PINAS

Ang Lihim ng Panginoon (Ikapitong Bahagi)

Sonspeak

Recent News:

Quezon City

DOTr nakatutok sa public vehicles Biyahe ng LRT 1, LRT 2,  MRT-3 at Jeepneys, tiniyak na ligtas

by

Ni: Vick Aquino Tanes

TINIYAK ng pamunuan ng Department of Transportation (DOTr)  na ligtas ang mga pasahero sa pagsakay sa mga pampu-blikong sasakyan na tulad ng  Light Rail Transit Line 1 (LRT-1) , LRT-2, Metro Rail Transit Line 3 (MRT-3), maging ang mga pampasaherong jeepney tungo sa pagbabago na matagal nang hangad ng mga Pilipino.

Ayon kay Transportation Secretary Arthur Tugade, na kailangang matiyak ang kaligtasan ng mga pasahero ng pampublikong sasakyan dahil hindi lamang Pinoy ang sumasakay dito kundi maging ang mga dayuhan at turista.

Kaugnay nito, bukod sa Philippine National Railways (PNR) na unang tren sa bansa, sinunod ang pagtatayo ng LRT ng panahon ng 80’s pa at sa kasalukuyan ay lumagda na naman ang pamunuan ng LRT ng kasunduan upang mas mapalawak at mapabilis ang serbisyo sa publiko.

Ito ay matapos na lumagda sa isang P450 million agreement ang Light Rail Manila Corporation (LRMC)

Ayon kay LRMC President and Chief Executive Officer Juan F. Alfonso, nasa 24 na generation 2 light rail vehicles (LRV) ang kukumpunihin sa loob ng dalawang taon katuwang ang industrial company na Voith Digital Solutions Austria GmBH and CO KGH.

Layunin nito ay para sa pagkukumpuni at rehabilitasyon ng generation trains ng LRT-1 na sakaling matapos ay inaasahang magpapabilis pa sa travel time ng mga pasahero ng linya ng tren.

Sa kasalukuyan ay mayroong 51 generation-1 LRVs na binili noong 1984 ang LRT-1, walong generation-2 LRVs at 44 generation-3 na binili naman noong 2007 at nakatakdang dumating ang 120 bagong LRVs na binili ng Department of Transportation (DOTr) sa taong 2020.

Sa ngayon, ang LRT-1 ay may tatlong henerasyon ng mga tren.

Rehabilitasyon ng LRT-2

Abala ang mga tauhan ng Light Rail Transit Line 2 (LRT-2) para sa karagdagang konstruksyon para sa west at east bound lanes sa Marcos Highway.

Sinimulan na kasi ang konstruksyon ng platform ng LRT-2 sa west at east bound lanes ng Marcos Highway para sa platform ng Emerald Station ng LRT-2.

Ayon sa pamunuan ng LRT-2, kailangan nang madagdagan ang linya ng para sa kombinyente ng mga pasahero mula sa Taguig, Pateros, Makati, Marikina, Quezon City at Pasig area na sakop ng bagong linya.

Malaki ang maitutulong ng karagdagang dalawang istasyon dahil kaya nitong pasa-kayin ang may 80,000 pasahero sa loob ng limang taong operasyon nito.

“This increased capacity of 80,000 daily ridership of the rail line will not only provide a means to decongest our roads but, more important, offer better riding options to our daily commuters. As we improve the public’s general mobility, we also unburden them from traffic worries,” ayon pa kay Tugade.

MRT-3, walanang tirik

Sinisimulan na ng pamunuan ng Metro Rail Transit-3 (MRT-3) ang pagkukumpuni sa mga luma at nabubuklok na bagon at motor ng mga tren matapos na isa-isang dumating ang mga inorder na piyesa mula sa bagong maintenance provider nito na Mitsubishi ng Japan.

Inaasahang madaragdagan pa sa mga susunod na araw ang bulto ng mga spare parts na gagamitin para sa pagsasaayos ng mga depektibong bagon ng MRT-3.

Kabilang sa mga supplier ng spare parts ng MRT 3 ay ang Pink Armour Corporation na kinunan ng mga spare parts para sa power at Overhead Catenary System (OCS), Linkers Enterprises para sa spare parts ng rolling stock at Nikka Trading sa spare parts ng mga depektibong tracks

Ilan sa mga piyesang inorder ay mula sa Germany, Europe at China habang ang ilan ay mula sa supplier sa bansa, ayon sa Special Bids and Awards committee ng MRT-3.

P2P Buses, aalalay sa MRT

Samantala, sa kabila ng pagkasira ng MRT-3 ay nag-laan ang DOTr ng Point to Point bus (P2P bus) sa EDSA bilang pag-alalay sa mga pa-sahero.

Sa ngayon ay marami na rin ang sumasakay sa P2P habang nasa ilalim pa ng pagsasaayos ang mga tren ng MRT.

Ayon sa pamunuan ng MRT-3, unting-unting inaayos ang mga tren at riles ng MRT-3  mula sa bagong maintenance service provider nito na kinuha ng DOTr at asahan umano ang pagbabago sa mga pagbibiyahe ng MRT-3 sa kabila ng sunud-sunod na aberyang nangyayari mula sa North hanggang Taft Avenue stations.

E-jeepney para sa Modernisasyon

Kaugnay nito, tiniyak naman ng Land Transportation Franchising and Regulatory Board (LTFRB) na papasada na   bago matapos ang taon, ang mga bagong e-jeepney sa mga lansangan sa Metro Manila na magiging kapalit ng mga bulok na jeep.

Katuwang ang DOTr, Land Transportation Office (LTO) at Metro Manila Development Authority (MMDA), nagkaisa silang ipatupad ang programang Jeepney Modernization.

Ayon kay LTFRB Chairman Martin Delgra III, kaila-ngan na umanong pairalin ang pagpapatupad ng public utility vehicle (PUV) modernization program sa may 180,000 jeepneys nationwide.

“Kailangan nang palitan ang mga luma at bulok sa pampasadang jeepney sa Metro Manila ay hindi na ito maganda sa paningin lalo sa pang-turismo natin, partikular pa ang polusyon na naidudulot nito,” ayon kay Chairman Delgra.

Halos lahat naman siguro ng mga Pinoy ay nakasakay ng pampasaherong jeep kaya napapanahon na rin upang baguhin sila para sa kapa-kanan ng susunod na dekada.

“Karamihan ng mga jeep ay luma na ang mga designs, umaabot na sila noon pang 1970’s, 1980s, 1960s pa. Ang iba nag-rehabilitate but it doesn’t mean na you are modernized, you are only rehabilitated,” paliwanag pa nito.

Matatandaan na noong Oktubre 12, 2017 ay nangasiwa ng Expo ng mga updated mo-dern jeepneys ang Department of Transportation (DOTr) at Department of Trade and Industry kung saan ang mga local  manufacturers  ay nagbuo ng mga prototype vehicles na naaayon sa  DOTr specifications.

Nais ng pamahalaan na palitan ang mga bulok na jeep na may edad 15 taon pataas ng mga environment-friendly jeepneys na may mga safety features ngunit sa kabila nito, may 600,000 jeepney drivers at operators naman ang maaapektuhan sa gagawing jeepney phase out ng pamahalaan.

Karamihan sa mga tumututol sa nasabing programa ay ang grupo ng mga tsuper at drayber dahil hindi umano makatarungan ang gagawin ng pamahalaan na kung saan ay kapakanan lamang nila ang kanilang iniisip at hindi ang para sa lahat.

Sa kabila ng mariing pagtutol ng mga grupo, tuloy pa rin ang pag-iimplementa ng pamahalaan sa programang jeepney modernization program.

Ayon naman kay Transportation Secretary Arthur Tugade, sinabi nito na hindi anti-poor ang pagpapatupad ng Public Utility Vehicle Modernization Program (PUVMP).

 “Nililiwanag ko lang ho na yung programang modernization of public utility is not anti-poor; it is not designed to phase out the jeepneys or the jeepney business. It is actually designed to strengthen and guarantee the profitability of the jeepney business,” paliwanag ni Tugade.

“Gumagawa tayo ng pamamaraan na kung saan yung jeepney ay magiging compliant sa mga specification na gusto natin sa program upang ang paghahanap-buhay ay kakambalan natin ng responsibilidad sa kapaligiran. Maghanap-buhay ka pero ‘wag mong patayin ‘yung environment. Maghanap-buhay ka pero pangalagaan mo ang henerasyon na darating,” dagdag pa ni Tugade.

Layunin kasi ng mga ahensya ng DOTr, LTFRB, LTO at MMDA na maisaayos ang public road transport system na mapakikinabangan ng lahat.

Napakalaking problema sa trapik, may solusyon na!

by

Ni: Noli Liwanag

NAPAKALAKING problema ng buong Metro Manila sa bawat kalsada nito na sinakop ng mga kotse, bus, jeepney at tricycle. Napakahaba ang mga stranded na sasakyan at walang magawa ang mga motorista kundi maghintay na humupa ang buhol-buhol na mga sasakyan lalung-lalo na sa kahabaan ng EDSA (AH26).

Walang humpay ang pa-nawagan ng Metropolitan Manila Development Authority (MMDA) sa publiko na magtulungan, maging maunawain at habaan ang pasensiya sa inaasahang “paglala” ng trapiko sa Kalakhang Maynila dahil sa iba’t ibang proyektong imprastruktura na programa at proyekto ng gobyerno.

Ayon kay MMDA Assistant General Manager Jojo Garcia, kailangang magtulungan ang lahat upang mabawasan kahit paano ang epekto ng trapiko na inaasahan ngayong taon dahil sa konstruksiyon na proyekto ng Department of Transportation (DOTr) tulad ng extension ng Light Rail Transit (LRT)-Line 1 hanggang Cavite at ng LRT-Line 2.

Ayon sa DOTr, uumpisahan na rin ang konstruksiyon ng Metro Rail Transit (MRT)-Line 7 at North Luzon Expressway (NLEX) Harbor Link Segment 10 sa Caloocan City, gayundin ang pagpapagawa sa ilang tulay.

MGA MALL OPERATORS, KAISA NA MAIBSAN ANG TRAPIKO

Hinihikayat ng MMDA ang mga mall operators, partikular ang mga nasa EDSA, na nakasentro sa four commercial districts tulad ng Cubao, Quezon City Central Business District, Makati Central Business District at Ortigas, na palawigin ang implementasyon ng adjusted mall hours na napatunayang epektibo upang mabawasan ang pagsisikip ng trapiko.

May kasunduan ang MMDA sa mga shopping mall na i-adjust ang kani-kanilang ope-rasyon mula 11:00 ng umaga hanggang 11:00 ng gabi, habang ang delivery hours ay simula 11:00 ng gabi hanggang 5:00 ng umaga. Noong Oktubre 15, nakaraamg taon naging epektibo ang nasabing kasunduan, hanggang noong nakaraang Enero 15, 2018.

Ayon sa MMDA, sa pamamagitan ng umiiral na adjusted mall hours ay bumilis  ng 10 porsiyento ang trapiko sa mga pangunahing lansangan.

 

MALA-SARDINAS NA LANSANGAN AT PASAHERO LULUTASIN NG SUBWAY PROJECT – DR. JAMES DEE

Nagbigay ng magandang suhestiyon si Dr. James G. Dy, president and CEO of CGHMC, isa sa ipinaliwanag nito na halos 10 taon na niyang nabanggit na dapat magkaroon ang bansa ng subway.

Ayon kay Dr. Dy, para matapos o mabawasan ang kinakaharap na problema ng Pinas sa masikip na trapiko at siksikan ng mga pasahero sa Metro Manila, kailangang magkaroon ng subway tulad ng ilang karatig bansa sa Asya na hindi pinoproblema ang trapiko.

Marami na ang namuno sa ating bansa, at ngayon lang matatapos ang paghihirap ng sambayanang Pilipino sa problemang transportasyon sa pamamagitan ng proyektong Metro Manila Subway at iba pang proyektong pangkalsada at transportasyon.

P355.6-B APRUBADO NG NEDA

Matatapos na ang pro-blema ng mga mananakay sa siksikang pagbibiyahe bago sumapit ang 2025 o walong taon mula ngayon. Ang unang bahagi ng proyektong subway ay magsisimula sa Mindanao Avenue sa Quezon City hanggang sa Ninoy Aquino International Airport sa Parañaque City.

Sa ngayon, aabutin ng ta-tlong oras ang biyahe sa lansangan, sa subway, tatagal lamang ng 30 minuto ang biyahe, ayon sa mga nagplano ng proyekto.

Nagsimula na ang gobyerno para sa ikabubuti ng mamamayan, sa pamamagitan ng subway na may P355.6-bilyong pondo at aprubado ng National Economic and Deve-lopment Authority (NEDA), at planong dugtungan ito mula sa Caloocan City hanggang sa Dasmariñas City, Cavite.

Matatandaan na maraming planong palakihin at dagdagan ang mga kalsada sa Metro Manila na hindi pa rin nakukumpleto hanggang ngayon.

Ilang taon nang ginagawa ang elevated highway na nag-uugnay sa North at South Expressways, nakapagitna sa siksikang trapiko ang mga wala pang porma na istruktura nito, subalit mistulang naantala ng hindi pagkakasundo sa right of way ang pagkumpleto sa proyekto.

Ang mga bagong proyekto tulad ng subway, na pinondohan ng bilyong pisong utang sa Japan International Cooperation Agency (JICA) ay may mababang interes na 0.10 porsiyento kada taon, at babayaran sa loob ng 40 taon.

Gayunman, mahalagang tiyakin ng mga nagpaplano ng proyekto na hindi maaantala nang ilang buwan o taon ang mga schedule dahil lamang sa ilang problemang tulad ng right of way.

Inaasahan nating masisilayan na natin ang elevated expressway mula sa SLEX hanggang NLEX sa loob ng isa hanggang dalawang taon. Pagkatapos nito, aasahan naman natin ang subway system na dapat na magagamit na sa 2025, kung lalong magpupursige ang mga opisyal ng bayan ng ating mga pampublikong pagawaan kumpara sa mga pinalitan nila.

KONSTRUKSIYON NG METRO MANILA SUBWAY 

Ipinaliwanag ni DOTr Secretary Arthur Tugade na uumpisahan na ang konstruksiyon ng Metro Manila Subway project.

Ayon kay Sec. Tugade, sisimulan ang proyekto sa Mindanao Avenue, Quezon City hanggang sa Ninoy Aquino International Airport (NAIA) sa Parañaque City.

Planong gawin agad ang tatlong subway station na Mindanao Avenue, Tandang Sora at North Avenue stations bago matapos ang taong 2022.
“Ang subway ay mauum-pisahan na before the end of this year. ‘Yung partial ope-rability, sa pulong namin sa gobyerno ng Japan, gusto nila 2022. Ang gusto ko 2021 so tinitingnan namin paano bibi-lisan,” sabi ni Tugade.

Dagdag pa ni Tugade, aabot sa 120,000 pasahero ang maisasakay araw-araw na maseserbisyuhan ng tatlong subway station.

Ang subway ay may kabuuang 14 na istasyon. Bukod pa rito ang ilalagay na istasyon sa Quezon Avenue, East Avenue, Anonas, Katipunan, Ortigas North, Ortigas South, Kalayaan, Bonifacio Global City, Cayetano Boulevard, Food Terminal Inc., at NAIA.

IBA PANG PROYEKTO NG GOBYERNO

Aprubado na ni Pangulong Rodrigo Roa Duterte ang 11 proyektong imprastruktura na layuning mapabuti ang transportation network at water resource management ng bansa.

Inaprubahan ang mga proyekto sa pulong ng National Economic and Deve-lopment Authority (NEDA) sa Malacañang kamakailan.

Inaprubahan ang mga major infrastructure pro-ject kahit wala si Pangulong Duterte, chairman ng NEDA Board, sa pulong.
“In the absence of the President, the NEDA Secretary as NEDA Board vice chair presided over the NB meeting,” sabi ni Presidential Spokesman Ernesto Abella.
“All items submitted to NEDA Board were approved by the Cabinet,” pahayag pa ng presidential spokesman.
Pinakamalaki sa mga ina-prubahang proyekto ay ang Malolos-Clark railway pro-ject o ang Philippine National Railway (PNR) North 2 na nagkakahalaga ng P211.43 bilyon.

Pasado din sa pulong ng NEDA ang: Mindanao Railway Project Phase 1, Tagum-Davao, na nagkakahalaga ng P35.26 bilyon; ang Cavite Industrial Area Flood Risk Ma-nagement Project, P9.89B; ang Clark International Airport expansion, P12.55B; Education Pathways to Peace in Conflict-Affected Areas of Mindanao, P3.47B; ang Australia Awards and Alumni Engagement Program-Philippines, P1.19B.

Aprubado na rin ang New Communications, Navigation and Surveillance/Air Traffic Management Systems Development Project, P10.87B; ang LRT Line 1 North Extension Project-Common Station, P2.8B; ang Arterial Road Bypass Project Phase II, P4.62B; ang Kaliwa Dam Project ng MWSS, P10.86B; at ang Chico River Pump Irrigation Project ng NIA, P2.7B.n

 

Kilalanin ang tao sa likod ng Lydia’s Lechon at ang dalang sarap ng tagumpay

by

Ni: Ana Paula A. Canua

SA ating bansa nagiging batayan bilang engrande ang isang selebrasyon kapag may handang lechon. Bahagi na ito ng handang Pinoy lalong-lalo na sa pinaka espesyal na okasyon tulad ng Pasko, Bagong-taon at anibersaryo. Likas na rin sa mga ‘Pinoy ang pagpares ng sarap at linamnam sa kasiyahang nadarama ng espesyal na salo-salo ng magkakapamilya.

Isa sa mga pinaka kilalang lechon sa bansa ay ang Lydia’s Lechon, marahil gaya ng maraming negosyo na nakasunod sa pangalan, marami sa inyo ang nagtatanong, sino ba si Lydia? Nagmula ba siya sa mayamang pamilya ng mga negosyante dahil sa laki ng kanyang food business? Narito ang pinagmulan ng sikat na Lydia’s lechon.

 

Nagmula sa tabi ng simbahan

Taong 1965, nagsimulang magtinda sa maliit na stall sa tabi ng simbahan ng Our Lady of Sorrows Church o mas kilala sa tawag na Baclaran Church si  Lydia de Roca, na noon ay 17-anyos pa lamang, kasama ang kanyang butihing asawa na si Benigno de Roca  sa gilid ng simbahan nila sinimulang buohin ang pangarap at panalangin na maging matagumpay sa negosyo.

Naging suki ng mag-asawa ang mga parokyano sa simbahan ng Baclaran, noon pa man kasi marami na talaga ang pumupunta sa Baclaran, una ay upang magsimba at pangalawa ay upang mamili ng mga murang damit at gamit.

Sa gilid ng simbahan itinitinda ng mag-asawa ang abot-kaya ngunit masarap na letchon na pwedeng ihain kahit walang okasyon.   Ipinagbibili nila ito sa maliliit na hiwa. Bukod sa lechon slice mayroon ding ibang ulam na ibinebenta ng mag-asawa gaya ng dinuguan.

Sa murang edad lubos ang pagsusumikap ni Lydia katuwang ang kanyang asawa na kumita para sa kanilang mga anak. Pagmamahal ng isang ina ang naging pangunahing sangkap ng kanyang mga lutuin upang pawiin ang kumakalam na sikmura ng kanyang mga mamimili.

 

Dininig ang panalangin

Kasabay ng kanilang pagtitinda ay ang panalangin na sana balang araw ay masuklian ang kanilang pagsisikap. Hindi kalaunan ay natanggap ng alok mula sa isang hotel sa Roxas Boulevard ang mag-asawa na nagpapa-deliver ng sampung buong letchon.

Sa pagkakataong ito hindi na lamang sa bangketa matitikman ang kanilang luto kung di sa isang malaking hotel na rin, tila dininig ng langit ang kanilang panalangin na lumago ang kanilang munting negosyo.

Noong mga panahong iyon mayroon lamang P500 na kapital si Lydia mula sa pakimkim mula sa binyag ng kanyang ikalawang anak. Bumili siya ng sampung buhay na baboy sa halagang P35 kada isa, ito ay kanyang nili-lechon at  ipinagbibili ng P85 kada isa.

 

Mas masarap na letchon

Noong una simple lamang ang ginagamit na panghalo ni Lydia sa kanyang baboy, ngunit habang lumalaki at nakikilala ang kanyang produkto naisip niya na ayaw naman niyang maisaalang-alang ang tiwala ng kanyang mga kliyente kaya naman naisipan niya na magdagdag ng simpleng pampabango at pampalasa sa kanyang letson. Bukod sa asin, nagdagdag ng tanglad at pandan sa baboy si Lydia, simple lang naman ang pampalasa sa baboy, nagkakatalo lamang sa lutong at lambot ng karne.

Lumipas pa ang panahon at nakatanggap muli ng offer sa ibang hotel si Lydia na nangangailangan ng lima hanggang sampung letchon kada araw.

Malaking hamon ito para sa kanilang mag-asawa na tanging sa labas lamang ng bahay nag-iihaw at walang alagang mga baboy. Dahil maliit lamang ang kanilang kapital at resources hanggang gabi ay nag-iihaw ang mag-asawa upang tugunan ang orders nila.

Matapos ang dalawang taon na gabi-gabing pinagpupuyatan ng mag-asawa ang magpaikot ng letchon sa baga, nakaipon sila sa wakas ng sapat na kapital upang makakuha ng marerentahang lugar upang paglutuan ng 20 letchon ng sabay-sabay.

At kapag lumalaki na ang negosyo, kailangan na rin magdagdag ng tao. Upang matugunan ang orders kumuha ng mga napagkakatiwalaan at masisipag na empleyado. Sa ngayon malaking bilang ng mga orders ay mula pa rin sa mga hotel sa Maynila at Quezon City. Nananatili pa rin namang hands-on ang mag-asawa ito kahit pa 70 taong gulang na si Aling Lydia.

 

Mula sa maliit na stall, mayroon ng malaking kainan

Taong 1986, sa kauna-unahang pagkakataon nakarating na sa mall ang letchon ni Aling Lydia. Inokupahan nila ang 750-square-meter sa kahabaan ng Roxas Boulevard, na malapit pa rin sa gilid ng Baclaran Church. Mula dito tanaw ng mag-asawa ang pinagmulan ng kanilang negosyo, lalo pa’t mula sa gilid-gilid sa wakas mayroon na silang sariling lugar.

 

Suki si Henry Sy ni Lydia

Lubos din na pinasasalamatan ni Lydia ang nagmamay-ari ng SM na si Henry Sy dahil siya ang unang nagbigay ng oportunidad para ipatikim sa loob ng mall ang kanyang letchon. Ayon kay Lydia tuwing linggo ay binabalik-balikan ni Henry Sy ang kanyang masarap na lechon, at kalauna’y nabigyan ng pagkakataong ialok ni Henry Sy kay Lydia ang patayo ng stall sa SM upang mas makilala pa ang negosyong lechon-baboy.

 

Lumago ang negosyo

Hindi na lamang sa Baclaran makita ang Lydia’s Letchon kundi sa iba’t ibang bahagi na rin ng bansa dahil sa ngayon mayroon ng 27 branches,  nagsu-supply sa 10 restaurants at mayroon ng  17 stalls ang Lydia’s letchon.

Katulong ni Lydia sa pagpapalago ang kanyang apat na anak at masipag na asawa. Hindi lamang letsunan ang mayroon sila, mayroon na rin silang farm sa Batangas na pinamamahalaan ng kanyang asawa, doon nagmumula ang malaking bahagdan ng kanilang supply na baboy.

Kahit pa 50-taon na makalipas simula ng magtinda sila sa bangketa hatid pa rin ng kanilang letchon ang lasap ng pagsisikap at saya ng tagumpay.

Isang lalaki sa QC, nahaharap sa patong-patong na kaso dahil sa pagpapaputok ng baril at nakabiktima ng isang lola

by

Ni: Jimmy Mendoza

NAHAHARAP ngayon sa patong-patong na kaso ang lalake matapos magpaputok ng baril at tamaan ng bala ang isang lola sa Quezon City.

Humihimas na ng rehas na bakal sa QCPD Station 10 ang suspek na si Edmund Barber ,nasa wastong taong gulang na itinuturong nagpaputok ng hindi mabatid na kalibreng baril at minalas na tumama sa binte ng  80 anyos na lola habang ito ay naglalakad sa Cubao, Quezon City.

Agad naman naisugod sa  East Ave Medical Center ang lola.

Ayon kay QCPD Station Comander Col. Christian De La Cruz, ang suspek ang tinuturo ng mga testigo na siyang nakitang nagpaputong ng baril at tamaan ng ligaw na bala ang 80 anyos na lola na ngayon ay nanatili pa sa naturang pagamutan.

Mas pinahigpit na seguridad sa QC, inilatag ng QCPD

by

Ni: Jun Samson

INILATAG na ng Quezon City Police District (QCPD) ang mahigpit na seguridad sa Lungsod ng Quezon lalo na mga mataong lugar para sa paghahanda ng kapaskuhan at Bagong Taon.

Sa eksklusibong panayam ng DZAR Sonshine Radio kay QCPD Director Chief Supt. Guillermo Lorenzo Eleazar, mas dinoble nila ang nilatag na higpit na seguridad sa buong Quezon City laban sa mga masasamang elemento ng lungsod at mapangalagaan ang kapakanan ng bawat indibwal.

kabilang sa mga imo-monitor ng mga miyembro ng qcpd ang mataong lugar tulad ng mall, MRT at LRT stations, bus terminals , subdivision, at villages ng lungsod.

Ayon kay Eleazar, kailangan din nila ang tulong ng publiko para sa kapayapaan ng lungsod,  pagbibigay impormasyon sa mga kahina-hinalang tao at mga gumagawa ng ilegal sa lungsod.

 

Krizziah Lyn Tabora: Ang Bagong Prinsesa ng Bowling

by

Ni: San Antonio Jomar M.

SA makapigil-hiningang pagpapatumba ng mga bowling pins kasama ang kaba na dulot ng nalalapit na pagtatapos ng kumpetisyon, nagawa muli ng Pilipinas na dalhin ang kampeonato sa bansa sa larangan ng bowling. Pinatunayan ni Krizziah Lyn Tabora na siya ang bagong prinsesa ng Alley matapos ang 14 na taong pananabik ng bansa na makuha muli ang tropeyo.

Sa katatapos pa lamang na 53rd QubicaAMF Bowling World Cup (BWC) na ginanap sa Hermosillo, Mexico, nabawi muli ng Pilipinas ang kampeonato sa pagpupursige, determinasyon, at lakas ng loob ni Krizziah Lyn nang talunin niya ang 68 na mahuhusay na bowlers mula sa iba’t ibang bansa at iuwi ang tropeyo para sa women’s single division.

“I know people at home have been watching on the live streaming and I’ve already got lots of notifications from friends and family. It has been a good year for me. Our ladies team won bronze in the SEA Games and then we got silver in the Asian Indoor Games. But this is far and away the best!” ika ni Krizziah tungkol sa kanyang pagkapanalo na hindi raw niya inaasahan.

“Usually ’pag finals po hindi ako tumitingin (sa scores), lumapit lang po iyong Malaysian . . . and niyakap na lang po niya ako at sinabi niya na: ‘Krizziah, I’m so proud of you and congratulations.’ So parang natulala ako,” kwento niya sa kanyang mga taga-suporta.

Sa kasaysayan ng bowling sa bansa, panlimang Pilipino na si Krizziah na nakapagkamit ng World Cup na siyang dumagdag sa walong titulo ng bansa. Matatandaan na ang huling pagkakataon na nanalo ang Pilipinas sa World Championships ay noon pang 2003 sa pangunguna ni CJ Suarez na siyang sinundan ng ating prinsesa.

Si Paeng Nepomuceno na siyang coach ngayon ng Philippine Bowling Team ay siyang unang nagdala ng tropeyo sa bansa noong 1976, 1980, 1992, at 1996. Sa tulong niya ay lalong lumago ang kakayanan ng mga Pilipinong atleta at isa na nga doon si Krizziah Lyn. Pangatlong babaeng Pilipino naman si Krizziah na nag-kampeon nang sinundan niya ang yapak nina Bong Coo (1979) at Lita del Rosario (1978).

Siyam na taon na sa bowling ang 26-taon na dalaga. Ayon sa kanya, malaking bahagi ng kung sino siya ngayon ay ang kanyang ama na isa ring bowler. 13-anyos niya ng magsimulang maglaro kung saan itinuturing nya ang bowling bilang buhay niya.

“Bowler po ang dad ko. Kami ng kuya ko nasama po kami sa bowling centers. As a parent gusto niyang nagbo-bowling din sa mga anak. Pinaturuan niya iyong brother ko, pero ako nagpupumilit sumali. Pinapagulong ko iyong ball sa floor, nakulitan ang dad ko so pinaglaro niya ko ng one game, e nag-score po ako ng 236 kaya sabi niya, ‘Patuturuan na kita.’ ”

Lumaki nga si Krizziah Lyn na bola ng bowling ang kasama. 17 taong gulang siya nang mapanalunan niya ang National Open na siyang nag-udyok sa kanya na magpatuloy sa kanyang bowling career. Nagtapos ang dalaga sa Miriam College at naninirahan siya sa Quezon City. Sa katunayan, hindi pa nagwawagi ng kahit anong international women’s single championship si Krizziah kung kaya naman bago lamang sa kanyang pakiramdam ang kanyang nakamit.

Ang records ng ating prinsesa ay noong manalo sila ng kanyang team ng gold medals sa 2014 Asian Inter-City Bowling Championships’ women’s doubles and team sa loob ng limang events. Ngayong taon, nanalo naman siya at ang kanyang grupo na binubuo ng limang miyembro ng silver medal sa 2017 Asian Indoor and Martial Arts Games (AIMAG). Idagdag pa ang Southeast Asian Games na kung saan nanalo ng back-to-back bronze medals ang Women’s bowling team.

Ang kanya nga raw karanasan sa World Championships ay hinding-hindi niya malilimutan. “Ang mindset ko po kasi that day is per shot lang po talaga, more on to get good shots,” ika niya upang mawala ang kaba sa pahirap ng pahirap na lebel ng kumpetisyon. “I only felt the pressure when I advanced to the top four. I wasn’t able to eat my breakfast but the reminders from my parents and (teammate) Jomar (Jumapao) helped me get over it.” Ang suporta ng magulang at ng iba pang kasama mula sa Pilipinas ang naging sandigan ng dalaga upang maabot ang kampeonato. Tumaas na ang ranggo ng dalaga na noon ay may 209 Game Average at ngayon naman ay may 217 Game Average na.

Nagkaroon ng hero’s welcome ang ating prinsesa kung saan sinalubong siya ng kanyang mga fans at ng mga bowling legends ng bansa. Sinalubong din siya ng kanyang kasintahan na isa ring bowler kung kaya naman ayon kay Krizzia Lyn, naiintindihan nito ang hirap at sitwasyon ng kanilang napiling sports.

Tungkol naman sa kung ano ang nais niyang mangyari sa darating na panahon, mananatili pa rin daw siyang lalaban para sa bansa. “Nakakadagdag po ng pressure kasi may expectation na ang mga tao na magaganda na ang mga susunod na laro ko,” ika niya. “Pero siyempre, laban pa rin.”

Close Bitnami banner
Bitnami