PINAS

Ang Lihim ng Panginoon (Ikapitong Bahagi)

Sonspeak

Recent News:

SHANE ELAIZA ASIDAO

Sakit na dulot ng iodine deficiency

by

Nagbibigay tulong ang iodine upang maging balanse ang produksyon ng hormones sa katawan na nagmumula sa thyroid glands.

 

Ni: Shane Elaiza Asidao

NAGKAKAROON ng balanseng produksyon ng hormone dahil sa tulong ng mineral na tinatawag na iodine. Nagmumula ang mga hormone na ito sa thyroid gland na responsable sa metabolism, tumutulong sa paglaki ng katawan at nire-repair ang damaged cells na magdudulot ng iba’t ibang uri ng sakit gaya na lamang ng kanser.

 

Ngunit, ayon sa artikulo ng Healthline, marami sa atin ang maaaring kulang sa iodine o may iodine deficiency.

Kabilang sa mga kadalasang may iodine deficiency ay ang mga buntis, mga bansang kulang ang produksyon ng iodine gaya ng Timog-Silangang Asia, New Zealand, Timog Asya, at ibang bansa sa Europa, mga taong hindi gumagamit ng iodized salt at mga taong sumusunod sa vegan diet o mga vegetarian.

Dagdag pa ng Healthline ilan sa mga sintomas ng kulang sa iodine ang mga sumusunod:

  • Namamaga ang leeg o tinatawag na goiter.
  • Biglaang bigat ng timbang.
  • Hypothyroidism o mababang lebel ng thyroid hormones

Dahil sa Hypothyroidism, makakaranas ang isang tao ng:

  • Panghihina
  • Mabilis lamigin
  • Constipation
  • Mabagal na tibok ng puso
  • Paghina ng mga muscle
  • Depression
  • Mahinang memorya
  • Pagbilog ng Mukha
  • Paglalagas ng buhok

Kapag hindi agarang nalunasan, maaaring magkaroon ng iba’t ibang uri ng komplikasyon o sakit ang isang taong may kulang sa iodine. Ilan sa mga sakit na ito ang:

  • Paglaki ng puso at o komplikasyon sa puso.
  • Pagkakaroon ng mental health issues gaya ng depression at cognitive impairment
  • Pagkabaog sa mga kababaihan
  • Komplikasyon sa peripheral nerves.

Dagdag pa ng artikulo, sa kaso ng mga buntis, maaaring maging dahilan ito ng miscarrige, maagang panganganak at congenital abnormalities sa mga bagong silang na sanggol.

Bagaman seryoso ang sakit na ito, tamang diet ang isa sa pinakamabisang paraan upang maiwasan o mabigyang lunas ito. Kumain ng mga pagkain na mataas sa iodine tulad ng mga lamang dagat, itlog, patatas, prutas at ilang mga dairy products.

Gayunpaman, kapag nakaranas ng sintomas sa ganitong sakit, huwag isawalang bahala at kumonsulta sa doktor para agarang malunasan ang naturang sakit upang hindi na ito lumala pa.

Constipation: Ano nga ba ito?

by

Maaaring makaramdam ng discomfort o pananakit sa ibang parte ng tiyan ang isang indibidwal kapag inaatake ng constipation.

 

Ni: Shane Elaiza Asidao 

ANG constipation o pagtitibi ang kalimitan nating nararanasan na sakit sa ating digestive system. Nakakaranas ang isang tao ng matigas na dumi, hirap na paglabas ng dumi o hindi regular na bowel movement dulot ng naiprosesong sobrang tubig ng colon mula sa kinain.

Kasama sa mga sintomas ng pagkakaroon nito ang pakiramdam na bloated ang tiyan, matigas na stools, pananakit ng tiyan sa ibang parte at hirap na paglabas ng dumi. Nagkakaroon ng rectal bleeding dahil sa matigas na dumi.

Nagmumula ang Constipation sa kakulangan sa fiber at tubig sa katawan na nakakatulong upang magkaroon nang maayos na bowel movement. Ayon sa artikulo ng ritemed ilan sa mga dahilan nito ang mga sumusunod:

  • Stress
  • Mga gamot na ininom para sa pain gaya ng narcotics at ibang antidepressant
  • Pagpigil sa pagbabawas
  • Labis na paggamit ng laxatives
  • Intake ng ibang antacid na mayroong calcium o kaya naman ay aluminum
  • Pagbubuntis
  • Aging

Malaking epekto rin ang pagkain ng labis na dairy products katulad ng tsokolate, ice cream, keso at gatas. Kabilang na rin ang pag-inom ng kape at alak sa dahilan ng pagkakaroon ng constipation.

Gayunpaman, ayon sa artikulo ng webmd, mayroong mga paraan upang ma-iwasan at malunasan ang Constipation:

  1. Dagdagan ng dalawa hanggang apat na baso ang iniinom na tubig araw-araw.
  2. Ugaliing kumain ng prutas at gulay.
  3. Subukan uminom ng maligamgam na tubig tuwing umaga.
  4. Huwag pigilan ang pagbabawas ng dumi.
  5. Maging mas active sa physical activities dahil kapag aktibo ang mga muscles sa katawan, gayundin ang mga muscles sa iyong bituka.

Hindi man seryoso ang sakit na constipation, kailangan pa ring maging ma-ingat upang hindi makaramdam ng discomfort na maaaring makaapekto sa pang araw-araw na gawain. Dagdag pa, makabubuti rin na panatilihing malusog at masigla ang katawan nang sa gayon hindi ito pagmulan ng seryosong karamdaman.

Magandang Dulot ng Siling Labuyo

by

Bukod sa pagpapagana sa ating pagkain, ang siling labuyo ay marami ring naibibigay na benepisyong pangkalusugan.  

 

Ni: Shane Elaiza Asidao

ALAM niyo ba na sa kabila ng anghang na taglay ng siling labuyo, maraming makukuhang benepisyo mula rito? Galing sa prutas ng Capsicum pepper plant, isa ang siling labuyo sa popular na sangkap sa ating mga lutuin. Dahil karamihan sa atin ang mahilig sa maanghang na pagkain, kadalasang mayroong suka na may siling labuyo na sawsawan sa hapag kainan.

Ayon sa mga eksperto, ang siling labuyo ay nagtataglay ng mga bitamina at mineral tulad ng  Vitamin A, C, folic acid, fiber at potassium na mabisang panlaban sa iba’t-ibang uri ng sakit.

Maliban sa mga bitamina na mayroon ito, nakakatulong din ang pagkonsumo ng siling labuyo sa mga sumusunod:

Nagbibigay sigla sa puso

Base sa artikulo ng Pepperhead, pinipigilan nito ang anumang uri ng sakit sa puso dahil may kakayahan itong magpababa ng blood serum cholesterol at binabawasan nito ang deposito ng lipids, dahilan para maiwasan ang pagbara ng dugo sa puso.

Pagbaba ng timbang

Ayon naman sa website ng ‘Risingsunchatsworth.co.za’, dahil sa init na binibigay ng pagkain ng siling labuyo, nakakatunaw ito ng calories sa katawan na magreresulta sa pagbaba ng timbang.

Nagbibigay lunas sa pamamaga o inflamation

Dagdag pa ng website, isa ang capsaicin sa mga sangkap na mayroon ang siling labuyo. Ayon sa ilang pagsusuri, epektibo itong gamot sa sensory nerve fibre disorders kasama na ang sakit na dulot ng arthritis, psoriasis, at diabetic neuropathy.

Karagdagan pa, dahil ang capsaicin ay nagsisilbing anti-oxidant at anti-inflammatory substance sa katawan, may ilang pagsusuri na nagsasabing nilalabanan nito ang sakit na kanser. Halimbawa na lamang, pinipigilan nito ang paglaki ng prostate cancer cells at epektibo rin para labanan ang breast at pancreatic canser.

Epektibong paraan ng paggamit ng lotion

by

lotion

Maraming Pilipino ang gumagamit ng kung anu-ano para lamang luminis at kuminis ang balat sa mukha mula sa pimples.

 

Ni: Shane Elaiza Asidao

Ang regular na paggamit ng lotion ay mahalaga rin para maiiwasan ang skin irritation na resulta ng pagkatuyo ng balat.

Ngunit para higit na maging epektibo at kapaki-pakinabang ang paggamit nito, nararapat din na alamin natin ang wastong paggamit nito at kailan ito gagamitin.

Mayroong naglalagay ng lotion tuwing umaga lamang, mayroon namang sa gabi o sa kahit anong oras sa buong maghapon.

Ngunit, tuwing kailan nga ba mas mainam maglagay ng lotion?

Ayon kay Dr. Michael Kaminer, isang board-certified dermatologist at consultant ng skincare.com, mas epektibo mag­lagay ng lotion matapos maligo, kapag basa ang balat o kapag hydrated na ito. Gayunpaman, ayon sa skincare.com, hindi lamang sa gabi o araw dapat maglagay ng lotion kundi kaila­ngan mas maraming beses sa isang araw para mapanatiling moisturized ang balat at upang maiwasan ang ilang skin problems hatid ng pang-araw-araw na gawain.

Karagdagan pa rito, anila, gumamit din ng lotion matapos mag-ahit para maiwasan ang dryness o pagkatuyo ng balat at para gumaling ito mula sa pagkairita ng balat mula sa razor na ginamit.

Maaari rin magpahid ng lotion sa gabi bago matulog dahil hindi lamang nakaka-relax ang paglalagay ng lotion kundi mananatili ring hydrated ang balat habang ikaw ay natutulong nang sa gayon ay matulungan itong mag rejuvenate.

Tandaan lamang na suriing mabuti ang lotion na gagamitin at huwag basta basta bibili ng anumang produkto. Humanap ng hiyang sa iyong balat at mainam din na humingi ng opinyon mula sa lisensyadong dermatologist.

Mga Pagkain na dapat limitahan upang maka-iwas sa gallstones

by

Pagkain

Karaniwan na nagkakaroon ng gallstones ay mga kababaihan

 

Ni: Shane Elaiza Asidao

MARAMI sa atin ang hilig kumain.  Minsan, hindi natin namamalayang nakakasama na ang ating mga kinakain.  Ilan sa mga ito ang nakakasama sa ating gallbladder o apdo.

Ang apdo ay isang hugis peras na organ.  Kinokolekta at iniimbak nito ang mga bile na nakakatulong upang tumunaw ng taba.

Gallstones ang karaniwang problema sa apdo.

Ayon sa Webmd, puwedeng panggalingan ng abdominal pain, bloating, masamang pakiramdam at pagsusuka.  Kapag ang sintomas ay napapadalas o pabalik-balik, ang pinaka mabisang lunas ay operasyon para alisin ang mismong apdo.  Ngunit kahit walang sintomas ng sakit, hindi natin malalaman kung nangangailangan na ito ng agarang lunas.

Maaaring namamana ang sakit sa apdo.  Gayunpaman, ang karaniwan na nagkakaroon ng gallstones ay ang mga babae na nasa edad 40 pataas kasama na rin ang mga babae na mabilis magpapayat, umiinom ng hormonal medicines, o kahit ang mga babaing may malusog na pangangatawan.  May tsansa rin na tamaan ng sakit sa apdo ang kalalakihan.

Ilan sa mga pagkain na ito ang dapat limitahan para maka-iwas sa gallstones:

  • Piniritong pagkain
  • Mga prinoseso na pagkain (doughnuts, pie, cookies)
  • Whole-milk dairy products (keso, sorbetes, mantikilya)
  • Mga karne na may taba

Samahan din ito ng healthy diet at regular exercise.

Hindi man natin alam kung kailan tayo dadapuan ng sakit, mas maigi na maging handa at patuloy na alagaan ang sarili.  Dahil ang kalusugan ay kayamanan.

Mga hakbang sa pagpapanatili ng negosyo

by

Ni: Shane Elaiza Asidao

SA pabago-bagong panahon, sumasabay din ang takbo ng ekonomiya ng bansa. Nagbabago ang presyo ng bilihin sa merkado at hindi sigurado ang magiging tadhana ng iyong bukas sa pinapasukang trabaho.

Kaya karamihan sa atin ang naiisipan magtayo ng sariling negosyo.

Ayon sa datos na naitala ng “University of Phoenix”, mayroong 63 porsyento ng mga nasa edad 30 pababa ang nagpapatakbo o gusto magtayo ng sariling negosyo.

Malaki ang naitutulong sa atin ng pagbuo nito. Ngunit, paano mo mapapanatili ang iyong naitayong negosyo?

 

Mula sa isang ‘wholesaler’ ng sari-sari store

Ayon kay Fely Pastoral, may-ari ng isang “wholesaler” na sari-sari store, nagsimula lamang sila sa pagtitinda ng bigas hanggang sa umabot na sa pagiging wholesaler. Naging kuhaan na sila ng mga tinitinda sa ibang mga sari-sari store at nakapagtayo na rin sila ng iba pang tindahan.

Aniya, hindi niya akalain na aabot sila sa pagiging “wholesaler”

“Actually, bigasan lang talaga ang planong business. Eh, since maghapon din naman na nakabantay, naisip na rin na magdagdag ng ibang paninda,” kwento ni Fely.

Ngunit, dahil marami ang kalaban sa negosyo, hindi rin maiiwasan ang pagbaba ng kita. Gayunpaman, hindi ito naging hadlang para bumagsak ang kanilang tinayong negosyo. Ayon kay Fely, umaabot sa mahigit 70,000 ang kinikita nila sa isang araw.

“Lakas ng loob lang. Maging risk taker ka dapat at maging ready sa resulta at umiwas sa utang.”

Walong taon na ang kanilang negosyo na patuloy pa rin ang paglago sa kabila ng problema.

 

‘Passion’ na naging Propesyon

Hindi lahat pinapalad maging trabaho o negosyo ang kanilang talento dahil karamihan sa atin ang nagtiya-tiyaga sa kung alin ang makapagbibigay ng pagkain sa hapag kainan.

Gayunpaman, may mga sumubok at tumaya upang makamit ang pangarap na negosyo. Gaya na lamang ni James Bryan Ona, isang propesor sa unibersidad at kilala bilang propesyunal na photographer. Tinaya niya ang kanyang buhay makamit lamang ito.

Aniya, hindi madali pasukin ang industriya ng photography dahil hindi araw-araw may magpapakuha ng litrato. Ngunit, dahil sa sipag at tiyaga, nakabuo siya ng magandang pangalan sa indrustiyang ito.

Kwento ni James, “In my experience, pinakaimportante yung meron ka dapat ng lakas ng loob. Hindi kasi araw-araw may shoot eh. Pero positibo ako palagi kaya minsan once a week lang pero kadalasan 5 to 10 days straight meron akong shoot depende sa client o project.”

“Magset ka ng goals. Dapat may direksyon na pupuntahan ang negosyo mo,” wika niya, “Hindi ka pwedeng matapos sa iisang ideya lamang. Mahalaga na habang lumalago ang negosyo mo ay sabay mong pinaplano yung mga susunod pang pagpapaunlad dito at pagbibigay sa mga existing clients ng higit pa sa kaya mong ma-ideliver.”

Marami sa atin ang nagdadalawang isip pasukin ang gusto natin maging propesyon dahil iniisip natin na wala itong kikitain o pupuntahan. Gayunpaman, kailangan natin sumubok upang malaman natin ang magiging resulta nito.

Ayon kay James, kailangan alamin ang kahinaan at kakulangan ng “services” na binibigay ng negosyo sa ating mga kliyente. Panatilihin ang magandang relasyon at huwag hahayaan na mawalan ng komunikasyon sa kanila paminsan-minsan. Bukod sa mga teknikal na detalye, mahalaga rin na pangalagaan ang iyong sarili lalo na ang pisikal na aspeto. Dapat manatiling malusog. Mag-ehersisyo at kumain ng tama para habang lumalago at lumalaki ang negosyo, hindi mahirap pamahalaan at sabayan ang paglago nito.

Payo naman ni James sa gustong pumasok sa industriya ng photography, “Have a positive mental attitude. Dapat palagi kang nasa positive side kahit anong mangyari sa negosyo mo.”

 

Negosyo ng isang Pamilya

Mula sa isang bigasan owner na naging sari-sari store “wholesaler” at sa isang talento na naging propesyon, mayroon naman na negosyong pinapatakbo ng isang pamilya.

Mahirap pamahalaan ang negosyo lalo na mayroon kang iniintinding personal na bagay. Gaya na lang ng pagkakaroon ng pamilya. Ngunit, hindi ito naging hadlang sa pamilya Lawas. Naka-isip sila na magtayo ng negosyo na sila rin mismo ang magpapatakbo nito.

Mayroon silang “vacation house” sa Tagaytay na may pangalang “Enchante Farm”.

Ayon kay Mark Lawas, isa sa may-ari ng negosyo at mismong taga-advertise nito, nagsimula lamang sa bakanteng lote ang nasabing bahay bakasyunan. Dahil maraming mamahaling “hotel” sa Tagaytay, naisip nila na magtayo ng matutuluyan ng mga turista o mga nagbabakasyon sa murang halaga na puwede umokupa ng malalaking grupo.

Marami ang puwedeng gawin sa nasabing bahay bakasyunan gaya ng pangingisda, “swimming”, at iba pang “leisure area”.

“Nakatulong sa amin ang networking style kumbaga once nasiyahan na ang client, ishe-share niya iyon sa friends or family and ganun  na rin ang mangyayari na once na napuntahan nila, customers mo na ang mismong mag-advertise sayo,” kwento ni Mark.

“Basta maganda ang service o accommodation ang ibibigay mo.”

Mahirap panatilihin ang ganitong klase ng negosyo dahil na rin sa mga nagsulputan na “vacation house” o mga “hotel”. Ngunit, ayon kay Mark, kailangan mo i-analyze mabuti ang factors kung paano makakakuha ng customers at kung paano matataasan ang iyong mga kalaban sa negosyo.

Dagdag pa aniya, “Innovate. Provide mo ‘yung wala sa ibang vacation house para puntahan ka. At dapat reasonable price rin ‘yung promos mo especially sa hindi peak season. And identify mo ‘yung trending na hinahanap ng community ngayon.”

Maraming daan ang puwede mong subukin upang mapalago at mapanatili ang iyong negosyo. Gaya nga nila Fely, James at Mark na may iba’t ibang uri ng pinapatakbong negosyo, sipag, tiyaga, pakikisama at pagiging responsable sa mga customers o kliyente ang dapat na isaalang-alang.

Gayunpaman, samahan mo lagi ito ng tiwala sa sarili at higit sa lahat pananalig sa Diyos dahil ito ang pinaka mabisang sangkap sa pagpasok at pagpapanatili ng kahit anong klase ng negosyo.

Close Bitnami banner
Bitnami