PINAS

Ang Lihim ng Panginoon (Ikapitong Bahagi)

Sonspeak

Recent News:

University of the Philippines

Dapat na bang gawing legal ang marijuana?

by

Sa gitna ng umiiral na War on Drugs ng pamahalaan, pabor naman ang Duterte administration na gawing legal ang medical marijuana sa bansa.

 

Ni: Quincy Joel Cahilig

NAGING laman ng mga usap-usapan ang isa na namang kontrobersyal na pahayag ni Pangulong Rodrigo Duterte na  gumagamit siya umano ng marijuana upang mapanatili ang kanyang enerhiya sa gitna ng kanyang hectic schedule.

“It’s a killing activity and I think the… my age, ako hindi masyado kasi nagma-marijuana ako eh para magising. Sa iba, hindi na kaya,” wika ni Duterte sa kanyang talumpati sa pagbibigay parangal para sa ASEAN National Organizing Committee, na ginanap sa Malacañang kamakailan.

Nguni’t pagkatapos ng okasyon agad ipinaliwanag ng Pangulo sa media na ang kaniyang pahayag ay isa lamang biro para hindi mabagot ang audience.

“It was a joke, of course it was a joke. Pero nobody could stop me from just doing my style. Minsan sabi ninyo misogynist ako kasi magbiro ako ng ganun, that’s my style it’s too late to change. If I want to joke, I will joke,” aniya.

Sa kabila nito, marami pa rin ang nagulat, nabahala, at bumatikos sa birong ito ng Pangulo, na kilala sa kanyang mahigpit na kampanya laban sa ipinagbabawal na gamot, na kinabibilangan ng marijuana.

Kasama si opposition lawmaker Gary Alejano sa mga hindi natawa sa marijuana joke ni Duterte. Aniya, “insensitive” ang mga pahayag ng Pangulo sa isang sensitibong isyu na nababalutan ng mga alegasyon ng extra judicial killings, na ibinibintang sa war on drugs ng pamahalaan.

“If you are making a joke of an issue that has cost the lives of thousands of people in your drug war, then what does that say? You also treat peoples’ lives as a joke,” sabi ni Alejano.

Sa isang banda, binuhay ng joke ng Pangulo ang usapin kung dapat na nga bang gawing legal ang marijuana sa bansa.  Ayon sa Malacañang, pabor naman talaga si Pangulong Duterte sa legalization ng marijuana para gamitin na panggamot.

“Well, the President already made a statement on that prior. He said for purposes of medicine to heal, he’s in favor, but not for use other than that,” pahayag ni Presidential Spokesperson Salvador Panelo sa mga kawani ng media.

“There have been researches. In fact, in some countries, marijuana is legalized. Canada. In fact, in some states in the US, it is used there. But it is controlled, regulated. The President is for that,” binigyang diin pa ni Panelo.

 

ANG MGA BENEPISYO NG MARIJUANA

Sa loob ng 3,000 taon, marami ang gumagamit ng marijuana, o kilala din sa tawag na cannabis, para sa iba’t-ibang health purposes. Ayon sa medical information website na WebMD, ginagamit ang naturang halaman para makatulong sa pag-relax at bilang pain reliever. Nakakatulong din umano ito na mabawasan ang pagkahilo ng mga pasyenteng sumasailalim sa chemotherapy.

Base sa isang global drug report ng United Nations noong 2012, tinukoy ang marijuana bilang “world’s most widely produced, trafficked, and consumed drug in the world in 2010.”  Bagama’t illegal sa maraming bansa, umaabot umano sa 224 milyong adults (18 taong gulang pataas) ang gumagamit nito.

Subali’t hindi pa rin inaaprubahan ng U.S. Food and Drug Administration ang paggamit ng marijuana plant para sa health treatment kahit na legal ito sa 33 states.

Pinapayagan naman ng FDA ang paggamit ng substance mula sa halaman na cannabinoids bilang gamot sa seizures sa mga pasyenteng may matinding epilepsy, at treatment para sa loss of appetite and weight ng mga AIDS patients.

Isabela Representative Rodito Albano 

 

Dahil sa mga health benefits ng tamang paggamit ng marijuana, isinusulong ni Isabela representative Rodito Albano ang pag-legalize ng medicinal use ng cannabis sa bansa sa kanyang House Bill 6517 o Act Providing Filipinos Right of Access to Medical Marijuana.

Para sa naturang mambabatas, “long overdue” na ang pagpasa ng naturang panukala na malaki umano ang maitutulong para sa mga pasyenteng may malubhang karamdaman tulad ng cancer. Kaya nananawagan siya sa kaniyang mga kapwa mambabatas at sa publiko na buksan ang kaisipan para sa naturang hakbang.

“Thousands of patients in the country are suffering from serious and debilitating diseases and they need this. We don’t have to put them in jeopardy,” sabi ni Albano.

Aniya pa, tinitiyak din sa kanyang panukalang batas ang mahigpit na control provisions para maiwasan ang pang-aabuso sa cannabis sa pamamagitan ng pagtatatag ng Medical Cannabis Regulatory Authority na tutukoy kung sino-sinong mga pasyente ang nangangailangan ng naturang paraan ng treatment.

Senate President Vicente Sotto III 

 

PANUKALA NI ALBANO, DEHADO?

Bagama’t maganda ang layunin ng house bill ni Albano, mariing tinututulan naman ito ng Technical Working Group on Medical Cannabis Legalization at faculty members ng University of the Philippines Manila dahil maaari nitong maisapanganib ang kalusugan ng publiko.

Kinikilala ng grupo ang medicinal properties ng marijuana, nguni’t di ito sang-ayon sa pagtatatag ng Medical Cannabis Study Group na nakasaad sa panukala. Dapat na ang Dangerous Drugs Board umano ang magre-regulate ng medical cannabis alinsunod sa batas, at upang matiyak na maiiwasan ang paglusot ng paggamit ng marijuana sa maling paraan.

Samantala, “dead in the water” para kay Senate President at dating Dangerous Drugs Board head Vicente Sotto III ang panukalang gawing legal ang cannabis dahil labag ito sa UN treaty.

Mapipigilan nga ba ang fake news?

by

Ni: Quincy Joel V. Cahilig

ANIMO`Y totoo, ngunit hindi. Itsurang “orig”, yun pala “japeyks.  Isang katotohanang di natin mape-peke na sanay na tayong mga Pilipino makakita ng ganito.

Tumungo lang sa mga pa­mi­lihan at mga lansangan, at makakakita ng maraming peke: pekeng relo, pekeng sapatos, pekeng damit, pekeng dokumento, pekeng cellphone, at maging bigas, may peke din umano. At kahit ilang kampanya kontra sa mga ganitong uri ng produkto ang gawin, laganap pa rin ito.

Ngayon, isang uri ng peke na naman ang di mapigilan ang pagkalat. At tulad ng maraming pekeng produkto, ito’y mapanganib. Ito ay ang fake news o disinformation. Animo’y totoong balita pero hindi pala, na naglalayong makaimpluwensya at kumondisyon ng isipan.

At tulad din ng sa mga pekeng produkto, madami din ang tumatangkilik at nagpapakalat nito, lalo na sa mga social media sites tulad ng Facebook.

Kaya naman itinuturing ngayon na isang mabigat na isyu ang fake news dahil maraming Pinoy internet users­ ang exposed dito. Sa huling survey ng Social Weather Stations, 67 porsyento ng mga Pilipinong gumagamit ng internet ang naniniwala na ang kalaganapan ng fake news sa online sites ay seryosong pro­blema. Tignan lang ang mga awayan sa mga comments sa iba’t-ibang news sites, makikita ang epekto ng pekeng balita sa takbo ng isip ng mga tao.

Hindi naman na bago ang ganitong klase ng mga propaganda. Panahon pa ng mga Kastila, Hapon, at Martial Law ay may fake news na. Ang kaibahan lang sa kasalukuyan, mas mabilis na itong kumalat dahil mas “high-tech” na ang komunikasyong ngayon.

Sa katunayan, matagal nang ipinagbabawal ng batas ang pagpapalaganap ang naturang gawain. Sa ilalim ng Revised Penal Code, may kaukulang parusa ang “unlawful use of means of publication and unlawful utterances”, subalit marami pa rin ang tahasang lumalabag dito. Kaya noong Setyembre 2017 nilagdaan ni Pangulong Rodrigo Duterte ang pagtataas ng multa sa mga magpapalaganap ng fake news: mula sa PHP 200 hanggang PHP 1,000, itinaas ang multa sa P40,000 hanggang P200,000. Maari din makulong ng isa hanggang anim na buwan.

Pero matapos ang siyam na buwan, nananatili pa ring isang malaking hamon ang disinformation.

Batas kontra fake news, epektibo kaya?

Nakahain at tinatalakay ngayon sa Senado ang Senate Bill No. 1492 o Anti Fake News Act of 2017 na inihain ni Senador Joel Villanueva. Kung tuluyan itong maisasabatas, papatawan ng mabigat na multa ng PHP 100,000 hanggang PHP 5,000,000 at pagkakulong ng isa hanggang limang taon sa sinomang mapapatunayang malisyosong gumagawa at nagpapalaganap ng pekeng balita. Dobleng parusa naman kung ang offender ay isang public official.

Naniniwala si Presidential Spokesperson Harry Roque na labag sa Saligang-batas ang pagkakaroon ng anti-fake news law dahil maari itong magamit sa pagsikil sa kala­yaan ng pamamahayag at sa panggigipit sa oposisyon.

“Ang tanong ko sa inyo, ang matataas ba na kakampi ng administrasyon lilitisin kapag sinabing sila ay lumabag dito? Chances are sa ating kasaysayan, baka kapag ikaw malapit sa gobyerno, hindi ka lilitisin,” wika ni Roque sa isang pagdinig sa Senado kamakailan.

“Together with the vagueness of the definition, ang ma­kakasuhan lang dito ay ‘yung mga taong gobyerno na kalaban ng administrasyon,” dagdag niya.

Ngunit nilinaw ni Roque na hindi polisiya ng Duterte Administration ang pagpapalusot sa mga kaalyado at panggigipit sa oposisyon.

“It’s a possibility po, please, I was just illustrating why this law is unconstitutional. If you violate the fundamental freedom of expression, it could be used as a tool for persecution against the opposition,” “It’s a possibility, but I’m not saying that it’s the policy of the Duterte administration,” paliwanag niya.

Halos ganito rin ang pananaw ng University of the Philippines professor at batikang journo na si Luis V. Teodoro. Aniya, hindi makakatulong ang pagkakaroon ng batas kontra fake news at gagawin lamang nitong mas kumplikado ang problema.

“False and misleading information can be spread either unintentionally and in good faith, or maliciously for a predetermined purpose. Whether a news report was meant to sow hatred, panic, chaos, etc. can be extremely difficult if not impossible to establish. If in the aftermath of a news report in print, or a Facebook entry, a series of violent incidents occurred, how certain can anyone be of a causal connection between those incidents and the reports themselves?” sabi niya sa kaniyang blog.

“Equally problematic is the question of who, or what authority or agency will decide that a report, a news analysis or commentary in print, radio, television, in social media, a blog, or a news site, is fake news,” dagdag ng eksperto.

Edukasyon ang solusyon

Naniniwala si Kabataan party-list Rep. Sarah Elago na media literacy ang mas epektibong sandata sa pagsugpo sa pagkalat ng fake news, kaya inihahanda niya ang isang panukalang batas na magsusulong nito sa buong bansa.

Aniya, tila isang mahirap na problema ito dahil patuloy ang pagdami ng mga online trolls at iba pang mga mekanismo na walang ibang layunin kundi magpalaganap ng maling balita, kaya dapat armahan ng wastong edukasyon kontra disinformation.

“Media literacy is not usual­ly provided as a subject in schools. And if there is one, the curriculum treats an individual as a passive receiver of information given by media, obviously ignoring the role of an individual as a contributor to media, especially online,” sabi ni Elago.

Samantala, inilunsad naman ng Presidential Communica­tions Office (PCOO) ang Provincial Communications Officers Network (PCONet).

Ayon kay PCOO Secretary Martin Andanar, layunin ng naturang programa na tulu­ngan ang pamahalaan na turuan ang mga tao na tukuyin at kontrahin ang fake news at disinformation, na banta umano sa demokrasya at ma­ging sa ekonomiya ng Pilipinas.

Naniniwala si Andanar, na isang beteranong brodkaster, na ang pagpapalaganap ng totoong impormasyon ay serbisyo para sa bansa.

Aniya, gagamitin ng PCOO ang mga media outlets ng pamahalaan tulad ng Philippine Information Agency, Philippine News Agency, Radyo Pilipinas, People’s Television Network at mga online platforms ng gobyerno para labanan ang fake news.

Ipinunto niya na namuhunan ng malaki ang gobyerno sa pagmodernisa ng mga plataporma at equipment, na siyang gagamitin upang maiparating ang tamang impormasyon sa malalayong mga lugar sa bansa sa tulong ng mga local government units.

Bernadette Romulo-Puyat bagong DOT secretary

by

Ni: Melrose Manuel

“just don’t be corrupt.” Ito ang naging kautusan ni Pangulong Rodrigo Duterte matapos tanggapin ni Department of Agriculture Undersecretary Bernadette Romulo-Puyat ang bagong posisyon bilang Department of Tourism (DOT) secretary.

Hindi raw ito makapaniwala matapos siyang sabihan na siya ang hahalili kay Wanda Tulfo Teo na nagbitiw sa kanyang posisyon dahil sa kontrobersiyal nitong hinaharap.

Nababagay umano si Pu­yat sa nabakanteng posisyon dahil malinis ang kanyang record sa nagdaang 12 taon nitong paninilbihan sa gobyerno.

“Your credentials speak for itself” ang sabi ng pangulo.

Mga naging posisyon ni Puyat

Nagsimulang naglingkod sa gobyerno si Puyat bilang isang deputy cabinet secretary sa presidential management staff noong administrasyon ni Pangulong Arroyo.

Sumunod nitong katungkulan ay sa Department of Agrarian (DA), isa siyang undersecretary in-charge sa mga post-harvest facilities at rural credits noong si Athur Yap pa ang agriculture secretary.

Naging undersecretary din ito for women’s farmers, gender and development, at indigenous tribes and youth.

Iiwanan naman niya ang kanyang pagiging undersecretary for agribusiness and marketing ng DA upang gampanan ang bagong ipinagkatiwala sa kanya ng pa­ngulo sa ahensya ng DOT.

Plano sa DOT

Walang pinagkaiba ang da­ting trabaho ni Puyat sa DA at sa DOT dahil palagi nitong nakakatrabaho ang nasabing ahensya at marami na rin silang joint project gaya ng madrid fusion at agri-tourism kung saan ay ipinapakilala ang mga lokal na produkto sa buong mundo.

Samantala, pag-aaralan muna ni Puyat ang plano at kontrata ng DOT sa pamamahala ni Teo. Hindi rin muna ito magbibigay ng reaksyon sa mga proyekto na nasimulan ng dating kalihim. Kasama na rito ay ang isinusulong na muling pagho-host ng bansa para sa Miss Universe Pageant.

Isa umano sa magiging proyekto nito ang pagpapa­tuloy na pagsulong sa pagkaing Pinoy na nasimulan na niya sa ilalim ng DA. Ito ay dahil limitado lamang ang ginagawang proyekto ng gobyerno na may kinalaman sa mga pagkaing espesyal ng Pinoy.

Gagamitin umano nito ang kanyang natutunan bilang undersecretary sa DA para pamahalaan ang DOT bilang paunang programa nito sa kanyang bagong posisyon.

Aminado naman ito na marami rin itong hindi nalalaman na hindi kaugnay sa pagkain kaya handa naman itong makinig sa plano para sa mga kasalukuyang programa.

Isusulong din umano nito ang paglimita sa pagdagsa ng mga turista sa bawat tourist destination ng bansa.

Tiwala ng mga senador kay Puyat

Malaki ang tiwala ni Pa­ngulong Rodrigo Duterte kay Puyat. Suportado naman ng ilang mga senador ang pagtalaga sa kanya. Kilala na isang matapat sa gobyerno ang pa­milya nito kaya’t inaasahan din na maging matapat din si Bernadette.

“Excellent choice” ganito ini­larawan ni Senador Grace Poe ang ginawang pag-appoint­ kay Puyat. Subok na umano si Puyat bilang isang public official buhat pa sa nakaraang administrasyon. Na­niniwala rin ang senadora na malaki ang kakayahan ng bagong kalihim na maiangat ang turismo ng bansa.

Natitiyak naman ni Senador Majority Leader “Tito” Sotto III na hindi magkakaroon ng problema ang kalihim kapag haharap na ito sa Commission on Appointment (CA). Matagal na nitong ka­kilala na may malinis na record sa paninilbihan sa pamahalaan.

Samantala, kampante naman si Senador Ralph Recto na magagampanan ni Puyat ang kanyang magiging responsibilidad sa DOT. Aniya nakayanan nitong gawin ng maayos ang trabaho nito sa ibang departamento kaya aasahan din umano na marami itong magagawa sa ikakaunlad ng turismo kasabay ng paglago ng ekonomiya sa bansa.

“She has good academic credentials and is very qualified to be the secretary of tourism” ani Recto.

Sino si Bernadette

Laging pinapansin ni Pa­ngulong Duterte si Bernadette Romulo-Puyat sa tuwing nagkakaroon sila ng pagpupulong. Ito ay dahil sa malinis na pagganap nito sa kanyang tungkulin sa kanyang mga nagdaang posisyon.

Byuda ni Atty. Dave Pu­yat si Bernadette kunsaan sa edad na 40 ay pumanaw si Dave noong 2010 dahil sa heart attack. Nanggaling rin ito sa pamilya ng pulitiko na kilala at nirerespeto ng sambayanan.

Anak siya ni dating Senador at Foreign Affairs Secre­tary Alberto G. Romulo. Ka­patid naman siya ni dating kongresista ng Pasig City Roman T. Romulo. Apo naman siya ng dating presidente ng United Nations General Assembly Carlos P. Romulo.

Nakapagtapos din ito bilang Cum Laude ng BS economics sa University of the Philippines.

Puyat kawalan sa DA

Kawalan sa Department of Agriculture ang pagkaluklok ni Puyat na bagong Secretary ng Department of Tourism dahil marami itong maiiwanang trabaho sa departamento.

Isang mapagkatiwalaang public official si Puyat at na­ngunguna sa mga gawaing pang agrikultura.

“She is a loss to the DA, especially in our marketing advocacies” ito ang komento ni Agriculture Secretary Emmanuel Piñol. Wala naman daw pinag-usapan sa cabinet meeting kaya nagulat daw ito nang malaman ang pagtalaga ng pangulo kay Puyat.

Gayunpaman, masaya naman ang buong departamento ng DA sa bagong posisyon ni Puyat at naniniwala ang mga ito na magampanan nito ng maayos ang DOT.

Sinabi rin ni Piñol na mas mapapaigting ngayon ang joint program ng DOT at DA sa pagpa-angat ng farm tou­rism at agri-tourism.

Ibibigay naman ang naiwanang trabaho ni Puyat kay DA secretary for policy and planning Segfredo Serrano hinggil sa rice importation. Namamataan naman na hahalili si Jose Gabriel La Vina bilang DA undersecretary.

Benham Rise, Tagong Yaman Sa Pilipinas Na Pinag-aaralan Ng Pinoy

by

Ni: Kristin Mariano

UMALMA ang maraming Pilipino sa pagpayag ng administrasyong Duterte sa mga Chinese researchers na magsagawa ng pagsasaliksik sa Benham Rise sa karagatang Pasipiko malapit sa lalawigan ng Isabela. 250 kilometro lamang ang layo ng Benham Rise sa Pilipinas at nasa ilalim ito ng Exclusive Economic Zone ng bansa. Ang pagkadismaya ng mga Pinoy ay nag-ugat sa pag-angkin ng China sa mga isla at karagatan sa West Philippine Sea. Ang Benham Rise ay nasa silangang bahagi ng Pilipinas at higit na mas malayo sa China.

Tila pinagnanasaan ng China ang Benham Rise na hitik sa yamang dagat at mineral. Sinasabing mayaman ang Benham Rise hindi lamang sa isda pati na rin sa natural gas na maaaring pagkunan ng enerhiya. Hinala ng marami na ito ang habol ng China sa paggalugad sa lugar na nangangailangan ng resources para suportahan ang bilyon-bilyon nitong residente.

Dapat ba natin itong ikabahala? Nakasaad sa Saligang Batas ng Pilipinas na dapat protektahan ng gobyerno ang teritoryo ng bansa. Ayon kay Roilo Golez, dating National Security Adviser, ang pagpayag sa Tsina na pasukin ang lugar ay maaaring pagpapahayag ng kanilang presensya sa Pasipiko na dinodomina ng US at Japan. Dagdag pa ni Goilez na naghahanap ang China ng “thermocline,” lugar sa ilalim ng dagat kung saan biglang nagbabago ang temperatura at kung saan nakakagalaw ang mga submarine.

Mahigpit na kalaban ng Pilipinas ang China sapagkat iginigiit ng China ang kanilang nine dash line na argumento sa pinag-aawayang West Philippine Sea. Kabilang sa inaangkin ng China ang ilan sa mga isla sa Spratlys, at madalas narin mamamataan ang mga barko ng Chinese sa karagatan sa kanlurang bahagi ng Pilipinas.

Anong meron sa Benham Rise?

Natuklasan ng DENR na may malaking deposito ng methane hydrates o tinatawag din na methane ice sa Benham Rise. Sinasabing maaaring magpayaman sa bansa ang mga depositong ito bilang natural gas exporter. Ang natural gas ay ginagamit para mag-produce ng enerhiya. Ang eksatong laki ng deposito sa Benham Rise ay hindi pa nasusukat hanggang ngayon dahil sa sinabi ng Department of Agriculture na mas makabubuting huwag nang magsagawa ng oil exploration sa Philippine Rise at sa halip ay ireserba ang yamang-tubig nito para sa seguridad sa pagkain ng Pilipinas.

Napakalawak ng mga lugar na pangisdaan sa Philippine Rise, kaya hindi dapat na makapanghimasok ang mga dayuhan sa napakayamang pangisdaan na sakop ng ating territorial waters. Ang mga Pilipinong angler ay tiniyak na maraming blue marlin, sailfish at iba pang malalaking isda na nahuhuli sa bingwit sa Philippine Rise.

Sa Pilipinas Ba Ang Benham Rise?

Ipinahayag ni Presidential Spokesman Harry Roque na hindi pag-aari ng Pilipinas ang Benham Rise. Kung tutuusin, may sovereign rights ang Pilipinas sa Benham Rise. Ang sovereign rights ay pinapayagan ang eksplorasyon, paggalugad, at pamamahala sa mga likas na yaman. Noong nakaraang taon, pinangalanan ang Benham Rise na Philippine Rise at idineklara ng United Nations noong 2012 na extension ito ng Pilipinas.

Ikinagulat din ng mga netizen ang sinabi ng palasyo na walang kakayahan ang Pilipinas at mga Pilipino na magsagawa ng pananaliksik sa Philippine Rise. Samantala, ilang taon ng pinag-aaralan ng mga Pilipinong eksperto ang lugar at mga yaman nito na maaaring magpayaman sa Pilipinas:

  1. Mula 2004-2008 at noong 2010, nagpadala ang National Mapping and Resource Information Authority ng DENR ng hydrographer na gumawa ng 3D digital bathymetric model ng buong rehiyon.
  2. Sa nakalipas na isang dekada, DA’s Bureau of FIsheries and Aquatic Resources ay nagsasagawa ng pananaliksik sa mga isda at mga ekspidisyon sa Benham Rise upang alamin ang mga potensyal ng katubigan at mga bagong species na naninirahan sa lugar.
  3. Noong 2014 at 2016, nag-organisa ang DOST, na sinuportahan ng DA-BFAR at sa partisipasyon ng University of the Philippines, De la Salle University, Silliman University at iba pang mga unibersidad, ng dalawang oceanographic research cruises sa Benham Bank – ang pinakamababaw na parte ng Benham Rise. Ang ikatlong cruise ay nakatakdang ganapin ngayong taon. Ang cruise ay binubuo ng mga scientists, marine science students, Navy and Coast Guard technical divers, and mariners. Sinuportahan ito ng Oceana, isang NGO na nagtataguyod ng konserbasyon ng marine resources sa pamamagitan ng pagpapahiram ng mga gamit at pagpapadala ng mga scientists at technical divers.
  4. Pinag-aaralan din ng UP National Institute for Geological Sciences and UP Marine Science Institute ang mga samples at observations na nakukuha mula sa mga nakaraang research.
  5. Sa pagtatangka na protektahan at pamahalaan ang Philippine Rise, ibinalita ng PINAS na may planong magtayo ng naval base sa Casiguran, Aurora malapit sa lugar upang magpatrolya sa mga nais manamantala

Ilan lamang ito sa mga proyekto ng pamahalaan at pribadong sektor sa patuloy na pagsasaliksik at paglinang ng Benham Rise. Marami pang mga nakalatag na proyekto para sa Philippine Rise ang mga Pinoy. Isang tanong ang mananatili, magiging hadlang ba ang pagpasok ng Chinese researchers sa mga planong ito?

University of the Philippines, pasok sa Top 1000 universities ng The World University Rankings

by

Tanging ang University of the Philippines (UP) lang ang nakapasok sa The Higher Education World University Rankings para sa taong 2018.

Mula sa 800 bracket noong 2017, nasa 600-800 bracket na ngayon ang UP batay sa survey na inilabas ngayong araw September 6.

Pumasa ang natatanging Unibersidad ng Pilipinas mula sa 13 performance indicators kabilang ang teaching, research, knowledge transfer, at international outlook.

Nakakuha ang UP ng over all 30.6 out of 100 points performance rating.

Samantala nangunguna pa rin sa listahan ng The World University Rankings ang University of Oxford, na sinundan ng University of Cambridge habang nasa ikatlong posisyon naman ang California Institute of Technology at Stanford University.

Nananatili namang nangunguna sa Asya ang University of Singapore na nasa ika dalawampu’t dalawang pwesto.

2016 bar examinations: Naglaho na ang Imperial Manila

by

NAKAGUGULAT ang resulta ng 2016 bar examination results na inilabas kamakailan lamang. Ito na ang may pinakamaraming bilang ng pumasa sa nasabing pagsusulit na umabot sa 59.06% na ibig sabihin ay 3,747 ang nagtagumpay mula sa 6,344 na aspirante. Pangkaraniwan sa bar exams ay 25%-30% lamang ang pumapasa taun-taon. Ang bar exams ay kaila ngang ipasa para ang nagtapos sa kursong batas ay maging ganap na abugado.

Maliban sa pinakamataas na bilang ng pumasa, ang higit na nakagugulat ay wala sa top ten ang anumang paaralan ng batas sa Metro Manila. Tuwing lalabas ang resulta ng bar exams ay pang karaniwan na ang lahat o mayorya ng nasa top ten ay mula sa paaralan ng batas sa Metro Manila tulad ng University of the Philippines (UP), Ateneo de Manila, San Beda at University of  SantoTomas (UST). Subalit sa 2016 bar exams ay walang isa man sa top ten ang nagtapos sa mga paaralan ng batas sa Imperial Manila. Humihingi ako ng paumanhin sapagkat may mga paaralang nasa top ten ang hindi ko alam na may ganoong paaralan at lalong hindi ko alam kung saan matatagpuan ang mga ito.

Ang numbers 1, 3, 7 at 8 ay mula sa San Carlos University. Ang numbers 2, 9 at 10 ay mula sa Silliman University. Tumabla sa number 3 ang mula sa Andres Bonifacio College. Ang number 4 ay mula sa University of San Agustin. Ang number 5 ay mula sa Ateneo de Davao University. Ang number 6 ay mula sa Northwestern University. Tumabla sa number 9 ang mula sa University of Batangas. Kitang-kita na ang labindalawang (12) nasa top ten ay walang mula sa College of Law sa Metro Manila.

In fairness sa mga paaralan ng batas sa Imperial Manila, maraming bagong abugado ang nagtapos sa mga ito. Subalit kung susuriing mabuti, marami sa mga mag-aaral ng batas ay mula sa malalayong probinsiya na nag-aral sa Metro Manila dahil (Sundan sa pahina 5) paniwala ay mas malaki ang pag-asang pumasa sa bar exams kapag sa mga ito nagtapos. Ngayon ay mababago na ang paniniwalang ito at maiisip na kahit saan ka pa nag-aral sa bansa ay pareho lang naman ang mga probisyon ng batas na pinag-aaralan. Dahil dito, asahan na ang bilang ng mga estudyante sa mga paaralan ng batas sa probinsiya ay tataas at bababa naman sa Imperial Manila.

Uso ang probinsiyano ngayon hindi lamang sa telebisyon.

Close Bitnami banner
Bitnami