Philippines

Pinas pumalag na sa ‘swarming’ ng Chinese vessels sa Pag-asa

April 25, 2019 by Pinas News

ANG Pag-asa Island, na bahagi ng Spratly Islands group na pinag-aagawan ng maraming mga bansa sa Southeast Asia.

Ni: Quincy Joel Cahilig

MULI na namang ipinakita ng China ang pagiging agresibo nito sa pag-angkin sa mga isla at karagatang pagmamay-ari ng Pilipinas. Sa isang ulat ng militar, makikita na pinapalibutan ng daan-daang mga sasakyang pandagat ang Pag-asa Island, na bahagi ng lalawigan ng Palawan.

Tinawag ng Department of Foreign Affairs na “illegal” ang pag-“swarm” sa naturang dako ng mga Chinese vessels, na aabot ang kabuuang bilang na 275 mula Enero hanggang Marso.

Sa kabila ng pagsiguro ni Chinese Ambassador Zhao Jianhua na hindi armado ang mga fishing vessels na namataan, tinukoy ng think tank na Centre for Strategic and International Studies (CSIS), na ang mga barkong namataan ay binubuo ng navy, coastguard, at fishing boats. Batay sa satellite images na kanilang nakalap, nagsimula noong Disyembre ang pagpapadala ng China ng mga vessels sa naturang dako.

Ayon naman kay analyst Richard Heydarian, marami sa mga sasakyang pangdagat ay mula sa Chinese People’s Liberation Army at layunin ng mga ito na pigilan ang Pilipinas na makapagtayo ng mga structures sa isla.

“This is not really helpful to President Duterte because he is trying very hard to sell his rapprochement to China to the Philippine people, including to the Philippine military, which remains very skeptical of China,” wika ni Heydarian.

Sa kasalukuyan sumasailalim sa rehabilitasyon ang mga structures sa Pag-asa Island, kabilang dito ang isang runway. Ang isla ay bahagi ng Spratly Island group na matagal na panahon nang pinag-aagawan ng iba’t-ibang mga bansa gaya ng China, Vietnam, Malaysia, Philippines, Brunei, at Taiwan. Sinasabing mayaman sa natural gas ang Spratlys.

PERSONAL na inimbitahan ni Chinese President Xi Jinping si Pangulong Rodrigo Duterte para daluhan ang 2nd Road and Belt Forum sa Beijing ngayong Abril, kung saan maaaring talakayin ang usapin sa West Philippine Sea.

Duterte to China: ‘Pag-asa is ours’

Kung noon ay tila “friendly” ang tono ng Duterte administration sa issue sa West Philippine Sea, tila palaban na ang naging mga pahayag ng pamahalaan sa ginagawang pangangamkam ng China sa mga teritoryo ng bansa.

Sa isang pagkakataon, sinabihan ni Pangulong Rodrigo Duterte ang China na lubayan ang Pag-asa Isand.

“I’m trying to tell China: ‘Yung Pag-asa is ours. We have been there since 1974. Kung inyo ‘yan, bakit hindi ninyo pinaalis kami?” sabi ni Duterte sa isang kampanya ng Partido Demokratiko Pilipino-Lakas ng Bayan (PDP-Laban).

“Let us be friends, but do not touch Pag-asa Island and the rest, Pag ‘yan ang ginalaw ninyo, ibang istorya na ‘yan. Sabihin ko sa mga sundalo ko, ‘Prepare for suicide mission,'” dagdag nito.

Sa kabila ng magandang relasyon ngayon ng dalawang bansa, ani Duterte, maaari itong magbago kapag may sinaktan ang China na Pinoy.

“I said that is part of the conflict because they have gobbled up the whole of China Sea. Para sa kanila, kanila ‘yan. So they feel free to roam around and do whatever, but they actually never harmed or arrested any Filipino. I am sure that it has something to do with the greater game of geopolitics and it is not directed to us. And I assure you that if they kill or arrest people there who are Filipinos, then that would be the time that we will have to decide on what to do,” wika ng Pangulo.

Subali’t nilinaw ni Duterte na hindi niya hinahamon ang China kundi pinapayuhan lamang.

“This is not a warning; this is just a word of advice to my friends, kasi kaibigan tayo ng China. So nakikiusap ako. I will not plead or beg, but I’m just telling you that lay off the Pag-asa because may mga sundalo ako diyan,” aniya.

Sinabi naman ng Malacañang na walang dahilan para palibutan ang mga islang occupied na ng Pilipinas at binigyang diin na hindi tutulutan ng Duterte administration na panghimasukan ng mga Chinese ang teritoryong pagmamay-ari ng bansa.

Wika ni Presidential Spokesman Salvador Panelo, patuloy na tututulan ng gobyerno ang paglalayag ng mga Chinese vessels sa karagatan ng Pilipinas sa pamamagitan ng paghahain ng diplomatic protests.

“We will object to their presence. We have already filed a diplomatic protest and that applies to everything, anything that concern Chinese vessels in our territory,” wika ni Panelo. “They should leave, they have no business being there. They cannot be staying there forever.”

“We remain steadfast in maintaining our claims with respect to our territory and exclusive economic zones pursuant not only to the said arbitral judgment based on accepted principles of public international law but consistent with the directives of our Constitution and the aspirations of the Filipino people,” aniya.

Sinabihan din ni Panelo ang China na iwasang gumawa ng mga hakbang na maaring makasama sa mga mangingisdang Pilipino na namamalakaya sa mga teritoryong pinagtatalunan, bagay na makapagdudulot umano ng di magandang epekto sa “friendly relations” at “bilateral negotiations” ng dalawang bansa.

“If they continue to be present in our territory then it is an assault to our sovereignty,” sabi ni Panelo.

Inaasahan na pag-uusapan ang naturang isyu sa 2nd Belt and Road Forum na dadaluhan ni Pangulong Duterte ngayong Abril. Noong Nobyembre, personal na inimbitahan ni Chinese President Xi Jinping ang Pangulo na daluhan ang naturang pagpupulong na isasagawa sa Beijing.

SINA dating foreign secretary Albert del Rosario at dating Ombudsman Conchita Carpio Morales, na kamakailan ay kapwa nagsampa ng reklamo laban kay Chinese President Xi Jinping sa International Criminal Court dahil sa pang-aagaw ng China sa teritoryo ng Pilipinas sa West Philippine Sea.

Gamitin na ang The Hague ruling vs. China

Tinawag ni Department of National Defense (DND) Secretary Delfin Lorenzana na “solid” ang claim ng Pilipinas sa Spratly islands batay sa historical at legal na mga ebidensya.

“Despite the pronouncement of the Chinese Foreign Ministry, we stand on solid ground on our claims in the Spratlys and the West Philippine Sea. There is the 1981 UNCLOS (United Nations Convention on The Law of the Sea) of which China is a signatory, that gave the Philippines an EEZ (exclusive economic zone) of 200 nautical miles,” sinabi niya sa harap ng media.

Dagdag ni Lorenzana, mas pinatibay pa ng Permanent Court of Arbitration (PCA) ruling noong July 12, 2016 ang claim ng Pilipinas, na tuluyang nagbasura naman sa Nine-dash Line historical claim ng China.

“There is the PCA ruling of July (12) 2016 which invalidated the Chinese historical claims. In short, the Chinese have nothing working for them except their imagined historical claim,” binigyang diin ni Lorenzana.

Subali’t nagpasya noon si Pangulong Duterte na isantabi muna ang verdict ng International arbitration court upang isulong ang magandang ugnayan ng Manila at Beijing para sa bilateral ties tungo sa ikalalago ng ekonomiya. Nguni’t sinabi ng Pangulo na gagamitin din niya ang The Hague ruling sa tamang panahon.

Para kay dating foreign secretary Albert del Rosario, ito na ang tamang panahon para gamitin ng Duterte admin ang nasabing ruling sa gitna ng agresibong pagkilos ng China sa West Philippine Sea. Dapat na aniyang gumawa si Foreign Affairs Secretary Teodoro Locsin, Jr. ng mga recommendation hinggil dito.

“What is currently notable is that Beijing is now clearly revisiting its excessive and unlawful claim in the South China Sea that has been ruled upon by the arbitral tribunal whose ruling is now an integral part of international law. At the same time, amid aggressive moves by our northern neighbor in such areas as Pag-asa, in other areas and in other issues, it may be the right time to finally unshelve our arbitral outcome, enabling our SFA to develop recommendations for our President’s consideration,” pahayag ni del Rosario.

Naniniwala si del Rosario at si Ombudsman Conchita Carpio Morales na ngayon na nga ang best time para isulong ang resulta ng arbitral tribunal outcome. Kapwa nila sinampahan ng reklamo for crimes against humanity sina Chinese President Xi Jinping at ang iba pang Chinese officials sa International Criminal Court dahil sa usapin sa West Philippine Sea.

Sa ruling ng PCA, walang basehan umano ang China na gamitin ang Nine-dash Line claim nito sa West Philippine Sea at sinabing nilabag ng Beijing ang sovereign rights ng Pilipinas. Sinabi rin ng korte na hindi mga isla kundi mga bato o reefs lang ang kontrolado ng China, na hindi nabibigay ng territorial rights sa kanila. Subalit hindi tumalima ang China sa naturang ruling at inakusahan pa ang mga hukom ng tribunal na tumatanggap ang mga ito ng suhol mula sa Pilipinas para ibasura ang claims nito sa West Philippine Sea.

Bilang ng mahihirap sa bansa, bumaba

May 10, 2018 by Pinas News

Ni: Quincy Joel V. Cahilig

SA halos ikalawang taon sa puwesto ni Pangulong Rodigo R. Duterte, patuloy na dumarami ang bilang ng mga Pilipinong nakakaramdam ng pag-angat ng estado ng buhay.

Indikasyon ito na nagbubunga ang mga pagsusumikap ng kanyang administrasyon na sugpuin ang kahirapan sa Pilipinas.

Base sa pinakahuling survey na isinagawa ng Social Weather Stations (SWS), 42 porsyento ng mga pamilyang Pilipino ang naniniwalang sila ay mahirap o “self-rated poverty”. Ito ay mas mababa ng dalawang porsyento kumpara sa 44 porsyento na naitala sa katulad na survey na isinagawa noong Disyembre 2017.

“We are pleased to note that Filipino families who consider themselves mahirap or poor continue to decrease to a record-low 42 percent in March 2018,” pahayag ni Presidential Spokesperson Harry Roque.

Lumabas din sa resulta na 29 porsyento o nasa 6.7 mi-lyong pamilya ang nagsabing “poor” ang kanilang pagkain o self-rated food poverty. Ayon sa SWS, ito ang unang pagkakataon na ang numero ng self-rated food poverty ay bumaba sa 30 porsyentong marka mula nang simulan ng ahensya ang pag-aaral sa food-poverty sa bansa noong 1988, sa termino ni dating Pangulong Corazon Aquino.

Bagamat masasabing mataas pa rin ang naitalang mga numero sa survey, isinasaad ng paggalaw nito na du-madami ang nakakaramdam sa ipinangako ng Pangulo sa kanyang kampanya noon na “Change is coming”.

“Our poverty-alleviation efforts are thus gaining ground as we continue to assure everyone that no one will be left (behind) in the Duterte administration,” wika ni Roque.

Dahil sa positibong resulta ng SWS survey, dagdag ni Roque, ipagpapatuloy ng pamahalaan ang mga programa nito tulad ng conditional cash transfers na mula sa kinikita ng gobyerno sa first package ng compreshensive tax reform program (TRAIN), at ang iba pang may mga programa sa pagkain, land reform, pang-kalusugan, patubig, pabahay, edukasyon, trabaho, kalikasan, at pagsusulong ng kapayapaan.

Bilib pa rin sa Pangulo ang maraming Pinoy

Lumabas din sa pinakabagong SWS survey na maraming Pinoy ang tiwala pa rin sa liderato ni Pangulong Duterte.

Nakakuha si Duterte ng +65 “very good” net trust ra-ting sa survey na isinagawa nitong ika-23 hanggang ika-27 ng Marso. Ngunit bahagya itong bumaba kumpara sa “excellent” trust rating na nakuha ng Pangulo noong Di-syembre ng nakaraang taon.

Nanatiling “excellent” ang ibinigay na rating para sa Pangulo ng mga taga-Visayas at Mindanao samantalang “very good” naman ang sa Metro Manila at Balance Luzon.

Sa kabila nito, nagpapasalamat pa rin ang Administrasyong Duterte sa mataas na kumpiyansa ng masa sa Chief Executive ng bansa sa kabila ng mga kontrobersiya at isyung ipinupukol sa kanya.

“We are thus grateful for our people’s vote of confidence with significant trust in the President, amid being subject to unending criticisms and attacks. Rest assured that the President will continue to steer the ship of State until we reach a drug-free destination where the country’s macroeconomic fundamentals would be strong and resilient so Filipinos could lead comfortable lives,” wika ni Roque.

Ang ‘pasalubong’ ni Duterte mula SA ASEAN

Kamakailan ay tumungo ang Pangulo sa Singapore upang daluhan ang Association of Southeast Asian Nations (ASEAN) Summit, kung saan tinalakay ng mga lider ng mga kaanib na bansang Myanmar, Vietnam, Laos, Thailand, Cambodia, Philippines, Malaysia, Singapore, Indonesia, at Brunei Darussal ang ang iba’t-ibang isyu sa rehiyon, kabilang ang pagtutulungan sa pagpapalakas ng ekonomiya sa South East Asia, pagtatayo ng ASEAN Smart Cities Network, at cyber-security.

Sa isang okasyon doon ay personal na sinaksihan ni Pangulong Duterte ang pagpirma ng mga investment agreements sa pagitan ng mga malalaking kumpanya ng Pilipinas at Singapore na aabot sa USD 185.7 milyon. Kasama din ni Duterte sina Foreign Affairs Secretary Alan Peter Cayetano, Trade Secretary Ramon Lopez, Finance Secretary Carlos Dominguez, Presidential Communications Office Secretary Martin Andanar at Roque sa seremonyang ginanap sa Ritz-Carlton Millenia Singapore.

NO CORRUPTION SA PANGULO

Upang mas maengganyo ang mga dayuhang kumpanya na mamuhunan sa bansa, tiniyak ni Pangulong Duterte sa kanila na walang kurap-syon sa ilalim ng kaniyang administrasyon.

“For as long as I am there, there will be no corruption in my government,” siniguro ng Pangulo sa harap ng mga negosyante sa Singapore.

Bilin pa niya sa mga ito na personal siyang tawagan kung mayroon mang kawani ng gobyernong hihingi ng suhol.

“Do not give in to them. All you have to do is to make a call and I will grant you anytime especially about graft, about workers in go-vernment asking for money,” aniya.

Mababatid na ilang mga opisyal ng gobyernong nasangkot sa katiwalian na rin ang sinibak ng Pangulo sa puwesto. Ang sinseridad na ito ng Pangulo sa pakikipagbaka sa kurapsyon, marahil, ang dahilan kung bakit matatag pa rin ang kumpyansa ng masa at mga negosyante sa kanya.

MARAMING TRABAHO

Aatasan din ng Pangulo ang Department of Trade and Industry at ang Department of Finance na gumawa ng mga hakbang na magpapadali sa proseso ng pagnenegosyo sa bansa, dahil layunin ng kaniyang administrasyon ang humikayat pa ng mga mamumuhunan na tumulong sa paglikha ng mga trabaho para sa mamamayan.

“I welcome you. I assure you the protection that you need. No corruption is no corruption. I stake my presidency on this. I will lose the presidency on this. I will lose the honor and the prestige in pursuing that policy of no corruption,” aniya.

Kaya naman sa kanyang pagbalik sa Pilipinas, bitbit ng Pangulo ang magandang balita ng karagdagang foreign investments na inaasahang makalilikha ng 2,000 trabaho sa Pilipinas, na may kinalaman sa urban solutions, information and communication technology, water solutions, security, urban development, renewable energy, finance solutions, transportation, at training para sa small and medium enterprises.

BATA, SAFE KA BA?

November 30, 2017 by Pinas News

Ni: Quincy Joel V. Cahilig

ANG Pilipinas ay isa sa mga bansang may napakalaking bilang ng internet users. Tinatayang nasa 60 milyon o 58% ng kabuuang populasyon ang gumagamit ng internet sa bansa, at umaabot sa siyam na oras kada araw ang ginugugol ng mga Pinoy sa iba’t ibang aktibidad online.

Malaking porsyento rin ng mga gumagamit ng internet ngayon ay mga kabataan. Nakakabit na sa lifestyle ng bagong henerasyon ang naturang modernong teknolohiyang nakapag-uugnay sa mga tao saanmang sulok ng mundo. Karamihan ng aktibidad, impormasyon, at libangan ngayon ng mga kabataan ay nasa world wide web: research, social media, online games, music at video streaming.

Pero paano kung ang bagay na lubhang mahalaga sa buhay nila ay maari rin maging daan sa kanilang kapahamakan?

ESTADO NG ONLINE CHILD ABUSE SA PINAS

Aminado ang mga awtoridad na malaking problema sa bansa ang mataas na bilang ng mga kabataang nabibiktima ng iba’t ibang uri ng pang-aabuso at karahasan.

Umabot sa 2,147 ang kaso ng child abuse ang naitala ng Department of Social Welfare and Development (DSWD) noong nakaraang taon, ¼ sa mga ito ay pang-aabusong sekswal.

At lalo pang lumalaganap ang ganitong uri ng krimen gamit ang internet.

Ang Pilipinas ay tinuturing na isa sa mga bansa sa Asia-Pacific na apektado ng online child abuse. Isa ito sa mga pangunahing pinanggagalingan ng child pornography materials na ginagawa sa pamamagitan ng livestream at webcam.

Ayon sa global study ng UNICEF-IPSOS, 8 sa 10 Pilipinong bata ang nanganganib sa online sexual abuse at bullying; samantalang 5 sa 10 bata ang naniniwalang maaaring may kakilala silang sangkot sa mga ilegal na gawain.

Nakapanlulumong isipin na may mga kaso rin kung saan mga mismong mga magulang pa nila ang nagtutulak sa kanila sa naturang maling gawain upang sila ay pagkakitaan.

Ang kadalasang kalakaran: inaalok ng mga child molester ang mga operator ng cybersex dens ng bayad para magpalabas ng sexual activities tampok ang mga bata sa harapan ng camera o webcam show. May mga pagkakataon pa na magulang pa ng mga biktima ang nagtutulak sa kanila sa naturang kahalayan sa halagang $3 o P150 kada bata.

Batay sa ulat ng Terre des Hommes, umaabot sa 75,000 ang bilang ng child predators online, at marami sa kanila ang naghahanap ng mga batang Pinoy na mabibiktima.

Samantala, tinataya naman ng grupong Plan International Philippines na umaabot 100,000 na mga menor de edad ang nahuhulog sa prostitusyon kada taon dahil sa madaling pagsasagawa ng bentahan ng laman sa pamamagitan ng malalaking websites at social media.

“We’re not just looking at traditional websites were you can find pornography. You would expect that that is where abuse happens, but we found that it also happens on regular Internet spaces like Facebook, on Tinder, on Craigslist…even on OLX. You have children selling themselves online that way,” inilahad ni Paulene Santos, campaign and advocacy specialist ng Plan International Philippines.

SAMASAMANG PAGKILOS KONTRA CHILD ABUSE

Batid ng Philippine National Police (PNP), sa ilalim ng pamumuno ni Director General Ronald Dela Rosa, ang matinding problema ng child abuse sa bansa. Kaya naman mas pinaiigting ngayon ng pulisya ang kampanya nito kontra anumang uri ng pangaabuso sa mga kabataan, sa tulong ng iba’t-ibang organisasyon at sektor ng lipunan.

“Agresibo hindi natatakot ang pambansang pulisya, partikular ang Women and Children Protection Center (WCPC) sa pagsasagawa ng mga kampanya at operasyon para labanan ang iba’t-ibang krimen at pang-aabuso sa mga kababaihan at mga bata,” pahayag ni Dela Rosa.

“Malaking tulong sa hakbanging ito ang patuloy na pagsusumikap ng ating pamahalaan na maitaguyod ang mga serbisyo at programa na nagbibigay protesyon lunas at katarungan sa mga kababaihan at batang nakakaranas ng karahasan, maging ang suportang ipinagkaloobn ng iba’t ibang trupo ahensya at indibidwal para sa kampanyang ito.”

Dagdag pa ni “General Bato”, patuloy ang pagbalangkas ng WCPC ng mga operational handbooks kontra human trafficking upang mas mapabilis at mas maging organisado ang pagpapatupad ng batas, katuwang ang mga counterparts gaya ng International Justice Mission, Federal Beureau of Investigation, at Australian Police.

Kamakailan, inilunsad ng Council for the Welfare of Children (CWC), PNP, at humanitarian group na Rotary ang isang kampanyang naglalayong proteksyunan ang mga kabataan mula illegal drugs at iba pang uri ng pangaabuso na binansagang “Pito Bata Pito! A Call 4 Help” project, kung saan magpapamigay ng mga pito (whistle) sa mga bata sa buong bansa upang magamit sa oras ng panganib.

“It’s really empowering themselves to be strong to be brave to be courageous and not to worry,” wika ni Rotarians Against Child Exploitation Board Member Bing Carreon. Aniya, maliban sa pito, layunin din ng naturang programa na turuan ang komyunidad ng tamang pagtugon sa mga sitwasyon ng child abuse.

Naglunsad din ang Department of Education (DEPEd) at ang University of the Philippines Manila ng programang magpapaigting sa kakayahan ng mga guro, school administrators, at guidance counselors sa pagtulong sa mga estudyanteng nakaranas ng pang-aabusong sekswal. Ito ang Safe Schools for Teens, isang website kung saan maaring makapag-training patungkol sa 4Rs of child abuse prevention: recognize, record, report, at refer.

Ang pagresolba sa problema ng child abuse ay nakaatang hindi lamang sa balikat ng gobyerno at pulisya kung di sa lahat ng miyembro ng lipunan. Ayon kay UNICEF Representative to the Philippines Lotta Sylwander. upang masugpo ang mga pangaabuso, kinakailangang magkaroon ng wastong kaalaman ang bawa’t mamamayan patungkol sa naturang isyu, na sumisira kalusugan, kaisipan, at kinabukasan ng mga biktima.

“We need to raise awareness and vigilance of this issue, so that parents and others understand that child abuse – in any form – is not just morally wrong, it is also extremely harmful to children’s health and development,” wika ni Sylwander.

Kung may nais na i-report na insidente ng online child abuse, maaring kontakin ang PNP Anti-Cybercrime sa hotline no. 09985988116 o ang PNP-Women and Children Protection Center sa telephone no. 410-3213.

Ang halaga ng ASEAN sa buhay ni Juan

November 17, 2017 by Pinas News

Ni: Quincy Joel Cahilig

MARAMI sa mga kababayan natin sa Metro Manila, Bulacan, at Pampanga ang “bakasyon mode” sa kanilang long weekend dahil idineklara ng Malacanang na special (non-working) days ang Nobyembre 13 to 15 sa mga nabanggit na lugar para lumuwag-luwag ang daloy ng trapiko sa mga lansangang dadaanan ng mga country leaders at mga delegado mula Clark Airport hanggang sa mga sa mga lungsod ng Manila at Pasay para sa Association of South East Asian Nations (ASEAN) Summit.

Kabilang sa mga paghahanda ang 15-day gun ban sa National Capital Region, Central Luzon, at Southern Tagalog na ipinatutupad ng Philippine National Police mula Nobyembre 1 to 15 upang masiguro ang seguridad ng mga dadalo sa naturang pagpupulong.

Bagamat itinuturing ng ilan na “vacation time”, sa katunayan ay isa itong napakahalagang at makabuluhang okasyon at malaking karangalan para sa Pilipinas, sa pangunguna ng Pangulong Rodrigo Duterte, dahil nasa atin ngayong taon ang ASEAN Chairmanship kung kailan ipinagdiriwang ang ika-50 na founding anniversary ng ASEAN, na may temang “Partnering for Change, Engaging the World,” na tila sumasalamin din sa layunin ng kasalukuyang administrasyon na magpatupad ng pagbabago, gayundin ang pagnanais na paigtingin ang pakikipag-ugnayan sa mga bansang kaalyado.

Ang ASEAN ay organisasyon ng mga bansa sa Asya na itinatag noong 1967, na binubuo ng Indonesia, Malaysia, Philippines, Singapore, Thailand, Brunei Darussalam, Vietnam, Lao’s People’s Democratic Republic, Myanmar, at Cambodia. Ayon sa ASEAN Declaration, layunin ng ASEAN na mas pabilisin ang pag-unlad ng ekonomiya, lipunan, at kultura sa rehiyon sa pamamagitan ng pagpapalitan ng yaman at kaalaman sa transportasyon, agrikultura, pagnenegosyo, at komunikasyon; at ang pagsusulong ang mapayapang relasyon sa pagitan ng mga bansang kaanib, alinsunod sa prinsipyo ng United Nations Charter.

Inaasahang dadalo sa naturang pagtitipon si United Nations Secretary-General Antonio Guterres at ang mga lider ng mga bansang Canada, Australia, Japan, New Zealand, South Korea, China, Russia, India, the European Union, at United States of America.

Isang prayoridad ngayong ASEAN Summit ay ang makapagbalangkas ng mga panuntunan kung paano mas mapapaunlad ang mga micro-, small-, and medium-sized enterprises (MSME) at ang malalaking kumpanya. Bilang isang rehiyon na may malaking economic potential, na may populasyon na 625 milyon, ang large corporations at mga MSME sa South East Asia ang tinukoy na “key drivers” sa paglago economiya sa rehiyon. Batay sa mga reports, mas tumatatag ang mga ekonomiya ng mga bansang kasapi sa ASEAN habang lumalago ang mga negosyo dito.

Sa kasalukuyan, 96 porsiyento ng share sa ASEAN market ay binubuo ng mga MSME na nagbibigay ng mula 50 hanggang 80 porsiyentong domestic employment o mga trabahong pinakikinabangan ng milyun-milyong pamilya. Subalit marami sa mga small and micro entrepreneurs ang umaaray sa hirap na makapagpundar ng kapital at sapat na pondo para matugunan ang mga requirements para makapagsimula at makapagpatuloy sa pagnenegosyo.

Pero para sa mga hindi naman negosyante, meron bang halaga ang ASEAN sa buhay nila?

Meron. Hindi nga lang nila alam.

Ito ang bagay na tila ikinalulungkot ni Melito Salazar, Jr., dating pangulo ng Management Association of the Philippines at kasalukuyang dean ng School of Accountancy and Management ng Centro Escolar University—ang di pagkaalam ng maraming Pilipino, lalo na ng mga nasa lalawigan, patungkol sa ASEAN.

“It is however, sad to note that the level of knowledge and understanding of the Filipinos of ASEAN is less than that of our neighbors. This is a product of years of cursory attention given to the dissemination of ASEAN developments by the government and even the Philippine mass media,” wika ni Salazar.

Aniya, bagama’t mayroong mga advertisements sa Philippine media ang ASEAN ay hindi kalakihan ang impact ng mga ito kumpara sa ginagawa sa mga ASEAN countries tulad ng Thailand, Indonesia, at Malaysia kung saan naglalaan ng segment ang kanilang mga news programs sa telebisyon para makapagreport tungkol sa kanilang kapwa ASEAN countries.

Ipinunto din ni Salazar na malaki talaga ang nakukuhang benepisyo ng mga ordinaryong mamamayan mula sa ASEAN kaya dapat itong malaman at maunawaan ng sambayanan.

“In the countryside where the impact of ASEAN will be the greatest, there is little appreciation of the tremendous opportunities and challenges that ASEAN is bringing. Many Filipinos are not aware that the K to 12 Program is one way of levelling up Philippine education to match that of our ASEAN counterparts so that the Philippines can fully benefit from the free flow of human resources. Other reforms like tax reforms will improve our business competitiveness vis-à-vis other ASEAN enterprises and the consolidation of the Philippine banking system will ensure our ability to participate meaningfully in the free flow of capital.

Parte rin ng mga nabanggit na benepisyo ay ang ASEAN Free Trade Area na nagtaas sa antas ng kompetisyon sa mga suppliers at distributors sa rehiyon. Ito ang nagbigay daan para sa mga Filipino consumers na makapamili ng mga produktong dekalidad sa mas murang halaga. Kasama rin ang mga sumusunod: opportunidad para sa mga estudyante na makapag-cross-enroll sa 10 ASEAN countries, proteksyon ng mga yamang dagat, visa-free travel assistance, at ang mga tulong para sa mga nasalanta ng mga kalamidad.

Pinuri naman ni Salazar ang mga hakbangin ng Duterte Administration na ilapit sa mga lalawigan ng nakaraang Asia-Pacific Economic Cooperation meetings sa mga key centers sa mga lalawigan, gaya ng Bacolod City. Sa pamamagitan ng mga ganitong paraan ay nakikita ng ibang mga bansa ang pag-asenso ng pamumuhay sa rural areas at mas naiintindihan nila ang kultura ng Pilipinas. Kaya iminumungkahi ng naturang business expert na magkaroon din ng mga ASEAN meetings sa iba’t ibang bahagi ng bansa sa mga susunod na pagkakataon upang mas maunawaan ito ng masa.

Recent News: