US v. China: Showdown sa West PH Sea

Ni: Quincy Joel Cahilig

PATULOY ang pagtindi ng tensyon sa pagitan ng US at China, at ang umiinit na girian ng dalawang makapangyarihang bansa ay ramdam na ramdam na sa West Philippine Sea (South China Sea), na pinangangambahan ng ilan na maaring humantong sa isang military confrontation.

Sa ngayon, ang ekonomiya ng China ang isa sa pinakamabilis ang paglago sa mga developing economy sa buong mundo. Ito ang pinakamalaking exporter ng mga produkto at serbisyo sa mga first world countries tulad ng Amerika at patuloy din ang pagdami ng foreign direct investments nito. Kaya  tinatagurian ngayon na “next most powerful economy of the world” ang bansang minsan nang tinaguriang “sleeping giant.”

Kasabay ng paglago ng ekonomiya ng China ay ang paglakas din ng kakayahang militar, na siyang ipinapakita sa pambu-bully at pag-angkin sa mga bahagi ng South China Sea na sakop ng teritoryo ng iba’t-ibang mga bansa sa Southeast Asia, tulad ng Malaysia, Indonesia, Vietnam, at Pilipinas.

Bagama’t nakamit ng Pilipinas ang landmark victory sa international tribunal noong 2016, kung saan idineklara ng korte na hindi valid ang nine-dash line claim ng China na batayan nito sa pag-angkin sa West Philippine Sea at sa mga yamang taglay nito, naging agresibo pa rin ang China sa militarisasyon doon— bagay na lubhang nakaapekto sa kabuhayan ng maraming lokal na mangingisda, na napaulat na itinataboy at hina-harass ng Chinese navy.

Tila bantulot din ang Duterte administration sa pagsusulong ng karapatan ng Pinas sa pinagtatalunang teritoryo, sa katwirang umiiwas ito sa pagkakaroon ng giyera laban sa China, na itinuturing ni Pangulong Duterte bilang “kaibigan.” Ito ay sa kabila ng paninindigan at mga hakbang ng mga karatig bansa natin kontra sa pambu-bully ng China. Kamakailan nga ay pumasok sa isang kasunduan ang Vietnam at Japan para isulong ang kanilang seguridad sa pinagtatalunang teritoryo.

Ang pagtatayo ng base militar ng China sa South China Sea ay di lamang nakakaapekto sa Pilipinas kundi maging sa iba pang mga bansa dahil nililimitahan nito ang kalayaan sa paglalayag sa naturang rehiyon.

Nakatakdang magsagawa ng military exercise sa South China Sea ang U.S. Navy para isulong ang freedom of navigation. Nguni’t di ito lalahukan ng Pilipinas.

 

SINDAKAN SA KARAGATAN

Sa ilalim ng administrasyon ni President Donald Trump, minabuting paigtingin ng US ang military activities nito sa South China Sea sa pamamagitan ng pagpapalipad ng B-52s na may kakayahang maglulan ng nuclear weapons. Ipinahihiwatig lang ng Amerika sa China na walang kaduda-duda na sila pa rin ang pinaka makapangyarihang bansa sa buong mundo, at pagtulong din sa mga kaalyado nito sa Asya.

At kamakailan ay umigting pa ang tensyon sa pagitan ng dalawang bansa nang muntik nang magka-banggaan sa bandang Graven Reef ang isang Chinese destroyer at ang USS Decatur, na nagsasagawa ng freedom of navigation operation.

Ikinagalit ng China ang insidente at tinawag na “provocative.” Kaya naman nagbitaw ng pahayag ang isang Chinese air force spokesman na naglagay na sila ng nuclear-capable bombers sa Woody Island para palakasin ang kanilang kakayahan na makapagsagawa ng air strikes sa lahat ng direksyon, “as well as preparation for the battle for the South China Sea.”

Tugon naman ni US Vice-President Mike Pence, hindi pasisindak ang Amerika, kasabay ang pagmamatigas, tuloy pa rin ang pagpapararamdam ng pwersa ng US sa pinagtatalunang karagatan.

“Despite such reckless harassment, the United States Navy will continue to fly, sail and operate wherever international law allows and our national interests demand. We will not be intimidated. We will not stand down,” pahayag ni Pence.

Bukod sa di-pagkakasundo sa South China Sea, mayroong umiiral na trade war sa pagitan ng US at China, kung saan nagpataw ng mga tariff sa kanilang palitan ng mga produkto. Bahagi umano ito ng kampanya ni Trump sa paglutas sa “longtime abuse of the broken international system and unfair practices” ng China.

DUTERTE, KUMABIG SA CHINA

Sa gitna ng giriang ito ng dalawang makapangyarihang bansa, ipinahayag ni Pangulong Rodrigo Roa Duterte na hindi lalahok ang Pilipinas sa isasagawang military exercises ng US sa South China Sea, na sasabay ang naturang naval drills sa pagbisita ni Chinese President Xi Jinping sa Maynila sa Nobyembre.

“The President said that we will not take part in that military exercise,” pahayag ng Malakanyang.

Ayon sa report, nakatakdang magsagawa ang US Navy Pacific Fleet ng military exercises sa South China Sea at dadalhin nito ang mga barko at eroplanong pandigma nito sa bahagi ng Taiwan Strait, na malapit sa teritoryo ng China, upang isulong ang right of free passage in international waters.”

Sa kabila nito, para sa ilang eksperto, ang girian ng US at China ay hindi lamang tungkol sa usapin ng “freedom of navigation” at militarisasyon ng China sa mga pinagtatalunang teritoryo.  Ito ay bahagi ng tunggalian ng isang nagpataw ng mga tariff laban sa most powerful nation in the world na may kinalaman sa pulitika, economiya, kultura, at imahe. Isa itong labanan para sa kontrol sa nasabing rehiyon, alinsunod sa kani-kaniyang interes, kung saan ang mananalo ay magkakaroon ng mas malaking impluwensya sa maraming bansa sa mundo.

Mga librong Harry Potter, paborito pa rin ng mga mambabasa

MAY-AKDA na si J.K. Rowling kasama sina Emma Watson (Hermione Granger), Daniel Radcliffe (Harry Potter), Rupert Grint (Ron Weasley).

Ni: Kristine Joy Labadan

NAKAMIT ng serye ng Harry Potter ang isang malaking tagumpay ngayong taon sa pagtatala ng mahigit 500 milyong libro na naibenta sa buong mundo at naisalin sa 80 lengguwahe.

TUNAY NA BIDA – JOANNE KATHLEEN ROWLING

Maraming taon na ang nakalipas mula nang mangarap ang isang babaeng manunulat, si Joanne Kathleen Rowling, na bumuo ng kwento tungkol sa isang batang salamangkero.

Sakay ng tren na byaheng London patungong Manchester at kapos sa salapi, isinulat kamay niya ang manuskripto sa ilang kapehan sa Edinburgh habang kasama ang anak na sanggol. Natapos niya ito noong 1995.

Matapos makatanggap ng maraming pagtanggi na ilathala ang kanyang kwento, ang Bloomsbury ang  tumanggap nito at nag-imprinta ng 500 na kopya noong Hunyo 26, 1997.

Matapos noo’y naging mistulang mahika ang naging buhay ng libro at ng awtor nito. Ang ungang libro, ang Harry Potter and the Philosopher’s Stone, ay nasundan pa ng anim hanggang sa umabot ng 500 milyong kopya ng serye ang bumenta sa buong mundo.

May 20 taon na ang nakakalipas mula nang madiskubre, ng mga mambabasa sa buong mundo ang daigdig ng mahika ni Harry Potter na isinulat ni JK Rowling. May 500 milyong kopya na ng serye ang naibenta mula noon. Ibig sabihin nito’y isa sa bawat labinlimang tao sa buong mundo ang nagma-may ari ng Harry Potter na libro. Bukod sa pitong naunang libro sa serye, mayroon pang tatlong kaugnay na librong sumunod na naimprenta at may bersyon din na e-books. Naisalin din sa anim na pelikula ang serye.

 

DALAWANG personalidad na nagkwento ng Harry Potter audiobooks, sina Jim Dale (kanan) at Stephen Fry (kaliwa)

 

SIMULA NG MAHIKA

Bukod sa 80 na lengguwahe, patuloy pa ang pagsalin ng serye sa iba pang lengguwahe tulad ng Albanian, Azerbaijani at Hebrew sa patuloy pagbukas sa maraming pang mambabasa ng mundo ni Harry Potter.

Sa katunayan, ang pitong libro ng serye ay naglalaman ng higit kumulang na isang milyong mga salita — 1,100,086 bilang tiyak na numero — kasama na ang mga inimbentong salita mismo ng manunulat tulad ng “muggle” at “Quidditch,” na pumapasok na rin sa pang araw-araw na lengguwahe.

Sa kabila ng pagiging hindi makatotohanang mundo ng Hogwarts na laging mananatili sa ating mga imahinasyon, ang mga karakter sa libro ay nakararanas naman ng mga pagsubok na hango sa totoong buhay— ang pangungulila, pagkalungkot, pag-uusig, selos, hindi nasusukliang pagmamahal, pagkakasala, pagka-api, atbp.

Isa na sa dahilan ng tagumpay ng serye ay kung paano umuunlad ang mga karakter sa kabila ng kumplikadong karanasang pinagdadaanan ng mga ito na sumasabay rin sa pagsibol ng kaisipan ng mga mambabasa. Gayunman, ang mga pakiwari at impresyon sa unang pagkakakilala sa mga karakter ay masusubukan ng mga pangyayari at rebelasyon sa libro.

 

PAGTATANGHAL ng mga Harry Potter na libro mula sa internasyonal na British Library exhibition Harry Potter: A History of Magic.

 

IBA PANG TAMPOK NA BERSYON

Hindi rin naman surpresa sa lahat na ang mismong unang libro sa serye ng Harry Potter na pinamagatang Harry Potter and the Philosopher’s Stone ang pinakamabentang libro sa pito. sa kabilang banda, Harry Potter and the Deathly Hallows, ang pang-pitong libro sa serye, ang pinakamabilis na libro ng piksyon na naibenta sa lahat.

Hindi lamang ang mga libro at eBooks na Harry Potter ang dinudumog ng mga tao kundi pati ang audiobooks ay marami ring tagpakinig. Ilan sa mga kilalang personalidad na may talento sa pagbibigay boses ng kwento ng Harry Potter ay sina Jim Dale at Stephen Fry. Kung itatangi ang audiobooks, higit apat na milyong minuto ng Harry Potter na ang nakonsumo sa kabuuan nito mula taong 2016.

Sa kabila ng naabot nang tagumpay ay hindi pa nagtatapos ang patuloy na paglago ng libro sa larangan ng paglalathala ng mga bagong saling mga libro sa iba’t-ibang lengguwahe, mga edisyon na maaaring kolektahin, bagong sining sa mga gamit at damit, at kahit mga dibuho ng mga sikat na artista na ipinapakita sa atin ang ating mga paboritong karakter sa kamangha-manghang mga anggulo.

PAGDIRIWANG KASAMA ANG MAHIKA

Kaugnay naman ng paggunita ng ika-dalawampung kaarawan ng libro sa US, ang unang libro ng Harry Potter ay magkakaroon ng panibagong paglalakbay ngayong taon katulong ang Scholastic at Pottermore sa paghahanda ng malaking anibersaryo kaugnay ang mga tindahan ng aklat, mga silid-aklatan, eskuwelahan, kasiyahan, at pag-komisyon sa kilalang magaling na artistang si Brian Selznick bilang lilikha ng bagong pabalat ng libro.

Ilan sa mga kaganapan ngayong 2018 para sa pagbubunyi ng libro ay ang tampok na palabas sa Broadway na Harry Potter and the Cursed Child na gaganapin ngayong tagsibol, ang ng paglunsad ng eksibisyon na Harry Potter: A History of Magic na matatagpuan sa New-York Historical Society ngayong Oktubre.

Hindi rin dapat kaligtaan na kaugnay ng lahat ng ito’y ipapalabas na sa mga sinehan ang ikalawang pelikula ng Fantastic Beasts ngayong Nobyembre na may titulong Fantastic Beasts: The Crimes of Grindelwald.

Pagpapatunay lamang kung sabihin na matapos ang 20 taon at 500 na mga libro, nagagawa pa rin tayong paglakbayin ng Harry Potter sa ibang uniberso sa pamamagitan ng mga pahina nito. Ito ang mga dahilan kung bakit habambuhay natin ‘tong babasahin at patuloy na ipapasa pa sa mga susunod na henerasyon.

Benham Rise, Tagong Yaman Sa Pilipinas Na Pinag-aaralan Ng Pinoy

Ni: Kristin Mariano

UMALMA ang maraming Pilipino sa pagpayag ng administrasyong Duterte sa mga Chinese researchers na magsagawa ng pagsasaliksik sa Benham Rise sa karagatang Pasipiko malapit sa lalawigan ng Isabela. 250 kilometro lamang ang layo ng Benham Rise sa Pilipinas at nasa ilalim ito ng Exclusive Economic Zone ng bansa. Ang pagkadismaya ng mga Pinoy ay nag-ugat sa pag-angkin ng China sa mga isla at karagatan sa West Philippine Sea. Ang Benham Rise ay nasa silangang bahagi ng Pilipinas at higit na mas malayo sa China.

Tila pinagnanasaan ng China ang Benham Rise na hitik sa yamang dagat at mineral. Sinasabing mayaman ang Benham Rise hindi lamang sa isda pati na rin sa natural gas na maaaring pagkunan ng enerhiya. Hinala ng marami na ito ang habol ng China sa paggalugad sa lugar na nangangailangan ng resources para suportahan ang bilyon-bilyon nitong residente.

Dapat ba natin itong ikabahala? Nakasaad sa Saligang Batas ng Pilipinas na dapat protektahan ng gobyerno ang teritoryo ng bansa. Ayon kay Roilo Golez, dating National Security Adviser, ang pagpayag sa Tsina na pasukin ang lugar ay maaaring pagpapahayag ng kanilang presensya sa Pasipiko na dinodomina ng US at Japan. Dagdag pa ni Goilez na naghahanap ang China ng “thermocline,” lugar sa ilalim ng dagat kung saan biglang nagbabago ang temperatura at kung saan nakakagalaw ang mga submarine.

Mahigpit na kalaban ng Pilipinas ang China sapagkat iginigiit ng China ang kanilang nine dash line na argumento sa pinag-aawayang West Philippine Sea. Kabilang sa inaangkin ng China ang ilan sa mga isla sa Spratlys, at madalas narin mamamataan ang mga barko ng Chinese sa karagatan sa kanlurang bahagi ng Pilipinas.

Anong meron sa Benham Rise?

Natuklasan ng DENR na may malaking deposito ng methane hydrates o tinatawag din na methane ice sa Benham Rise. Sinasabing maaaring magpayaman sa bansa ang mga depositong ito bilang natural gas exporter. Ang natural gas ay ginagamit para mag-produce ng enerhiya. Ang eksatong laki ng deposito sa Benham Rise ay hindi pa nasusukat hanggang ngayon dahil sa sinabi ng Department of Agriculture na mas makabubuting huwag nang magsagawa ng oil exploration sa Philippine Rise at sa halip ay ireserba ang yamang-tubig nito para sa seguridad sa pagkain ng Pilipinas.

Napakalawak ng mga lugar na pangisdaan sa Philippine Rise, kaya hindi dapat na makapanghimasok ang mga dayuhan sa napakayamang pangisdaan na sakop ng ating territorial waters. Ang mga Pilipinong angler ay tiniyak na maraming blue marlin, sailfish at iba pang malalaking isda na nahuhuli sa bingwit sa Philippine Rise.

Sa Pilipinas Ba Ang Benham Rise?

Ipinahayag ni Presidential Spokesman Harry Roque na hindi pag-aari ng Pilipinas ang Benham Rise. Kung tutuusin, may sovereign rights ang Pilipinas sa Benham Rise. Ang sovereign rights ay pinapayagan ang eksplorasyon, paggalugad, at pamamahala sa mga likas na yaman. Noong nakaraang taon, pinangalanan ang Benham Rise na Philippine Rise at idineklara ng United Nations noong 2012 na extension ito ng Pilipinas.

Ikinagulat din ng mga netizen ang sinabi ng palasyo na walang kakayahan ang Pilipinas at mga Pilipino na magsagawa ng pananaliksik sa Philippine Rise. Samantala, ilang taon ng pinag-aaralan ng mga Pilipinong eksperto ang lugar at mga yaman nito na maaaring magpayaman sa Pilipinas:

  1. Mula 2004-2008 at noong 2010, nagpadala ang National Mapping and Resource Information Authority ng DENR ng hydrographer na gumawa ng 3D digital bathymetric model ng buong rehiyon.
  2. Sa nakalipas na isang dekada, DA’s Bureau of FIsheries and Aquatic Resources ay nagsasagawa ng pananaliksik sa mga isda at mga ekspidisyon sa Benham Rise upang alamin ang mga potensyal ng katubigan at mga bagong species na naninirahan sa lugar.
  3. Noong 2014 at 2016, nag-organisa ang DOST, na sinuportahan ng DA-BFAR at sa partisipasyon ng University of the Philippines, De la Salle University, Silliman University at iba pang mga unibersidad, ng dalawang oceanographic research cruises sa Benham Bank – ang pinakamababaw na parte ng Benham Rise. Ang ikatlong cruise ay nakatakdang ganapin ngayong taon. Ang cruise ay binubuo ng mga scientists, marine science students, Navy and Coast Guard technical divers, and mariners. Sinuportahan ito ng Oceana, isang NGO na nagtataguyod ng konserbasyon ng marine resources sa pamamagitan ng pagpapahiram ng mga gamit at pagpapadala ng mga scientists at technical divers.
  4. Pinag-aaralan din ng UP National Institute for Geological Sciences and UP Marine Science Institute ang mga samples at observations na nakukuha mula sa mga nakaraang research.
  5. Sa pagtatangka na protektahan at pamahalaan ang Philippine Rise, ibinalita ng PINAS na may planong magtayo ng naval base sa Casiguran, Aurora malapit sa lugar upang magpatrolya sa mga nais manamantala

Ilan lamang ito sa mga proyekto ng pamahalaan at pribadong sektor sa patuloy na pagsasaliksik at paglinang ng Benham Rise. Marami pang mga nakalatag na proyekto para sa Philippine Rise ang mga Pinoy. Isang tanong ang mananatili, magiging hadlang ba ang pagpasok ng Chinese researchers sa mga planong ito?

McDonald’s sa China, papalitan ng pangalan

Ni: Jomar M. San Antonio

“GOLDEN Arches”—yan ang bagong pangalan ng US fast food giant na McDonald’s Corporation sa mga papeles nito sa mga sangay nito sa China at Hong Kong. Ayon sa Mcdo, papalitan lamang ng firm ang pangalan nito mula sa McDonald’s patungo sa Golden Arches (China) Co Ltd. matapos ibenta ng chain ang Chinese and Hong Kong businesses nito sa CITIC Ltd. at Carlyle Group.

“It will still be clearly ‘McDonald‘s’ when diners come to our stores,” ayon sa isang microblog ng Chinese counterpart nito. Dagdag pa nila, balak doblehin ng firm ang bilang ng mga sangay nito sa mainland China hanggang 4,500 sa taong 2022.

“Our restaurant name will remain the same, the change is only at business license level,” ika ng Chinese chain spokesperson Regina Hui sa isang pahayag.

Ang 52% ng McDonald’s sa China at Hong Kong ay pag-aari na ngayon ng CITIC Ltd., samantalang 28% naman ang hawak ng Carlyle. Tanging 20% na lamang ng shares ang hawak ng McDonald’s US.

 

Ang pagbabago ng pangalang ito ay bahagi ng pagpapaunlad ng kumpanya sa serbisyo nito sa China kasabay ng pagpapalaki at pagpapalawak pa ng negosyo. Lalo pa kasing lumalakas ang fast food chain sa Canada, Britain, at China.

Sa US vs North Korea: Apektado ba ang Pinas?

Ni: Kristian Mariano

DAPAT nga bang ikabahala ng mga Pilipino kung totohanin ng North Korea ang banta nito na tirahin ang Estados Unidos? Naging mainit na usap-usapan ang palitan ng banta ni US President Donald Trump at North Korean leader Kim Jong Un noong Agosto na ikinabahala ng ilang mga Pilipino dahil sa posibilidad na madamay ang Pilipinas sa nakaambang giyera ng dalawang nasyon.

Nagsimula ito ng magpahayag si Donald Trump ng “Fire and fury like the world has never seen” sa kalagitnaan ng missile launch test sa Pyongyang. Sumagot ang North Korea ng banta na pasasabugin ang Guam na teritoryo ng US sa western Pacific.

Ang US at Japan ay may missile defense systems sa Asia Pacific bilang depensa sa North Korea. Maihahalintulad ang kasalukoyang sitwasyon sa Cuban Missile Crisis – paghaharap sa pagitan ng US at Soviet Union noong 1962 dahil sa pagkakaroon ng nuclear weapons sa Cuba.

Samantala, kinondena rin ng Pilipinas ang missile tests ng North Korea. Tinawag ni President Rodrigo Duterte na “fool” at “son of a bitch” si Kim Jong Un noong Agosto 2 dahil sa missile tests. Tila naman nagbago ang ihip ng hangin ng i-welcome ng pangulo ang North Korean Foreign Minister na si Ri Yong-Ho noong Agosto 8. Sinabi ni PRRD kay Ri na “We would be a good dialogue partner.” Ipinahayag ng Pilipinas na bukas tayo sa North Korea.

Sa kasalukuyan, ilang araw ng hindi nagsalita sa publiko si Pangulong Trump hinggil sa NoKor at mas pinili nitong tumuon sa health care policy ng bansa. Dati ng sinabi ni Trump na kapag mabigo ang pagtangkang mapatigil si Kim Jong-un sa programa nito sa nukleyar sa diplomatikong paraan, mapipilitan umano ang pangulo ng Amerika na mamagitan gamit ang militar.

Paano maaapektuhan ang Pilipinas

May posibilidad na madamay ang Pilipinas kung sakaling humantong sa all-out war ang gulo sa pagitan ng US at North Korea. Ayon kay Prof. Lucio Pitlo III, consultant sa UP Korea Research Center, walang matibay na relasyon ang Pilipinas sa North Korea or the Democratic People’s Republic of Korea (DPRK). Mas kilala ang bansa sa pagkakaroon ng magandang relasyon sa US at South Korea. Walang embahada ang North Korea sa bansa.

Ang pagkakaroon ng mga pasilidad ng Estados Unidos sa bansa ay tatak ng alyansa ng US at Pilipinas. Ang pagpapadala ng mga sundalo ng Amerika sa bansa upang magsanay ay maihahalintulad sa relasyon ng US at South Korea na kaaway ng North Korea.

Direktang maaapektuhan ang mga Pilipinong ngayon ay nagtatrabaho o naninirahan sa South Korea. Ayon sa Department of Foreign Affairs (DFA), may 65,000 na Pilipino ang naninirahan sa South Korea.

The lives of many Filipinos in [South] Korea, which is about 60,000 as of May 2017, are now in danger. If North Korea goes into an all-out war, then we will be greatly affected. Filipinos’ lives will be at risk. Mostly comprised of migrant workers, Filipinos will be forced to go home without finishing their contract and possibly go home jobless in the [Philippines],” ayon sa Korean Studies professor na si Michelle Palumbarit.

Pwersa ng NoKor vs RP

Makikita na malaki ang lamang ng North Korea sa Pilipinas pagdating sa budget at kagamitan pandigma dahil halos 20% ng kabuuang budget ng bansa ay nakalaan sa pangangailangang militar.

North Korea Philippines
Nuclear Weapons <10 warheads 0
Military Budget $15 billion $3 billion
Active personnel 1 190 000 125 000
Reserve personnel 600 000 131 000
Available for military 6 515 279 25 614 135
Tanks 6 000 0
Armoured fighting vehicles 4 000 672
Total artillery 13 000 323
Self-propelled artillery 4 500 0
Rocket artillery 5 000 0
Total aircraft 906 221
Fighter aircraft 349 2
Multirole aircraft 35 0
Attack aircraft 154 23
Helicopters 202 124
Total naval 525 132
Frigates 6 4
Corvettes 6 12
Submarines 75 0

Ayon sa: ArmedForces.eu

Ayon kay Mel Sta. Maria, Jr., dean ng Far Eastern Univeristy Institute of Law, maari din umanong madamay sa digmaan ang Pilipinas kung imbokahin ng Estados Unidos ang Mutual Defense Treaty (MDT)  at Enhaced Defense Cooperation Agreement (EDCA)  sa pagitan ng Pilipinas at ng naturang bansa.  Bagama’t wala umanong pwersa militar na maiaambag ang Pilipinas kung magkaroon nga ng digmaan sa pagitan ng US at North Korea, maari naman sa mga base militar ng Pilipinas magre-fuel ang mga warship at warplanes ng U.S.

Dahilan rito, may mga nangangamba na maaaring maging target ang Pilipinas ng NoKor.

Ngunit, ayon pa sa analista, kinikilala ng MDT na anumang suporta na idedeklara ng bansa ay kinakailangang umayon sa Philippine Constitution at sa UN Charter.

“In case a U.S public ship is attacked (in the Pacific), the Philippines must declare our support for US but the extent of support is subject to the Philippine Constitution and UN Charter. Support can very well be a public declaration of support without more,” paliwanag pa ni Sta. Maria.

Handa ba ang mga Pilipino sakaling lumala ang tensyon sa pagitan ng dalawang bansa? Hindi naman sumasagi sa isip ng ilang Pilipino ang nakaambang giyera sa pagitan ng North Korea at US. Ayon sa ilang Pilipino, mas dapat bigyan ng pansin ang mga lokal na isyu kaysa sa mga isyung panlabas.

Close Bitnami banner
Bitnami