Nanawagan si Commission on Elections (Comelec) chairman Andres Bautista na dalhin sa korte ang alegasyong ibinabato sa kanya ng kanyang asawang si Patricia Bautista.

Ani Bautista, dapat ay idaan sa korte ang isyu para malaman ang authenticity ng mga dokumentong hawak ng kanyang misis.

Pero tutol si Bautista sa imbestigasyon ng national Bureau of Investigation (NBI).

Kailangan, ayon sa Comelec chairman, ay makita niya ang mga itinurn-over sa NBI para malaman kung totoo at sa kanya nga ang mga ito.

Iginiit din ni Bautista na hindi siya nagsinungaling sa kanyang Statement of Assets, Liabilities and Networth (SALN), gaya ng paratang sa kanya ng kanyang asawa.

Inilabas ng kampo ng asawa ni Commission on Elections (Comelec) chairman Andres Bautista na si Patricia Bautista ang mga litrato ng pakikipagpulong nito kay Pangulong Rodrigo Duterte.

Naganap ang pulong noong Hulyo a-bente sais – dalawang araw matapos ang State of the Nation Address (SONA).

Sa nasabing mga litrato, kasama ni Bautista ang kanyang mga abogado na nakipag-usap sa pangulo.

Una nang kinumpirma ni Duterte ang pakikipagpulong ni Bautista.

Ayon sa pangulo, gusto nilang ipaalam ang pagsasampa ng kaso dahil sa makukwestyon ang integridad ng eleksyon.

Una na ring ipinaliwanag ni Gng. Bautista na kailangan nilang magpunta sa isang taong hindi maka-corrupt.

Itinanggi rin ng kampo ni Bautista na nagsilbing broker sa naturang pulong ay ang mag-asawang Ferdinand at Liza Marcos.