PINAS

Ang Lihim ng Panginoon (Ikapitong Bahagi)

Sonspeak

Recent News:

National Food Authority (NFA)

BoC, hugas-kamay sa pagtaas ng presyo ng commercial rice

by

Ni: Jun Samson

DUMEPENSA at itinanggi ni Customs Commissioner Isidro Lapeña na ang Bureau of Customs umano ang dahilan ng pagka-antala sa pagproseso at pag-release sa mga inaangkat na bigas ng gobyerno. Ito ang reaksyon ni Lapeña sa isyung ito tungkol sa mga rice shipments sa mga pantalan na naging dahilan ng pagtaas ng presyo ng bigas sa mga pamilihan sa bansa.

Kaugnay nito’y iginiit ni Lapeña na sa katunayan ay inatasan na niya ang lahat ng mga district port collectors na madaliin ang pagproseso sa mga pangunahing pagkain gaya ng bigas, asukal at karne.

“Knowing the importance and urgency to release these shipments, I have sent a letter request to the Department of Agriculture and the National Food Authority (NFA) dated September 10 to expedite the release of the import permits since it cannot be released on our end without such permit,” paliwanag niya.

Gayunman, aminado si Lapeña na may mga pagkakataon na hindi talaga maiiwasan dahil minsan ay nagkakaproblema sa proseso ng pag-release sa kargamento dahil sa kawalan ng import permit mula sa NFA. “If only NFA permits were submitted to the bureau before the arrival of these shipments, then an efficient and faster Customs clearance process can be put in place,” dagdag ni Lapeña.

Ipinaliwanag ng commissioner na bago pa man dumating ang rice shipment ay dapat naiproseso na ang NFA permit, pero karamihan umano sa mga importers ay kumukuha lang ng import permit sa NFA kapag dumating na sa bansa ang shipment

NFA: napapanahon na bang tanggalin?

by

Pinas News

MAINIT ang usapin ngayon hinggil sa kinabukasan ng National Food Authority (NFA), kung napapanahon na ba itong tanggalin o hayaan itong manatili na lamang.

Nagsimula ang pagtatalong ito dahil sa kapalpakan ng ahensyang matugunan ang ilang buwan ng problema ng kakulangan ng suplay ng bigas sa bansa na siyang naging dahilan upang tumaas ang presyo nito na malaki ang naging epekto sa mga mahihirap na mamamayan.

Layunin ng NFA na matugunan ang kakulangan ng suplay ng bigas sa bansa habang pananatilihin naman nito na panatilihin ang maayos na presyo nito.

Ngunit ilang buwan na simula nang mabalitaan ang kakulangan ng suplay ng buffer stock ng bigas ay hindi nito natugunan hanggang ngayon na sa huli ay nagresulta ng pagtaas ng presyo ng bigas sa ibang rehiyon sa bansa kagaya na lamang sa rice crisis sa Zamboanga City na nagpatawag na ng state of calamity dahil sa kakulangan ng suplay ng bigas dahilan ng pagtaas ng presyo nito na umabot na sa P70 kada kilo.

Ganito ang magiging senaryo sa iba pang lugar ng bansa kapag hindi ito maslusyunan ng naturang ahensya.

Ngunit iilan sa mga mambabatas maging ng mga ekonomista ay pabor na magkaroon ng rice tarrification bill na magpapahintulot ng importasyon ng bigas sa mga pribadong negosyante. Magiging solusyon ito upang masiguro ang sapat na suplay ng bigas sa bansa.

Aprubado na nga ito ng kongreso noon pang Agosto at kapag tuluyan na itong maipatutupad ay wala nang silbi pa upang manatili ang NFA.

Sa naturang batas, hayaan na makapag-angkat ang mga negosyante ng bigas sa ibang bansa na may kaukulang taripa. At ang makokolektang taripa na tinatayang makapagbigay ng P20 bilyon sa bawat taon ay makatutulong sa mga magsasaka ng palay sa pamamagitan ng pagbibigay sa kanila ng subsidiya.

Kaya nga lamang ay nakasasama rin para sa mga magsasaka ng palay kapag walang limitasyon ang pag-angkat ng bigas sa ibang bansa kaya kailangan din siguro na may limit ang pag-angkat nito para naman ay hindi gaanong maapektuhan ang mga magsasaka natin na siyang may malaking kabahagihan ng suplay ng bigas sa ating bansa at tanging sa palay lamang kumukuha ng ikabubuhay.

Kailangan lamang ng gobyerno ng maayos at maiging pagplano kapag ipatutupad nga nila ang rice tarrification law upang patuloy na maprotektahan ang industiya ng palay at maging ng mga magsasaka.

Ngunit habang tinatalakay pa ang rice tarrification bill at kasalukuyang namumuno pa ang ahensya ng NFA ay hindi pa natin masasabi kung tuluyan na nga itong mawawala.

Bigas at Galunggong, ‘in’ pa rin sa panlasang Pinoy

by

Ni: Vick Aquino Tanes

 Hindi mawawala sa hapag kainin ng mga Pilipino ang kanin dahil ang staple grain na ito ay ka partner ng maraming paboritong ulam na Pinoy tulad ng adobo, sinigang, kare-kare, ginisang mungo, guinataang isda at ilan pang popular na lutuin.

Swak pa rin sa panlasang Pinoy ang galunggong na masarap ito bilang pinirito, adobong galunggong, paksiw at ginataang galunggong.

Sa panahon ngayon, tila nagkakahirapan nang bumili ng bigas na swak sa badyet ng mga Pinoy. Mayroon na kasing mga bigas na mula sa ibang bansa at inaangkat para sa karagdagang paninda subalit tila yata natatabunan ang ating mga bigas dahil pinapakyaw naman ito ng National Food Authority (NFA).

Ganuon din ang isda na kung saan ay marami nang klase ng isda na mapagpipilian kaya ang galunggong ay natatabunan.

 

BIGAS – Pangunahing pagkain ng pamilyang Pilipino

 

NFA rice sulit pang-masa

Sulit na sulit para sa masa ang NFA rice. Ito ay dahil sa mababang halaga na patok para sa mga pamilyang mahihirap subalit bakit sa mahihirap lang? Marami kasing klase ng bigas na mapagpipilian kaya na swak sa badyet ng ilang pamilyang Pinoy.

Mayroon tayong ipinagmamalaking Rice Granary of the Philippines sa Nueva Ecija at Cagayan, Banawe Rice Terraces sa Benguet at iba pang malalaking palayan ngunit bakit tila nagkakahirapan nang bumili ng bigas ngayon sa sariling bansa at kailangan pang bumili ng iba o mag-import ng bigas mula sa ibang bansa.

Bakit sa dami ng ating mga palayan ay nagkakaubusan pa rin ng bigas.

Sa nararanasang kahirapan sa bansa ay mumurahing bigas na lamang ang tanging nakakain ng ilang mga pamilyang Pinoy mula sa National Food Authority (NFA).

 

Galunggong – simpleng isda na patok sa panlasang Pinoy

 

Galunggong noon at galunggong ngayon

Tunay na masarap ang isdang galungong. Pinag-aagawan pa nga ito sa hapag-kainan lalo na kung malutong ang pagkakaluto.

Pero, ganito na rin ang sitwasyon ngayon sa paboritong isda ng mga Pinoy na galunggong. Alam n’yo bang tumaas na ang presyo ng galunggong na dapat sana ay abot kaya ng mga mahihirap nating kababayan.

Sa taas ng presyo nito na P160 hanggang P200 ang bawat isang kilo ay mamarapatin na lamang nilang kumain ng karne ng baboy o manok.

Simpleng isda subalit bakit hindi makontrol ng pamahalaan na ibaba ang presyo?

Pag-angkat ng bigas

Sa kabila ng pagsirit ng presyo ng bigas, nais paimbestigahan ni House Appropriations Committee Chairman, Davao City Rep. Karlo Nograles sa National Food Authority (NFA) ang pagsirit ng presyo ng bigas na una nang tumaas sa Zamboanga peninsula.

Ayon kay Nograles, kailangang matukoy agad kung may iligal na nangyayari sa kalakalan ng bigas sa lungsod ng Zamboanga para maagapan ito ng gobyerno o posibleng may nangyayaring manipulasyon sa panig ng mga rice traders doon.

Marami na kasing reklamo na mayroong mga rice trader ang nagho-hoard ng bigas kaya lalong napapataas ng mga ito ang presyo.

Kaya naman sa kabila ng hoarding, pasok ang NFA rice sa murang halaga.

Umaabot sa P55 hanggang P60 per kilo ang bigas sa Dipolog, Zamboanga Del Norte; Pagadian, Zamboanga Del Sur at Ipil, Zamboanga Del Sur habang P60 hanggang P68 per kilo naman sa Zamboanga City at mas malala naman umano ang sitwasyon sa Basilan dahil nasa P60 hanggang P70 ang kada kilo doon ng bigas ngayon habang nasa P27-30 lamang ang presyo ng NFA rice.

Bigas sa Mindanao, sumirit

Idineklara ang state of calamity sa Zamboanga City dahil sa pagtaas ng presyo ng bigas.

Ayon kay Zamboanga City Mayor Isabelle Climaco-Salazar, sa kanilang monitoring umaabot sa P50 hanggang P70 ang presyo bawat kilo ng bigas sa lungsod.

Ang Zamboanga City ay nangangailangan ng 180,000 na sako ng bigas para mapunan ang tatlong buwan na buffer stock.

Gayunman, nakatanggap lamang ito ng 40,000 hanggang 50,000 na sako ng NFA rice na bahagi ng subsidiya ng gobyerno at base sa monitoring ng Zamboanga City local government.

Sa bahagi ng Tumaga District umabot sa P68 kada kilo ang pinakamahal na presyo ng bigas habang P70 naman ang pinakamahal sa Ayala District at Manicahan District.

NFA, sosolusyunan ang problema sa bigas

Handa ang National Food Authority (NFA) na agapan ang kakulungan sa bigas mula sa tulong ng ating mga magsasaka.

Mas maaga umanong masasawata ang pagtaas ng presyo ng bigas sa mga merkado kung mayroon nang bagong suplay ng bigas.

Ayon kay National Food Authority spokesman Rex Estoperez, mahalagang sapat ang bigas ng gobyerno sa mga pamilihan para maging stabilize ang presyo ng bigas.

Isa sa mga isinusulong ng economic managers ni Pangulong Rodrigo Duterte ang pagpataw ng taripa sa mga aangkating bigas kapalit ng pagtanggal sa quantity restrictions.

Kaugnay nito, pinagpaliwanag ng mga kongresista sa pagdinig ng House Appropriations Committee si Department of Agriculture (DA) Secretary Manny Piñol kaugnay sa mataas na presyo ng bigas.

Sa pagdinig sa panukalang P49.8 Billion na badyet ng DA, inatasan ng mga mambabatas si Piñol na pababain ang presyo ng bigas at iba pang mga pangunahing bilihin.

Nakitang solusyon naman ng NFA ay ang pagkakaroon ng Tariffication Bill na mag-aalis sa quota sa pag-import ng bigas na sa pamamagitan nito ay dadami ang suplay ng bigas na magpapababa ng presyo sa merkado.

Gayunman, dapat ding masiguro na mapupunta ito sa mga magsasaka para makabibili ng magandang binhi ang mga ito at madoble pa ang kanilang ani.

Bigas sa Zamboanga City, balik na ang suplay

Unti-unti nang bumabalik ang suplay ng bigas sa mga pamilihan matapos ang maagap na aksyon ng pamahalaan kaugnay sa pagsirit ng presyo nito.

Ibinalita ni Zamboanga City Mayor Isabelle Climaco-Salazar na bumabalik na ang normal ang suplay ng bigas sa lungsod matapos ang pagpasok ng suplay ng bigas mula sa Isabela City sa Basilan at mga imported rice na nagmula naman sa India.

Dumagdag pa ang 40,000 sako ng bigas mula sa NFA at may darating din mula sa Cotabato City at mga munisipyo ng Zamboanga Sibugay.

Patuloy na nakikipagtulungan sa lokal na pamahalaan ang Department of Agriculture, Department of Trade and Industry (DTI), NFA at mga rice supplier upang tuluyang maresolba ang kakulangan ng bigas sa lungsod.

Galunggong, hind lang pang-import, pang-export din

Dahil nga masarap ang galunggong ng Pilipinas ay nakararating na ito sa ibang bansa.

Ngunit sa kabila ng pag-export nito palabas ng bansa at siya naman ang pasok ng bagong isda, lalo na ang galunggong mula sa China.

Ayon sa Bureau of Fisheries and Aquatic Resources (BFAR), asahan ang pagdami ng isda at klase ng galunggong mula sa ibang bansa.

Sa katunayan ay pumasok na sa bansa ang may 17,000 metric tons na galunggong para umano madagdagan ang suplay sa bansa.

Ayon kay Agriculture Secretary Manny Piñol, aprubado na ito ng pamahalaan at aprubado at inaasahang magpapatuloy ang pag-import nito hanggang 90-days.

Ngunit sa kabila ng kaliwa’t kanang batikos sa pang-angkat ng galunggong ay tila nasisisi ang Department of Agriculture dahil pinapaboran umano nito ang pag-aangkat ng isda mula sa ibang bansa na dapat sana ay palakasin na lamang ang isda natin at hindi sagot ang importasyon.

“May mga reports sa amin na ang pagbagsak ng isda sa fish port, halimbawa ng galunggong, ibababa ng mga barko natin at fishing companies ang presyo sa 100 pesos per kilo na, bakit makikita natin pagdating sa mga palengke umabot na siya sa 140 o 160,” ayon kay BFAR Assistant Director Sammy Malvas.

Kasalukuyang nagsasagawa ng imbestigasyon ang DA kaugnay sa naganap na paglabas ng mga baguhang isda.

Pagpasok ng imported na isda

Siniguro ng BFAR na hindi kakalat sa bansa ang mga imported na galunggong at tanging sa mga accredited facilities lamang ang bentahan nito.

Mahigpit kasi ang guidelines na ipatutupad ng BFAR para hindi malusaw ang bentahan ng local na galunggong.

Ayon naman sa Pambansang Lakas ng Kilusang Mamamalakaya ng Pilipinas (PAMALAKAYA-Pilipinas) kailangan mas palakasin ng BFAR ang local production at hindi ang pagbebenta sa labas.

Malaki ang pag-aaring karagatan ng Pilipinas kaya asahan na malaki at maraming isda ang makukuha at tiyak na hindi magugutom ang mga Pinoy dahil sapat para sa lahat ang taglay na yaman ng bansang Pilipinas.

Abot-kayang presyo ng bigas para sa Pinoy

by

Aksyon

Nagbigay babala si Pangulong Rodrigo Duterte sa Rice Cartel na papapanagutin ang mga ito sa batas sa kanilang pananabotahe sa ekonomiya.

 

Ni: Quincy Joel Cahilig

ANG pangalawang taon sa panunungkulan ni Pangulong Rodrigo Duterte ay binagabag ng pagtaas ng presyo ng bigas, na isa sa mga dahilan ng mabilis na akyat ng inflation rate sa bansa.

Nagsimulang tumaas ang wholesale at retail prices ng bigas sa merkado pagpasok ng 2018 nang magkaroon ng shortage ng murang bigas mula sa National Food Authority (NFA) sa merkado, na, batay sa Philippine Statistics Authority, ay nakapagdulot ng nasa 4.5 porsyentong average ng pag-akyat ng presyo ng well-milled at regular milled na bigas, na naglalaro ngayon sa P44 at P40 kada kilo.

PRESYO NG BIGAS, TARGET PABABAIN NI DUTERTE

Sa nakaraang State of the Nation Address (SONA) ni Pangulong Duterte, binitawan niya ang pangako at inilahad ang mga hakbang na kaniyang isusulong sa pagresolba sa problema ng mataas na presyo ng bigas.

“We are also working on long-term solutions. On top of this agenda to lower the price of rice. We need to switch from the current quota system in importing rice to a tariff system where rice can be imported more freely. This will give us additional resources for our farmers, reduce the price of rice by up to 7 pesos per kilo, and lower inflation significantly. I ask Congress to prioritize this crucial reform, which I have certified as urgent today.”

Ang pinagmamadaling reporma ng Pangulo ay ang rice tariffication bill o House Bill 4904 na mag-aamyenda sa Agricultural Tariffication Act of 1996 na nagsasaad na tanging ang National Food Authority (NFA) lamang ang may monopolya sa importasyon ng bigas. Kapag naisabatas na ang naturang panukala, tatanggalin na ang “prescribed import volume” at bubuksan sa mga pribadong negosyante ang pag-angkat ng bigas mula sa ibang bansa.

Ayon kay Socio-economic Planning Secretary Ernesto Pernia malaki ang magagawa ng rice tariffication bill sa pagbaba ng presyo ng bigas at inflation rate.

“To the extent that rice importation will be liberalized, the private sector will start importing. The more private sector imports, the supply of rice enlarges and therefore the price of rice goes down.”

Dagdag ni Pernia, kapag nabuksan na ang importasyon sa mga pribadong rice traders mas mapagtutuunan ng atensyon ng NFA ang pagsiguro sa buffer stocks ng bigas sa buong bansa upang mapanatili ang sapat na supply lalo na sa panahon ng kalamidad.

“Meanwhile, the revenue from the tariff on rice will be used to help the farmers increase their productivity,” dagdag ni Pernia.

Nguni’t para kay Rosendo So, chairman ng Samahang Industriya ng Agrikultura, imbis na mapababa ay baka mas tumaas pa ang presyo ng bigas sa bansa kapag natuloy ang plano ng gobyerno.

“Kasi open up, ibig sabihin lahat magpapasok. So yung volume hindi natin alam kung ilan ang papasok. Once na ganun ang mangyari, yung nagbebenta sa atin na countries, dahil may demand ang Pilipinas, itataas nila ang presyo,” paliwanag ni So.

Dagdag niya, mas dapat pagtuunan ng pansin ng pamahalaan ang pagbibigay ayuda sa mga lokal na magsasaka upang mapataas pa ang kanilang produksyon.

Ayon sa isang ulat ng Food and Agriculture Organization ang production cost ng palay sa Pilipinas ay nasa P10-12 kada kilo, samantalang sa Vietnam ay nagkakahalaga lamang ng P6.50 kada kilo at P9 kada kilo naman sa Thailand at India.

BILANG NA ANG ARAW NG RICE CARTEL

Isa sa mga sinisisi sa pagkakaroon ng mataas na presyo ng bigas sa bansa ay ang operasyon ng rice cartel na nakapagdidikta sa bentahan at supply sa merkado. Ayon sa mga report, ang mga malalaking negosyante sa likod ng naturang cartel ay may kakayahang bumili at makapag imbak ng tone-toneladang mga bigas. At dahil hawak nila ang malaking bahagi ng supply, kaya nilang manipulahin ang kalakalan—pwede nilang i-hoard ang supply ng bigas upang magkaroon ng rice shortage na magbubunsod ng pagtaas ng presyo sa merkado. Kapag nangyari na ito, saka nila ilalabas ang mga stocks nila na maibebenta sa mas mataas na halaga.

Kaya naman nagbigay babala si Pangulong Duterte na ang rice cartel sa bansa ay tatanggalan ng maskara at papanagutin ang mga sa batas dahil sa pananabotahe sa pambansang ekonomiya.

“To help stabilize rice prices, we also need to address the issue of artificial rice shortage. I now ask all the rice hoarders, cartels and their protectors, you know that I know who you are: Stop messing with the people. I hate to… Power sometimes is not a good thing. But I hope I will not have to use it against you,” wika ni Pangulong Duterte sa kanyang 49-minutong SONA.

“Consider yourselves warned; mend your ways now or the full force of the State shall be brought to bear upon you. I am directing all intelligence agencies to unmask the perpetrators of this economic sabotage and our law enforcement agencies to bring them to justice,” dagdag na babala niya.

RICE SMUGGLER, NASAMPOLAN

Bilang pagpapakita ng pangil ng pamahalaan kontra sa pananabotahe ng cartel, ilang araw matapos ang SONA ay nasabat ng Bureau of Customs ang aabot sa 10,000 sako ng hinihinalang smuggled rice sa isang bodega sa Lungsod ng Calamba, Laguna. Tinatayang aabot ang halaga ng mga bigas na iligal na naipasok sa bansa ng P25 milyon.

Sa naturang operasyon ay aktwal na nasaksihan din ng otoridad ang pagre-repack sa sako-sakong imported rice mula Thailand, China, at Vietnam upang palabasin na locally-produced ang mga ito at ididispatsa sa mga lalawigan ng Oriental Mindoro, Nueva Ecija, Isabela, at Palawan bagay na ginagawa umano ng rice cartel.

Ayon kay Customs Commissioner Isidro Lapeña ang mga smuggled rice ay nakatakdang ilabas sa merkado kapag tumaas na ang presyo ng bigas.

“’Yung mga rice kapag hindi ni-release sa market, there will be an artificial shortage of rice in the market then the price goes up. ´ Yan ang tinatawag nila na price manipulation. And then saka nila ilalabas itong mga stock nila kapag nagtaas na ‘yung price ng bigas sa market,” wika ni Lapeña.

Ang smuggled rice ay inangkat ng Marcelo Rice Trading, na ayon sa NFA at sa Bureau of Customs ay walang import permit.

“The interested party is given 15 days to prove or show the source of the goods and the payment of duties and taxes. If they fail to do so, the goods will be seized and subjected to forfeiture proceedings,” wika ni Lapeña.

Marami ang umaasa na sa mga darating na panahon ay magagawa ng Pangulong Duterte na matagumpayan ang laban kontra cartel, gaya ng matagumpay na laban nito kontra drogan.

Ang presyo ng bigas at ang NFA

by

Ni: Assoc.Prof. Louie C. Montemar

Nakababagabag ang pagtaas ng presyo ng bigas nitong ilang huling buwan. Sa kagyat, tila mauugat ang pag-aalala ng mga negosyante at ang kanilang kaugnay na pagtataas ng presyo ng bigas sa mga nakababahalang pahayag ng National Food Authority (NFA) na may kakulangan daw tayo sa bigas. Ngunit para kay Cabinet Secretary Jun Evasco, hindi tunay ang “kakulangan” dahil may palay sa kamay ng ating mga lokal na magsasaka.

Tila sang-ayon naman ang mga lokal na samahan ng mga magsasaka’t magbubukid kay Sec. Evasco.  Wika nga ni Zenaida Soriano, pambansang tagapangulo ng National Federation of Peasant Women (Amihan), “Ang agarang solusyon sa kakulangan sa bigas ng NFA ay ang pagbili mula sa aming mga lokal na magsasaka”.

“Dapat gamitin ng National Food Authority (NFA) ang kanyang Php pitong (7) bilyon na badyet para sa lokal na pagbili ng bigas sa halip na umangkat.”

May pera naman talaga ang NFA.  Kung ano, magkano, saan, at kailan bibili ng bigas ang usapin.

Kaugnay nito, dapat bigyang­­ pansin din na ayon sa Bantay Bigas, isang network ng mga magbubukid at konsyumer, “kung ang NFA ay magtataas ng presyo ng suporta nito sa Php 20 bawat kilo ng palay, maaari nitong makuha ang mga 350,000 metro tonelada (MT) [ng palay] na katumbas ng 227,500 MT o 4.5M bags ng bigas, na sapat sa pitong (7) araw na buffer stock.” Ngayon lamang, nabalitang bibili na nga ang NFA ng bigas sa halos 35 pesos sa kada kilo mula sa mga negosyante!

Pagdidiin nga ng tagapag­salita ng Bantay Bigas na si Cathy Estavillo, “Ang kakulangan sa bigas-NFA ay nakapagpapataas sa posibilidad ng pagtaas ng presyo ng bigas. Samakatuwid, dapat ipatupad ng pamahalaang Duterte ang isang pansa­mantalang kontrol ng presyo upang matiyak na ang mga komersyal na presyo ng bigas ay hindi magtataas at tiyakin na ang mga pribadong negosyante ay hindi makikinabang sa sitwasyon.”

Ang di-maipagkakaila, may hindi pagkakasundo sa panananaw sina Sec. Evasco at iba pang mga opisyal sa loob ng NFA. Hindi magkasundo sa kung ano, magkano, saan, at kailan bibili ng palay o bigas. Halimbawa, mayroon sa kanilang nagdidiin sa walang habas na pag-angkat.  May naniniwala namang makasasapat at mas makabubuti na bumili na lamang sa mga lokal na producers.

Ayon sa pinakahuling mga balita, habang sinusulat mismo ang artikulong ito, ililipat na ng Malakanyang ang NFA sa loob ng Department of Agriculture habang patuloy pa rin naman ang pagkakaroon ng “quantitative restrictions” (mga limitasyon) sa pag-angkat ng bigas.

Sa harap ng lahat ng ito, tila mas may pagkiling tayo sa pananaw ni Sec. Evasco—isang pananaw na tila aayon naman sa sinabi ni Estavillo na “ang seguridad ng pagkain ng bansa ay hindi dapat nakasalalay sa ibang mga bansa; sa halip, ang lokal na industriya ng bigas ay dapat palakasin sa pamamagitan ng pagpapaunlad at pangangalaga ng mga tradisyunal na uri ng bigas na mas mahusay na angkop sa mga pangangailangan ng mga magsasaka at mga kondisyon ng sakahan at pagbibigay ng angkop na mga serbisyo ng suporta at subsidyo sa mga lokal na magsasaka ng bigas.”

Ang pag-aaral sa mga usapin sa NFA ay magandang panimula upang repasuhin ang kabuuang programang pang-agrikultura ng ating bansa. Sa huling paglilimi, hindi naman talaga ang NFA ang tunay na magpapababa sa presyo ng bigas at iba pang produktong pang-agrikultura, kundi ang isang matibay at makabagong programang pang-agraryo para sa buong bayan, lalo na ang ating mga kapus-palad.

Close Bitnami banner
Bitnami