil sa nabanggit na kadahilanan. Ito naman ay mariing pinabulaanan ni Senador Trillanes at ipinagtanggol na mayroong bidyo na magpapatunay na nag-apply siya ng amnestiya at litratong tangan-tangan niya ang amnesty application form na kanyang sinulatan at pinirmahan bilang pag-ako sa pagkakasalang nagawa laban sa saligang batas.

Batay sa kasalukuyang saligang batas, ay bahagi ng kapangyarihan ng pangulo ang maggawad ng amnestiya sa mga tao o grupo ng taong may opensiba o kasalanang nakabatay sa kanilang politikal na paniniwala at ideolohiya o tinaguriang “political offenses”. Saklaw ng amnestiya ang mga dating rebelde na piniling isuko ang kanilang mga armas at magbalik-loob sa pamahalaan tulad ng mga miyembro ng Moro National Liberation Front (MNLF), Moro Islamic Liberation Front (MILF), Reform the Armed Forces Movement (RAM), at Young Officers Union (YOU) o maging ng New People’s Army (NPA).

Dahil dito, ay dapat nating mabatid ang mga sumusunod, una ,ang paggawad ng amnestiya ay hindi nakasalalay lamang sa pangulo, kailangan din nitong sang-ayunan ng kongreso at pagtibayin ng korte batay sa prinsipyo ng checks and balances at co-equal branches. Kung ito rin ba ng prosesong susundin sa pagkansela nito ay hindi malinaw sa kadahilanang maging ang saligang batas ay tahimik dito.

Pangalawa, ay dapat natin ding limiin na bahagi ba ng kapangyarihan ng pangulo ang mag-utos ng pag-aresto sa isang indibidwal ng walang warrant of arrest o ito ay sadyang nasa poder ng kapangyarihan ng korte na maglabas ng warrant of arrest bilang batayan sa pag-aresto?

Pangatlo, ay puwede ba talagang kanselahin ang amnestiyang naibigay na ng dating pangulo ng kasalukuyang pangulo. Dapat nating tandaaan, na ang diwa at hangarin ng amnestiya ay upang mapag-isa, mapag-buklod at mapaghilom ang mga sugat at makalimutan ang bakas ng hidwaang namuo sa pagitan ng gobyerno at mga nagawaran nito.

Pang-apat, ay may mga tanong na kung ang pangyayaring ito ay bahagi lang ng paraan para maiwasan ng mga mamamayan na pagtuunan pansin ang mga mas mahahalagang isyu at pagsubok na kinahaharap ng kasalukuyang lipunan tulad ng tumataas na halaga ng mga bilihin at serbisyo, pagbaba ng piso laban sa dolyar, kakulangan sa bigas at pagbagal ng takbo ng ekonomiya.

Dagdag pa rito ang alegasyong ito ay bahagi lamang ng “political persecution” at “political harassment” ng administrasyon para matahimik ang mga tunay na oposisyon na aktibong kinakatawan ni Senador Trillanes.

Bilang paglalagom, tanging ang korte suprema lamang ang may kapangyarihang maghatol kung ang nasabing pagkansela ng amnestiya ay naayon o labag sa saligang batas. Ano mang hatol o desisyon ng korte suprema ay siguradong igagalang at irerespeto ng parehong kampo ni Pangulong Duterte at Senador Trillanes.

Ito ang unang malaking hamon ng bagong talagang mahistrado ng korte suprema Teresita de Castro, ngunit higit pa rito, ito ay isang malaking hamon at pagsubok sa ating mga demokratikong lipunan, institusyon at proseso na gumagarantiya na ang mga karapatang pantao at kabutihang panlipunan ay buhay at di kailanman mawawala o maglalaho. Ipagpatuloy nating ipagdasal na ang kalooban ng Maykapal ang mamayani at hindi ang pansariling kapakinabangan o interes lamang ng tao ang siyang magwagi sa pagbibigay katugunan sa isyung ating kinasasadlakan.

May destabilization plot nga ba laban sa gobyerno?

by

Pinas News

KINUMPIRMA ng Department of Justice na hindi kunektado o walang pagkaka-ugnay ang magkakasunod na pagpatay sa dalawang mayor at isang vice mayor sa loob lamang ng limang araw.

Ito ay base sa resulta ng ini-syal na imbestigasyon na isinumite ng National Bureau of Investigation sa DOJ, dahil ang NBI ang inatasan na magsagawa ng parallel investigation o hiwalay na pagsisiyasat sa magkakasunod na tatlong krimen.

Maaalalang unang binaril si Tanauan City, Batangas Mayor Antonio Halili nuong July 2 habang dumadalo sa kanilang flag raising ceremony. Sinasabing si Halili ay kabilang sa tinatawag na narco-list ng Philippine Drug Enforcement Agency.

Kinabukasan  naman  ng  July 3 ay napatay sa ambush sa Cabanatuan City ang mayor ng General Tinio, Nueva Ecija na si Ferdinand Bote. Kasama sa napatay ang  kanyang  driver na si Romulo Guillemer at kritikal ang  lagay  sa ospital ng security aide na si Romeo Edrinal.

Pangatlo, ang pag-ambush kay Vice Mayor Alex Lubigan ng Trece Martires City, Cavite habang binabagtas nila ang Trece Martires-Indang Road sa Barangay Luciano, Trece Martires City nito lamang July 7. Napatay rin ang kanyang driver na si Romulo Guillemer.

At bagamat may tama ng mga bala ay naisugod sa ospital at nabuhay ang security aide niya na si Romeo Edrinal.

Sinabi ni Justice Secretary Menardo Guevarra na base sa resulta ng inisyal na  im-bestigasyon ng NBI lumilitaw na hindi kunektado sa isa’t-isa ang tatlong krimen. Sa kabila nito ay inatasan na rin niya ang NBI na alamin kung may kaugnayan ba sa sinasabing  destabilization plot laban sa Duterte administration ang nasabing mga insidente. Dahil dito ay marami ng mga local officials tulad ng mayors, vice mayors, governors, vice governors at iba pa ang humiling na sa na bigyan ulit sila ng mga detailed police escorts. Tinanggalan na kasi sila ng mga police escorts kamakailan, base sa utos mismo ni Pangulong Rodrigo Duterte.

Ang sabi tuloy ng ilang kritiko ay tila lumalala na ang crime situation sa bansa?  Dati daw kasi ay mga sibilyan o mga ordinaryong mamamayan tulad ng mga drug pushers ang napapatay ng mga pulis dahil nanlaban daw? Pero ngayon ay kapansin-pansin daw na mga matataas na opisyal na ang pinapatay bagamat  hindi naman tukoy ng mga otoridad kung sino ang mga salarin at kung ano ang motibo? Bakit ganyan kalakas ang loob ng mga armadong grupo na pumatay ng mga opisyal at sa araw pa isinasagawa ang krimen, na hindi katulad sa mga nagdaang panahon na sa gabi o sa madaling araw? Nagkulang ba o may kapabayaan ba sa panig ng kapulisan? Masasabi pa ba na ligtas ang mga opisyal ngayon mula sa kamay ng mga armadong grupo o sindikato?

Anti-corruption campaign ni Duterte, magtagumpay kaya?

by

Ni: Jun Samson

MATINDI talaga at kitang-kita ng sambayanang Pilipino na seryoso si Pangulong Rodrigo Duterte o kanyang administrasyon na tuparin ang isa sa ka-nyang ipinangako noong panahon ng kampanya na lilinisin niya at gigibain ang korapsyon sa bansa.

Kung inyong maaalala ay sinabi ni Digong noon pa man na bukod sa iligal na droga ay malaking problema rin ng bansa ang korapsyon.

Hindi naman maitatanggi ninuman na ang talamak na korapsyon o pagnanakaw sa kaban ng bayan ang isa rin sa dahilan kung bakit mabagal ang pag-usad ng ating ekonomiya o growth rate.

Isa sa patunay na sinise-ryoso at tinutupad ng pangu-lo ang kanyang pangako ay magkakasunod o paisa-isa na niyang sinibak o pinagresign ang ilang mga opisyal na nasangkot sa umano’y katiwalian. Hindi ba at sumambulat sa bansa kamakailan lang ang balitang pinagbitiw o sinibak ni Pangulong Digong si Tourism Secretary Wanda Tulfo-Teo? Ito daw ay dahil sa conflict of interest matapos nagbayad ng advertisement ang Department of Tourism sa blocktime television program ng kanyang kapatid na si Ben Tulfo sa government station sa People’s Television Network channel 4.

Kasunod niyan ay pinagbitiw umano si DoT Promotions Board Chairman Cesar Montano dahil naman umano sa labis na paggastos ng kanyang opisina, kasama na ang mga pag-abroad nito.

Sa usapin naman sa Department of Justice ay inanunsyo ng presidente sa isang press conference sa Malakanyang na tinanggap niya ang resignation ni dating Justice Secretary Aguirre. Nang itinalaga naman si Justice Secretary Menardo Guevarra na kapalit ni Aguirre ay agad na inatasan ni Guevarra ang nadatnan niyang anim na DoJ undersecretaries at limang assistant secretaries na magsumite ng kani-kailang courtesy resignation.

Nag-ugat ang kontrobersya sa DoJ matapos inabswelto ng DoJ sa illegal drug trade si Kerwin Espinosa at iba pang umano’y mga chinese drug lords.

Dahil sa sobrang pagkadismaya ni Duterte ay iniutos nito na isalang sa automatic review ang nasabing kaso.

Nasibak din sa pwesto at nakakulong pa sina Bureau of Immigration Deputy Commissioners Al Argosino at Mike Robles matapos na tumanggap umano ng P50M na suhol mula sa foreigner gaming tycoon.

Sinibak naman ng pangulo si Rudolf Phillip Jurado bilang government corporate counsel dahil din sa umano’y anomalya na nasilip din ng Malakanyang.

Pinakahuli sa sinibak at pinaliguan ng malulutong na mura ng pangulo ay si Bureau of Customs Deputy Commissioner for Management and Information Technology Noel Sales Prudente. Sobra-sobra rin daw kasi ang travel abroad nito na wala namang kaugnayan sa kanyang trabaho pero ginastusan ng pondo ng ahensya.

Ito ay malinaw na nais talaga ni Pangulong Digong na linisin ang korapsyon sa ating Inang Bayan. Bagamat ang lahat ng ito ay hindi pa napatunayan dahil ang iba sa kanila ay hindi naman nasampahan ng kaso sa korte kaya wala pang patunay sa alegasyon. Ang tanong ko lang sa mga mambabasa, kelan kaya mauubos ang mga corrupt officials? Nababawasan kaya sila o nadadagdagan pa?

Saan kaya papunta ang PCGG at OGCC?

by

Ni: Jun Samsun

PATULOY na naninindigan at sumusuporta si Justice Secretary Menardo Guevarra sa hakbang na isinulong sa Kamara de Representantes para sa panukalang pagpapabuwag sa PCGG o Presidential Commission on Good Government at OGCC o Office of the Government Corporate Counsel.

Sa pananaw ni Guevarra ay malayo pa ang lalakbayin o tatahakin ng nasabing panukala dahil hanggang sa kasalukuyan ay wala pa itong counterpart bill sa Senado.

Sa kabila nito ay agad namang dumepensa si Guevarra at sinabing nirerespeto naman niya ang hakbang ng Kamara, pero kung siya anya ang tatanungin o sa legal aspect ay mas nais niyang manatili sa ilalim ng pangangasiwa o pamamahala ng Department of Justice ang PCGG at OGCC.

Samantala tahasang inamin ni Guevarra na hanggang sa kasalukuyan ay hindi pa niya natatalakay kay Pangulong Rodrigo Duterte ang nasabing bill.

Sa ilalim kasi ng batas ay maaari itong pigilan ng presidente sa pamamagitan ng pag-veto. Ang naturang panukalang batas ay lumusot na sa ikatlo at huling pagbasa sa Kamara.

Matapos nito ay iaakyat naman ito sa senado at sakaling makapasa ay dadalhin naman sa Malakanyang at duon na magkakaalaman kung lalagdaan ni Pangulong Digong o ibiveto?

Kung inyong maaalala ay naging kontrobersyal ang PCGG lalo na nuong naupo bilang pangulo si Cory Aquino. Sa panahon na iyon ay masigasig ang PCGG sa paghabol sa umano’y nakaw na yaman ng mga Marcos.

Pero kalaunan ay sumambulat sa sambayanan ang isang larawan na masayang nakikipagsayaw si dating First Lady Imelda Marcos sa isang mataas na opisyal ng PCGG na bisita sa birthday party ni Madam Imelda.

Nagkaroon ng kulay ang nasabing litrato na kapwa naman nila itinanggi. Sa ngayon ay hihintayin muna ang mangyayari kapag naiakyat na ito sa senado at sa Malakanyang. Marahil ang reaksyon ng simpleng mamamayan at pamilya nila Juan dela Cruz ay, “ano ba ang pakialam namin kung ano man ang mangyari sa panukalang iyan na kaugnay sa PCGG? Makakain ba namin iyan? “

SoJ Guevarra, may sariling kumpas

by

Ni: Jun Samson

AMINADO si dating Senior Deputy Executive Secretary Menardo Guevarra na tiyak na maninibago siya sa pwesto bilang bagong Justice Secretary.

Dahil dito ay sinabi ni Guevarra na gusto niyang maging pamilyar muna siya sa ibat-ibang mga mandato ng Department of Justice bilang abugado at pati na rin sa organisasyon ng kagawaran. Nito lamang nagdaang linggo ay pormal nang nagsimula sa kanyang trabaho sa DoJ si Guevarra at sa kanyang unang araw ay agad niyang pinulong ang mga opisyal sa DoJ.

Sa pamamagitan nito ay malalaman din umano niya kung kakailanganin ba niyang magdagdag ng mga tao o magsibak.

Kinumpirma rin ni SoJ Guevarra na pinayagan umano siya ni Pangulong Rodrigo Duterte na palitan o sibakin ang mga tao sa DoJ na sangkot sa mga maling gawain.

Nakupo yari na!!! Magtago o gumilid-gilid na iyung ilang Asec at Usec na halos dalawang taon na nagsiga-sigaan sa DoJ na akala yata ay sariling kumpanya nila ang opisinang pinapasukan nila?

Parking attendant din siya kung tawagin ng iba dahil pakialamero daw sa parking area? Dapat daw sa iyo ay kusang loob na lumabas sa bakuran ng DoJ at huwag mo nang hintayin na sibakin ka pa ni SoJ Guevarra o ni Pangulong Duterte!

Isama mo si Ms. Graceful Exit. Sa totoo lang ayon sa mga insiders ay wala naman daw siyang naitulong kay dating Justice Secretary Vitalliano Aguirre.

Sa halip ay naging kargo o pasanin pa nga daw siya? Balikan ko lang si Secretary Guevarra, sinabihan pala siya ng pangulo na hindi makikialam ang palasyo sa paraan niya ng pagpapatakbo sa DoJ.

Ibig sabihin ay malaya, may kamay at may sariling desisyon si Guevarra kaya hindi siya magiging flower vase o robot sa kanyang opisina.

Dahil dito’y tiyak na madidismaya ang mga kaanak o mga malalapit kay Pangulong Duterte na hihingi ng pabor sa kanya. Malinaw daw kasi ang bilin ng pangulo na huwag pagbigyan ang mga kamag-anak niya na hihingi ng pabor sa DoJ.

Ang magiging malaking problema agad dito ni SoJ Guevarra ay puro kontrobersyal at malalaking kaso ang agad na sumalubong sa kanya, tulad ng ibinasurang drug case laban kina Kerwin Espinosa, Peter Lim at Peter Co, iyung isyu ng pagkakapasok sa provisional coverage ng Witness Protection Program ng tinaguriang PDAF scam queen na si Janet Lim-Napoles, ang malaking problema sa Bureau of Immigration, drug trade sa Bureau of Correction at iba pa.

Pero tama ang kasabihan na you can never put a good man down. Kaya kahit na marami ang problema, basta mahusay at matino ang pinuno ay siguradong ang opisina o departamento ay sa maganda rin patutungo. Aba, parang tula yata ah? Hahaha, good luck po Sir MIG!

Resignation o dismissal!

by

Ni: Jun Samson

TILA nauuso ang sibakan o resignation sa hanay ng mga government official? Ang pinakahuling nagbitiw ay si Justice Secretary Vitaliano Aguirre II at ang ipinalit sa kanya ay si Senior Deputy Executive Secretary Menardo Guevarra. Ngayon naman ay hinihiling ng Public Attorney’s Office (PAO) at ng Volunteers Against Crime and Corruption kay Health Secretary Francisco Duque III na magbitiw na rin sa pwesto.

Hindi man sangkot si Duque sa implementasyon ng Dengvaxia, pero patuloy pa rin ang panawagan ng kanyang resignation.  Ito raw ay dahil nagiging hadlang o sagabal si Duque sa paghahanap ng hustisya sa mga batang nasawi matapos naturukan ng Dengvaxia.

Sa paniwala ni PAO Forensic Chief, Dr. Erwin Erfe na dapat na magbitiw sa pwesto si Duque dahil sa halip anya na makatulong ang kalihim na makamit ang hustisya ng mga biktima ng Dengvaxia ay tila lumilitaw na ito pa ang nagiging sagabal para mapanagot ang mga may sala sa kontrobersyal na malawakang anti-dengue vaccine ng Department of Health.

Nakakuha naman ng kakampi ang PAO dahil sinegundahan o sinang-ayunan ng mga miyembro ng VACC o Volunteers Against Crime and Corruption ang panawagang resignation ni Duque. Isa sa mga tinutulan ng PAO ay ang inilabas na kautusan ng DoH na nagsasabing dapat ay sa mga ospital lamang ng gobyerno ipaubaya ang pagasasagawa ng autopsiya sa mga naturukan ng Dengvaxia.

Dahil diyan ay agad na idinipensa ng PAO ang sistema ng pagsasagawa nila ng forensic examination sa mga bangkay ng mga naturukan ng Dengvaxia. Tama ba na sa tuwing magkakaroon ng problema o kontrobersya ay ipapanawagan ang resignation sa namumuno? Sakali namang mag-resign nga at napalitan ang hepe ay nakakatulong ba ito o magiging dahilan kaya ito para maresolba ang problema?

Marahil ay hindi resignation o dismissal ang sagot sa problema? Ang kailangan siguro ay malinis na intensyon ang pairalin sa puso, tunay na pagsisilbi sa taumbayan at sa inangbayan, at walang korapsyon o katiwalian at walang pinoprotektahang political party. Pero sa panahon ngayon ay saan naman kaya tayo maghahanap ng public servant na masasabing tunay na malinis at walang bahid ng kahit na kaunting katiwalian? Sabi nga ay dapat magkaroon ng isang leader by example. May apat na taon pang pamumuno sa bansa ang natitira para sa Duterte administration. Hindi naman maiiwasan na mag-isip o magtanong, “ilang opisyal pa kaya ang sisibakin o magre-resign?

 

Close Bitnami banner
Bitnami