PINAS

Ang Lihim ng Panginoon (Ikapitong Bahagi)

Sonspeak

Recent News:

Vick Aquino Tanes

Teknolohiya at social media, ok sa mental health

by

Makikita sa larawan ang pag-uusap ng dalawang magkasintahan sa pamamagitan ng social media na nakakatulong sa kanilang long distance relationship.

 

Vick Aquino Tanes

 

ALAM ninyo bang nakakahasa raw ng kaisipan at kalusugan ang responsableng paggamit ng social media at teknolohiya, ayon sa mga eksperto.

 

Ayon kay Dr. Bernard B. Argamosa, psychiatrist ng Department of Health-National Center for Mental Health, kung responsable lamang sa paggamit ng teknolohiya ay walang mangyayari dahil malaki ang naitutulong nito para sa lahat.

 

Dagdag pa nito, hindi lamang ang mga kabataan ang naaapektuhan ng maling paggamit ng social media kundi maging ang mga overseas Filipino workers (OFWs) na nakararanas ng depresyon.

 

“Ang technology ay nandiyan na, wala na tayong magagawa diyan. Kailangan lang ay gamitin ito ng responsable. Katulad sa paaralan na kung saan ay marami na ang nabu-bully at ginagamit pa ang social media para ipaalam sa madla ang kanilang ginawa,” paliwanag ni Argamosa.

 

“Maniwala kayo sa hindi, mayroon kaming nakikitang umuuwi na. Nasa 20 hanggang 30 OFW kada buwan mula pa sa Saudi Arabia o sa Middle East ang nakararanas ng psychotic symptoms na lubos na nakakaalarma,” dagdag pa nito.

 

Ang social media ay nakatutulong sa mga OFW na magkaroon ng komunikasyon sa kanilang mga pamilya.

 

“Basta may libreng internet lang may communication na pero saan nagkakaproblema? Kapag umuwi sila dito, kakain ang pamilya nang sabay-sabay pero hindi na sila nag-uusap kasi kaharap ang kaniya-kaniyang telepono, ayun ang negatibong epekto ng social media,” ayon sa doktor.

 

Base sa pag-aaral, nagkakaroon ng negative effect ang social media kapag hindi na nag-uusap ang mag-anak at nakatuon lahat sa kanilang hawak na cellphone, iyon ang nakasisira ng pamilya at social bonding na sana ay maiwasan.

 

Samantala, ayon kay Cel Gonzales, quality control director ng One Algon Place, isang rehabilitation center para sa may drug and alcohol addiction, nakakaapekto ang teknolohiya sa mga laro na nagiging addict dito ang isang manlalaro na naaapektuhan na ang kanyang mental health.

 

Naka-focus na umano ang mga kabataan ngayon sa paglalaro ng games na tulad ng mobile legends, clash of clans at iba pa na halos pinagpupuyatan na at maging ang kanilang oras para sa sarili at pamilya ay napapabayaan na.

Mag-asawang French inilunsad ang high-tech rice mill sa Leyte

by

 Vick Aquino Tanes

 

BUMIDA ang isang French national at kaniyang asawang Filipina sa bayan ng  Alang-Alang, Leyte matapos nilang ilunsad ang technologically advanced rice processing center.

 

Pinili ng mag-asawang Patrick Renucci, at Filipino wife niyang si Rachel na  mamuhay sa Alang-Alang noong 2015 kapalit ng maayos na pamumuhay sa Paris kung saan si Patrick ay nagmamay-ari ng isang printing press at si Rachel ay isang investment banker.

 

Ayon sa mag-asawa, isa lang ang kanilang hiling na makatulong sa mga nasalanta ng Bagyong Yolanda. Mula nang mabalitaan nila na lubos na naapektuhan ng bagyo ang Leyte ay kapwa sila nagdesisyon na tumulong sa mga nasalanta.

 

Nagkasundo ang mag-asawa na manirahan sa Leyte at magtayo ng negosyo para makatulong sa mga kababayang naapektuhan.

 

Naisip naman ng mag-asawa na maglaan ng isang negosyo na makakatulong sa mga kababayan sa pamamagitan ng rice production business na kung saan ay nagbibigay sila ng low-interest na pautang at naglalaan ng seeds sa mga para aa mga magsasaka.

 

Ayon kay Rachel, nakadiskubre sila ng isang well-kept secret na hindi alam ng nakararaming mga Pilipino. Ang Leyte ay isang top rice-producing region sa bansa na marami nang nakalaang post-harvest facilities, kaya naisipan nilang makatulong sa mga magsasaka na magkaroon ng teknolohiya at ibigay ang world-class rice sa mga Pinoy.

 

Inilunsad ng mag-asawa sa Alang-Alang ang  pinaka technologically advanced rice processing center sa Southeast Asia na ginagamitan teknolohiya para sa pagpapatuyo, pag-iimbak ng mga bigas na makatutulong sa mga magsasaka na makaani ng mas marami at tumaas ang kanilang kita.

 

Dahil sa kanilang pagsisikap na mapaunlad ang negosyo,  kinilala ito ni President Rodrigo Duterte at dumalo pa ito sa kanilang inauguration.  Nais rin ng Pangulo na gayahin sa iba pang lalawigan ang business model na itinatag ng mag-asawa.

 

“Really, I’d like to thank you from the bottom of my heart. And if we can work together, if you want to stay in the Philippines, and I said considering the amount that you have invested… I’m not that rich but I can give you another P1.5 billion to do your thing,” wika ni Pangulong Duterte.

 

Sa kabila ng kanilang naiambag na negosyo sa Leyte ay binigyan ng Pangulo ang mag-asawa ng Filipino citizenship at sinabing kuwalipikado si Patrick na maging miyembro ng gabinete na makatutulong sa usaping agrikultura

Bisa ng iba’t ibang klase ng sibuyas

by

sibuyas

Vick Aquino Tanes

ALAM ba ninyo na maraming klase ng sibuyas. Kadalasan itong inilalahok sa pagluluto, inilalagay sa sawsawan at ginagamit bilang herbal therapy para sa iba’t ibang klaseng sakit. Gamit din ang balat ng sibuyas bilang pampakulay, pantanggal ng amoy, pampaalis ng mga insekto, at pampakintab ng metal.

Ang sibuyas ay nagmula sa Asya at Middle East kaya naman popular ang sibuyas sa mga Arabo, Bumbay at iba pa. Ang iba naman ay sinasamba ang sibuyas na para bang ito ang nagbibigay sa kanila ng buhay na walang hanggan. Inilalagay ang sibuyas sa mga libingan ng mga hari ng Ehipto na namatay na sa paniniwalang ang mga ito ay aakay sa kanila sa kabilang buhay.

Ang sibuyas ay mayaman sa sulphur, na siyang dahilan kung bakit ito ay may matapang na amoy at nakakapagpagaling. May taglay din silang flavonoid partikular ang Quercetin na mahusay na antioxidant. Ito ay mayaman din sa mga bitamina tulad ng B6, C, biotin, K, folic acid, chromium, calcium at fiber.

Mas maraming bitaminang makukuha mula sa sibuyas kapag kinakain ito ng hilaw at kapag hindi ito hinihiwa o hinuhugasan sa tubig dahil napapanatiling buo ang bitamina at mineral nitong taglay. Subalit, ang lutong sibuyas ay may taglay pa ring bitamina na nakakatulong sa ating kalusugan.

Ang sibuyas ay mabisang pampurga, pwedeng maging antibiotic at mayroon antiseptikong taglay. Nakakaalis ng sakit, pamamaga at pangingirot.

Puwede rin itong maging diuretic, nakakatulong sa ating digestive system, fungicidal, tonic at stimulant. Nakakapagpababa ng kolesterol at triglycerides, nagpapababa ng high blood pressure, at nababawasan ang panganib na magkaroon ng sakit sa puso at stroke.

Ang sibuyas ay nakakatulong din sa pag-iwas ng pagkakaroon ng tumor at iba pang klase ng kanser. Maiwasan ang gastric ulcer, indigestion o hindi pagkatunaw ng kinain, pagkakaroon ng kabag o hangin sa sikmura.

Nakakatulong din ito upang maging maginhawa ang pakiramdam sa panahong may trangkaso, ubo, sipon, bronchitis at nagtatanggal din ng plema.

Isang anti-allergenic, nagpapababa ang sibuyas ng sugar level, nagpapanatili ng malakas na buto, nagpipigil upang magkaroon ng anemia, pagkabulok ng ngipin at impeksiyon sa bibig.

Ang sibuyas ay may iba’t ibang uri tulad ng:

Yellow Onions.  Ito ang uri ng sibuyas na matamis ang lasa at golden color ang balat at pale yellow naman ang kulay ng laman. Ito ang madalas na ginagamit sa pagluluto dahil sa tamis ng lasa nito at ito rin ang mahusay na gamitin lalo na kapag gumagawa ng onion soup. Ang ganitong klase ng sibuyas ay lalong tumatamis habang nagtatagal na niluluto.

Red Onions. Ang sibuyuas na pula ang tinatawag nilang maanghang na sibuyas. Ang kulay nito ay pula sa labas at medyo mapulang maputi sa loob. Hindi ito pwedeng itago nang matagal. Ginagamit ito sa sariwang gulay bilang salad at sa mga sandwiches at minsan ay ginagamit din sa pagluluto.

White Onions. Ang mga ganitong klase naman ng sibuyas ay kulay puti sa labas at puti rin sa loob. Ito ang pinaka-suwabe sa lahat at maaari itong kainin ng hilaw o luto. Ginagamit ito ng madalas ng mga Mehikano sa pagluluto.

Green Onions/Spring Onions. Ang green onions ay tinatawag nilang sibuyas na mura na pwedeng kaining hilaw. Maaari itong gawing palamuti at pampalasa sa lugaw, mami at iba pa.

 

Paano iwasan ang stiff neck?

by

VICK AQUINO TANES

HINDI maigalaw na leeg? Stiff neck iyan o pananakit ng leeg, tiyak na naipitan ng ugat o nangalay ang leeg. Nakakabalisa kapag may nararamdaman na hindi maganda ang isang tao lalo na kung katawan nya ay apektado na.

 

Sa una ay hindi mo napapansin ang pangangalay ng leeg ngunit hindi ito dapat ipinagbabale-wala dahil ang leeg ay malapit sa ulo at puso. Upang maiwasan ang pananakit ng leeg, kailangan sundin ang mga nararapat na hakbang upang makaiwas sa stiff neck:

  1. Panatilihing tama ang pustura sa pagtindig, pag-upo at sa paghiga.
  2. Regular na mag-ehersisyo.
  3. Gumamit ng unan na may tamang taas kapag natutulog.
  4. Siguraduhing nakahiga nang maayos na pahilata kapag matutulog. At hanggat maaari, umiwas na matulog na nakaupo.
  5. Iwasan ang maling paraan ng pag-upo o ang mala-kuba na posisyon.
  6. Ilagay sa tamang lebel ang telebisyon o computer. Dapat ay kapantay lamang ito ng mata.
  7. Siguraduhing nasa tamang ayos ang backpack na dala.
  8. Isaayos din ang upuan ng mga sasakyan.
  9. Kung pupulot ng mabigat na bagay mula sa sahig, baluktutin ang tuhod imbes na likod.
  10. Magkaroon ng sapat na pahinga.
  11. Umiwas sa stress.

Kutis porselana na swak sa budget

by

MAAARING makamit ang porselanang kutis gamit ang banana facial mask.

 

Ni: Vick Aquino Tanes 

ALAM n’yo bang maaaring makamit ang kutis porselana sa murang halaga. Hindi na kailangan pang pumunta sa mga derma clinic para magpaganda dahil mayroon puedeng gamitin para rito na makikita sa loob ng bahay at menos gastos pa.

Siguradong swak sa budget at tiyak pang ligtas dahil natural ingredients ang taglay nito na nakapagpapaganda, nakapagpapaputi at nakakapagpakinis ng kutis gaya ng mga sumusunod:

  1. Banana facial mask. Maaaring gamitin ang saging bilang natural at gawa sa bahay na facial mask at moisturizer. Garantisadong nagpapaputi at nagpapabata ito. Kumuha ng isang katamtamang laki ng saging, durugin ito para maging isang paste at ilagay ito sa mukha at sa leeg. Hayaan ito sa mukha at leeg ng 10 hanggang 20 minuto at banlawan ng malamig na tubig.
  2. Oatmeal facial mask. Maghanda ka ng oatmeal facial mask sa pamamagitan ng paghalo ng ½ tasa ng mainit na tubig pero siguraduhing hindi kumukulo, at 1/3 tasa ng oatmeal. Pagkalipas ng dalawa o tatlong minuto, haluan ito ng 2 kutsarang yogurt, 2 kutsarang honey at isang maliit na itlog (kunin lamang ang puti). Lagyan ang mukha ng manipis na mask at hayaan ito sa loob ng 10 hanggang 15 minuto. Ban­lawan gamit ang maligamgam na tubig.
  3. Gatas facial mask. Gumawa ng facial mask gamit ang ¼ tasa ng gatas na powder na may sapat na tubig para makagawa ng makapal na paste. Lagyan ang mukha hanggang sa matakpan ang balat. Hayaang matuyo ang mask at banlawan ng maligamgam na tubig. Mararamdaman mo na mas maputi at bumata ang iyong mukha pagkatapos.
  4. Egg facial mask. Mabisa namang pangpasariwa ng balat ang itlog. Kung tuyo ang balat mo, ihiwalay ang puti at batihin ang pula ng itlog. Kung oily naman ang balat mo, kunin ang puti ng itlog at haluan ng ka­lamansi at honey. Para sa normal na balat, puwede mong gamitin ang buong itlog, batihin, ilagay sa mukha at magrelax. Maghintay ng 30 minuto at banlawan.
  5. Mayonnaise facial masks. Ipahid ang mayonnaise sa mukha hanggang matakpan ang lahat ng balat sa mukha at iwanan ito ng 20 minuto. Punasan at banlawan ng malamig na tubig. Mararamdaman mong kuminis at pumuti ang mukha mo.
  6. Kalamansi facial mask. Natural na nakapagpapaputi ang kalamansi, Gumawa ng facial mask sa pamamagitan ng paghalo ng katas ng kalamansi sa ¼ tasang olive oil. Ipahid ito sa mukha at hayaan ng 10 hanggang 20 minuto at banlawan.
  7. Yogurt facial mask. Para linisin ang mukha at paliitin ang mga pores o butas ng balat, maglagay ng yogurt sa mukha at iwanan ito ng 20 minuto. Para gumawa ng facial mask, maghalo ng isang kutsarang yogurt at katas ng kalamansi at isang kutsarang gulaman ng aloe vera. Ilagay ito sa mukha at banlawan pagkalipas ng limang minuto.
  8. Vinegar facial mask. Pagkatapos maghilamos, maghalo ng 1 kutsarang apple cider vinegar at 2 baso ng tubig para linisin ang iyong balat.

SUBUKAN ang otameal facial mask upang maging makinis ang iyong mukha.

 

Puwede ring gumawa ng facial mask gamit ang ¼ baso ng apple cider vinegar at ¼ baso ng tubig. Marahan itong ipahid sa mukha at hayaang matuyo.

 

Ingat sa mga pagkain pang Media Noche

by

MALINAMNAM na processed foods.

 

Ni: Vick Aquino Tanes

BAGONG taon. Asahan na maraming pagkain ang nakahain ngayon sa mesa bilang pagsalubong sa bagong taon.

May putaheng hamon, bacon, hotdogs at iba pang processed foods na tulad ng tocino at longanisa. Alam n’yo bang nakasasama ito sa katawan. Ang pagkain ng processed meat ay may malaking sintomas ng pagkakaroon ng cancer, heart disease at diabetes.

Base sa pag-aaral ng mga researchers ng Harvard School of Public Health, nasa mahigit 110,000 katao ang kumain ng ilang piraso ng bacon o isang hot dog sa isang araw ay tumaas ang kanilang mortality rate ng 20 percent sa loob ng 20-taon.

Ang isang maliit o three-ounce serving of red meat sa loob ng isang araw ay nagpapataas ng mortality rate ng 13 percent o dili kaya ay mataas ang tsansang maagang mamatay dahil sa pagkakaroon ng mga sakit.

Kasabay nito ang pag-aaral sa pagkain ng karne ng manok o gulay bilang kapalit ng processed foods. Ikinagulat ng mga researchers ang malaki ang kaibahan nito dahil mababa lamang ang naging tsansa ng kanilang mortality rate dahil ang pagpili sa pagkain ng karne ng manok kumpara sa procesed foods ay mas tumatagal ang buhay dahil mababa lamang sa cholesterol at fats ang manok.

Base pa sa pag-aaral, tinutukan nila ang pagkonsumo ng red meat, lalo na ang processed meat na base sa kanilang pag-aaral ay premature death ang kahahantungan nito. Ngunit ang pagpili ng mas masustansyang klase ng protina kapalit ng red meat ay nakapagpapababa ng tinatawag na chronic disease morbidity at ang maagang kamatayan.

Hindi naman po nakasasama ang pagkain ng processed foods basta limitado lamang sana ang pagkain at mas mainam na mas tangkilikin na lamang ang mga pagkain na sariwa.

Close Bitnami banner
Bitnami