PhilHealth

Panukalang ilagay sa Universal Health Care Law ang kita mula sa road user tax, kinontra sa kamara

October 7, 2019 by Pinas News

House Deputy Speaker for Finance Lray Villafuerte

KINONTRA ng ilang kongresista ang panukala na ilagay sa Universal Health Care Law ang kikitain mula sa Expanded Motor Vehicles Users Charge (MVUC) tax.

Batay sa house bill 4695 ni House Ways and Means Committee Chairman Joey Sarte Salceda, 50% ng kita mula sa road user’s tax ang ilalaan sa UHC law habang 50% din sa PUV Modernization Program.

Binigyang diin ni House Deputy Speaker for Finance Lray Villafuerte na may ibang maaring pagkuhanan ng pondo ang pamahalaan para sa Universal Health Care Law katulad ng “off budget” mula sa PAGCOR at savings mula sa ibang ahensya ng pamahalaan.

Bukod dito, malaki na rin aniya ang kinikita ng PhilHealth mula sa mga premium contributions pa lamang.

Ayon naman kay Marikina Rep. Stella Quimbo, nasa P144 billion ang nakolekta na ng PhilHealth sa premium contributions at sapat na niya ito upang pondohan ang hospitalization at primary care ng mga pasiyente na layong tulungan ng Universal Health Care Law.

Aniya, mas mainam na ilagay na lamang ang 50 percent allocation ng MVUC sa road safety.

MJ MONDEJAR

Atty. Roque, naalarma sa pagbasura ng kaso laban sa may-ari ng WellMed

August 14, 2019 by PINAS

TERRIJANE BUMANLAG

NAAALARMA ang abogado ng dalawang WellMed whistleblowers na si Atty. Harry Roque sa pagbasura ng Quezon City Court sa mga kasong kriminal laban sa may-ari ng WellMed Dialysis Center.

Nangangamba si Roque na madiskaril ang lahat ng pagsisikap para linisin ang PhilHealth sa paghahanda sa pagpapatupad ng Universal Health Care Law.

Nanawagan naman si Roque na agad sibakin sa pwesto si PhilHealth Senior Vice President Atty. Jojo del Rosario dahil sa paghahain ng defective complaint na siyang ibinasura ng korte.

Iginiit ni Roque na hindi dapat sinampahan ng kaso ang dalawang whistleblowers sa halip ay kinasuhan ang mga PhilHealth official na sangkot sa isyu ng ghost dialysis.

Kasong graft at plunder din aniya ang tamang kaso na dapat isinampa sa may-ari ng WellMed.

Sa kabila nito, tiniyak ng dating tagapagsalita ng Malacañang na maaring muling isampa ang kaso dahil ibinasura lang ito dahil sa technicality at walang double jeopardy.

Publiko, hinimok na isumbong ang mga katiwalian sa PhilHealth

August 8, 2019 by PINAS

SAM GUTIERREZ

NANAWAGAN si dating Presidential Spokesperson Harry Roque na magkaisa ang sambayanan para tanggalan ng lisensiya ang mga nandaraya sa Philippine Health Insurance Corporation o sa PhilHealth.

Sa panayam ng Sonshine Radio at SMNI News, sinabi ni Roque na matagal na nilang naisiwalat ang mga kaso ng pang-aabuso ng mga health care providers na kakutsaba ng PhilHealth.

Subalit ayon kay Roque, bagama’t wala pang natatanggal na health care professionals hanggang ngayon ay naniniwala naman siya na tutulong ang bagong pamunuan ng PhilHealth.

“Nakakahiya nga po, marami diyan mga doktor pa, so kinakailangan po talaga magkaisa ang sambayanan kasama po ang mga propesyonal na mga doktor na dapat naman tanggalan ng lisensiya yung mga nandadaraya diyan sa PhilHealth,” ayon sa pahayag ni Roque.

“Pero importante rin tanggalin yung mga nakiki-kutsaba diyan sa PhilHealth dahil hanggang ngayon po, wala pang natatanggal dun sa mga careers na sila naman talaga ang kakutsaba ng mga health providers diyan.”

“Pero ang aking paniwala po matapos ko pong makausap ang bagong liderato ng PhilHealth, ay darating naman po ang panahon diyan,” ayon pa ni Roque.

Maaalalang sinibak ni Pangulong Rodrigo Duterte ang mga matataas na opisyal ng PhilHealth at inilagay sa puwesto si retired General Ricardo Morales.

Ito ay matapos ang kontrobersiyal na “ghost” dialysis patients ng WellMed Dialysis Center na patuloy na nakakukuha ng bayad mula sa PhilHealth kahit patay na ang kanilang pasyente.

Paglalaan ng pondo sa PhilHealth, dapat munang ipatigil

Kaugnay nito, ipinanawagan ni Roque na tutukan muna ang pagtanggal ng kurapsyon sa ahensya bago ibuhos ang malalaking pondo dahil sa masasayang lamang ito.

Ayon kay Roque, masasayang lang ang ilalaang pondo para sa mga magandang proyekto ng gobyerno kung mapupunta lang sa kamay ng mga kurakot.

Magugunitang ibinunyag ni Senador Panfilo Lacson sa kanyang privilege speech na ang isang drug manufacturing company na pag-aari ng pamilya ni dating Health Secretary Francisco Duque ay nakakuha ng milyun-milyong kontrata para maging supplier ng gamot sa government hospitals.

“Pati ‘yung sa DOH ngayon nagkakaroon ng bansag dahil nga dun sa privilege speech ni Senator Ping Lacson. Kaya nga siguro uulitin ko yung panawagan ko. Pag-aralan muna natin kung paano tanggalin ang kurapsyon bago natin ibuhos ang sangkatutak na salapi galing sa kaban ng bayan para isabatas ang Universal Health Care. Ako po gustung-gusto kong maipatupad na. Pero ang opsyon po natin mapapatupad ba natin iyan o patatabain lang natin ang mga kurakot,” ani Roque.

Ang kaso ng Leptospirosis at ang pag-puksa rito

July 16, 2018 by Pinas News

Secretary Duque bumisita sa mga biktima ng leptospirosis

Ni: Jonnalyn Cortez

Patuloy na tumataas ang bilang ng may leptospirosis o yung sakit na nakukuha sa ihi ng daga dahil na rin sa sunud-sunod na pag-ulan at malawakang pagbaha. Kamakailan lang, nagdeklara na ng leptospirosis outbreak ang Department of Health (DOH) sa ilang lugar sa Metro Manila.

Ayon sa isang sistematikong pagsusuri na inilathala sa “Epidemiology and Infection” noong 2012, isa ang leptospirosis sa pinaka-karaniwang sakit na nakukuha kaugnay sa panahon. At dahil nagsimula na nga ang panahon ng tag-ulan, mas mataas ang tyansang marami ang mabiktima nito.

Ano nga ba ang leptospirosis?

Ayon sa World Health Organization (WHO), ang leptospirosis ay isang uri ng bacterial infection na nagmumula sa ihi ng daga. Apektado ng sakit na ito ang buong mundo, ngunit mas laganap ito sa rehiyong may tropikal at subtropikong klima. Maging ang mga hayop ay maaaring magkaroon ng ganitong uri ng sakit.

Dahil na rin sa mga naninirahang daga sa ating kapaligiran, malaki ang banta ng pagkakaroon ng leptospirosis kapag nagbaha. Sa oras na lumusob sa baha ang isang tao na may bukas na sugat o galos sa balat at magkaroon ng direktang kontak sa kontaminadong tubig, maaari itong madapuan ng ganitong uri ng sakit.

Maaari rin itong makuha mula sa ihi ng hayop na may kaparehong sakit na magkakaroon ng kontak sa mucous membranes ng mata, ilong, at bibig. Bukod sa baha, nakukuha rin ang leptospirosis sa lupang kontaminado ng ganitong karamdaman.

Mga palatandaan at sintomas

Makikita ang mga palatandaan at sintomas ng leptospirosis sa loob ng lima hanggang 14 na araw pagkatapos makakuha ang biktima ng ganitong uri ng impeksyon. Maaari ring lumabas ang mga senyales sa loob ng dalawa hanggang 30 araw.

Ilan sa mga sintomas nito ay mataas na lagnat, pananakit ng kalamnan, sakit ng ulo, namumulang mata, panginginig, pagsusuka, pagtatae, at pamamantal. Kadalasang na naihahalintulad ang mga sintomas ng leptospirosis sa ibang mga pangkaraniwang sakit tuwing tag-ulan tulad ng dengue, typhoid, at viral hepatitis.

Ayon naman sa Center for Disease Control and Prevention, maaaring mabilis na magkaroon agad ng leptospirosis pagkatapos lamang magkaroong ng kontak sa sakit na ito. Maaari ring makaramdam ng ilang sintomas ng sabay sabay.

Bunsod nito, mahalagang maagang makita at magamot ang karamdaman na ito upang maiwasan ang mala-lang komplikasyon. Sa katunayan, matapos ang unang antas ng hindi nagamot na karamdaman, lalabas uli ang mga ganitong uri ng sintomas, ngunit mas malala at maaaring nakamamatay.

Ilan nga sa mga palatandaang malala na ang sakit ay ang paninilaw ng kulay ng balat at mata dahil na rin sa kidney failure, makutim na kulay ng ihi, mapusyaw na kulay ng dumi, madalang na pag-ihi, matinding sakit ng ulo, liver failure, at meningitis.

Dahil dito, pinapayuhang magpatingin agad sa doktor ang sinomang makakaranas ng ganitong mga uri ng sintomas. Sinabi rin ng WHO na pinakaepektibo ang pagpuksa sa sakit na ito kapag nagamot nang maaga.

Pag-iwas sa ganitong uring sakit

Lubhang mapanganib na magkaroon ng leptospirosis ang mga taong nagtatrabaho sa sakahan, tindahan ng mga hayop, mga pagawaan ng karne, mga manggagawa sa agrikultura, at syempre pa, ang mga sumuong sa baha.

Upang maiwasan ang ganitong uri ng sakit, pinapayo ng WHO at DOH na iwasang sumuong sa baha o magsuot ng bota, guwantes, at mask kung kinakailangan talagang lumusob dito. Siguraduhin ding maghugas o maligo pagkatapos lumusob sa tubig baha. Hugasan at linisin ding mabuti ang mga sugat lalo na sa paa at hita.

Panatilihin ding malinis ang kapaligiran at gumamit ng bitag at lason para sa daga upang mapuksa ang mga ito. Uminom lamang ng malinis na tubig at gumamit ng iba pang uri ng transportasyon upang maiwasan ang pagsuong sa baha.

Pag-iwas sa self-medication

Matinding pinaaalalahanan naman ni Health Secretary Francisco Duque III ang mga Pilipino na iwasang mag self-medicate kapag nakaramdam na ng mga sintomas ng leptospirosis. Ito ang kanyang sinabi sa kanyang pagbisita sa mga pasyente na may ganitong uri ng sakit sa East Avenue Medical Center (EAMC) sa Quezon City.

“Let us not self medicate because we are talking about a prescription antibiotic here,” anito. Dagdag pa niya, kinakailangan pa umanong suriin ng mga doktor kung kinakailangan uminom ng antibyotiko upang gamutin ang mga pasyenteng may ganitong inpeksyon.

Ginagamot ang leptospirosis sa pamamgitan ng pag-inom ng antibyotiko na kailangang maibigay sa unang sintomas pa lamang ng sakit, ayon sa WHO. Kinakailangan naman nang mas matinding gamutan ang mga may malubhang kaso nito upang gamutin ang mga komplikasyon.

Mahigpit na tinututulan ng DOH ang basta-bastang pag-inom ng antibyotiko ng walang reseta dahil maaari itong maging sanhi ng pagiging “anti-microbial resistant” ng katawan at pagkapinsala ng internal organs.

Tanging mga doctor lamang ang makapagbibigay ng tamang dami at bilang ng gamot na prophylaxis na kailangang inumin ng pasyente depende na rin sa antas ng pagkakaroon ng ganitong sakit na nakadepende rin sa kung gaano kalala ito.

Sa kabilang dako, sinang-ayunan naman ni Philippine Society for Microbiology and Infectious Disease diplomate na si Dr. Daisy Tagarda ang mga sinabi ni Duque. Anito, mas mabuting kumonsulta sa isang doktor bago gumawa ng sariling medikasyon upang gamutin ang leptospirosis.

“The most effective prevention of leptospirosis is avoidance of exposure. But if we don’t have a choice, we can take prophylaxis to decrease the chances of incidences,” anito.025

Dagdag pa niya, hindi nila ipinapayo ang ganitong uri ng gamot sa mga may allergic reactions, buntis, at mga batang pasyente. “It can cause yellowish or discoloration of the teeth of children and even of the baby in the womb,” paliwanag ni Tagarda.

Sa karagdagan, pinayuhan naman ni National Kidney and Transplant Institute (NKTI) deputy director for medical education and research na si Romina Danguilan ang publiko na agad humingi ng tulong sa mga lokal na health centers ng DOH kung kinakailangan.

Handa naman ngayon ang NKTI na tanggapin ang dumaraming biktima ng leptospirosis. Sa katunayan, pansamantala na nitong ginawang ward ang gym ng ospital at nagdagdag ng mga hemodialysis machines para sa mga pasyente.

Ngayon lamang buwan ng Hulyo, maaari ng makakuha ng “coverage package” na nagkakahalaga ng P11,000 ang mga miyembro ng PhilHealth para sa may mga pangkaraniwang antas hanggang malalang kaso ng leptospirosis.

National ID, mga dapat malaman at ikatakot

March 26, 2018 by Pinas News

Ni: Ana Paula A. Canua

ISANG hakbang na lamang bago tuluyang maisabatas ang National ID system dahil kasalukuyang nasa pinal na pagbasa na ang panukala sa senado. Ayon kay Sen. Panfilo Lacson, positibo siya na tuluyang makakalusot ang bill lalo pa’t pabor ito sa lahat dahil mapapabilis nito ang transaksyon mapapribado o publiko man.

“We are hoping the House will simply adopt the Senate version, ergo it becomes an enrolled bill next week before we go on a break,” pahayag ni Lacson.

Tatawaging Filipino Identification Sysem o FilSys ang naturang ID. Kapag mayroon na nito, hindi na kailangan pa magpresenta ng maraming ID bilang proof of Identification sa alinmang proseso sa government at private sector.

Nakasaad sa panukala na lahat ng Pilipino na nandito sa bansa at abroad ay kailangang magregister ng kanilang impormasyon upang magkaroon ng FilSys.

Ilan sa mga impormasyon na lalamanin ng FilSys ay ang pangalan, picture, birthdate, kasarian, pirma, blood type at Common Reference Number (CRN) o individual serial number na magmumula sa Philippine Statistics Authority (PSA).

Sa pamamagitan ng CRN maaring makikita at ma-verify ng awtoridad ang iba pang government-issued numbers ng may-ari mula sa passport, SSS, PAGIBIG, voter’s ID, Philhealth, at tax identification papers.

Upang masigurado naman na magiging tamper-proof ang ID, magkakaroon ito ng smart chip na naglalaman ng biometrics, iris scan, facial image, reception code at iba pang feature upang matiyak na hindi madaling mapeke ang ID.

“Sa pamamagitan nito, isa na lang ang kailangan nating ID at nag-identify tayo na magagamit ito sa iba’t-ibang ahensya ng gobyerno,” pahayag ni Population Committee Chair Sol Aragones.

Ang sinuman na mapatunayan na gumagawa at nagmamay-ari ng pekeng FilSys ay haharap sa anim hanggang dalawang taong pagkakakulong at multang P50,000 hanggang P500,000.

Nakasaad din sa panukala na kailangan ng consent bago ma-access ang iba pang personal na impormasyon ng may-ari, maliban na lamang sa oras ng aksidente o mga sitwasyon na kailangan ng medical workers na makuha ang impormasyon ng biktima. Maaari rin na ma-access ito kapag inutos ng korte na tingnan ito dahil sa banta sa seguridad at kaligtasan ng nakararami.

Nakatakda namang siguraduhin ng Philippine Statistics Authority, Department of Information and Communications Technology at ng National Privacy Commission na mapoprotektahan ang impormasyon ng may-ari.

Permanent ID number

“The bill would allow every Filipino and resident alien of the country to be identified with the use of a PhilSys number, or PSN, a randomly generated, unique and permanent ID number which shall be the standard number assigned to each individual to be incorporated in all ID systems of government agencies,” dagdag ni Sen. Lacson na siyang nagsponsor ng panukalang Senate Bill No. 1738, o An Act Establishing the Philippine Identification System.

Sa kasalukuyan mayroong tinatawag na unified multipurpose ID ang mga miyembro ng SSS and GSIS Philippine Health Insurance Corp. at Home Development Mutual Fund. Hindi saklaw ng lahat ang unified multipurpose ID na ito kaya sa pamamagitan ng FilSys mas mapapaigting ang pagkakaroon ng datos sa bawat Pilipino.

Privacy Violation

Ilan sa mga kinakatakot ng ilang grupo ang posibilidad ng data breaching o ang pagsiwalat at pagnakaw ng impormasyon.

“Aside from the fact that this is an invasion of our people’s privacy this measure may have some very serious sovereignty and security implications since the proposed repository of all these data is the Philippine Statistics Authority (PSA) that entered into questionable contract with a US-based firm called Unisys,” pahayag ni Bayan Muna Rep. Carlos Isagani Zarate.

Nagbabala siya na maaring maging banta ito sa mga Pilipino dahil sa kwestiona-bleng kredibilidad ng ilang kontratang pinasok ng PSA gaya ng Unisys.

“Unisys having unbridled control” of the civil registry system, the US government can also easily have undiminished access to all civil documents of more than 100 million Filipinos” giit nito.

Aniya, “Sa pagsusuri ng Bayan Muna at mga pangkat ng IT (information technology) professionals sa panukalang batas na ito, naging malinaw para sa amin na ito ay labag sa Saligang Batas, ilalagay sa panganib ang seguridad ng taumbayan, at nagbibigay ng mas malawak pang puwang upang supilin ang karapatan ng mamamayan.”

“Napaka-powerful ng binibigay mo, personal information ang nilalagay kaya marami ang may interest diyan hindi lang militarily, bureaucracy, lahat,” pahayag naman ni Gabriela Party-List Rep. Arlene Brosas.

Ayon kay Brosas, sa pamamagitan ng FilSys mapapadali rin ang State Surveillance o kaya ay maaring ipagbili ng gobyerno sa mga korporasyon ang personal na impormasyon ng mga Pilipino.

“Baka magkaroon ng third-party data leaks at magamit din sa militarization dahil napakarami nga sa bureaucracy natin ngayon ang military ang nakaupo na hindi naman magbubunga ng ganansya para sa mga maliliit nating mamamayan,” dagdag nito.

Budget

Sa ngayon nasa P2 bilyon ang tantyang badyet para sa FilSys at nakatakdang pag-usapan pa kung ano ang magiging sistema kung kaya ba itong maging libre sa lahat at paano mapapabilis ang sistema ng registration at pagclaim nito.

Nauna na rito, nagpakita na ng interes at pagpabor ang pangulo sa tuluyang pagpapatupad nito noong ito ay nasa unang pagbasa pa lamang, ito rin ang tini-tingnang dahilan kung bakit umaani ng malaking suporta sa halos lahat ng senador at representante ang naturang panukala.

2018 National Budget: Saan nga ba mapupunta?

January 8, 2018 by Pinas News

Si Pangulong Rodrigo Roa Duterte kasama sina Senate President Aquilino Pimintel III (pangalawa sa nakaupo sa kaliwa), House Speaker Pantaleon Alvarez (nakaupo sa dulong kanan), at ng iba pang mga mambabatas sa Ceremonial Signing ng 2018 General Appropriations Act at Tax Reform Acceleration and Inclusion sa Malacañang Palace.

Ni: Quincy Joel V. Cahilig

BAGO matapos ang taong 2017 ay pinirmahan ni Pangulong Rodrigo Duterte ang 2018 General Appropriations Act (GAA) o mas kilala bilang 2018 National Budget, na base sa 2018 Proposed Budget na isinumite ng administrasyon sa Kongreso noong Hulyo 24, 2017, ang araw ng ikalawang State of the Nation Address ng Pangulo.

Ang 2018 National Budget ay masusing tinalakay sa Kongreso at Senado, ang pagpupursiging maisakatuparan ang mga pangako ng pangulo sa sambayanan mula pa sa kanyang kampanya (‘’Tunay na pagbabago tungo sa matatag, maginhawa, at panatag na buhay ng bawa’t Pilipino.’’)

Breakdown ng alokasyon kada sektor

Ayon sa statement ng Department of Budget and Management (DBM), ang enacted obligation budget para sa Fiscal Year 2018 ay nagkakahalaga ng P3.767 trillion, na mas mataas ng 12.4 % sa 2017 National Budget. Ang nasabing halaga ay katumbas ng 21.6 % ng Gross Domestic Product ng bansa na gagamitin sa implementasyon ng iba’t ibang programa ng gobyerno, lalo na ng mga Human Capital Development at Infrastructure Projects.

Pinakamalaking bahagi ng GAA ay inilaan para sa social services na nagkakahalaga ng P1.426 trillion, na mas mataas ng 5.5 % kumpara sa inilaang pondo sa taong 2017, upang mas mapaigting ang mga programa ng gobyerno para sa edukasyon, kalusugan, social security, social welfare, at employment safety nets para sa paglinang ng kakayahan ng mamamayan, na siyang pangunahing yaman ng bansa. Batid ng Duterte Administration na kailangan mag-invest para sa human capital development na susi upang lalong umunlad pa ang kabuhayan ng mga mamamayan at ang ekonomiya ng bansa.

Ang ikalawang sektor na may pinakamalaking budget ay ang economic services na may nakalaang P1.154 trillion pondo para sa iba’t ibang infrastructure at agriculture development. Sa ilalim ng Build Build Build Program ng Duterte Administrasyon, bibigyang prayoridad ang pagtatayo ng mga pampublikong imprastraktura upang makaakit ng mga foreign investors, mapaganda ang daloy ng transportasyon, at makalikha ng maraming trabaho. Isusulong din ang mga proyektong pang-agrikultura sa mga nasa probinsya at ang agrarian reform para sa mga magsasaka.

Pinaglaanan naman ang general public services ng P655.4 billion (13.9 % increase) kung saan kabilang ang public order at general administration services para sa mas maayos na operasyon ng mga ahensya ng gobyerno para mas mapaglingkuran ng epektibo ang mamamayan.

Ang defense naman ay binigyan ng P161.5 billion pondo, na 8.6 % ang itinaas mula ng nakaraang taon, para sa seguridad panloob at labas ng bansa.

Samantala, 370.8 billion o 5.5 %increase ang inilaan para sa pagbabayad ng mga utang ng bansa: P354 billion ang para sa debt service interest payments at 16.8 billion naman para sa net lending.

Pinakamalaking pondo para sa DepEd at DPWH

Pagdating sa breakdown kada ahensya, ang Department of Education (DepEd) at Department of Public Works and Highways (DPWH) ang dalawang sangay na binigyan ng pinakamalaking budget.

Mandato ng Konstitusyon na paglaanan ng pinakamataas ang sektor ng edukasyon. Sa 2018 National Budget, ito ay makatatanggap ng P672.4 billion na pondo para sa iba’t ibang programa tulad ng scholarships, grants, at subsidies. Ang DepEd ay may P533.3 billion budget, P62.1 billion para sa State Universities and Colleges, P49.4 billion sa Commission on Higher Education (CHED), at ang Technical Education and Skills Development Authority ay may P7.6 billion na alokasyon.

Dahil seryoso rin ang Duterte Administration na makapagtayo ng mga imprastrakturang kailangan ng bansa tulad ng mga tulay at kalsada, ang Department of Public Works and Highways binigyan ng alokasyon na P637.9 billion, na katumbas ng 40.3 percent increase sa budget ng nakaraang taon. Kabilang din sa paglalaanan ng budget ang pagtatayo ng flood control systems upang mabawasan ang pinsalang dulot ng mga pagbaha na dala ng malalakas na ulan bunsod ng climate change.

Ang Department of Interior and Local Government naman ang pangatlong may pinakamataas na budget na P170.8 billion, 15.4 % increase. Sinundan ito ng Department of Health na may P167 billion, o 12.3 % increase, kasama na dito ang alokasyon para sa Philippine Health Insurance Corporation (PhilHealth), para sa mga programang tutugon sa mga pangangailangang pangkalusugan ng mamamayan, lalo na ng mga mahihirap.

Ang Department of National Defense naman ay binigyan ng 149.7 billion pondo (9.1 % increase) para sa mapaigting ang kakayahan ng kasundaluhan sa pamamagitan ng sa Armed Forces of the Philippines Modernization Program.

Para sa Department of Social Welfare and Development ang P141.8 billion pondong pangtustos sa iba’t ibang social protection programs nito.

Ito naman ang inilaang budget para sa mga sumusunod na ahensya: Department of Transportation (P66.3 billion), Deparment of Agriculture (P53.5 billion), Autonomous Region in Muslim Mindanao (P33.1 billion), Department of Environment and Natural Resources (P24.9 billion).

Hindi mapapako ang mga pangako ng Pangulo

Sinisiguro rin sa 2018 National Budget na matutupad ang mga pangako ni Pangulong Duterte sa mamamayan na libreng serbisyo, libreng edukasyon, dagdag sahod, at tulong sa mga biktima ng trahedya.

Sa pagpasa ng batas na Universal Access to Tertiary Education o Free Tuition Fee Law (Republic Act 10931), siniguro na ang mga estudyante sa mga state universities and colleges, local universities and colleges, at technical-vocational institutions ay wala nang babayaran pang tuition fee , miscellaneous fee, at iba pang bayarin sa eskwelahan. Naglaan na ang pamahalaan ng P40 billion para dito na kasama sa budget ng CHED para sa mga estudyanteng mag-eenroll sa School Year 2018-2019. Dahil dito, inaasahan na mas marami ang magkakaroon ng access sa mas mataas na edukasyon, na daan tungo sa mas magandang kinabukasan.

Wala na rin atrasan ang pagtataas ng sahod ng mga Military and Uniformed Personnel. Simula Enero ng 2018, tataas ang base pay ng 58.7 % ng lahat ng ranggo. Naglaan para dito ang gobyerno ng P64.2 billion na kukunin sa Miscellaneous Personnel Benefits Fund at iba pang budget allotments ng mga ahensiyang may kinalaman.

Hindi na rin dapat pang mamroblema ang mga magsasaka sa bayad ng patubig sa kanilang mga bukirin dahil sinagot na ng pamahalaan ang naturang serbisyo. Nasa P2 billion ang subsidiyang inilaan ng gobyerno para sa Irrigation Service Fee, na kabilang sa P41.7 billion pondong inilaan para sa National Irrigation Administration. Magsasaayos at magtatayo rin ng mga modernong irrigation systems sa bansa ang naturang ahensya.

Samantala, kasama sa 2018 National budget ang P10 billion pondo para muling ibangon ang Marawi City, na kabilang sa National Disaster Risk Reduction Fund. Nakalaan ang nasabing pondo para pagtatayo ng mga imprastraktura, proyektong pabahay, serbisyong pangkalusugan, edukasyon, at tulong pangkabuhayan para sa mga biktima ng bakbakan sa naturang lungsod.

Recent News: