PINAS

Ang Lihim ng Panginoon (Ikapitong Bahagi)

Sonspeak

Recent News:

Metro Manila

Beepbeep.ph: One-stop shop app para sa sasakyan

by

BEEPBEEP.PH handog ang mga serbisyong car repair at iba pa online.

 

Ni: Jonnalyn Cortez

SA PANAHONG ito ng easy installment plans at low down payment, mag-iisip pa rin ng makailang beses ang isang nagnanais bumili ng sasakyan dahil sa patuloy na pagtaas ng presyo ng gasolina at ang maintenance cost na hindi maiiwasan.

At kapag inilabas na ang sasakyan sa daan, nariyan ang mga pagsubok na kaakibat ng pagmamaneho araw-araw: ang salasalabit na trapiko kahit saan pumunta, mga paghukay sa kalsada, init ng ulo ng kapwa motorista, mga traffic aide, mga motorsiklong pasingit-singit sa bawa’t espasyo sa daan, mga tumatawid sa di tamang tawiran, at kapag may bagyo, ibang sakit ng ulo ang titiisin. Sadyang napakahaba ng listahan ng nagmamay-ari ng sasakyan.

Ngunit sa harap ng mga ito, maraming dahilan pa rin kung bakit bumibili ng sasakyan ang motorista.

At ngayon, bukod sa mga batas trapiko na kailangang sundin, dapat ding maging maingat sa pagmamaneho upang maiwasan ang makabangga, mabangga at masira ang minamaneho. Hindi biro ang maintenance cost at pagpapa-repair ng sasakyan sa ngayon. Pero kung may pera ka nga at kakayahan na ipagawa ito, may oras ka ba na dalhin ito sa pagawaan?

Dito sa pangangailangang ito pumapasok ang website at app na BeepBeep.ph na dinebelop ni Anton Ojeda, dating country manager ng restaurant directory na Zomato.

Nais ni Ojeda na maging madali para sa karamihan ang pagkakaroon ng sasakyan sa pamamagitan ng mga inaalok nitong serbisyo. Ang Beepbeep.ph ay may malaking database na naglalaman ng mga address ng service providers sa buong Metro Manila mula sa malalaking auto dealer at kasa hanggang sa mechanic shops at maliliit na talyer at vulcanizing shops.

Sa kabuuan, meron itong 7,000 registered shops na pawang may mga permit upang siguruhin ang seguridad ng sasakyan ng kanilang mga kliyente.

Gamit ang app, makikita ng user ang pinakamalapit na pagawaan sa kanyang lugar, ano ang mga specialized services nito at estimated cost ng ipagagawa niya. Pagmamalaki ni Ojeda, ang simpleng pag-search sa Google ay hindi kayang ibigay ang serbisyong handa silang ibigay sa mga may-ari ng sasakyan.

ANTON Ojeda pinangako at siniguro ang safety ng mga sasakyan sa Beep-beep.ph.

 

Paano nagsimula ang Beepbeep.ph?

Nagsimula ang konsepto ng Beepbeep.ph nang umalis ang drayber ni Ojeda at kinailangan niyang dalhin ang kanyang sasakyan sa pagawaan. Dahil sa kawalan ng oras at pagiging sobrang abala, pinadalhan siya ng kanyang kaibigan ng mekaniko na kukuha ng kanyang kotse mula sa bahay at saka ito gagawin.

“I enjoyed the convenience, and asked him why he does not offer that service to others. He told me that he did not have the capability for it. Then that got me to thinking about building the platform. Fortunately, I found people to believe in it and invest — friends and people I have worked with before. We are an all-Filipino group,” wika ni Ojeda.

Dahil hindi kabisado ng lahat ng customer kung saan ang mga pagawaan ng sasakyan sa buong Metro Manila, inilagay ni Ojeda at ng kanyang mga kasamahan ang lahat ng impormasyon na ito sa isang app. Pumunta sila sa Securities and Exchange Commission (SEC), mga business center at car establishments.

“We went out and sent our own guys to each street in Metro Manila and count all car service establishments. We put all the information in our website,” dagdag nito.

Plano ni Ojeda na palawakin pa ang kanilang negosyo sa kalagitnaan ng taon. Pagkatapos na dalhin ito sa buong bansa, marami rin ang nagpahiwatig ng interes na ipakilala ang serbisyong ito sa iba pang bansa sa Southeast Asia.

“We will be off to another country, most likely in Southeast Asia, probably Thailand or Indonesia. We already have people who are interested and we are talking about it,” sabi ng chief operating officer ng Beepbeep.ph na si Gianpaolo Acosta.

“In the tech startup community here and now, it is always investment, investment, investment. We took a different approach with business, business, business. We will see if it is a good one. So far, so good,” pagmamalaki nito.

Galing naman ang revenue ng app sa iba’t-ibang advertiser na hindi lamang sumesentro sa sasakyan, kundi sa iba pang mga serbisyo at produkto.

“We have insurance companies and banks. They reach out to our audience with their products, to show what insurance options are out there,” paliwanag ni Ojeda.

LAHAT ng serbisyong kailangan para sa sasakyan na sa Beepbeep.ph.

 

One’stop shop para sa sasakyan 

Maraming serbisyo ang inaalok ng Beepbeep.ph. Para itong one-stop shop para sa sasakyan kung saan matatagpuan lahat ng serbisyong kinakailangan ng mga may-ari ng kotse.

“If you need towing service, battery replacement, oil, gas, car wash or auto repair, you can call our hotline 24/7.  If you are among a lot of people who lock your cars with the keys inside, we can help you.  We also provide roadside assistance service.  It is the first of its kind here,” sabi ni Ojeda.

“You won’t find another company doing everything for cars.  Our valet service is the first in the world.  Nobody does that,” dagag niya.

Meron ding pickup at delivery ang nasabing app at concierge service, kung saan maaaring pumili ang user ng driver na kukuha ng kanyang sasakyan sa bahay at dadalhin ito sa pagawaan at ibabalik sa bahay ng kliyente.

Wala naman dapat ipag-alala ang mga may-ari ng sasakyan dahil sinisiguro ni Ojeda na safe at secure ang kanilang mga kotse.

“The drivers have body cams, and the company installed a dashcam on the car that can also be tracked via GPS. It also has a checklist of items, and owner and driver have to look over the car before it leaves. This is to ensure that nothing will go missing and the car will not come back with new dings,” paglilinaw nito.

Pawang mga professional license holders na dumaan sa matinding screening at pumasa sa training at driving tests ng kumpanya ang mga driver nito.

Bukod dito, may mobile carwash at home service ang Beepbeep.ph. Ilan nga sa mga alok nito ay maintenance at mechanical repairs, wheels at tires, detailing, battery, insurance at Land Transportation Office (LTO) registration, body repair, paint at wrap, parts at accessories.

Kauna-unahang Manila Autocon 

Sa kauna-unahang pagkakataon, sisimulan ng Beepbeep.ph ang unang automotive convention at exhibit sa bansa, ang Manila Autocon na gaganapin sa SMX Convention Center sa Pasay City mula sa Enero 31 hanggang Pebrero 3. Itatampok dito ang dating wrestler na ngayon ay kilala ng aktor sa Hollywood, ang Filipino-American na si Dave Bautista.

Pinapangako ni Ojeda na magiging kakaiba at world-class ang darating na automotive event.

“Most expos around the world are an overall show, not just on a specific thing. That is what we want to do here. We want to make it world class. How do we do that? We have to have some world class things happening,”

Ipinangako rin ni Ojeda na hindi lamang kalalakihan ang mag-eenjoy sa convention kundi pati mga babae, bata at matatanda. Nais nitong gawing family-oriented ang event na maaaring daluhan ng kahit sino.

“It should be a family experience,” wika niya.

Inahandog sa unang araw ng kombensyon ang mga kilalang entrepreneurs sa industriya, thought leaders, game changers at innovators na siya namang tatalakay sa iba’t-ibang paksa tulad ng digitalization, business expansion, new technology, consumer trends at public relations na may kinalaman sa mundo ng automotive.

Magkakaroon din ng dalawang exhibit sa pagpupulong na magtatampok ng iba’t-ibang sasakyan at accessories kabilang ang serbisyo at produktong may kinalaman sa kotse. Inaasahang dadaluhan ito ng 500 katao.

Manila Bay sasailalim sa rehabilitasyon 

by

DENR nakatakdang isailalim sa rehabilitasyon ang Manila Bay.

 

Ni: Jonnalyn Cortez

PLANO ng Department of Environment and Natural Resources (DENR) na ibalik ang dating ganda at sigla ng Manila Bay.

Gamit ang parehong estratehiyang sa rehabilitasyon ng Boracay Island, determinado si Environment Secretary Roy Cimatu na tanggapin ang hamon na linisin ang Manila Bay.

Pagbuhay sa Manila Bay

Kilala ang Manila Bay sa kabigha-bighani nitong sunset, pero kilala rin ito bilang dagat ng basura. Ngunit sa plano ng gobyernong rehabilitasyon, hindi magtatagal ay muling mabubuhay ang ganda ng look.

“We are preparing for an all-out strategy to bring the coliform concentration in Manila Bay to a safe level so that millions of people who reside in the bay region and neighboring areas will enjoy its waters and marine resources without fear of getting sick,” ani Cimatu.

Sinabi ng retired general na nakikita nitong pangmatagalang solusyon ang pagpapababa sa coliform level ng tubig sa 100 kada 100 milliliters (MPN/100ml) upang muling makalangoy dito at makapagsagawa ng iba pang water activities. Sa kasalukuyan, mayroon itong 333 million MPN/100ml.

Dagdag din ni Cimatu na magpapakita ng parehong political will ang gobyerno sa paglilinis nito tulad ng ginawang rehabilitasyon sa Boracay.

Nanawagan naman si DENR Calabarzon Executive Director Ipat Luna na tumulong ang mga local government units (LGU) na disiplinahin ang mga naninirahan sa easements.

“Kasi ‘pag napigilan natin sila – kahit patrolin mo ‘yan araw-araw, mas maliit pa rin ang gagastusin mo kaysa hanapan mo sila ng bahay. Mas malaking gastusin pag ire-relocate mo na sila,” paliwanag nito.

Sinang-ayunan naman ito ni Cimatu at pinaalalahanan ang mga mga LGU na sumunod sa mga environmental law upang makatulong sa rehabilitasyon ng Manila Bay.

“I am calling on all LGUs to step up their efforts in cleaning up the bay because it is their own constituents who will benefit,” anito.

Polusyon dulot ng domestic waste

Ibinunyag ni Luna na 90 porsyento ng polusyon sa Manila Bay ay mula sa domestic waste.

Pangunahing kontributor umano dito ay ang Calabarzon. Dumidiretso ang basura nito sa Laguna Lake at tumutungo sa Manila Bay.

Sinabi naman ni Cimatu na ang mataas na coliform nito ay dulot ng dumi mula sa mga estero o estuaries sa Metro Manila.

Dagdag nito, natukoy na ng DENR ang apat na pangunahing estero na nagdadala ng bilyong coliform sa mga tubig kabilang na ang Pasig River. Dalawa naman dito ay nakakaapekto lamang sa Manila Bay. Isa nga rito ang Estero de San Antonio de Abad sa Malate, Manila, na nakatakdang inspeksyonin ni Cimatu.

“If we control these four esteros, I am very optimistic that the coliform level of the bay will be reduced significantly,” pagtitiyak nito.

Hamon kay Cimatu

Malaking hamon para kay Cimatu ang paglilinis ng Manila Bay dahil sakop nito ang apat na lungsod — Metro Manila, Cavite, Bulacan at Bataan.

“We have divided the cleanup based on these areas but we will concentrate first here in Metro Manila,” pahayag nito.

“This is urgent because I believe that during habagat, dirt and garbage is blown to the west and stagnates in Manila Bay.”

Nakatakdang magsimulang bumisita si Cimatu sa mga gusali, pagawaan, at sapa na nagtatapon ng maruming tubig dito.

Determinado umano itong ipasara ang mga makikita nitong establisyemento na lumalabag sa environmental laws na malapit at nasa paligid nito.

Plano ni Cimatu na makipagpulong sa mga stakeholders at opisyal ng gobyerno sa lalong madaling panahon upang mailunsad nila ang kanilang plano sa darating na Enero 2019.

“We start this early and we are planning to have a meeting-conference with stakeholders and city mayors of Metro Manila,” anito.

“After that, we’ll be launching also this plan into reality within the month of January so that we expect that at the end of this year, by Christmas next year we’ll have a better Manila Bay.”

Dati nang iniutos ni Cimatu sa Manila Bay Coordinating Council ang paggawa ng draft master plan para sa rehabilitasyon. Bukod naman sa DENR, 15 pang ahensya ng gobyerno ang magtutulung-tulong na gumawa ng draft rehabilitation plan para rito.

DENR Sec. Roy Cimatu at Sen. Cynthia Villar

 

Pagkilala kay Villar

Kinilala ng DENR ang pagsisikap ni Senator Cynthia Villar na linisin at isailalim sa rehabilitasyon ang Manila Bay sa ika-10 anibersaryo ng pagpapalabas ng mandamus ng Supreme Court na nag-uutos sa 13 ahensya ng gobyerno na pangunahan ang rehabilitasyon ng look.

Si Villar ang chairperson ng Committee on Environment and Natural Resources.

“Manila Bay is one big toilet kaya hindi malinis-linis,” anito pagkatanggap ng plake mula kay DENR Undersecretary Sherwin Rigor sa harap ng representante mula sa mandamus agencies at opisyal ng DENR.

Pinansin din nito ang kawalan ng waste water treatment facilities na siyang nagiging dahilan ng mataas na coliform level sa tubig.

Pinuri naman ni Villar si Cimatu nang ianunsyo nito ang planong rehabilitasyon.

Sinabi ng senadora na maaaring magsilbing modelo ng paglilinis ng look ang kanyang dalawang proyekto sa Manila Bay.

Isa rito ay ang Las Piñas-Parañaque Wetland Park, kungsaan nagsasagawa ng buwanang clean-up at tree-planting activity. Ang isa naman ay ang proyekto niya sa Baseco Compound, kung saan sa tulong ng Villar Social Institute for Poverty Alleviation and Governance kaakibat ang Department of Health (DOH) ay nakapagtayo sila ng mga palikuran para sa mga residente. Nakagawa naman sila ng mga livelihood projects katulad ng aquaculture at urban gardening para sa mga nakatira rito sa pagtutulungan ng Department of Agriculture (DA) at Pasig River Rehabilitation Commission.

Bubble C: Sagana sa bitamina C at Calcium

by

Ni: Eyesha Endar

MAYAMAN sa bitamina C at calcium ang Bubble C – isa pa rin ito sa mga produkto ng EDMARK International na nagbibigay ng enerhiya sa katawan ng tao.

Sinasabing ang isang basong Bubble C ay katumbas ng bitaminang makukuha sa tatlong bagong pitas na orange na dalandan.

Mga katangian ng EDMARK’s Bubble C:

Gawa mula sa sariwang prutas na dalandan:  Mula ito sa sariwang prutas na dalandan na ginawang purong juice upang mas madaling ihanda.

Mayaman sa bitamina C: Sagana ito sa bitamina C na kailangan ng katawan ng tao.

Nagtataglay ng calcium: Mataas ang calcium content nito na nagpapatibay ng mga ngipin at mga buto sa katawan. Nakatutulong din upang mapanatili ang tamang timbang ng katawan.

Pinahusay ang likas na kulay: Natural ang kulay nito mula sa karotina, ang sangkap na pangkulay na nagbibigay ng maliwanag na kulay.

Ligtas sa lahat ng pampatamis: Ang matamis na dalandan na nalalasahan sa Bubble C ay mula sa natural na fructose.

Ligtas ito para sa may mga diabetes dahil hindi nito itataas ang antas ng blood sugar.

       Mga benepisyong makukuha sa Bubble C:

  • Pinalalakas ang immune system.
  • Nilalabanan ang lamig at impeksiyon.
  • Tumutulong sa pagkukumpuni ng blood vessels at connective tissues.
  • Pinabibilis ang metabolismo.
  • Pinasisigla ang paggalaw ng utak.
  • Tumutulong sa pagsipsip ng iron at protina.
  • Sinusuportahan ang collagen production ng katawan.
  • Pinoprotektahan ang balat at buhok upang hindi masira.
  • Tumutulong upang mabilis na mapagaling ang sakit sa katawan.
  • Iniiwas ang katawan sa dietary deficiency mula sa bitamina C.
  • Tumutulong upang maiwasan ang pagkakaroon ng cancer at heart disease.
  • Binubuhay ang anti-oxidants tulad ng bitamina E.

Marami pang mga produkto ang Edmark na makatutulong na mapanatilingmaganda ang kalusugan tulad ng Cocollagen Anti-aging Beverage at Bio elexir Soya Drink.

Para sa mga karagdagan pang impormasyon, tumawag sa opisina ng Edmark International sa mga numerong 0935-541-9918, hanapin si Ms. Bing o di kaya’y magsadya sa kanilang opisina na matatagpuan sa ikatatlong palapag ng Empire Bldg., Savemore Supermarket, EDSA Ext., corner Taft Ave., Pasay City, Metro Manila.

Mahalagang makamit natin ang magandang kalusugan dahil ito ang ating puhunan upang matupad ang lahat ng ating mga pangarap sa buhay. Sa Edmark, hindi lang magandang kalusugan ang ibibigay sa iyo kundi bibigyan rin ng pagkakataon at tuturuan kung papaano pauunlarin ang iyong buhay.

Dagdag sa sahod, sapat nga ba?

by

Silvestre Bello inanusyo ang P25 dagdag pasahod sa Metro Manila.

 

Ni: Jonnalyn Cortez

INANUNSYO ng Department of Labor and Employment (DOLE) Secretary Silvestre Bello III ang bagong wage orders sa iba’t-ibang sektor sa mga rehiyon ng Pilipinas na magbibigay ng P10 hanggang P25 na dagdag sahod sa mga manggagawa. Dagdag din dito ang P10 cost of living allowance (COLA) na bumubuo sa bagong minimum wage na PHP 537 para sa mga empleyado sa Metro Manila.

Sakop ng karagdagang P25 ang mga empleyadong nagtatrabaho sa retail at service establishments na may 15 o mas mababa pang trabahador. Kabilang din dito ang mga manufacturing establishments na regular na tumatanggap ng 10 o mas mababa pang bilang ng manggagawa.

Bagong wage order

Sinabi ni Bello sa isang press briefing na inaprubahan ng NCR Regional Tripartite Wages and Productivity Board (RTWPB-NCR) ang bagong wage adjustment para sa mga non-agricultural workers na sakop ng Wage Order No. NCR-22.

Nagkakahalaga ng P502 ang kasalukuyang basic pay sa Metro Manila na may karagdagang P10 COLA na bumubuo sa minimum wage na P512. Ayon ito sa Wage Order No. NCR-21 na inaprubahan noong Setyembre 14, 2017.

“That is now the real wage adjustment, hindi yung speculation na P25,” ani Bello.

Dagdag pa nito, magiging epektibo ang dagdag sa sweldo 15 araw pagkatapos ng publication ng bagong wage order.

Sinabi rin ng labor secretary na magkakaroon ng pagtaas sa sweldo sa Cagayan Valley at MIMAROPA.

Magkakahalaga ng mula P320 hanggang P360 ang magiging bagong minimum wage rate sa iba’t-ibang sektor sa Cagayan Valley pagkatapos aprubahan ng board ang P10 basic wage increase.

Magiging P283 hanggang P320 naman ang minimum wage rate sa iba’t-ibang sektor sa MIMAROPA kapag naaprubahan na ang P12 hanggang P20 na umento sa sahod.

Hindi pa naman naglalabas ng bagong wage adjustment ang Regional Board of Caraga (Region 13), ngunit inaasahan itong magtataas ng pasweldo pagsapit ng ika-isang anibersaryo ng kasulukuyan nitong wage order sa Disyembre 8, 2018.

DOLE: Empleyado sa Metro Manila makakatanggap ng karagdagang sweldo.

 

Hindi makatarungang taas ng pasahod

Ayon naman sa isang labor group, hindi makatarungan ang karagdagang P25 sa mininimum wage para sa mga manggagawa sa Metro Manila.

Matatandaang humihiling ng P334 na taas sweldo ang Associated Labor Unions-Trade Union.

“This is a great injustice for workers who helped build the business; this is injustice for workers who helped our economy grow,” sabi ng tagapagsalita ng nasabing unyon na si Alan Tanjusay sa ANC.

Dagdag pa ni Tanjusay, nakatakdang magsampa ng isa pang petisyon ng dagdag pasahod ang grupo upang itaas ang kasalukuyang minimum wage sa mas katanggap-tanggap na halaga.

Sinabi rin nito na ang inaprubahang dagdag pasweldo ng DOLE ay maliit na halaga lamang kumpara sa kanilang unang hiling.

Naiintindihan ni Tanjusay na ang P25 na umento sa sahod lang ang abot-kaya ng mga micro and small enterprises, ngunit isa itong napakababang halaga para sa mga medium at malalaking negosyo.

“Yung P25 e baryang barya ito sa mga medium and large enterprises,” anito sa isang panayam sa DZMM.

“Baka ho pwedeng P100 man lang yung dagdag sa sahod. Kung P25, wala po, hindi kayang bumili ng isang kilong NFA rice yan.”

Dagdag naman ng dalawang kinatawan ng mga manggagawa mula sa Metro Manila Wage Board na hindi sapat ang P25 na dagdag sa sweldo.

Sinabi ni RTWPB-NCR worker’s representative na si Angelita D. Señorin na hindi ito sang-ayon sa P25 wage increase at P10 COLA.

“The P25 increase and integration of P10 COLA is far from an inclusive increase, given the ‘amazing’ real economic growth,” anito. “Even as productivity has grown, there has been no real wage increase.”

Ayon sa Philippine Statistics Authority (PSA), nasa 8.4 prosyento ang labor productivity rate ng bansa, na naitalang pinakamataas sa loob ng walong taon.

Sinang-ayunan naman ng isa pang worker’s representative na si German N. Pascua Jr. at sinabi ni Señorin ukol sa kakulangan ng P25 na dagdag sweldo para sa mga empleyado sa Metro Manila na tumatanggap lamang ng minimum wage.

“The amount is too small,” anito sa BusinessWorld. Gayunpaman, inamin ni Pascua na bumoto ito para sa P25 na taas sa pasahod at P10 COLA, ngunit pinaliwanag nitong kailangan may “reservations with respect to the amount and coverage.”

Sinabi naman ni Tanjusay na humihiling ang ALU-TUCP ng isang dayologo kay Pangulong Rodrigo Duterte upang pag-usapan ang ukol sa dagdag sa pasahod.

Konsiderasyon sa pagtataas ng pasahod

Pinaliwanag ni National Wages and Productivity Commission Executive Director Criselda Sy na kinukunsidera rin ng wage board ang kakayanan ng mga employer at ng ekonomiya ng bansa ang pagtataas sa pasahod.

“It is a potential source of second round inflationary effect,” anito. “Ibig sabihin po kung ang inflation level natin ay 6.7 percent mas maaari pong tumaas pa diyan.”

“In deciding a minimum wage adjustment, the board needs to balance the needs of workers and their families with the capacity of enterprises to pay the additional labor costs without impairing business especially its capacity to continuously generate jobs,” dagdag naman ni Bello.

Naniniwala naman si dating Bayan Muna Representative Neri Colmenares na kayang magbigay ng mga employer ng P750 minimum wage rate para sa mga pribadong manggagawa sa Metro Manila mula sa kanilang mataas na kita sa nakaraang mga taon.

“A P238 wage hike now to have the national minimum wage at P750 is feasible considering that firms in NCR with 20 or more workers have a combined profits of P903 billion in 2015 giving an average of P530 daily minimum wage as stated by IBON Foundt’n. #P750NationalMinimumWageNowNa,” anito sa isang tweet.

“Based on this, raising the NCR minimum wage to P750 and ensuring that workers get this will cost just P132 billion which is just 14.6% of their profits. #P750NationalMinimumWageNowNa.”

Sinabi ni Sy na mayroong 10 araw ang mga manggagawa upang umapela sa desisyon ng wage board. Ngunit, nilinaw nito na wala pang ganitong klaseng apela ang nagtagumpay kahit pa umabot sa Korte Suprema.

Sinabi naman ng DOLE na 16 mula sa 17 na Regional Boards ang naglabas na ng bagong wage orders na may halagang P9 hanggang P56 na bagong minimum wage rates mula noong katapusan ng Oktubre.

Naitalang ang pinakamataas na dagdag sa pasahod para sa mga empleyado sa Metro Manila ay naganap noong 2012 na nagkakahalaga ng P30.

Mga commuter umalma sa pagtataas pasahe sa jeep, bus

by

Ni: Maynard Delfin

MARIING tinututulan ng libu-libong commuter sa Metro Manila ang agarang pagpapatupad ng pagtaas ng pamasahe sa mga jeep at bus na orihinal na itinakda sa unang linggo ng Nobyembre.

Dahil dito, inaasahang maaantala ang dagdag singil sa pasahe habang dinidinig ang kanilang apela.

 Nagsumite ang ilang commuter ng isang motion for reconsideration upang mapatigil ang pagpapatupad ng bagong naaprubahang pasahe sa mga jeepney at mga bus sa Metro Manila, Central Luzon, at Calabarzon.

Bagong pasanin sa mga mahihirap

Ayon sa isang petisyon na isinumite kamakailan ng dalawang concerned citizen na sina Arlis Acao at Rodolfo Javellana ng United Filipino Consumers and Commuters, malaking epekto ang pagtaas ng pasahe sa mga mahihirap.

Nakasaad sa kanilang petisyon na maigting nilang pinagdarasal, tinututulan, at ninanais na pigilan o huwag nang ipatupad ang pagtaas na ito para sa kapakanan ng mas nakararaming Pilipino sa buong bansa.

Di napapanahong pagtaas ng pasahe

Isinaad nila na nakakakuha na ng magandang kita ang mga operator ng mga jeepney at bus higit sa minimum na sahod na P512 sa Metro Manila.

Binigyang diin ng nagpetisyon na di makatarungan sa milyon-milyong Pilipino na habang nakararanas ng paghihigpit ng sinturon sa kahirapan dulot ng inflation ay sasabayan pa ng pagtaas ng pamasahe.

Kamakailan inaprubahan ng Land Transportation Franchising and Regulatory Board (LTFRB) ang P2 na dagdag-singil sa minimum fare ng jeepney sa Metro Manila, Central Luzon, at Calabarzon. Kasabay nito ang P1 taas-pasahe para sa minimum fare ng bus sa Metro Manila.

Panandaliang pagpapatigil 

Dahil sa mosyon na inihain, nangangahulugan ito na maaantala ang pagpapatupad ng pagtaas ng pasahe na orihinal na itinakda sa Nobyembre 5.

Ayon kay LTFRB Chairman Martin Delgra III, isang hearing ang idadaos para pagdesisyunan ang petisyon.

Para kay LTFRB Board Member Aileen Lizada, na may negatibong opinyon tungkol sa pagtaas pasahe sa jeep, siya ay nababahala sa pagtaas ng “mas mataas kaysa sa inaasahan” ng singil sa transportasyon na maaaring magdulot ng paglobo ng inflation sa mga darating na buwan batay sa mga data ng ilang economic managers.

Sumampa na ang inflation rate ng bansa sa average na 6.2 porsyento sa ikatlong bahagi ng 2018. Ito ay mas mataas kaysa sa binagong forecast ng 2018 na 4.8 hanggang 5.2 porsyento.

Aprubado ng LTFRB 

Sa isang order na pinalabas ng LTFRB noong Oktubre 18, sinang-ayunan ng ahensya ang petisyon ng mga driver at operator ng mga pampublikong sasakyan noong Setyembre 2017 na humihingi ng dalawang pisong dagdag singil sa minimum na pamasahe —na magiging P10 —bunsod ng sunod-sunod na pagtaas ng presyo ng gasolina.

Ang LTFRB order na ito ay magiging epektibo pagkatapos ng 15 araw makaraan ang paglathala nito sa mga pahayagan. Una nang ipinag-utos ng LTFRB noong Hulyo ang pansamantalang pagtaas ang minimum fare sa P9.

Ang tatlong miyembro ng regulatory board ay pumirma at sumang-ayon sa order; si Lizada, na may kasalungat na opinyon sa karamihan ang di pumirma. 

Binasurang kahilingan ng mga drayber

Una nang hiniling ng mga jeepney driver sa LTFRB ang P2 dagdag pasahe para sa susunod na kilometro subalit tinanggihan ito ng board dahil sa “lack of factual and reasonable basis.”

Inaprubahan din ng LTFRB kamakailan ang P1 dagdag sa minimum na pamasahe ng bus sa Metro Manila bilang pagsang-ayon sa petisyon noong Pebrero 2018 ng mga bus operator ng SOLUBOA, PBOAP, at Stop, Inc.

Sa unang limang kilometro, ang pasahe sa mga bus na ordinaryo at air conditioned ay magiging P11 mula sa dating P10; wala nang pagtaas sa mga susunod na kilometro.

Maging ang mga provincial buses ay walang pagtaas pasahe sa minimum fare maliban sa P0.15 na dagdag sa mga susunod na kilometro.  Dahil dito, magkaroon ng kabuuang P1.55 pagtaas kada kilometro mula sa orihinal na P1.40. Inaasahan din sana na ipatutupad ito sa Nobyembre 5.

Pagtaas ng presyo ng gastusin sa transportasyon

 Di pa man tumataas ang pamasahe, walong porsyento na ang dagdag gastos sa transportasyon bunsod ng pabago-bagong presyo ng gasolina, diesel at iba pang mga produktong petrolyo. Ang mga ito ang tatlong pinakamabilis na tumaas sa consumer price index, kasunod sa mga inuming nakalalasing at tabako, pagkain, at di-alkohol na inumin.

Pinaniniwalaang ang pagpapatupad ng dagdag pasahe na inaprubahan ng LTFRB ay hindi lamang magtataas ng gastos sa pagsakay sa jeep at bus kundi magreresulta pa sa paglubha ng inflation na may direktang epekto sa presyo ng mga bilihin.

Bagaman ang transportasyon ay maliit na bahagi lamang sa consumer price basket, makakaapekto ito sa mga presyo ng pinamiling tingi o retail price ng mga pagkain at iba pang mga kalakal na kailangang gamitan ng transportasyon.

Ang sakop sa naaprubahang probisyonal na rate sa LTFRB order ay mga bus sa Metro Manila at mga lalawigan, kasama na rin ang mga jeepney sa NCR, Region 3 at Region 4.

Fixed rate sa bus drivers wala nang atrasan

by

Fixed rate

Ni: Quincy Joel V. Cahilig

KAAGAPAY ng libu-libong mga Pinoy komyuter sa Metro Manila at sa mga probinsiya ang bus. Bukod sa jeep at tren, ito pa rin ang pangunahing mass transportation system na nagdadala ng mga tao tungo sa iba’t-ibang destinasyon, lalo na sa mahabaang pagbiyahe.

Sa kabila nito, tinukoy ng awtoridad na kabilang ang mga bus sa mga sanhi ng maraming aksidente sa daan. Base sa datos ng Metro Manila Development Authority (MMDA), nasa 434 ang namatay at 19,374 ang nasaktan sa National Capital Region (NCR) sanhi ng mga aksidente sa kalsada noong nakaraang taon.

Iniinspeksyon ni LTFRB Chairman Martin Delgra III ang Dimple Star bus na nahulog sa bangin sa Sablayan, Occidental Mindoro nitong Marso na kumitil sa buhay ng 19 na pasahero.

Bagama’t mas mababa ang naturang bilang kumpara noong 2016, kung saan 446 ang namatay at 20,876 ang nasaktan, masasabing marami pa rin ang mga nadisgrasya noong 2017.

Isa sa mga nakikitang dahilan ng pagkakasangkot ng mga pampublikong bus sa mga sakuna ay ang commission basis na sistema ng pasweldo sa mga bus driver at kundoktor, na nagtutulak sa mga ito na mag-agawan sa mga pasahero at paspasan ang pagmamaneho upang maka boundary, na di alintana kung nalalabag na ba nila ang mga batas sa kalsada, para lamang may maiuwing sweldo pantugon sa mga pangangailangan nila at ng kanilang pamilya.

Land Transportation Franchising and Regulatory Board member Atty. Aileen Lizada

 

Ang sistemang ito rin ang sinisisi ni Atty. Aileen Lizada, board member ng Land Transportation and Regulatory Board (LTFRB), sa pabalagbag na estilo ng pagmamaneho ng maraming bus driver para  masigurong may sapat na kikitain araw-araw. Bukod dito, nalalagay din aniya sa alanganin ang kalusugan ng mga driver at konduktor dahil sa mahabang oras ng pagtatrabaho. Isipin mo na lang kung gaano kahirap sa katawan at pag-iisip ang mabababad sa mala-pagong na trapiko sa Metro Manila.

“Their commission is based on the number of riders they pick up. Kaya ang mga driver gustong mas marami silang riders at mas maraming trips. Because of this, buses are no longer safe and convenient for the riding public. In the long run talo rito ang mga bus drivers lalo na ang mga pasahero,” saad ni Lizada.

Noong Enero 2012, ibinaba ng LTFRB ang Memorandum Circular No. 2012-001 na nag-oobliga sa mga operators ng public utility buses na kumuha ng Labor Standards Compliance Certificates. Ang hindi makakatugon dito ay maaring bawian o hindi mapagkakalooban ng panibagong certificate of public convenience para ituloy ang pagbibiyahe ng kanilang mga bus.

Kasunod nito, nag-isyu naman ang DOLE ng Department Order No.118-12 patungkol sa memorandum circular ng LTFRB na nagbibigay ng computation para sa fixed at performance-based na pagpapasweldo sa driver at kundoktor.

Noong Pebrero 2012, nag-isyu ang National Wages and Productivity Commission (NWPC) ng operational guidelines na susundin para ipatupad ang naturang panibagong wage system, alinsunod sa department order ng DOLE.

Subalit hindi agad naipatupad ang mga naturang memo dahil naghain ng petisyon sa Korte Suprema ang mga samahan ng PUB operators, ang Bus Operators Association of the Philippines (PBOAP), ang Southern Luzon Bus Operators Association, Inc. (SO-LUBOA), ang Inter City Bus Operators Association (Interboa), at ang City of San Jose del Monte Bus Operators Association (CSJDMBOA). Giit nila, labag sa karapatang ibinibigay ng Saligang Batas sa mga operators ang mga ibinabang order ng LTFRB at DOLE.

HATOL NG KORTE: ITIGIL NA ANG BOUNDARY

Pagkatapos ng mga hearing sa loob ng anim na taon, ibinasura ng Korte Suprema ang petisyon ng mga operators. Base sa ruling ng pinakamataas na hukuman, na inakda ni Associate Justice Marvic Leonen, nabigong patunayan ng mga petitioners o bus operators sa korte na kontra sa Saligang Batas ang department order ng DOLE at ang memorandum circular ng LTFRB.

Binigyang diin din ng Korte Suprema sa en banc desisyon nito na may “quasi-legislative powers” o kapangyarihang magbalangkas ng rules and regulations ang mga nasabing ahensya, kabilang dito ang pagpapatupad ng fixed rate salary para sa mga bus driver at kundoktor.

Ipinaliwanag din ng Korte Suprema na hindi labag sa due process ang mga hakbang na DOLE at LTFRB dahil layunin nitong iangat ang kabuhayan ng mga driver at kundoktor, at para rin ito sa kaligtasan ng mga commuters.

“The boundary system puts drivers in a ‘scarcity mindset’ that creates a tunnel vision where bus drivers are nothing but focused on meeting the boundary required and will do so by any means possible and regardless of risks… This scarcity mindset is eliminated by providing drivers with a fixed income plus variable income based on performance,” nakasaad sa desisyon.

“The fixed income equalizes the playing field, so to speak, so that competition and racing among bus drivers are prevented. The variable pay provided in Department Order No. 118-12 is based on safety parameters, incentivizing prudent driving,” dagdag pa nito.

KITA NG MGA TSUPER, TIYAK SA BAGONG WAGE SCHEME

Base sa ipapatupad na part-fixed-part-performance-based scheme, ang fixed wage ay pagkakasunduan ng bus operator at ng driver at kundoktor, at hindi ito dapat bababa sa mimimum wage na itinakda sa bawa’t rehiyon. Sa kasalukuyan, ang minimum wage sa Metro Manila ay ₱512.

Bukod dito, makakatanggap na din ang mga driver at kundoktor ng overtime pay, night shift differential, service incentive leave, premium pay, 13th-month pay, holiday at service incentive leave.

Magkakaroon na rin ng performance-based wage component, na magbabase sa iba’t-ibang performance tulad ng laki ng kita, sa pagiging ligtas ng pagbiyahe, at kung gaano kaunti ang traffic violations.

DOLE, MAHIGPIT NA MAGBABANTAY

Isa sa mga pangunahing mass transport system sa bansa ang bus, na tinatangkilik ng libu-libong mga komyuter araw-araw.

 

Ayon kay Director Teresita Cucueco, tututukan ng DOLE ang pagpapatupad ng bagong sistema ng pagpapasweldo ng bus operators para tiyakin na gaganda nga ang kundisyon ng pagtatrabaho para sa mga driver at kundoktor.

“The department order ensures income security for the bus drivers and conductors, as well as improves the working conditions in the bus transport sector. We will continue our monitoring on the implementation and compliance, as mandated,” sabi ni Cucueco.

Aniya, bibigyan din sila ng mga social benefits, kaya maiiwasan na ang mga disgrasya sa kalsada na dulot ng habulan at agawan sa pasahero.

Dagdag ni Cucueco, nakatakda silang makipagpulong sa mga regional directors ng ahensya upang pag-usapan ang pagpapatupad ng Department Order 118-12.

”We plan to meet with the regional directors and we will raise the Supreme Court decision implementing the fixed and performance-based pay,” aniya.

Samantala, sa kabila ng patuloy na pagtaas ng gasoline at maintenance costs, sinabi ni Alex Yague, executive director ng PBOAP na susunod sila sa desisyon ng Korte Suprema.

Ngunit, sinabi rin ni Yague sa isang panayam, “Wala po tayong magagawa kundi sumunod, pero ang magiging epekto po niyan, maraming magsasara na bus company.”

Close Bitnami banner
Bitnami