PINAS

Ang Lihim ng Panginoon (Ikapitong Bahagi)

Sonspeak

Recent News:

Pangulong Duterte

VFA, may pakinabang ba?

by

HANNAH JANE SANCHO

 

 NAIS nang ipawalang bisa ni Pangulong Rodrigo Duterte ang kasunduan ng Pilipinas at Estados Unidos na nagpapahintulot sa mga sundalo ng dalawang bansa na magkasamang magsagawa ng military exercises.

Taong 1998 nang pormal na nilagdaan ang Visiting Forces Agreement o VFA.

Nag-ugat ang  naging desisyon ni Pangulong Duterte na kanselahin ang VFA matapos isapubliko ni Senator Ronald “Bato” dela Rosa na kinansela ng Estados Unidos and visa nito at walang ibinigay na paliwanag kung bakit.

Si Dela Rosa ang dating hepe ng Philippine National Police at siyang chief architect ng kontrobersiyal na war on drugs ng Administrasyong Duterte.

Nagbabala ang Pangulo na kapag hindi ibinalik ang visa ni Dela Rosa sa loob ng isang buwan ay kaniyang i-abrogate ang VFA.

Una nang inihayag ng Estados Unidos na hindi nito pahihintulutan ang mga taong nasa likod ng pagpapakulong kay Senator Leila De Lima sa diumano’y pagkakasangkot nito sa iligal na droga.

Tinawag ni De Lima na political persecution ang pagkakapiit sa kaniya at labag sa kaniyang karapatang pantao. Na siya ring tingin ng ilang mambabatas sa Estados Unidos kaya nito inihain ang US resolution para hindi makapasok sa kanilang bansa ang mga nagpakulong kay De Lima.

Naniniwala si dating Foreign Affairs Secretary Albert del Rosario na bagamat hindi perpekto ang VFA ay mahalaga at may pakinabang ito sa Pilipinas.

Ani Del Rosario, na kapag wala ang VFA, hindi gagana ang Mutual Defense Treaty para sa mga joint training exercises sa pagitan ng mga sundalo ng Pilipinas at Estados Unidos.

Mahalaga aniya ang mga Balikatan Exercises na may layuning makatulong sa paghahanda ng ating mga sundalo sa mga kinakaharap na banta ng terorismo at pagkilos sa mga kalamidad.

Ipinunto ng dating DFA Secretary na dahil sa VFA ay nakatulong ang mga Amerikanong sundalo para makapaghanda ang pwersa ng Pilipinas nang tumama ang 2013 super typhoon Yolanda.

Maraming bansa sana ang nais magpadala ng kanilang sundalo para tumulong pero sa Estados Unidos lamang may ganitong kasunduan ang Pilipinas.

Pero maituturing nga bang nasa tamang rason o kapritso lang ang desisyon ni Pangulong Duterte na tuldukan na ang VFA?

Para kay Presidential Spokesperson Salvador Panelo, hindi dahil sa kapritso kaya umabot sa ganitong desisyon ang Chief Executive kundi dahil na rin ito sa serye ng pambabastos sa Pilipinas ng ilang senador ng bansang Amerika.

Sinabi ni Panelo na nagdesisyon ang Pangulo dahil ang pagkansela ng  visa ni Dela Rosa ang  “last straw that broke the camel’s back.”

Dagdag pa ni Panelo sa mga dahilan ni Pangulong Duterte ay ang pagdemand ng ilang senador ng Estados Unidos gaya nina Richard Durbin ng Illinois, Patrick Leahy ng Vermont at Edward Markey ng Massachusetts na palayain si de Lima; ang US Senate Resolution na nagkokondena sa umano’y human rights violations ng Pilipinas kaugnay ng war on drugs; ang probisyon sa US National Budget na hindi nagpapahintulot na makapasok sa kanilang bansa ang mga nasa likod ng pagpapakulong kay De Lima.

Ayon kay Panelo ang mga hakbang na ito ay itinuturing ni Pangulong Duterte na panghihimasok sa affairs ng Pilipinas.

Sana man lang daw ani Panelo ay nagbigay ng paliwanag ang Estados Unidos kung bakit nito kinakansela ang visa ni Dela Rosa bilang paggalang sa mambabatas ng bansa.

Ipinunto rin ng Malakanyang ang special privilege na mayroon ang Estados Unidos sa ilalim ng VFA.

Sa ilalim ng kasunduan, walang kapangyarihan ang Pilipinas na magkaroon ng jurisdiction kapag nakagawa ng krimen ang isang military personnel ng Amerika maliban na lang kung ang krimen ay sa Pilipinas naganap.

Sa pamamagitan ng VFA, binibigyan ng exemption ang mga sundalo ang Estados Unidos ng visa requirements at pinahihintulutan ang mga eroplano at barko nito na pumasok sa kahit anumang bahagi ng bansa.

Una nang inatasan ng Pangulo si Justice Secretary Menardo Guevarra na magsagawa ng preliminary impact assessment sa posibilidad na tuluyan nang tapusin ang VFA.

Gayunpaman nilinaw ng Malakanyang na wala pang inilalabas na final decision  ang Pangulo na tuluyan nang tapusin ang VFA kundi nagpahayag lang ito ng kanyang reaksiyon sa pagkansela ng visa ni Dela Rosa.

DUTERTE BIYAHENG ESTADOS UNIDOS?

by

HANNAH JANE SANCHO

 

IMBITADO si Pangulong Rodrigo Duterte at iba pang mga leaders ng Association of Southeast Asian Nations o ASEAN para sa nalalapit na US-Asean Summit na gaganapin sa Las Vegas sa March 4.

Ang imbitasyon ni US President Donald Trump ay sa kabila ng ipinapanukala ng US Senate na huwag pahintulutang makapasok ang mga nasasangkot na opisyal ng Pilipinas sa pagkakakulong ni Senator Leila De Lima.

Sa isang pahayag sinabi ng Presidential Communications Operations Office (PCOO) na unang ipinaabot ang imbitasyon ng Estados Unidos sa Asean Summit sa Bangkok, Thailand noong Nobyembre.

Muling pinaalalahanan ang mga Asean Leaders tungkol sa nasabing imbitasyon sa liham na ipinadala nitong January 9 lamang.

Hindi ito ang unang pagkakataon na inimbitahan si Pangulong Duterte na bumisita sa Amerika.

Si Senador Christopher Lawrence “Bong” Go ang nagsabi na noong 2016 ay inimbitahan ni Trump si Pangulong Duterte sa White House nang magkausap ito sa telepono.

Muling inimbitahan si Pangulong Duterte ni Pres. Trump noong 2017 para talakayin ang kahalagahan ng pagkakaroon ng strategic partnership ng dalawang bansa.

Gayunpaman wala sa mga imbitasyon na ito ang pinagbigyan ng Pangulong Duterte.

Paliwanag ni Presidential Spokesperson Salvador Panelo noong Oktubre 2019 na isa sa dahilan kung bakit ayaw bumisita ng Pangulong Duterte sa Estados Unidos ay dahil sa masyadong malamig ang klima nito, mahaba ang biyahe at wala pa sa plano.

Magbabago kaya ang desisyon ng Chief Executive kung buwan ng Marso naman gaganapin ng Asean-US Summit?

Magugunitang inihayag ni Pangulong Duterte na nagkaroon ito ng “very bad case of colds” nang umuwi ito mula sa pagbisita nito sa Russia noong nakaraang Oktubre.

Gayunpaman nagpahayag noong nakaraang Hulyo si Philippine Ambassador to the United State Jose Romualdez na nagpahiwatig si Pangulong Duterte na pupunta ito ng Estados Unidos, timing na lamang ang tinitingnan kung kailan ito mangyayari.

Itong taong 2020 na nga ba ang tamang pagkakataon para kay Pangulong Duterte sa kaniyang kauna-unahang pagbisita bilang chief executive sa Estados Unidos?

Sa kabila nito, wala pang maibibigay na kasiguraduhan ang Malakanyang na ituloy ni Pangulong Duterte ang biyahe sa Amerika.

 

CPP hindi kontrol ang NPA

by

EDITORIAL NI HANNAH JANE SANCHO

 

MALINAW na wala talagang kapangyarihan ang Communist Party of the Philippines sa armadong grupo nito na New People’s Army.

Isang patunay dito ang hindi pagsunod ng New People’s Army sa napagkasunduang ceasefire sa pagitan ng Communist Party of the Philippines at Gobyerno ng Pilipinas.

Nagsimula nitong December 22, 2019 ang tigil putukan hanggang January 7, 2020.

Sa kabila nito, ilang oras pa lang ang nakakalipas magmula nang magsimula ang ceasefire ay inatake ng pinaghihinalaang communist guerrillas ang mga pulis at sundalo sa dalawang magkahiwalay na insidente sa Iloilo at Camarines Norte province.

May kapangyarihan pa ba si Joma Sison ang founder ng Communist Party of the Philippines?

Sinusunod pa ba ng New People’s Army ang armadong grupo ng komunista ang mga utos ni Sison?

Kung ilang oras pa lang matapos magsimula ang tigil putukan ay hindi na agad ito nasunod sana ikansela na lang ito ng gobyerno.

Magtatapos ang taong 2019 na iniiwan ng Duterte Administration ang posibilidad na muling buksan ang peace talks sa pagitan ng komunista at gobyerno.

Ito ay sa kabila nang maraming beses na itong itigil dahil nakukulangan ang gobyerno sa sinseridad mula sa komunista.

Para kay Pangulong Rodrigo Duterte kung gusto ng CPP na ituloy ang peace talks dapat dito sa Pilipinas gawin at hindi sa ibang bansa.

Nagbigay din ng katiyakan si Pangulong Duterte na hindi huhulihin ng gobyerno at tutulungan na makabalik sa Pilipinas si Sison na nasa Netherlands bilang isang political refugee.

May patutunguhan nga ba ang peace talks sa mga komunista?

Nais ng gobyerno na pagbigyan ang kapayapaan pero hanggat nagpapatuloy ang ginagawang panununog, paghingi ng revolutionary tax, recruitment sa kanayunan, pagsira sa kinabukasan ng maraming kabataan kaya madalas natitigil o naisasangtabi ang usapang pangkapayapaan.

Kaya hindi tumitigil ang gobyerno na pigilan ang NPA sa mga operasyon sa nagpapatuloy na military operations sa mga kuta ng mga rebelde sa buong bansa.

Hindi na rin nakapagtataka ang desisyon ni Davao City Mayor Sara Duterte na huwag isama ang kaniyang lungsod sa Christmas ceasefire sa mga terorista pati na rin sa binabalak na formal peace talks.

Para kay Inday Sara hindi mapagkakatiwalaan ang CPP-NPA at hindi aniya kilala ng mga komunista ang ibig sabihin ng salitang sinseridad.

Sa napakaraming taon at administrasyon na nagdaan ay hindi umubra ang usapang pangkapayapaan sa mga komunista.

Kung sa ceasefire pa lang ay hindi na nasusunod si Joma Sison paano pa kaya ang mapagkakasunduan sa peace talks.

Marami nang nailatag na negosasyon sa dalawang panig para maging win-win ang usapang pangkapayapaan pero napupunta sa wala dahil pagdating sa implementasyon ng kasunduan sa parte ng CPP ay hindi ito nasusunod.

Kung itutuloy ito ng gobyerno ibang lider kaya ng CPP ang dapat kausapin dito para matiyak na nasusunod ang kasunduan?

Dahil sa maraming pagkakataon napatunayan ni Joma Sison, hindi na siya pinakikinggan ng mga komunista na nasa bansa.

Mga atletang nakakuha ng medalya sa SEA games, ginawaran ng parangal ni Pangulong Duterte

by

 

JAMES LUIS

GINAWARAN ni Pangulong Rodrigo Duterte ng cash incentives at order of lapu-lapu awards ang mga atletang pinoy na nakakuha ng medalya sa katatapos na Southeast Asian Games.

Nasa halos 600 medalist ng SEA games ang dumalo sa isinagawang seremonya sa Malakanyang para tanggapin ang parangal para sa tagumpay ng kampanya at programa ng gobiyerno.

Batay sa batas, ang gold medalist ay entitled ng P300,000 cash; P150,000 naman sa silver medalist at P60,000 sa bronze medalist o kabuuang P79 million para sa mga medalists sa katatapos na SEA games.

Maliban dito, nagkaloob din si Pangulong Duterte ng cash incentives sa mga medalist.

Nagkaroon ng photo opportunity si Pangulong Duterte sa bawat atleta na dumalo sa okasyon.

Hindi naman nakadalo ang mga miyembro ng Gilas Pilipinas gayundin ang gymastics gold medalist na si Carlos Yulo na kasalukuyang nagsasanay na sa Japan para sa Tokyo Olympics.

Sen Bong Go may pamasko sa mga batang may sakit na Leukemia

by

HANNAH JANE SANCHO

NAGHANDA ng espesyal na paparty si Senator Christopher Lawrence ‘Bong’ Go para sa mga batang may sakit na Leukemia sa Philippine Children’s Medical Center sa Quezon City nitong December 18, 2019, katuwang ang Touch of Love na isang nonprofit organization.

Binigyang diin ng Senador sa mga bata kasama ang kanilang pamilya na huwag mawalan ng pagasa.

“Mga bata, wag kayong mawalan ng pag-asa. Nandiyan ang Panginoon, nandiyan ang gobyerno para tumulong sa inyo,” ayon kay Sen Go.

Naghandog ng mga pamasko si Sen Go kung saan nakatanggap ang bawat pamilya ng panghanda sa noche buena at pamasahe sa mga gustong umuwi sa kanilang mga probinsya.

Ipinakilala rin ni Sen Go ang isang batang leukemia patient na si John Paul Culiao na naging malapit sa kaniya magmula nang makilala nito noong nagdiwang ito ng kaniyang kaarawan sa mga cancer patients taong 2018.

Tinulungan ni Sen Go si John Paul sa kaniyang pampaospital mula noon at hanggang ngayon at ipinakilala pa kay Pangulong Duterte.

Binigyang diin ni Senador Go na seryoso itong ipagpatuloy ang paghahatid ng serbisyo lalong lalo na sa mga kababayan nating may sakit.

“Ang kasiyahan ko sa mundong ito ay makapagserbisyo sa inyo at makapag-iwan ng ngiti sa inyong mukha. Ngayong panahon ng Pasko, kalimutan muna natin ang problema. Magkasiyahan muna tayo,” ayon kay Sen Go.

Patuloy din ang ginagawang paliwanag ni Sen Go sa mga kababayan natin na nangangailangan na lumapit lamang sa pinakamalapit na Malasakit Centers para sa kanilang problema sa medical at financial na pangangailangan.

Layunin ng Malasakit Centers na mapadali at maibigay agad ang tulong ng gobyerno sa taumbayan mula sa Philippine Health Insurance Corporation (PhilHealth), Department of Social Welfare and Development (DSWD), Department of Health (DOH) at Philippine Charity Sweepstakes Office (PCSO).

Magugunitang nitong unang linggo ng Disyembre nang lagdaan ni Pangulong Rodrigo Duterte ang Malasakit Center Act of 2019, na isa sa priority measure ni Senator Go.

Pangalan ng susunod na PNP chief, hintayin na lang – Malakanyang

by

HANNAH JANE SANCHO

 

HINTAYIN na lamang ang Pangulong Duterte sa pagpili sa susunod na pinuno ng pambansang pulisya.

Sinabi ni Presidential Spokesperson Salvador Panelo na maaaring hindi pa kuntento ang presidente sa tatlong pangalan na pamimilian sana niya ng susunod na hepe ng Philippine National Police.

Kabilang sa mga isinumite sa pangulo para sa susunod na PNP chief ang mga pangalan nina PNP Officer-In-Charge General Archie Francisco Gamboa; Deputy Chief for Operations Lieutenant General Camilo Cascolan; at Chief of Directorial Staff Major General Guillermo Eleazar.

Dagdag pa ni Panelo, hindi ito nagsasalamin na hindi honest o hindi qualified ang tatlong pangalan na ibinigay, maaaring hindi pa lang raw nakakarating sa pangulo ang pangalan ng hinahanap nitong susunod na hepe.

Kung sakaling wala talagang mapili ang pangulo, siya raw muna ang magiging pinuno ng pambansang pulisya ng bansa.

Close Bitnami banner
Bitnami