Senadora Leila de Lima

Ni: Eugene B. Flores

Pinaliligiran ng mga yamang natural ang kapuluang bumubuo sa Pilipinas. Bukod sa mga nakamamanghang tanawin at destinasyon, kilala rin ang mga lupaing ito sa napakalaking deposito ng yamang mineral, ika-lima sa mundo.

Dahil sa taglay na potensyal, naglipana ang mga kompanya ng minahan upang minahin ang mga yamang ito.

Ayun sa datos noong 2016, mahigit 100 kompanya ang gumagana sa bansa na nagmimina ng metal at hindi-metal. Nasa mahigit 1000 naman ang aplikasyon ng mga kompanyang nais magmina na hindi pa naaaprubahan.

Naging legal ang pagmimina sa bansa matapos gawing batas ang Philippine Mining Act of 1995.

Layunin ng batas na payagan ang mining industry sa bansa upang makatulong sa economic growth at magbigay ng progreso sa mga komunidad.

Tinatayang nasa mahigit 200,000 libo ang mga nagtatrabaho sa pagmimina at may ambag din ito sa gross domestic product (GDP) ng bansa. Nasa apat na porsyento naman ang tulong nito sa pagluluwas ng mga mineral na produkto ng bansa.

Ngunit bumababa ang mga ito sa sumunod na mga taon.

EPEKTO SA KABUHAYAN AT KALIKASAN

Matapos ang ilang dekada, nagpapatuloy pa rin ang pagmimina sa iba’t ibang panig ng bansa.

Ngunit tila ang nais na progreso sa mga komunidad ay nagresulta sa pagkawasak ng mga ito.

Hindi maikakaila ang naibibigay na pera sa bansa ng pagmimina na umaabot sa P70 bilyon kada taon ngunit hindi rin maiaalis na labis naabuso ang kalikasan dahil sa gawaing ito.

Patunay dito ang mga probinsyang nawawalan ng hanap-buhay dahil sa epekto ng pagmimina sa kanilang mga bukirin at palaisdaan.

Naging banta rin sa seguridad ng mga mamamayan ang pagmimina sa kanilang lugar.

Isang halimbawa nito ay ang nangyaring trahedya sa Itogon, Benguet, matapos manalanta ang super typhoon Ompong.

Natabunan ang tinatayang nasa 100 katao nang magkaroon ng landslide sa isang mining site.

Dumipensa naman sa nangyari ang Benguet Corp dahil itinigil na nila umano ang operasyon sa mga lugar na malapit sa landslide ngunit hindi raw sumunod ang mga minero sa nais ng kompanya.

Nagbigay naman ng tulong medikal at sa paghahanap ang kompanya.

PILIPINAS HINDI ANGKOP SA PAGMIMINA

Muling nagbigay ng pahayag ang dating sekretarya ng Department of Environment and Natural Resources (DENR) Gina Lopez ukol sa pagmimina sa bansa. Aniya, hindi angkop ang ganitong aktibidades sa bansang daanan ng mga bagyo at iba pang sakuna.

“We have typhoons, earthquakes, and ‘yung intensity and the incidents of typhoons are increasing every year. We are not fit for mining. Even if the mining companies are good, even if they behave, even if they do things well, we cannot avoid typhoons and calamities like that,” wika niya.

Binanggit din ni Lopez na hindi lamang sagana sa yamang mineral ang bansa bagkus ay pati sa yamang tubig at agrikultural.

“We are in geohazard zone and persist on doing the mining. Who takes the risk? Sino? Who benefits? Who makes the money? Parang a few people make the money, the community takes the risk, parang hindi tama ata ‘yan,” dagdag pa nito.

Bagama’t hindi nagtagal sa posisyon, nakilala si Lopez dahil sa pagpapahinto ng mga kompanyang minahan sa buong Pilipinas dahil sa ‘di umano’y iregularidad sa mga proseso nito na nagresulta sa pagkasira ng mga bundok at negatibong epekto sa mga komunidad.

Nagbigay ito ng maaring pagpilian ng bansa, ang pagmimina na tinawag niyang mapanganib o ang turismo at agrikultura na sagana rin ang bansa.

MGA MINAHAN SA BANSA MULING BIBISITAHIN

Dahil sa trahedyang naganap sa Itogon, inutusan ni Pangulong Duterte si Secretary Roy Cimatu ng DENR upang muling tignan ng seryoso ang mga minahan.

Nagbaba naman ng utos si Cimatu upang ipahinto ang operasyon ng mga small-scale miner sa buong rehiyon ng Cordillera.

“In view of this current situation in the Cordillera, to prevent further danger to the lives of our small-scale miners, I officially order cease and desist of all illegal small-scale mining operations in the whole of Cordillera Administrative Region,” wika nito.

Magiging mahigpit din umano ang ahensya bago aprubahan ang mga aplikasyon para sa Minahang Bayan site.

Kinababahala naman ni Senadora Leila De lima ang planong pagtatayo ng Ferro-Nickel Plant sa Candelaria, Zambales. Malalaking kompanya naman ang may operasyon sa katabing bayan nito na Sta. Cruz.

Aniya, nasira na ang mga bundok maging ang mga ilog at layunin ng gobyerno na pangalagaan ang mga tao. “Abandoning the people by disregarding their safety and needs is an outright dereliction of one’s duty,” wika nito.

MAY MAGAGAWA PA BA?

“Even before, I wanted to stop mining. But if it were not for the fact that it’s allowed by law, little could [be done] about it,” wika mismo ni Pangulong Duterte.

Aminado ang pangulo na maraming problema sa pagmimina, lalo na ang open pit mining ngunit hindi niya ito kayang ipahinto.

“I cannot stop mining because I’m not allowed to abrogate any law here. But I want to stop it because it has created a monster.” aniya.

Hindi rin daw gusto ng kaniyang economic managers ang pagpapasara sa mga kompanya sapagkat mawawalan ng P70 bilyon kada taon ang bansa.

Ngunit sabi nito na mas malaki pa ang mawawala kapag nangyari ang masamang epekto ng mina.

Nais din ng pangulo na kausapin ang Kongreso ukol dito sapagkat sila ang may kakayahan upang mabago ito.

Malaki ang ambag ng mina sa ekonomiya ng bansa at sagana rin ang lupain ng mga yamang mineral, ngunit kapag nagpatuloy ang hindi makatarungang aktibidad na hindi naaayon sa batas, maraming buhay ang maisasakripisyo nito.

Buo ang suporta ni Senador Drilon sa anti-political dynasty bill na kasalukuyang nasa Senado

Ni: Eugene B. Flores

“The time for debate is over. Thirty-one years ago, the Filipino people mandated us in Congress to enact an anti-political dynasty law. It is time for us to act now. Let us pass Senate Bill 1765 now,” wika ni Senate Minority Leader Franklin Drilon na nagpahayag ng buong suporta para maipasa ang anti-political dynasty bill sa lalong madaling panahon.

Aniya pa niya upang mas masiguro ang tagumpay ng bagong tatag na Bangsamoro Autonomous Region in Muslim Mindanao o BARMM, na kamakailan ay pinirma na umano Pangulong Duterte, kinakailangan nang maipasa ang anti-political dynasty law. Noong nagtipon ang bicameral conference committee, pinilit nito na maipasama ang anti-political dynasty law sa Bangsamoro Organic Law ngunit hindi ito naaprubahan.

“Our nation’s dream for a stable and progressive Bangsamoro Autonomous Region in Muslim Mindanao will fail unless we adopt an anti-political dynasty law that will be in place before a Bangsamoro government is installed,” dagdag pa niya.

Nangangamba umano ang senador na baka magpatibay lang lalo sa mga warlord at mga kilalang politiko sa rehiyon ang malaking kapangyarihang makukuha ng gobyerno ng Bangsamoro. Binanggit din nito na ayon sa isang pag-aaral, numero unong dahilan ng paglubog sa kahirapan ng mga lugar sa rehiyon ay ang dinastya sa pulitika.

Sa kasalukuyan, nasa senado pa ang bill na ito na naglalayong pagbawalan ang dinastya sa mga politiko ng bansa at may kaakibat na parusa ang sino mang lalabag dito.

Ayon sa Senate Bill 1765, binigyan ng kahulugan ang political dynasty bilang ang, “concentration, consolidation, and/or perpetuation of public office and political powers by persons related to one another within the second degree of consanguinity or affinity.”

Ibig sabihin, nasasakop nito ang mga kapatid full blood man o half blood, asawa legal man o common-law, mga anak legitimate, illegitimate at adopted, mga magulang, mga apo at maging mga asawa ng mga nabanggit na kamag-anak.

Ipagbabawal sa mga ito ang pagtakbo sa nasyonal at rehiyonal o lokal na pwesto sa iisahang botohan o eleksyon.

Umapela si Senadora Poe sa Pangulong Duterte upang maisabatas ang anti-political dynasty law sa lalong madaling panahon

MAS PRODUKTIBONG PAGLILINGKOD

Katulad ni Senador Drilon, buo rin ang suportang ibinigay ni Senadora Grace Poe para sa pagpapabilis ng senado para maisaayos ang Senate Bill 1765.

Bagama’t sinabi ng Senadora na hindi lahat ng political dynasties ay nakakasama para sa bansa, nalilimitan pa rin umano ng mga ito ang kapangyarihan na nanantili lamang sa kamay ng mga magkakamag-anak.

“..dahil sa mga political families, hindi nakakaupo sa gobyerno ang mga pinakamagaling at pinakamatalinong mga Pilipino. Maraming Pilipino ang gustong maglingkod, pero hindi kaya dahil ‘reserved’ na ang mga puwesto para sa kapatid, anak o asawa ng pulitiko.” Wika nito.

“Our country has been called an ‘Anarchy of Families.’ Pero sa totoo, I think politics in our country is more like a game of “Trip to Jerusalem”– si Mayor ay makikipagpalit kay Governor, si Board Member ay magiging Congressman. And in doing so, the circle of available ’seats’ gets smaller every election cycle,” dagdag pa niya.

Nagkakaroon din umano ng palaksan dahil sa ganitong dinastya, kung saan ang mga malalapit sa mga namumuno ay nagkakaroon ng tsansyang magkaroon ng pwesto sa pulitika.

“The regulation of political dynasties is consistent with the aspiration in the country for a more inclusive society, a fairer and more competitive political process, and a more balanced and inclusive political development.” Sabi ni Senador Drilon

Sa pamamagitan ng anti-political dynasty law, mabibigyan ng pantay na oppurtunidad ang mga taong may puso at nais maglingkod tungo sa ikauunlad ng bansa.

Isinusulong sa Senado ang Anti-political dynasty bill

PABOR ANG MGA SENADOR

Tumakbo ang usapin ukol dito matapos makatanggap ang proposal na anti-dynasty bill na in-sponsoran ni Senador Francis Pangilinan ng 13 pirma mula sa mga senador noong Mayo. Ang suporta ng mga senador ang dahilan ng patuloy na laban para maisabatas ito.

Kabilang sa mga pumirma ay sina Senadora Nancy Binay, Senadora Grace Poe, Senadora Risa Hontiveros, Senadora Loren Legarda, Senadora Leila de Lima, Senador Francis Pangilinan, Senador Sherwin Gatchalian, Senador Panfilo Lacson, Senador Ralph Recto, Senador Bam Aquino, Senador JV Ejercito, Senador Sonny Angara at si Senador Franklin Drilon.

Nagpahayag din ng suporta ang Pangulong Rodrigo Duterte sa nais ng mga senador, bagama’t siya mismo ay nagmula rinsa isang political family. “A few of the principled men, I would say, want this kind of thing about dynasty is abolished. I am for it,” sabi ng Pangulo.

Bagama’t may alinlangan kung papasa ito sa Kongreso, sinabi niya na “Dumadating itong dynasty, dynasty law. Nirerespeto ko yan. If that is the will, (kung) yun ang gusto ng tao. Walang problema yan.”

Umapela naman si Senadora Grace Poe sa Pangulo. “Mr. President, we have a choice today. We can stick to the status quo or we can take a step toward greater political and economic inclusion by immediately passing this measure,” aniya.

Naging mailap ang usapin sa pagbabawal ng political dynasties sa mga nakaraang dekada bagama’t nasa konstitusyon ang pagbabawal nito ay dahil sa karamihan ng mga nasa pulitika ay nagmula sa mga political family na patuloy na naipapasa hanggang sa kasalukuyan.

Senadora Leila de Lima